Seksyon 73
Rebelasyon nga ginhatag kanday Joseph Smith nga Propeta kag Sidney Rigdon sa Hiram, Ohio sang ika-10 sang Enero 1832. Humalin sa una nga bahin sang nagligad nga bulan sang Disyembre, ang Propeta kag si Sidney nangin masako sa pagwali, kag paagi sini madamo ang nahimo agud mabuhinan ang di-maayo nga mga panan-awan nga nagluntad batok sa Simbahan (tan-awa sa introduksyon sang seksyon 71).
1–2, Ang mga elder dapat magpadayon sa pagwali; 3–6, Sanday Joseph Smith kag Sidney Rigdon dapat magpadayon sa paglubad sang Biblia tubtob nga matapos ini.
1 Kay sa pagkamatuod, ini ang siling sang Ginuo, nagakaigo para sa akon nga dapat sila magpadayon sa pagwali sang ebanghelyo, kag sa paglaygay sa mga simbahan sa mga rehiyon sa palibot tubtob sa komperensya;
2 Kag dayon, tan-awa, paagi sa boto sang mga nagatambong sa komperensya ipahibalo sa ila ang ila lain-lain nga misyon.
3 Karon, sa pagkamatuod ginasiling ko sa inyo Joseph Smith Jr. kag Sidney Rigdon, mga alagad ko, ako nga Ginuo nagasiling, kinahanglanon nga maglubad kamo liwat;
4 Kag, sa bagay nga mahimo ini, magwali sa mga rehiyon sa palibot tubtob sa komperensya; kag pagkatapos sina kinahanglanon nga magpadayon sa buluhaton sang paglubad tubtob nga matapos ini.
5 Kag mangin sulundan ini sa mga elder tubtob nga makabaton sila sing dugang nga ihibalo suno sa nasulat.
6 Karon indi na ako magpahayag sing dugang pa sa inyo sa sini nga tion. Wagkosi ang inyo mga balikawang kag mangin but-anan. Kag gani amo sini. Amen.