Seksyon 9
Rebelasyon nga ginhatag paagi kay Joseph Smith nga Propeta kay Oliver Cowdery, sa Harmony, Pennsylvania sang Abril 1829. Si Oliver ginpaandaman nga mangin mapainumuron kag ginalaygayan nga mangin kontento sa pagsulat sa sini nga tion sa dikta sang taglubad sangsa magtilaw nga maglubad.
1–6, Dugang nga dumaan nga mga kasulatan ang pagalubaron pa; 7–14, Ang Libro ni Mormon ginlubad paagi sa pagtuon kag paagi sa espirituhanon nga pagpahayag.
1 Tan-awa, ginasiling ko sa imo anak ko nga bangod wala ka naglubad suno sa sinang ginapangayo mo sa akon, kag nagsugod ka liwat sa pagsulat para sa akon alagad nga si Joseph Smith Jr., sa amo man luyag ko nga magpadayon ka tubtob nga matapos mo ining kasulatan nga gintugyan ko sa iya.
2 Kag dayon, tan-awa, may dugang pa ako nga mga kasulatan nga hatagan ko ikaw sang ikasarang agud mabuligan mo sa paglubad.
3 Magpaumod anak ko, kay kinaalam para sa akon, kag indi kinahanglanon nga maglubad ka sa sini nga tion.
4 Tan-awa, ang buluhaton nga ginatawag ka sa paghimo amo ang pagsulat para sa akon alagad nga si Joseph.
5 Kag, tan-awa, bangod kay wala ka nagpadayon pareho sang pagsugod mo sang nag-umpisa ka sa paglubad, nga ginbawi ko ining pribilihiyo sa imo.
6 Indi magkumod anak ko, kay kinaalam para sa akon nga gintrato ko ikaw sa sini nga paagi.
7 Tan-awa, wala mo nahangpan; ginhunahuna mo nga ihatag ko ini sa imo nga wala mo ginbinag-binag sing maayo luwas nga magpangayo sa akon.
8 Apang, tan-awa, ginasiling ko sa imo nga kinahanglan nga tun-an mo ini sa imo hunahuna; dayon kinahanglan nga pamangkuton mo ako kon husto ini, kag kon husto ini himuon ko nga magdabadaba ang imo dughan sa sulod nimo; gani, mabatyagan mo nga husto ini.
9 Apang kon indi ini husto wala ka sang amo nga mga pamatyagan, apang makaangkon ka sang paghinay sang panghunahuna sa bagay nga malipatan mo ang butang nga sala; gani, indi mo sarang isulat inang sagrado luwas nga ini ihatag sa imo halin sa akon.
10 Karon, kon nahibaloan mo ini nakalubad ka kuntani; apang, indi kinahanglanon nga maglubad ka subong.
11 Tan-awa, nangin kinahanglanon sang nagsugod ka; apang nagkahadlok ka, kag ang tion nagligad na, kag indi ini kinahanglanon subong;
12 Kay, indi mo bala makita nga ginhatagan ko ang akon alagad nga si Joseph sing nagakaigo nga kusog, nga paagi sini napun-an ang kakulangan? Kag wala sing isa sa inyo nga akon ginkondenar.
13 Himoa ining butang nga akon ginsugo sa imo, kag magauswag ka. Mangin tampad kag indi magpadala sa tentasyon.
14 Mangin matutum sa buluhaton sa diin gintawag ko ikaw, kag bisan ang isa ka buhok sang imo ulo indi madula, kag pagabayawon ka sa katapusan nga adlaw. Amen.