Seksyon 66
Rebelasyon nga ginhatag paagi kay Joseph Smith nga Propeta sa Hiram, Ohio sang ika-29 sang Oktubre 1831. Sekreto nga nagpangabay si William E. McLellin sa Ginuo nga ipahibalo paagi sa Propeta ang sabat sa lima ka pamangkot nga wala mahibaloi ni Joseph Smith. Sa pangabay ni McLellin, nagpamangkot ang Propeta sa Ginuo kag nakabaton sining rebelasyon.
1–4, Ang wala’y katubtuban nga kasugtanan amo ang kabug-osan sang ebanghelyo; 5–8, Ang mga elder dapat magwali, magpamatuod, kag magpakighambal sa mga tawo; 9–13, Ang matutum nga pag-alagad sa Ginuo nagasiguro sang pagpanubli sang kabuhi nga wala’y katapusan.
1 Tan-awa, ini ang siling sang Ginuo sa akon alagad nga si William E. McLellin—Bulahan ka bangod nga gintalikdan mo ang imo mga kalainan, kag ginbaton ang akon mga kamatuoran, siling sang Ginuo nga imo Manunubos, ang Manluluwas sang kalibutan, bisan pa sa ila tanan nga nagapati sa akon ngalan.
2 Sa pagkamatuod ginasiling ko sa imo, bulahan ka bangod sa pagbaton sang akon wala’y katubtuban nga kasugtanan nga kabug-osan sang akon ebanghelyo, nga ginpadala sa mga anak sang katawhan agud nga may kabuhi sila kag mahimo nga mga umalambit sang mga himaya nga igapahayag sa ulihing mga adlaw suno sa ginsulat sang mga propeta kag mga apostoles sa dumaan nga panahon.
3 Sa pagkamatuod ginasiling ko sa imo William, alagad ko, nga matinlo ka apang indi lubos; gani, maghinulsol sinang mga butang nga indi makapalipay sa akon panulok, siling sang Ginuo, kay ipakita ini sang Ginuo sa imo.
4 Kag karon, sa pagkamatuod, ako, nga Ginuo, magapakita sa imo sang akon pagbuot parte sa imo ukon kon ano ang akon pagbuot parte sa imo.
5 Tan-awa, sa pagkamatuod ginasiling ko sa imo nga pagbuot ko nga ibantala mo ang akon ebanghelyo sa tagsa ka duta, kag sa tagsa ka siyudad, huo, sa sinang mga rehiyon sa palibot sa diin wala pa ini nabantala.
6 Indi magtinir sing madugay sa sining lugar; indi anay magkadto sa duta sang Sion; apang sa malab-otan sang imo ikasarang nga magpadala sang kwarta, magpadala; gani, indi pagpaminsara ang imo pagkabutang.
7 Magkadto sa mga duta sa este, magpamatuod sa tagsa ka lugar, sa tagsa ka katawhan kag sa ila mga sinagoga nga nagapakighambal sa mga tawo.
8 Paupda sa imo ang akon alagad nga si Samuel H. Smith, kag indi sia pagbayai, kag tudloan mo sia; kag sia nga tampad pabakuron sa tagsa ka lugar; kag ako, nga Ginuo, magaupod sa imo.
9 Itakdong ang imo mga kamot sa pagbendisyon sa mga nagamasakit, kag magaayo sila. Indi magpauli tubtob nga ako, nga Ginuo, magasugo sa imo. Magpadayon sa pihak sang mga pag-antos. Magpangayo kag magabaton ka; magpanuktok kag pagabuksan ini sa imo.
10 Indi pagpabudlayi ang imo kaugalingon. Talikdi ang tanan nga indi matarong. Indi magpanginbabayi ukon magpanginlalaki—isa ka tentasyon nga nagapaantos sa imo.
11 Tumana ining mga kasugoan kay matuod kag masaligan ang mga ini; kag tumana sing maayo ang imo palangakoan, kag patipona ang madamo nga tawo sa Sion nga may mga ambahanon sang wala’y katubtuban nga kalipay sa ila mga ulo.
12 Padayona ang paghimo sining mga butang bisan pa tubtob sa katapusan, kag maangkon mo ang korona sang kabuhi nga wala’y katapusan sa tuo nayon nga kamot sang akon Amay nga puno sang grasya kag kamatuoran.
13 Sa pagkamatuod, ini ang siling sang Ginuo nga imo Dios, imo Manunubos nga si Jesucristo. Amen.