Seksyon 99
Rebelasyon nga ginhatag paagi kay Joseph Smith nga Propeta kay John Murdock sang ika-29 sang Agosto 1832 sa Hiram, Ohio. Sing kapin isa ka tuig, nagawali si John Murdock sang ebanghelyo samtang ang iya mga anak—nga nailo sa iloy pagkapatay sang iya asawa nga si Julia Clapp sang Abril 183—nagpuyo upod sa iban nga mga pamilya sa Ohio.
1–8, Si John Murdock gintawag nga magbantala sang ebanghelyo, kag inang mga nagabaton sa iya nagabaton sa Ginuo kag magaangkon sang kaluoy.
1 Tan-awa, ini ang siling sang Ginuo sa akon alagad nga si John Murdock—ginatawag ka nga maglakat sa mga rehiyon sa este sa tagsa ka balay, sa tagsa ka baryo, kag sa tagsa ka siyudad agud ibantala ang akon wala’y katubtuban nga ebanghelyo sa mga pumuluyo sinang mga lugar sa tunga sang paghingabot kag kalainan.
2 Kag inang mga nagabaton sa imo nagabaton sa akon; kag magaangkon ka sang gahum sa pagpahayag sang akon pulong upod ang mga pagpahayag sang akon Balaan nga Espiritu.
3 Kag inang mga nagabaton sa imo pareho sing isa ka gamay nga bata nagabaton sang akon ginharian; kag bulahan sila kay makaangkon sila sang kaluoy.
4 Kag kon sin-o man nga indi magbaton sa imo, sia kag ang iya panimalay indi pagabatonon sang akon Amay; kag tinloan mo ang imo mga tiil sa sekreto nga mga lugar sa dalanon bilang testimonya batok sa ila.
5 Kag tan-awa, kag yari karon, magakari ako sing madasig sa paghukom, agud probahan ang tanan nila nga di-diosnon nga mga kahimoan nga ginhimo nila batok sa akon, nga nasulat parte sa akon sa libro sang balaan nga mga kasulatan.
6 Kag karon, sa pagkamatuod ginasiling ko sa imo nga indi nagakaangay nga maglakat ka tubtob nga mapatigayon mo ang kinahanglanon sang imo mga anak, kag mapadala sing maayo sa obispo sang Sion.
7 Kag pagkaligad sing pila ka tuig, kon ginapangayo mo sa akon, makakadto ka man sa maayo nga duta agud angkonon ang imo panublion;
8 Indi gani magapadayon ka sa pagbantala sang akon ebanghelyo tubtob nga pagakuhaon ka sa duta. Amen.