Opisyal nga Pahayag 1
Ang Biblia kag ang Libro ni Mormon nagatudlo nga ang pagpangasawa sing isa lang amo ang pagsulundan sang Dios sa pagpakasal luwas lang kon magpahayag Sia sing lain sangsa diri (tan-awa sa 2 Samuel 12:7–8 kag Jacob 2:27, 30). Pagkatapos nga mapahayag ang isa ka rebelasyon kay Joseph Smith, ang pagpangasawa sing madamo ginsugdan sa mga miyembro sang Simbahan sang nahauna nga bahin sang dekada nga 1840 (tan-awa sa seksyon 132). Humalin sang dekada 1860 tubtob sang dekada 1880, ang gobyerno sang Estados Unidos nagpasar sang mga layi agud himuon nga ilegal ining relihiyoso nga kagawian. Sang ulihi ining mga layi ginpabakod sang Korte Suprema sang Estados Unidos. Pagkatapos nga magbaton sang rebelasyon, si Pangulong Wilford Woodruff nagpagwa sang masunod nga Manifesto nga ginbaton sang Simbahan nga opisyal kag dapat tumanon sang ika-6 sang Oktubre 1890. Nagresulta ini sa pag-untat sang kagawian nga pagpangasawa sing madamo sa Simbahan.
Sa Mga Natungdan:
Bangod sang mga balita sa mga pahayagan halin sa Salt Lake City nga ginpagwa para sa mga katuyoan-politika, nga nabantala sing lapnagon nga nagasiling nga ang Utah Commission sa ila report sang sini lang sa Sekretaryo sang Interyor, nagaalegar nga ang pagpangasawa sing madamo padayon nga ginahikot kag nga kwarenta ukon masobra pa sang amo sini nga mga pagpakasal ang ginkasugtan sa Utah kutob sang nagligad nga Hunyo ukon sang nagligad nga tuig, kag nga sa mga pamulongpulong sa publiko ang mga lider sang Simbahan nagtudlo, nagpaisog kag naglaygay sa pagpadayon sang kagawian nga pagpangasawa sing madamo—
Gani, ako, bilang Pangulo sang Ang Simbahan ni Jesucristo sang mga Santos sa Ulihing mga Adlaw, paagi sini, labing sagrado nga nagapahayag nga indi matuod ining mga pagpasibangod. Wala kami nagatudlo sang poligamya ukon pagpangasawa sing madamo, ukon nagatugot sa bisan sin-o nga maghimo sini, kag ginapanghiwala ko nga kwarenta ukon bisan pila man ka kadamuon sang mga pagkasal sa madamo nga asawa ang ginhikot sa amon mga Templo ukon sa bisan diin nga lugar sa Teritoryo.
Isa ka insidente ang ginreport sa diin ang mga grupo nag-alegar nga ginhikot ang kasal sa Endowment House sa Salt Lake City sang Tigpamulak sang 1889 apang wala ako nakahibalo kon sin-o ang naghikot sang seremonya; kon ano man ang nahimo diri lipod sa akon ihibalo. Bilang resulta sining ginaalegar nga hitabo, sa akon mando, ginguba sing gilayon ang Endowment House.
Bangod ang mga layi ginpasar sang Kongreso nga nagadumili sang pagpangasawa sing madamo, nga ang amo nga mga layi ginpahayag sang pinakamataas nga korte nga nagasanto sa konstitusyon, gani ginapahayag ko ang akon tuyo nga magpaidalom sa sinang mga layi, kag gamiton ang akon impluwensya sa mga miyembro sang Simbahan nga ginapangulohan ko nga maghimo sang amo man.
Wala sa akon mga ginatudlo sa Simbahan ukon sa mga ginatudlo sang akon mga kaupod, sa tion nga ginsambit, nga masal-an nga nagasugo ukon nagapaisog sang pagpakasal sa madamo nga asawa; kag kon ang bisan sin-o nga Elder sang Simbahan nakagamit sang panghambal nga daw nagapabutyag sang amo nga pagpanudlo, ginsaway sia sing gilayon. Kag karon ginapahayag ko sa publiko nga ang akon laygay sa mga Santos sa Ulihing mga Adlaw amo nga maglikaw sa bisan ano nga pagpangasawa nga ginadumilian sang layi sang duta.
Wilford Woodruff
Pangulo sang Ang Simbahan ni Jesucristo
sang mga Santos sa Ulihing mga Adlaw.
Si Pangulong Lorenzo Snow nagpresentar sang masunod:
“Ginaproponer ko nga, bangod ginakilala si Wilford Woodruff bilang Pangulo sang Ang Simbahan ni Jesucristo sang mga Santos sa Ulihing mga Adlaw, kag ang nagaisahanon nga tawo sa duta sa subong nga panahon nga nagakapot sang mga yabi sang nagahugpong nga mga ordinansa, ginakabig naton sia nga lubos nga awtorisado tungod sang iya posisyon sa pagpatigayon sang Manifesto nga ginbasa agud aton mabatian, kag ginpetsahan sang ika-24 sang Septyembre 1890, kag nga bilang isa ka Simbahan nga natipon sa Pangkabilogan nga Komperensya, batonon naton ang iya pahayag parte sa pagpangasawa sing madamo nga opisyal kag dapat tumanon.”
Salt Lake City, Utah, ika-6 sang Oktubre 1890.
Mga bahin sang mensahe halin sa Tatlo kag Pamulongpulong ni
Pangulong Wilford Woodruff
Parte sa Manifesto
Indi gid ako pagpabay-an sang Ginuo ukon ang bisan sin-o nga nagatindog bilang Pangulo sining Simbahan nga patalangon kamo. Wala ini sa plano. Wala ini sa hunahuna sang Dios. Kon tilawan ko ina, kakason ako sang Ginuo sa akon nahamtangan, kag amo man ang bisan sin-o nga magtinguha nga patalangon ang mga anak sang katawhan halin sa mga orakulo sang Dios kag halin sa ila tulumanon. (Ika-sisenta’y uno nga Makaduha-sa-Tuig nga Pangkabilogan nga Komperensya sang Simbahan, Lunes, ika-6 sang Oktubre 1890, Salt Lake City, Utah. Ginreport sa Deseret Evening News, ika-11 sang Oktubre 1890, p. 2.)
Indi importante kon sin-o ang mabuhi ukon sin-o ang mapatay ukon sin-o ang gintawag nga magdumala sining Simbahan, kinahanglan nga dumalahan nila ini paagi sa inspirasyon sang Dios nga Makagagahum. Kon indi nila paghimuon ini sa sina nga paagi, indi gid nila ini mahimo. …
Nakabaton ako sing pila ka rebelasyon sang sini lang, kag importante ini kaayo sa akon, kag sugiran ko kamo kon ano ang ginhambal sang Ginuo sa akon. Tugoti ako nga dal-on sa inyo igtalupangod ang ginatawag nga manifesto. …
Ginhambalan ako sang Ginuo nga magpamangkot sa mga Santos sa Ulihing mga Adlaw, kag ginhambalan man niya ako nga kon magpamati sila sa akon ginsiling sa ila kag magsabat sang ginapamangkot sa ila, paagi sa Espiritu kag gahum sang Dios, tanan sila masabat sing palareho, kag tanan sila magapati sing palareho parte sa sining butang.
Ang pamangkot amo ini: Diin bala ang pinakamaayo nga pamaagi nga dapat pilion sang mga Santos sa Ulihing mga Adlaw—ang padayunon ang kagawian sang pagpangasawa sing madamo nga ginapamatokan sang mga layi sang nasyon kag sang sisenta ka milyon ka tawo kabaylo sang pagkompiskar kag pagkadula sang tanan nga Templo, kag pag-untat sang tanan nga ordinansa diri para sa mga buhi kag mga minatay, kag pagkabilanggo sang Unang Pangulohan kag Dose kag sang mga amay sang mga pamilya sa Simbahan, kag pagkompiskar sang personal nga pagkabutang sang mga tawo (nga tanan sini mismo magapauntat sang amo nga kagawian); ukon pagkatapos nga mahimo kag maantos naton ini tanan paagi sa aton pagtuman sining prinsipyo sa pag-untat sang kagawian kag pagpaidalom sa layi, kag sa paghimo sini tugotan ang mga Propeta, mga Apostoles kag mga amay sa puluy-an nga matudloan nila ang mga tawo kag mahikot ang mga tulumanon sang Simbahan, kag matugyan man ang mga Templo sa mga kamot sang mga Santos agud mahikot nila ang mga ordinansa sang Ebanghelyo para sa mga buhi kag sa mga minatay?
Ginpakita sang Ginuo sa akon paagi sa panan-awon kag rebelasyon kon ano gid ang matabo kon wala naton gin-untat ini nga kagawian. Kon wala naton gin-untat ini, indi ninyo kuntani mapuslan ang … bisan sin-o nga lalaki sa sining templo sa Logan; kay ang tanan nga ordinansa pagauntaton sa bilog nga duta sang Sion. Ang kagamo magapangibabaw sa bilog nga Israel, kag madamo nga mga lalaki ang himuon nga mga bilanggo. Ini nga problema magaabot kuntani sa bilog nga Simbahan, kag napilitan kita kuntani nga untaton ang ini nga kagawian. Karon, ang pamangkot amo nga, kon bala dapat ini untaton sa sini nga paagi ukon sa paagi nga ginpakita sang Ginuo sa aton, kag tugotan ang aton mga Propeta kag mga Apostoles kag mga amay nga mangin hilway, kag ang mga templo sa mga kamot sang katawhan agud nga matubos ang mga minatay. Madamo na ang naluwas sining katawhan halin sa bilanggoan sa kalibutan sang mga espiritu, kag ang buluhaton dapat bala padayunon ukon untaton? Ini ang pamangkot ko sa mga Santos sa Ulihing mga Adlaw. Kamo na ang maghukom. Luyag ko nga kamo na mismo ang magsabat sini. Indi ko ini pagsabton; apang ginasiling ko sa inyo nga amo ina mismo ang kahimtangan nga naagom kuntani naton bilang katawhan kon wala naton ginpili ang ini nga paagi.
… Nakita ko gid kon ano ang matabo kon wala sing may ginhimo. Yara sa akon ining balatyagon sa malawig na nga panahon. Apang luyag ko nga ihambal ini: Gintugotan ko kuntani nga madula ang tanan nga templo sa aton mga kamot; nagpabilanggo ako kuntani, kag gintugotan ang tagsa ka tawo nga mabilanggo man, kon ang Dios sang langit wala nagsugo sa akon nga himuon ang akon ginhimo; kag sang nag-abot ang oras nga ginsugo ako nga himuon ina, ang tanan nangin maathag sa akon. Nag-atubang ako sa Ginuo, kag ginsulat ko ang ginpasulat sa akon sang Ginuo. …
Ginabilin ko ini sa inyo para inyo binag-binagon kag hunahunaon. Ang Ginuo nagahikot upod sa aton. (Komperensya sa Estaka sang Cache, Logan, Utah, Domingo, ika-1 sang Nobyembre 1891. Ginreport sa Deseret Weekly, ika-14 sang Nobyembre 1891.)
Karon sugiran ko kamo kon ano ang ginpakita sa akon kag kon ano ang ginhimo sang Anak sang Dios sa sini nga butang. … Ining tanan nga butang natabo kuntani, pareho ka sigurado nga buhi ang Dios nga Makagagahum, kon wala nahatag ang inang Manifesto. Gani, nabatyagan sang Anak sang Dios nga kinahanglan ipresentar inang butang sa Simbahan kag sa kalibutan para sa mga katuyoan nga yara sa iya kaugalingon nga hunahuna. Ginmando sang Ginuo ang pagpahamtang sang Sion. Ginmando niya ang pagtapos sining templo. Ginmando niya nga ang kaluwasan sang mga buhi kag sang mga patay dapat patigayonon sa mga patag sining mga bukid. Kag ginmando sang Dios nga Makagagahum nga indi dapat pagtugotan nga punggan ini sang Yawa. Kon mahangpan ninyo ina, amo ina ang yabi sini. (Halin sa isa ka pamulongpulong sa ika-anum nga sesyon sang pagdedikar sang Salt Lake Temple sang Abril 1893. Rekord sang mga Serbisyo sa Pagdedikar, Mga Talagoan, Departamento sang Kasaysayan sang Simbahan, Salt Lake City, Utah.)