1 Dungga, kag yari karon, may tingug nga iya sing isa nga ginpadala sa idalom halin sa kahitaasan, nga mabaskog kag gamhanan, nga ang iya paglibot tubtob sa mga punta sang kalibutan, huo, nga ang iya tingug nagalab-ot sa tanan nga katawhan—Ihanda ninyo ang dalanon sang Ginuo, kag tadlonga ang iya mga banas.

2 Ang mga yabi sang ginharian sang Dios gintugyan sa tawo sa duta, kag halin sa sina magalapnag ang ebanghelyo tubtob sa mga punta sang kalibutan pareho sang bato nga natiphag halin sa bukid nga wala sang mga kamot, nga magaligid tubtob nga malikop sini ang bilog nga duta.

3 Huo, isa ka tingug nga nagasinggit—Ihanda ninyo ang alagyan sang Ginuo, ihanda ninyo ang panihapon sang Kordero, maghanda sa pagkari sang Nobyo.

4 Magpangamuyo sa Ginuo, magtawag sa iya balaan nga ngalan, ipahibalo ang iya dalayawon nga mga buhat sa katawhan.

5 Magtawag sa Ginuo agud maglapnag ang iya ginharian sa duta, agud mabaton ini sang mga pumuluyo sini, kag mangin handa para sa magaabot nga mga adlaw sa diin ang Anak sang Tawo magapanaog sa tunga sang langit nga napalibutan sang kasanag sang iya himaya, agud sugataon ang ginharian sang Dios nga nahamtang sa duta.

6 Karon, kabay nga maglapnag ang ginharian sang Dios agud nga mag-abot ang ginharian sang langit nga ikaw, O Dios, mahimaya sa langit kag sa duta agud nga madaug mo ang imo mga kaaway; kay imo ang pasidungog, gahum, kag himaya tubtob sa wala’y katapusan. Amen.