Seksyon 12
Rebelasyon nga ginhatag paagi kay Joseph Smith nga Propeta kay Joseph Knight Sr., sa Harmony, Pennsylvania sang Mayo1829. Nagpati si Joseph Knight sa mga pagsugid ni Joseph Smith parte sa iya pag-amlig sang mga plansa sang Libro ni Mormon kag sa buluhaton sang paglubad nga nagapadayon sadto kag sa makapila ka beses nga naghatag sia sang materyal nga bulig kay Joseph Smith kag sa iya tagsulat nga nagtugot sa ila nga mapadayon ang paglubad. Sa pangabay ni Joseph Knight, nagpamangkot ang Propeta sa Ginuo kag nakabaton sang rebelasyon.
1–6, Ang mga nagapangabudlay sa ulubasan magabaton sang kaluwasan; 7–9 Ang tanan nga nagahandum kag nagakaangay makabulig sa buluhaton sang Ginuo.
1 Isa ka dako kag dalayawon nga buluhaton ang pagasugdan na sa mga anak sang katawhan.
2 Tan-awa, ako ang Dios; magpamati sa akon pulong nga buhi kag gamhanan, nga mas matalom pa sa espada nga pihak kag pihak ang katalom, sa paghamulag sang mga lutalutahan pati utok sa tul-an; gani, magpamati sa akon pulong.
3 Tan-awa, ang uma puti na para anihon; gani, kon sin-o man ang luyag nga mag-ani, ipaduso sa iya ang iya garab sa iya kusog, kag paaniha samtang nga nagapadayon ang adlaw, agud nga mapanigana niya para sa iya kalag ang wala’y katubtuban nga kaluwasan sa ginharian sang Dios.
4 Huo, kon sin-o man ang magaduso sang iya garab kag mag-ani, ang amo man gintawag sang Dios.
5 Gani, kon magpangayo kamo sa akon magabaton kamo; kon magpanuktok kamo pagabuksan ini sa inyo.
6 Karon, bangod nagpamangkot kamo, tan-awa, ginasiling ko sa inyo, tumana ang akon mga kasugoan, kag tinguhai nga ipahanabo kag sigurohon ang kaayohan sang Sion.
7 Tan-awa, nagahambal ako sa imo, kag amo man sa tanan nga may handum sa pagpahanabo kag pagpahamtang sining buluhaton;
8 Kag wala sing makabulig sa sining buluhaton luwas nga mapainubuson sia kag puno sang gugma, nga may pagtuo, paglaum, kag kaluoy, nga may pagpugong sa tanan nga butang kon ano man ang itugyan sa iya.
9 Tan-awa, ako ang kasanag kag ang kabuhi sang kalibutan nga nagahambal sining mga pulong; gani, magpamati sa bug-os mo nga ikasarang, kag sa sini pagatawgon ka. Amen.