Seksyon 94
Rebelasyon nga ginhatag paagi kay Joseph Smith nga Propeta sa Kirtland, Ohio sang ika-2 sang Agosto 1833. Sanday Hyrum Smith, Reynolds Cahoon, kag Jared Carter ginpili bilang komite sa pagpatukod sang mga bilding para sa Simbahan.
1–9, Ang Ginuo nagahatag sang kasugoan parte sa pagpatukod sing isa ka balay para sa buluhaton sang Pangulohan; 10–12, Isa ka balay-imprinta ang dapat itukod; 13–17, Pat-od nga mga panublion ginhatag.
1 Kag sa liwat, sa pagkamatuod ginasiling ko sa inyo, mga abyan ko, isa ka kasugoan ang ginahatag ko sa inyo nga sugdan ninyo ang buluhaton sang pagplano kag paghanda sang panugod kag pundasyon sang siyudad sang estaka sang Sion diri sa duta sang Kirtland, sumugod sa akon balay.
2 Kag tan-awa, dapat ini himuon suno sa sulundan nga ginhatag ko sa inyo.
3 Kag ipakonsagrar ang una nga lote sa sur sa akon para sa pagpatukod sing isa ka balay para sa pangulohan, para sa buluhaton sang pangulohan sa pagbaton sang mga rebelasyon; kag para sa buluhaton sang pag-alagad sang pangulohan sa tanan nga butang parte sa simbahan kag ginharian.
4 Sa pagkamatuod ginasiling ko sa inyo nga itukod ini nga may kasangkaron nga singkwenta’y singko pie kag kalabaon nga sisenta’y singko pie sa nasulod nga bahin.
5 Kag may yara sang naidalom nga panalgan kag naibabaw nga panalgan suno sa sulundan nga ihatag sa inyo pagkatapos sini.
6 Kag idedikar ini sa Ginuo halin sa pundasyon sini suno sa paagi sang pagkapari, suno sa sulundan nga ihatag sa inyo pagkatapos sini.
7 Kag lubos ini nga idedikar sa Ginuo para sa buluhaton sang pangulohan.
8 Kag indi ninyo pagtugoti ang bisan ano nga mahigko nga butang nga magsulod diri; kag ang akon himaya mangin yara dira, kag ang akon presensya mangin yara dira.
9 Apang kon may magsulod diri nga bisan ano nga mahigko nga butang, ang akon himaya mangin wala dira; kag ang akon presensya mangin wala sa sini.
10 Kag sa liwat, sa pagkamatuod ginasiling ko sa inyo, idedikar ang ika-duha nga lote sa sur sa akon para sa pagpatukod sang balay para sa akon, para sa buluhaton sang pag-imprinta sang linubad sang akon balaan nga mga kasulatan, kag tanan nga butang nga isugo ko sa inyo.
11 Kag ini may kasangkaron nga singkwenta’y singko pie kag kalabaon nga sisenta’y singko pie sa nasulod nga bahin; kag may yara sang naidalom kag naibabaw nga panalgan.
12 Kag ining balay lubos nga idedikar sa Ginuo halin sa pundasyon sini para sa buluhaton sang pag-imprinta, parte sa tanan nga butang nga isugo ko sa inyo, nga mangin balaan, wala’y higko, suno sa sulundan nga igahatag sa inyo.
13 Kag sa ika-tatlo nga lote pagabatonon sang akon alagad nga si Hyrum Smith ang iya panublion.
14 Kag sa una kag ika-duha nga mga lote sa norte pagabatonon sang akon mga alagad nga sanday Reynolds Cahoon kag Jared Carter ang ila mga panublion—
15 Agud nga mahimo nila ang buluhaton nga ginhatag ko sa ila nga mangin isa ka komite nga magpatukod sang akon mga balay suno sa kasugoan nga ako, nga Ginuong Dios, ang naghatag sa inyo.
16 Indi pag-ipatukod ining duha ka balay tubtob nga maghatag ako sa inyo sing isa ka kasugoan parte sa mga ini.
17 Kag karon wala na ako sing ipahayag pa sa inyo sa sini nga tion. Amen.