Seksyon 51
Rebelasyon nga ginhatag paagi kay Joseph Smith nga Propeta sa Thompson, Ohio sang ika-20 sang Mayo 1831. Sa sini nga tion ang mga Santos nga nagasaylo halin sa este nga mga bahin sang Estados Unidos nagsugod sa pag-abot sa Ohio, kag nangin kinahanglanon nga maghimo sing pat-od nga mga pagpatigayon para sa ila puluy-an. Bangod nga ining ulobrahon iya sang responsibilidad sang obispo, si Bishop Edward Partridge nagpangayo sang laygay parte sining butang, kag nagpamangkot ang Propeta sa Ginuo.
1–8, Si Edward Partridge ginpili nga magdumala sang mga ginpangsalig kag mga pagkabutang; 9–12, Ang mga Santos dapat nga masaligan sa ila mga buhat kag pagatratohon sing palarehas; 13–15, Dapat may yara sila sang balay-talagoan nga dumalahan sang obispo kag dapat ipahamtang ang mga pagkabutang suno sa layi sang Ginuo; 16–20, Ang Ohio mangin temporaryo nga lugar nga tiliponan.
1 Dungga ako, siling sang Ginuo nga imo Dios, kag magahambal ako sa akon alagad nga si Edward Partridge, kag hatagan sia sang mga direksyon; kay kinahanglanon nga makabaton sia sang mga direksyon kon paano iplastar ining katawhan.
2 Kay kinahanglanon nga iplastar sila suno sa akon mga layi; indi gani pagasikwayon sila.
3 Gani, pahataga ang akon alagad nga si Edward Partridge, kag inang iya mga ginpili nga akon nahamut-an, sa sining katawhan sang ila mga bahin sang mga pagkabutang nga ang tagsa ka tawo palarehas suno sa kadakuon sang iya panimalay, suno sa iya mga sirkumstansya kag kon ano ang iya mga kulang kag mga kinahanglanon.
4 Kag kon ang akon alagad nga si Edward Partridge maghatag sa isa ka tawo sang iya bahin, pahataga man sia sang kasulatan nga magagarantiya sa sina nga tawo sang iya bahin, nga mangin iya ini bisan pa ining kinamatarong kag ining panublion sa simbahan tubtob nga makasala sia kag kabigon nga di-angay nga mangin miyembro sang simbahan paagi sa tingug sang mga miyembro sini, suno sa mga layi kag mga kasugtanan sang simbahan.
5 Kag kon makasala sia kag indi makabig nga angay nga mangin miyembro sang simbahan, wala sia sang kinamatarong sa pagbawi sinang bahin nga ginkonsagrar niya sa obispo para sa mga imol kag sa mga nagakinahanglan sang akon simbahan; gani, indi niya mahawiran ang tanan niya nga ginhatag, kundi makuha lamang inang bahin nga legal nga ginhatag sa iya.
6 Kag gani ang tanan nga butang pagasigurohon suno sa mga layi sang duta.
7 Kag ipahatag sa sining katawhan ang mga pagkabutang nila.
8 Kag parte sa kwarta nga nabilin sang sining katawhan—magpili sing isa ka representante sa sining katawhan nga magabaton sang kwarta agud nga magpatigayon sang mga pagkaon kag mga panapton suno sa kon ano ang mga kulang sining katawhan.
9 Kag ang tagsa ka tawo dapat nga masaligan sa ila mga buhat, kag mangin patas sa pagkabutang sa tunga sining katawhan, kag pagatratohon sing palarehas agud nga mag-isa kamo pareho sang akon ginsugo sa inyo.
10 Kag kon ano ang iya sining katawhan indi pag-ipakuha kag ipahatag sa lain nga sanga sang simbahan.
11 Gani, kon ang lain nga sanga sang simbahan luyag nga maghulam sang kwarta halin sa sining simbahan, dapat nila bayaran ang ining simbahan suno sa ila pagsugtanay;
12 Kag pagahimuon ini paagi sa obispo ukon sa representante nga pagapilion suno sa tingug sang simbahan.
13 Kag sa liwat, ang obispo dapat magpahamtang sing isa ka balay-talagoan sa sining simbahan; kag ang tanan nga kwarta pati pagkaon nga sobra sa kinahanglanon para sa mga kulang sining katawhan dapat taguon sa mga kamot sang obispo.
14 Kag patigan-a man sia sa iya kaugalingon para kon ano ang mga kulang niya mismo, kag para sa mga kulang sang iya panimalay bangod mangin masako sia sa paghimo sining iya mga responsibilidad.
15 Kag gani ginahatag ko sa sining katawhan ang pribilihiyo sa pagplastar sang ila mga kaugalingon suno sa akon mga layi.
16 Kag ginakonsagrar ko sa ila ining duta sa malip-ot lamang nga tion tubtob nga ako, nga Ginuo, magapatigayon sang lain naman para sa ila, kag magasugo sa ila nga maglakat halin diri;
17 Kag ang oras kag ang adlaw wala napahibalo sa ila; gani, ipakabig sa ila nga magpangabuhi kag magpuyo sa sining duta sing tinuig, kag magaresulta ini sa ila kaayohan.
18 Tan-awa, ini mangin sulundan sa akon alagad nga si Edward Partridge sa iban nga mga lugar, sa tanan nga simbahan.
19 Kag kon sin-o man ang masalapoan nga tampad, matarong, kag mainandamon nga tulugyanan magasulod sa kalipay sang iya Ginuo, kag magapanubli sang kabuhi nga wala’y katapusan.
20 Sa pagkamatuod, ginasiling ko sa inyo, ako si Jesucristo nga magakari sing madasig sa oras nga wala ninyo paghunahunaa. Kag gani amo sini. Amen.