Seksyon 111
Rebelasyon nga ginhatag paagi kay Joseph Smith nga Propeta sa Salem, Massachusetts sang ika-6 sang Agosto 1836. Sa sini nga tion nalubong sa utang ang mga lideres sang Simbahan bangod sa ila mga pagpangabudlay sa pag-alagad. Bangod nabatian nila nga may dako nga kantidad sang kwarta nga mahimo nila makuha sa Salem, nagpanglakaton didto ang Propeta, upod sanday Sidney Rigdon, Hyrum Smith, kag Oliver Cowdery halin sa Kirtland, Ohio agud usisaon ining balita kag magwali man sang ebanghelyo. Naghikot ang mga kauturan sing pila ka mga butang parte sa opisyal nga mga buluhaton sa Simbahan kag nagpangwali. Sang nangin maathag na nga wala ang ginapaabot nga kwarta, nagbalik sila sa Kirtland. Pila ka mga butang nga maathag sa mga sirkumstansya nga nagapalibot diri ang napakita sa pagpili kag pagplastar sang mga pulong sining rebelasyon.
1–5, Ang Ginuo nagapatigayon sang dutan-on nga mga panginahanglan sang Iya mga alagad; 6–11, Mangin maluluy-on sia sa Sion kag ipahanabo ang tanan nga butang para sa kaayohan sang Iya mga alagad.
1 Ako, ang Ginuo nga inyo Dios, nagatugot sang inyo paghimo sining pagpanglakaton sa pihak sang inyo mga kabuangan.
2 Tuman ang akon manggad sa sining siyudad para sa inyo, para sa kaayohan sang Sion, kag madamo ang akon katawhan sa sining siyudad nga akon pagapainon sa nagakaigo nga tion para sa kaayohan sang Sion, paagi sa inyo.
3 Gani, nagakaigo nga pangilalahon ninyo ang mga tawo sa sining siyudad suno sa paggiya sa inyo, kag suno sa ipahibalo sa inyo.
4 Kag matabo ini sa nagakaigo nga tion nga ihatag ko ining siyudad sa inyo mga kamot nga makaangkon kamo sang gahum sa sini, sa bagay nga indi nila matukiban ang inyo sekreto nga mga bahin; kag ang iya sini manggad nga bulawan kag pilak mangin inyo.
5 Indi ninyo pagkabalakhi ang parte sa inyo kautangan kay hatagan ko kamo sang ikasarang sa pagbayad sang mga ini.
6 Indi ninyo pagkabalakhi ang parte sa Sion kay mangin maluluy-on ako sa iya.
7 Magpabilin sa sining lugar, kag sa mga rehiyon sa palibot;
8 Kag ang lugar nga pagbuot ko nga magpabilin kamo sa masami ipahayag sa inyo paagi sa paghidaet kag gahum sang akon Espiritu nga igabubo sa inyo.
9 Ining lugar makuha ninyo paagi sa pag-arkila. Kag magpamangkot sing maid-id parte sa mas dumaan nga mga pumuluyo kag mga tagtukod sining siyudad;
10 Kay tuman ang manggad para sa inyo sa sining siyudad.
11 Gani, mangin maalam kamo pareho sang mga man-og apang wala sang sala; kag ipahanabo ko ang tanan nga butang para sa inyo kaayohan pareho kadasig sang inyo pagbaton sang mga ini. Amen.