Seksyon 16
Rebelasyon nga ginhatag paagi kay Joseph Smith nga Propeta kay Peter Whitmer Jr., sa Fayette, New York sang Hunyo 1829 (tan-awa sa introduksyon sang seksyon 14). Si Peter Whitmer Jr. sang ulihi nangin isa sang Walo ka Saksi sang Libro ni Mormon.
1–2, Ang butkon sang Ginuo yara sa bilog nga duta; 3–6, Ang pagwali sang ebanghelyo kag pagluwas sang mga kalag ang butang nga labing importante.
1 Dungga, Peter, alagad ko, kag magpamati sa mga pulong ni Jesucristo nga imo Ginuo kag imo Manunubos.
2 Kay tan-awa, nagahambal ako sa imo nga may katalom kag may gahum kay ang akon butkon yara sa bilog nga duta.
3 Kag sugiran ko ikaw sinang wala sing iban nga tawo ang nakahibalo magluwas lang sa akon kag sa imo—
4 Kay makapila ka beses nga nagpangayo ka sa akon nga makahibalo sinang mangin labing importante sa imo.
5 Tan-awa, bulahan ka bangod sining butang, kag sa pagsugid sang akon mga pulong nga ginhatag ko sa imo suno sa akon mga kasugoan.
6 Kag karon, tan-awa, ginasiling ko sa imo nga ang butang nga mangin labing importante sa imo amo ang pagpahayag sang paghinulsol sa sining katawhan, agud nga madala mo ang mga kalag sa akon, agud nga makapahuway ka upod sa ila sa ginharian sang akon Amay. Amen.