Seksyon 86
Rebelasyon nga ginhatag paagi kay Joseph Smith nga Propeta sa Kirtland, Ohio sang ika-6 sang Disyembre 1832. Ini nga rebelasyon nabaton samtang nagarepaso kag nagatadlong ang Propeta sang manuskrito sang paglubad sang Biblia.
1–7, Ginahatag sang Ginuo ang kahulugan sang paanggid sang trigo kag mga hilamon; 8–11, Iya ginapaathag ang mga bugay sang pagkapari sa sinang legal nga mga manunubli suno sa unod.
1 Sa pagkamatuod, ini ang siling sang Ginuo sa inyo nga akon mga alagad parte sa paanggid sang trigo kag mga hilamon:
2 Tan-awa, sa pagkamatuod ginasiling ko, ang uma amo ang kalibutan, kag ang mga apostoles amo ang mga manugsab-og sang liso;
3 Kag matapos nga natulogan sila ang dako nga manughingabot sang simbahan, ang nagtalikod sa simbahan, ang makihilawason, bisan pa ang Babilonia nga nagapainom sa tanan nga nasyon halin sa iya ilimnan nga sa ila mga tagipusuon ang kaaway nga si Satanas nagapungko agud maghari—tan-awa ginasab-og niya ang mga hilamon; karon, ginalumos sang mga hilamon ang trigo kag ginatabug ang simbahan pa kamingawan.
4 Apang tan-awa, sa ulihing mga adlaw, bisan pa subong samtang ang Ginuo nagasugod sa pagpahayag sang pulong, ang dahon nagasugod na sa pagtubo kag ugaling linghod pa—
5 Tan-awa, sa pagkamatuod ginasiling ko sa inyo, nagapakitluoy ang mga anghel sa Ginuo adlaw kag gab-i nga handa na kag nagahulat nga ipadala agud anihon ang uma;
6 Apang siling sang Ginuo sa ila, indi paggabuton ang mga hilamon samtang linghod pa ang dahon (kay sa pagkamatuod maluya pa ang inyo pagtuo) agud indi ninyo mahalitan man ang trigo.
7 Gani, patuboa sing dungan ang trigo kag ang mga hilamon tubtob nga ang alanihon lubos nga gulang na; pagkatapos painon ninyo anay ang trigo halin sa mga hilamon, kag pagkatapos nga napain ang trigo, tan-awa kag yari karon, bugkoson ang mga hilamon, kag ang uma handa na agud sunogon.
8 Karon, ini ang siling sang Ginuo sa inyo nga ang pagkapari nagpadayon paagi sa linahe sang inyo mga amay—
9 Kay kamo legal nga mga manunubli suno sa unod, kag gintago sa kalibutan upod ni Cristo paagi sa Dios—
10 Gani, ang inyo kabuhi kag ang pagkapari nagapabilin, kag kinahanglanon gid nga magpabilin paagi sa inyo kag sa inyo linahe tubtob sa pagpanumbalik sang tanan nga butang nga ginhambal paagi sa baba sang tanan nga balaan nga mga propeta halin sa ginsuguran sang kalibutan.
11 Gani, bulahan kamo kon magpadayon kamo sa akon kaayo, isa ka kasanag sa mga Gentil, kag paagi sa sining pagkapari, isa ka manluluwas sa akon katawhan nga Israel. Ang Ginuo ang naghambal sini. Amen.