Balaan ng mga Kasulatan
Doktrina kag mga Kasugtanan 21


Seksyon 21

Rebelasyon nga ginhatag kay Joseph Smith nga Propeta sa Fayette, New York sang ika-6 sang Abril 1830. Ini nga rebelasyon ginhatag sang gin-organisar ang Simbahan sa ginsambit nga petsa sa balay ni Peter Whitmer Sr. Anum ka lalaki nga nabunyagan na ang nagpartisipar. Paagi sa boto nga gin-ugyonan sang tanan ining mga lalaki nagpahayag sang ila handum kag determinasyon sa pag-organisar sang Simbahan suno sa kasugoan sang Dios (tan-awa sa seksyon 20). Nagboto man sila sa pagbaton kag pagsakdag kanday Joseph Smith Jr. kag Oliver Cowdery bilang nagapangulo nga mga opisyales sang Simbahan. Si Joseph nag-ordin kay Oliver nga elder sang Simbahan paagi sa pagtakdong sang mga kamot kag si Oliver nag-ordin kay Joseph sa amo man nga paagi. Pagkatapos sang pagpakamaayo kag pagpanagtag sang sakramento, sanday Joseph kag Oliver nagtakdong sang ila mga kamot sa tagsa ka manugpasakop agud hatagan sang Balaan nga Espiritu kag agud kompirmahan ang tagsa sa ila bilang miyembro sang Simbahan.

1–3, Si Joseph Smith gintawag nga mangin manugpanan-aw, taglubad, propeta, apostoles kag elder; 4–8, Ang iya pulong magagiya sang kaayohan sang Sion; 9–12, Ang mga Santos magapati sa iya mga pulong kon maghambal sia sini paagi sa Manugpasulhay.

1 Tan-awa, amligi ang isa ka kasulatan sa tunga ninyo; kag sa diri tawgon ka nga isa ka manugpanan-aw, taglubad, propeta, apostoles ni Jesucristo, elder sang simbahan paagi sa pagbuot sang Dios nga Amay, kag sa grasya sang imo Ginuong Jesucristo,

2 Nga may inspirasyon sang Balaan nga Espiritu sa pag-organisar sang simbahan, kag sa pagpauswag sini para sa kaayohan sang pinakabalaan nga pagtuo.

3 Ang ini nga simbahan gin-organisar kag ginpahamtang sa tuig sang inyo Ginuo mil otso sientos kag treinta, sa ika-apat nga bulan, kag sa ika-anum nga adlaw sang bulan nga ginatawag nga Abril.

4 Gani, kamo nga kon sayuron ang simbahan, magpamati sa tanan niya nga pulong kag kasugoan nga ihatag niya sa inyo sa iya pagbaton sang mga ini, nga nagalakat sa bug-os nga pagkabalaan sa akon atubang;

5 Kay ang iya pulong batonon ninyo nga daw pareho lang nga ini halin sa akon kaugalingon nga baba, sa tanan nga pagpaumod kag pagtuo.

6 Kay sa paghimo sining mga butang ang mga puwertahan sang impiyerno indi makadaug batok sa inyo; huo, kag tabugon sang Ginuong Dios ang mga gahum sang kadulom halin sa inyo, kag pauyogon ang kalangitan para sa inyo kaayohan, kag sa himaya sang iya ngalan.

7 Kay ini ang siling sang Ginuong Dios: Ginhatagan ko sia inspirasyon nga pauswagon ang kaayohan sang Sion sa dako nga gahum para sa kaayohan, kag nakahibalo ako sang iya katutum, kag nabatian ko ang iya mga pangamuyo.

8 Huo, nasaksihan ko ang iya paghibi para sa Sion, kag himuon ko nga indi na sia magpangalisud pa sa iya; kay ang iya tion nag-abot na nga magpangalipay sia bangod sa kapatawaran sang iya mga sala, kag sa ginapakita ko nga mga pagpakamaayo sa iya mga binuhatan.

9 Kay, tan-awa, pakamaayohon ko ang tanan nga nagapangabudlay sa akon ulubasan sang dako nga pagpakamaayo, kag magapati sila sa iya mga pulong nga ihatag sa iya paagi sa akon sang Manugpasulhay nga nagapamatuod nga si Jesus ginlansang sang makasasala nga mga tawo para sa mga sala sang kalibutan, huo, para sa kapatawaran sang mga sala sa mahinulsulon nga tagipusuon.

10 Karon, akon pagbuot nga dapat maordinan mo sia, Oliver Cowdery nga akon apostoles;

11 Kag ini isa ka pagsulundan sa imo nga ikaw isa ka elder sa idalom sang iya kamot, nga sia ang una sa imo, agud nga mangin elder ka sa sining simbahan ni Cristo nga nagadala sang akon ngalan—

12 Kag mangin una nga manugwali sang sining simbahan sa mga miyembro sini, kag sa kalibutan, huo, sa mga Gentil; huo, kag ini ang siling sang Ginuong Dios, tan-awa, tan-awa! sa mga Judio man. Amen.