Balaan ng mga Kasulatan
Doktrina kag mga Kasugtanan 3


Seksyon 3

Rebelasyon nga ginhatag kay Joseph Smith nga Propeta sa Harmony, Pennsylvania sang Hulyo 1828 parte sa pagkadula sang 116 ka pahina sang manuskrito nga ginlubad halin sa una nga bahin sang Libro ni Mormon nga gintawag nga libro ni Lehi. Nag-alaala ang Propeta sa pagsugot nga ining mga pahina nga yara sa iya magkadto kay Martin Harris nga nag-alagad sa malip-ot nga tion bilang tagsulat sa paglubad sang Libro ni Mormon. Ang rebelasyon ginhatag paagi sa Urim kag Tumim. (Tan-awa sa seksyon 10.)

1–4, Ang alagyan sang Ginuo isa ka wala’y katapusan nga nagalibot nga alagyan; 5–15, Si Joseph Smith kinahanglan maghinulsol ukon indi gani madula sa iya ang bugay sa paglubad; 16–20, Ang Libro ni Mormon magaluntad agud maluwas ang kaliwatan ni Lehi.

1 Ang mga buluhaton, kag mga plano, kag mga katuyoan sang Dios indi sarang mapaslawan, ukon mangin wala’y pulos.

2 Kay ang Dios wala nagalakat sa tiko nga mga banas, wala man sia nagaliso sa tuo nga kamot ukon sa wala, wala man sia nagabaylo-baylo sang iya ginhambal; gani, ang iya mga banas matadlong, kag ang iya alagyan isa ka wala’y katapusan nga nagalibot nga alagyan.

3 Dumduma, dumduma nga indi ang buluhaton sang Dios ang nagakapaslawan kundi ang buluhaton sang tawo;

4 Kay bisan pa nga ang tawo nakabaton sing madamo nga rebelasyon, kag may gahum sa paghimo sing madamo nga gamhanan nga mga buhat, apang kon nagapabugal sia sa iya kaugalingon nga kusog, kag ginabale-wala ang mga laygay sang Dios, kag nagasunod sa mga dikta sang iya kaugalingon nga pagbuot kag dutan-on nga mga handum, kinahanglan sia nga malaglag kag mag-agom sang pagtimalus sing isa ka matarong nga Dios sa iya.

5 Tan-awa, gintugyan sa imo ining mga butang apang daw ano ka istrikto sang imo mga kasugoan nga ginhatag sang Dios; kag dumduma man ang mga promisa nga ginhimo sa imo kon wala mo ginlapas ang mga ini.

6 Kag tan-awa, daw ano kasako ang imo paglapas sang mga kasugoan kag mga layi sang Dios, kag nagpadayon sa mga pagpangganyat sang mga tawo.

7 Kay tan-awa, wala mo kuntani ginkahadlokan ang tawo sing labi pa sa Dios. Bisan pa nga ginabale-wala sang mga tawo ang mga laygay sang Dios, kag ginasikway ang iya mga pulong—

8 Apang dapat nangin tampad ka; kag iya kuntani gintanyag ang iya butkon kag ginbuligan ka batok sa tanan nga nagadabadaba nga mga pana sang kaaway; kag sia kuntani nangin kaupod mo sa tagsa ka tion sang kagamo.

9 Tan-awa, ikaw si Joseph, kag ikaw ang ginpili sa paghimo sang buluhaton sang Ginuo apang bangod sang paglapas, kon wala ka nagabantay magalaglag ka.

10 Apang dumduma, ang Dios maluluy-on; gani, maghinulsol sa sinang imo ginhimo nga batok sa kasugoan nga ginhatag ko sa imo, kag ikaw ginpili sa gihapon, kag ginatawag liwat sa buluhaton;

11 Luwas kon himuon mo ini, pagapabay-an ka kag mangin pareho sa iban nga tawo, kag indi na makabaton pa sang bugay sa paglubad.

12 Kag sang gintugyan mo sa iban inang butang nga ginhatagan ka sang Dios sang panan-awon kag ikasarang sa paglubad, ginpabay-an mo ang sagrado nga butang sa mga kamot sing isa ka malain nga tawo,

13 Nga nagabale-wala sang mga laygay sang Dios, kag nagguba sang pinakasagrado nga mga promisa nga ginhimo sa atubang sang Dios, kag nagasalig sa iya kaugalingon nga paghukom kag nagapabugal sang iya kaugalingon nga kaalam.

14 Kag amo ini ang rason nga nadula sa imo ang imo mga pribilihiyo sa pila ka tinion—

15 Kay gintugotan mo nga ang laygay sang imo manugdumala nga lapakon halin sa ginsuguran.

16 Apang, ang akon buluhaton magapadayon kay sa bagay nga ang ihibalo parte sa Manluluwas naglapnag sa kalibutan paagi sa testimonya sang mga Judio, sa amo man ang ihibalo parte sa Manluluwas igapahayag sa akon katawhan—

17 Kag sa mga Nefinhon, kag mga Jacobnon, kag mga Josefnon, kag mga Zoramnon paagi sa testimonya sang ila mga amay—

18 Kag ining testimonya mahibaloan sang mga Lamanhon, kag mga Lemuelnon, kag mga Ismaelnon nga nag-usmod sa pagkawala’y pagtuo bangod sang kalainan sang ila mga amay nga gintugotan sang Ginuo nga pamatyon ang ila mga kauturan nga mga Nefinhon, bangod sang ila sini mga kalainan kag mga kangil-aran.

19 Kag sa sini mismo nga katuyoan ang ining mga plansa nga nagaunod sining mga kasulatan gin-amligan—nga ang mga promisa sang Ginuo nga iya ginhimo sa iya katawhan matuman;

20 Kag agud mahibaloan sang mga Lamanhon ang parte sa ila mga amay, kag agud mahibaloan nila ang mga promisa sang Ginuo, kag agud magpati sila sa ebanghelyo kag magasalig sa mga merito ni Jesucristo, kag pagahimayaon paagi sa pagtuo sa iya ngalan, kag agud nga paagi sa ila paghinulsol maluwas sila. Amen.