Seksyon 36
Rebelasyon nga ginhatag paagi kay Joseph Smith nga Propeta kay Edward Partridge, malapit sa Fayette, New York sang ika-9 sang Disyembre 1830 (tan-awa sa introduksyon sang seksyon 35). Ang kasaysayan ni Joseph Smith nagasugid nga si Edward Partridge “nangin sulundan sang pagkarelihiyoso, kag isa sang dungganon nga mga tawo sang Ginuo.”
1–3, Ang Ginuo nagtakdong sang Iya kamot kay Edward Partridge paagi sa kamot ni Sidney Rigdon; 4–8, Ang tagsa ka tawo nga nagabaton sang ebanghelyo kag sang pagkapari tawagon agud maglakat kag magwali.
1 Ini ang siling sang Ginuong Dios, ang Gamhanan sang Israel: Tan-awa, ginasiling ko sa imo, Edward, alagad ko, nga bulahan ka, kag napatawad na ang imo mga sala, kag gintawag ka sa pagwali sang akon ebanghelyo pareho sa tingug sang trumpeta;
2 Kag itakdong ko ang akon kamot sa imo paagi sa kamot sang akon alagad nga si Sidney Rigdon, kag mabaton mo ang akon Espiritu, ang Balaan nga Espiritu nga amo ang Manugpasulhay nga magatudlo sa imo sang mahidaeton nga mga butang sang ginharian;
3 Kag ipahayag mo ini sa mabaskog nga tingug nga nagasiling: Hosana, bulahan ang ngalan sang labing mataas nga Dios.
4 Kag karon ining tawag kag kasugoan ginahatag ko sa imo parte sa tanan nga tawo—
5 Nga ang tanan nga magkadto sa akon mga alagad nga sanday Sidney Rigdon kag Joseph Smith Jr., kag magbaton sining tawag kag kasugoan dapat ordinan kag ipadala agud magwali sang wala’y katubtuban nga ebanghelyo sa mga nasyon—
6 Kag magwali sang paghinulsol nga nagasiling: Luwasa ang inyo mga kaugalingon sa sining batinggilan nga henerasyon, kag maggwa halin sa kalayo, kag kangil-ari bisan ang mga biste nga namantsahan sang unod.
7 Kag ihatag ining kasugoan sa mga elder sang akon simbahan agud nga ang tagsa ka tawo nga magbaton sini nga may lubos nga katutum maordinan kag mapadala, pareho sa akon ginhambal.
8 Ako si Jesucristo, ang Anak sang Dios; karon, wagkosi ang inyo mga balikawang kag magakari ako sa hinali sa akon templo. Kag gani amo sini. Amen.