Balaan ng mga Kasulatan
Doktrina kag mga Kasugtanan 108


Seksyon 108

Rebelasyon nga ginhatag paagi kay Joseph Smith nga Propeta sa Kirtland, Ohio sang ika-26 sang Disyembre 1835. Ini nga seksyon nabaton sa pangabay ni Lyman Sherman nga naordinan sang nagligad nga isa ka sitenta kag nagkadto sa Propeta nga nagapangayo sang rebelasyon nga ipahibalo ang iya tulumanon.

1–3, Si Lyman Sherman napatawad na sang iya mga sala; 4–5, Pagaisipon sia upod sang nagapangulo nga mga elder sang Simbahan; 6–8, Ginatawag sia sa pagwali sang ebanghelyo kag pagpabakod sang iya mga kauturan sa Simbahan.

1 Sa pagkamatuod ini ang siling sang Ginuo sa imo, Lyman, alagad ko: Napatawad na ang imo mga sala bangod ginpati mo ang akon tingug sa pagkadto diri sini nga aga agud magbaton sang laygay halin sa iya nga akon ginpili.

2 Gani, patawhaya ang imo kalag parte sa imo espirituhanon nga kondisyon, kag indi na pagbatui ang akon tingug.

3 Kag magtindog kag mangin mas maid-id sugod subong sa pagtuman sang imo mga panaad nga imo nahimo kag ginahimo, kag pakamaayohon ka sing tuman ka dalagko nga mga bugay.

4 Maghulat sing may pagpasensya tubtob nga mahiwat ang sagrado nga pagtipon sang akon mga alagad dayon pagakabigon ka nga kabahin sang puno sang akon mga elder, kag magabaton sang kinamatarong paagi sa ordinasyon upod sang iban pa sang akon mga elder nga akon ginpili.

5 Tan-awa, ini ang promisa sang Amay sa imo kon magpadayon ka nga tampad.

6 Kag matuman ini sa imo sa sina nga adlaw nga maangkon mo ang kinamatarong sa pagwali sang akon ebanghelyo kon sa diin ko man ikaw ipadala sugod subong sugod sa sina nga tion.

7 Gani, pabakura ang imo mga kauturan sa tanan mo nga ginahambal, sa tanan mo nga pangamuyo, sa tanan mo nga laygay, kag sa tanan mo nga ginahimo.

8 Kag tan-awa, kag yari karon, kaupod mo ako agud pakamaayohon ka kag luwason ka tubtob sa wala’y katapusan. Amen.