Seksyon 46
Rebelasyon nga ginhatag paagi kay Joseph Smith nga Propeta sa Simbahan sa Kirtland, Ohio sang ika-8 sang Marso 1831. Sang nagasugod pa lang ang Simbahan, wala pa mapahamtang ang sulundan sa pagpamuno sang mga miting sa Simbahan. Apang, ang naandan na nga pagbaton sang mga miyembro kag sinsero nga mga manug-usisa lamang sa pangsakramento nga mga miting kag iban pa nga mga pagtipon sang Simbahan nangin medyo lapnagon nga gawi. Ini nga rebelasyon nagapabutyag sang pagbuot sang Ginuo parte sa pagdumala kag pagpamuno sang mga miting kag sang Iya direksyon nga magtinguha sa pag-angkon kag paghibalo sang mga bugay sang Espiritu.
1–2, Ang mga elder ang dapat magpamuno sang mga miting suno sa pagtuytuy sa ila sang Balaan nga Espiritu; 3–6, Ang mga nagapangita sang kamatuoran indi dapat pagdumilian sa pangsakramento nga mga miting; 7–12, Magpangayo sa Dios kag tinguhai nga maangkon ang mga bugay sang Espiritu; 13–26, Ang lista sing pila sining mga bugay ginahatag; 27–33, Ang mga lideres sang Simbahan nahatagan sang gahum sa paghibalo sang mga bugay sang Espiritu.
1 Dungga ninyo, O mga katawhan sang akon simbahan; kay sa pagkamatuod ginasiling ko sa inyo nga ining mga butang ginhambal sa inyo para sa inyo kaayohan kag pagtuon.
2 Apang wala’y labot sinang mga butang nga nasulat na, ginahatag sa mga elder sang akon simbahan halin pa sa ginsuguran, kag dalayon nga igahatag, ang pagpamuno sang tanan nga miting suno sa paggiya kag pagtuytuy sa ila sang Balaan nga Espiritu.
3 Apang ginasugo kamo nga indi gid pagdumilian ang bisan sin-o sa inyo mga pangpubliko nga mga miting nga ginahiwat sa atubang sang kalibutan.
4 Ginasugo man kamo nga indi pagdumilian ang bisan sin-o nga miyembro sang simbahan sa inyo pangsakramento nga mga miting; apang, kon may yara sing bisan sin-o nga nakasala, indi sia pagtugoti nga mag-ambit sang sakramento tubtob nga makapakig-uli sia.
5 Kag sa liwat ginasiling ko sa inyo, indi ninyo pagdumilian ang bisan sin-o nga sinsero nga nagapangita sang ginharian sa inyo pangsakramento nga mga miting—ginahambal ko ini parte sinang indi mga miyembro sang simbahan.
6 Kag sa liwat ginasiling ko sa inyo, parte sa inyo mga miting sa pagkompirma sang mga nabunyagan nga kon may bisan sin-o nga indi miyembro sang simbahan nga sinsero nga nagapangita sang ginharian, indi ninyo sila pagdumilian sa pagtambong.
7 Apang ginasugo kamo nga sa tanan nga butang magpangayo sa Dios nga nagahatag sing maalwan; kag inang ginapamatud-an sang Espiritu sa inyo sa amo man luyag ko nga himuon ninyo sa bug-os nga pagkabalaan sang tagipusuon nga nagalakat sing matarong sa akon atubang, nga nagahunahuna sang mangin resulta sang inyo kaluwasan, nga nagahimo sang tanan nga butang upod sang pangamuyo kag pagpasalamat agud nga indi kamo maganyat sang malain nga mga espiritu, ukon mga doktrina sang mga yawa, ukon mga kasugoan sang tawo; kay ang pila sini iya sang tawo, kag ang iban iya sang yawa.
8 Gani, mag-andam agud nga indi kamo magtalang; kag agud nga indi kamo mapatalang tinguhai ninyo sing matutum ang pinakamaayo nga mga bugay nga pirme ginadumdum kon para sa ano nga katuyoan ang mga ini ginahatag;
9 Kay sa pagkamatuod ginasiling ko sa inyo, ginahatag ang mga ini para sa kaayohan sinang nagahigugma sa akon kag nagatuman sang tanan ko nga kasugoan, kag sa iya nga nagatinguha sa paghimo sini; agud nga ang tanan nga nagatinguha ukon nagapangayo sa akon mabenepisyohan, nga nagapangayo kag indi sang tanda agud gamiton sa ila kaugalingon nga mga handum.
10 Kag sa liwat, sa pagkamatuod ginasiling ko sa inyo, luyag ko nga pirme ninyo dumdumon, kag pirme ninyo tandaan kon ano inang mga bugay nga ginahatag sa simbahan.
11 Kay ang tanan nga miyembro wala sang tagsa ka bugay nga ginahatag sa ila; kay madamo sang mga bugay, kag sa tagsa ka tawo ginahatag ang bugay paagi sa Espiritu sang Dios.
12 Sa pila ka mga miyembro ginahatag ang isa, kag sa pila lain naman ang ginahatag agud nga ang tanan makabenepisyo sa sini nga paagi.
13 Sa pila ginahatag sang Balaan nga Espiritu nga makahibalo nga si Jesucristo ang Anak sang Dios, kag ginlansang sia para sa mga sala sang kalibutan.
14 Sa iban ginahatag nga magpati sa ila mga pulong agud nga makaangkon man sila sang kabuhi nga wala’y katapusan kon magpadayon sila nga tampad.
15 Kag sa liwat, sa pila ginahatag sang Balaan nga Espiritu nga makahibalo sang nagkalain-lain nga mga paagi sa paghikot sa simbahan nga makapalipay sa amo man nga Ginuo, suno sa pagbuot sang Ginuo nga nagapabagay sang iya mga kaluoy suno sa mga sitwasyon sang mga anak sang katawhan.
16 Kag sa liwat, sa pila ginahatag sang Balaan nga Espiritu nga makahibalo sang nagkalain-lain nga mga pagbuhat kon ang mga ini iya sang Dios agud nga ang mga pagpahayag sang Espiritu mahatag sa tagsa ka tawo agud makabenepisyo sa sini nga paagi.
17 Kag sa liwat, sa pagkamatuod ginasiling ko sa inyo, sa pila ginahatag ang pagtudlo sang pulong sang kaalam paagi sa Espiritu sang Dios.
18 Sa iban naman ginahatag ang pagtudlo sang pulong sang ihibalo agud nga ang tanan matudloan nga mangin maalam kag makaangkon sang ihibalo.
19 Kag sa liwat, sa pila ginahatag ang pag-angkon sang pagtuo nga mag-ayo;
20 Kag sa iban ginahatag ang pag-angkon sang pagtuo nga magpang-ayo.
21 Kag sa liwat, sa pila ginahatag ang pagbuhat sang mga milagro;
22 Kag sa iban ginahatag ang pagpropesiya;
23 Kag sa iban ang paghibalo sa mga espiritu.
24 Kag sa liwat, ginahatag sa pila nga makahambal sa nagkalain-lain nga mga lengguahe;
25 Kag sa lain naman ginahatag ang paglubad sing iban nga lengguahe.
26 Kag ining tanan nga bugay halin sa Dios para sa kaayohan sang mga anak sang Dios.
27 Kag sa obispo sang simbahan, kag sa sinang mga pagapilion kag pagaordinan sang Dios nga magbantay sa mga miyembro sang simbahan kag mangin mga elder sang simbahan, igahatag sa ila ang paghibalo sinang tanan nga bugay agud nga wala sing bisan sin-o sa inyo nga magsiling nga ginsugo sang Dios apang wala ginpadala sang Dios.
28 Kag matabo ini nga sia nga nagapangayo paagi sa Espiritu magabaton paagi sa Espiritu;
29 Agud nga mahimo mahatag sa pila ka mga miyembro ang tanan sinang mga bugay sa katuyoan nga may magpangulo agud nga ang tagsa ka miyembro mabenepisyohan sa sini nga paagi.
30 Sia nga nagapangayo paagi sa Espiritu nagapangayo suno sa pagbuot sang Dios; gani, ginatuman ini suno sa iya ginapangayo.
31 Kag sa liwat, ginasiling ko sa inyo, ang tanan nga butang kinahanglan himuon sa ngalan ni Cristo, ano man ang inyo ginahimo paagi sa Espiritu;
32 Kag kinahanglan kamo magpasalamat sa Dios paagi sa Espiritu para sa ano man nga pagpakamaayo nga ginbugayan kamo.
33 Kag kinahanglan kamo mangin matarong kag balaan sa akon atubang sing dalayon. Kag gani amo sini. Amen.