Seksyon 83
Rebelasyon nga ginhatag paagi kay Joseph Smith nga Propeta sa Independence, Missouri sang ika-30 sang Abril 1832. Ini nga rebelasyon ginbaton samtang ang Propeta yara sa isa ka miting upod sang iya mga kauturan sa Simbahan.
1–4, Ang mga babayi kag mga kabataan may kinamatarong sa pagbaton halin sa ila mga bana kag mga amay para sa ila suporta; 5–6, Ang mga balo kag mga ilo may kinamatarong sa pagbaton halin sa Simbahan para sa ila suporta.
1 Sa pagkamatuod, ini ang siling sang Ginuo, bilang dugang sa mga layi sang simbahan parte sa mga babayi kag mga kabataan, inang mga miyembro sang simbahan nga nadulaan sang mga bana ukon mga amay:
2 Ang mga babayi may kinamatarong sa pagbaton halin sa ila mga bana para sa ila suporta tubtob nga mapatay ang ila mga bana; kag kon indi sila masalapoan nga naglapas batonon sila bilang miyembro sang simbahan.
3 Kag kon indi sila tampad indi sila pagbatonon bilang miyembro sang simbahan; apang magapabilin sa ila ang ila mga panublion suno sa mga layi sang duta.
4 Ang tanan nga kabataan may kinamatarong sa pagbaton halin sa ila mga ginikanan para sa ila suporta tubtob nga maglab-ot na sila sa husto nga edad.
5 Kag pagkatapos sina, may kinamatarong sila sa pagbaton sang bulig halin sa simbahan, ukon sa iban nga pulong sa balay-talagoan sang Ginuo, kon ang ila mga ginikanan wala gid sang sarang nga maghatag sa ila sang mga panublion.
6 Kag dapat dumalahan ang balay-talagoan paagi sa mga pagkonsagrar sang simbahan; kag dapat suportahan ang mga balo kag mga ilo, amo man ang mga imol. Amen.