Seksyon 75
Rebelasyon nga ginhatag paagi kay Joseph Smith nga Propeta sa Amherst, Ohio sang ika-25 sang Enero 1832. Ini nga seksyon nagalakip sang duha ka separado nga mga rebelasyon (ang una sa mga bersikulo 1 tubtob 22 kag ang ika-duha sa mga bersikulo 23 tubtob 36) nga ginhatag sa amo man nga adlaw. Ang tion amo ang isa ka komperensya sa diin ginsakdag kag gin-ordinan si Joseph Smith bilang Pangulo sang Mataas nga Pagkapari. Luyag sing pila ka mga elder nga mahibaloan pa gid ang parte sa ila gilayon nga mga tulumanon. Nagsunod ining mga rebelasyon.
1–5, Ang tampad nga mga elder nga nagawali sang ebanghelyo magaangkon sang kabuhi nga wala’y katapusan; 6–12, Magpangamuyo agud mabaton ang Manugpasulhay nga nagatudlo sang tanan nga butang; 13–22, Ang mga elder magapungko sa paghukom sinang nagasikway sang ila mensahe; 23–36, Ang mga panimalay sang mga misyonero dapat magbaton sang bulig halin sa Simbahan.
1 Sa pagkamatuod, sa pagkamatuod, ginasiling ko sa inyo, ako nga nagahambal bisan pa paagi sa tingug sang akon Espiritu, ang Alfa kag ang Omega, ang inyo Ginuo kag inyo Dios—
2 Dungga ninyo, O kamo nga naghatag sang inyo mga ngalan agud maglakat sa pagbantala sang akon ebanghelyo, kag agud panapsan ang akon ulubasan.
3 Tan-awa, ginasiling ko sa inyo nga pagbuot ko nga dapat kamo maglakat kag indi magpahinay-hinay, ukon mangin matamad kundi magpangabudlay sa inyo ikasarang—
4 Nga ginabayaw ang inyo mga tingug pareho sa tunog sang trumpeta, nga ginabantala ang kamatuoran suno sa mga rebelasyon kag mga kasugoan nga ginhatag ko sa inyo.
5 Kag gani, kon tampad kamo magaani kamo sang binugkos, kag pagakoronahan sang dungog, kag himaya, kag kawala’y kamatayon, kag kabuhi nga wala’y katapusan.
6 Karon, sa pagkamatuod ginasiling ko sa akon alagad nga si William E. McLellin, ginabawi ko ang misyon nga ginhatag ko sa iya nga maglakat sa mga rehiyon sa este;
7 Kag nagahatag ako sa iya sang bag-o nga tulumanon kag sang bag-o nga kasugoan nga sa diin ako, nga Ginuo, nagapina sa iya sa mga pagkumod sang iya tagipusuon;
8 Kag nakasala sia; apang, ginapatawad ko sia kag ginasiling sa iya liwat, Maglakat ka sa mga rehiyon sa sur.
9 Kag paupda ang akon alagad nga si Luke Johnson sa iya, kag ipabantala ang mga butang nga ginsugo ko sa ila—
10 Nga nagatawag sa ngalan sang Ginuo para sa Manugpasulhay nga magatudlo sa ila sang tanan nga butang nga maayo para sa ila—
11 Nga nagapangamuyo pirme agud indi sila magluya; kag kon ginahimo nila ini, kaupod nila ako tubtob sa katapusan.
12 Tan-awa, ini ang pagbuot sang Ginuo nga inyo Dios parte sa inyo. Kag gani amo sini. Amen.
13 Kag sa liwat, sa pagkamatuod ini ang siling sang Ginuo, palakta ang akon alagad nga si Orson Hyde kag ang akon alagad nga si Samuel H. Smith sa mga rehiyon sa este, kag ipabantala ang mga butang nga ginsugo ko sa ila; kag kon tampad sila, yari karon, kaupod nila ako tubtob sa katapusan.
14 Kag sa liwat, sa pagkamatuod ginasiling ko sa akon alagad nga si Lyman Johnson, kag sa akon alagad nga si Orson Pratt, maglakat man sila sa mga rehiyon sa este; kag tan-awa, kag yari karon, kaupod man nila ako tubtob sa katapusan.
15 Kag sa liwat, ginasiling ko sa akon alagad nga si Asa Dodds, kag sa akon alagad nga si Calves Wilson nga maglakat man sila sa mga rehiyon sa weste, kag ibantala ang akon ebanghelyo suno sa ginsugo ko sa ila.
16 Kag sia nga tampad magmadinalag-on sa tanan nga butang, kag pagabayawon sa katapusan nga adlaw.
17 Kag sa liwat, ginasiling ko sa akon alagad nga si Major N. Ashley, kag sa akon alagad nga si Burr Riggs, palakta man sila sa mga rehiyon sa sur.
18 Huo, palakta sila tanan suno sa akon ginsugo sa ila nga nagakadto sa tagsa ka balay, kag sa tagsa ka baryo, kag sa tagsa ka siyudad.
19 Kag kon sa diin man nga balay kamo magsulod, kag ginabaton nila kamo, magbilin kamo sang inyo pagpakamaayo sa sina nga balay.
20 Kag kon sa diin man nga balay kamo magsulod, kag wala nila kamo ginabaton, maghalin kamo sing gilayon sa sina nga balay, kag itaktak ang yab-ok sa inyo mga tiil bilang testimonya batok sa ila.
21 Kag mapuno kamo sang kasadya kag kalipay; kag hibaloa ini nga sa adlaw sang paghukom kamo ang magahukom sinang balay, kag magakondenar sa ila;
22 Kag mas mahagan-hagan pa para sa mga pagano sa adlaw sang paghukom sangsa para sa sina nga balay; gani, wagkosi ang inyo mga balikawang kag mangin tampad, kag magmadinalag-on kamo sa tanan nga butang, kag pagabayawon sa katapusan nga adlaw. Kag gani amo sini. Amen.
23 Kag sa liwat, ini ang siling sang Ginuo sa inyo, O kamo nga mga elder sang akon simbahan nga naghatag sang inyo mga ngalan agud nga mahibaloan ninyo ang iya pagbuot parte sa inyo—
24 Tan-awa, ginasiling ko sa inyo nga responsibilidad sang simbahan nga magbulig sa pagsuporta sang mga panimalay sina, kag sa pagsuporta man sang mga panimalay sinang mga gintawag kag kinahanglanon nga ipadala sa kalibutan agud ibantala ang ebanghelyo sa kalibutan.
25 Gani ako, nga Ginuo, nagahatag sa inyo sining kasugoan nga makatigayon kamo sang mga puluy-an para sa inyo mga panimalay sa punto nga handa ang inyo mga kauturan sa simbahan sa pagbukas sang ila mga tagipusuon.
26 Kag ang tanan nga makaangkon sang mga puluy-an para sa ila mga panimalay, kag sang suporta sang simbahan para sa ila, indi magpatumbaya sa paglakat sa kalibutan bisan diin man sa este ukon sa weste, ukon sa norte, ukon sa sur.
27 Papangayoa sila kag makabaton sila, papanuktoka sila kag pagabuksan ini sa ila, kag ipahibalo ini halin sa kahitaasan, sa pagkamatuod paagi sa Manugpasulhay, bisan diin sila magkadto.
28 Kag sa liwat, sa pagkamatuod ginasiling ko sa inyo nga ang tagsa ka lalaki nga may responsibilidad sa pagpatigayon sang kinahanglanon sang iya kaugalingon nga panimalay, papatigayona sia, kag indi madula sa iya ang iya korona; kag dapat magpangabudlay sia sa simbahan.
29 Dapat mangin matutum ang tagsa ka tawo sa tanan nga butang. Kag ang matamad wala sang lugar sa simbahan luwas kon maghinulsol sia kag bag-ohon ang iya mga panggawi.
30 Karon, paupora ang akon alagad nga si Simeon Carter kag ang akon alagad nga si Emer Harris sa pag-alagad;
31 Kag amo man ang akon alagad nga si Ezra Thayre kag ang akon alagad nga si Thomas B. Marsh;
32 Kag amo man ang akon alagad nga si Hyrum Smith kag ang akon alagad nga si Reynolds Cahoon;
33 Kag amo man ang akon alagad nga si Daniel Stanton kag ang akon alagad nga si Seymour Brunson;
34 Kag amo man ang akon alagad nga si Sylvester Smith kag ang akon alagad nga si Gideon Carter;
35 Kag amo man ang akon alagad nga si Ruggles Eames kag ang akon alagad nga si Stephen Burnett;
36 Kag amo man ang akon alagad nga si Micah B. Welton kag ang akon man alagad nga si Eden Smith. Kag gani amo sini. Amen.