Seksyon 115
Rebelasyon nga ginhatag paagi kay Joseph Smith nga Propeta sa Far West, Missouri sang ika-26 sang Abril 1838 nga nagapahayag sang pagbuot sang Dios parte sa pagpauswag sinang lugar kag sang balay sang Ginuo. Ini nga rebelasyon ginpatuhoy sa nagapangulo nga mga opisyales kag mga miyembro sang Simbahan.
1–4, Ginhingalanan sang Ginuo ang Iya simbahan nga Ang Simbahan ni Jesucristo sang mga Santos sa Ulihing mga Adlaw; 5–6, Ang Sion kag iya mga estaka mga lugar nga palalipdan kag dalangpan para sa mga Santos; 7–16, Ang mga Santos ginsugo nga magtukod sing isa ka balay sang Ginuo sa Far West; 17–19, Si Joseph Smith ang nagakapot sang mga yabi sang ginharian sang Dios sa duta.
1 Sa pagkamatuod ini ang siling sang Ginuo sa imo, Joseph Smith Jr., alagad ko, kag amo man kay Sidney Rigdon nga alagad ko, kag amo man kay Hyrum Smith nga alagad ko, kag sa imo mga manuglaygay nga ginpili kag pagapilion sa ulihi;
2 Kag amo man sa imo Edward Partridge, alagad ko, kag sa imo mga manuglaygay;
3 Kag amo man sa akon tampad nga mga alagad nga yara sa mataas nga konseho sang akon simbahan sa Sion kay ini dapat ang pagtawag sini, kag sa tanan nga elder kag katawhan sang akon Simbahan ni Jesucristo sang mga Santos sa Ulihing mga Adlaw nga nagalinapta sa bilog nga kalibutan;
4 Kay ang akon simbahan pagatawgon sa ulihing mga adlaw nga, Ang Simbahan ni Jesucristo sang mga Santos sa Ulihing mga Adlaw.
5 Sa pagkamatuod ginasiling ko sa inyo tanan: Magtindog kag magsilak agud nga ang inyo kasanag mangin pagsulundan sang tanan nga nasyon;
6 Kag agud ang pagtipon sang akon katawhan sa duta sang Sion, kag sa iya mga estaka mangin palalipdan, kag mangin dalangpan sa unos, kag sa kaakig kon igabubo ini nga wala sing pugong-pugong sa bilog nga kalibutan.
7 Himoa ang siyudad nga Far West nga isa ka balaan kag nakonsagrar nga duta sa akon; kag pagatawgon ini nga pinakabalaan kay ang duta nga inyo ginatindogan balaan.
8 Gani, ginasugo ko kamo nga magtukod sing isa ka balay sa akon para sa pagtipon sang akon mga santos agud simbahon nila ako.
9 Kag pasugdi ining buluhaton kag pagtukod, kag pagpanghanda sa buluhaton sa sining madason nga tig-ilinit;
10 Kag pasugdi ini sa ika-apat nga adlaw sang maabot nga Hulyo; kag sumugod sa sina nga tion dapat magpangabudlay sing matutum ang akon katawhan agud magtukod sing isa ka balay sa akon ngalan;
11 Kag sa sulod sang isa ka tuig sumugod sa sini nga adlaw pasugda sila liwat sa pagpasad sang pundasyon sang akon balay.
12 Gani, dapat magpangabudlay sila sing matutum sumugod sa sina nga tion tubtob nga matapos ini, halin sa pamusod nga bato sini pakadto sa atop sini, tubtob nga wala na sing may bisan ano pa nga mabilin nga wala natapos.
13 Sa pagkamatuod ginasiling ko sa inyo, indi pagtugoti nga magpangutang pa ang akon alagad nga si Joseph, ukon akon alagad nga si Sidney, ukon akon alagad nga si Hyrum sa pagpatukod sing isa ka balay sa akon ngalan;
14 Apang ipatukod ang isa ka balay sa akon ngalan suno sa sulundan nga ipakita ko sa ila.
15 Kag kon indi ini pag-itukod sang akon katawhan suno sa sulundan nga ipakita ko sa ila pangulohan, indi ko ini pagbatonon halin sa ila mga kamot.
16 Apang kon itukod ini sang akon katawhan suno sa sulundan nga ipakita ko sa ila pangulohan, bisan pa sa akon alagad nga si Joseph kag iya mga manuglaygay, dayon, batonon ko ini halin sa mga kamot sang akon katawhan.
17 Kag sa liwat, sa pagkamatuod ginasiling ko sa inyo, pagbuot ko nga ang siyudad sang Far West dapat pauswagon sing madasig bangod sang pagtipon sang akon mga santos;
18 Kag amo man nga iban pa nga mga lugar ang dapat pilion nga mangin mga estaka sa mga rehiyon sa palibot, suno sa ipahayag sa akon alagad nga si Joseph sa tagsa ka tion.
19 Kay tan-awa, makaupod niya ako, kag pakabalaanon ko sia sa panulok sang katawhan; kay sa iya ginhatag ko ang mga yabi sining ginharian kag pag-alagad. Kag gani amo sini. Amen.