Seksyon 53
Rebelasyon nga ginhatag paagi kay Joseph Smith nga Propeta kay Algernon Sidney Gilbert sa Kirtland, Ohio sang ika-8 sang Hunyo 1831. Bangod sang pangabay ni Sidney Gilbert, nagpamangkot ang Propeta sa Ginuo parte sa buluhaton ni Brother Gilbert kag tawag sa pag-alagad sa Simbahan.
1–3, Ang pagkatawag kag pagkapili kay Sidney Gilbert sa Simbahan amo nga ordinan sia nga isa ka elder; 4–7, Dapat mag-alagad man sia bilang representante sang obispo.
1 Tan-awa, ginasiling ko sa imo Sidney Gilbert, alagad ko, nga nabatian ko ang imo mga pangamuyo; kag nagtawag ka sa akon agud ipahibalo sa imo sang Ginuo nga imo Dios ang parte sa imo pagkatawag kag pagkapili sa simbahan nga ako, nga Ginuo, ang nagpahamtang sa sining ulihing mga adlaw.
2 Tan-awa, ako, nga Ginuo, nga ginlansang para sa mga sala sang kalibutan, nagahatag sa imo sang kasugoan nga talikdan mo ang mga butang sining kalibutan.
3 Batona ang akon ordinasyon, bisan pa inang iya sang elder agud nga magwali sang pagtuo kag paghinulsol kag kapatawaran sang mga sala suno sa akon pulong, kag sang pagbaton sang Balaan nga Espiritu paagi sa pagtakdong sang mga kamot;
4 Kag mangin representante man sang sining simbahan sa lugar nga igatudlo sang obispo suno sa mga kasugoan nga igahatag pagkatapos sini.
5 Kag sa liwat, sa pagkamatuod ginasiling ko sa imo, maglakat ka upod sang akon mga alagad nga sanday Joseph Smith Jr., kag Sidney Rigdon.
6 Tan-awa, ini ang una nga mga ordinansa nga imo pagabatonon; kag igapahibalo ang mabilin sa palaabuton suno sa imo pagpangabudlay sa akon ulubasan.
7 Kag sa liwat, luyag ko nga mahibaloan mo nga maluwas lamang sia nga nagapadayon tubtob sa katapusan. Kag gani amo sini. Amen.