Introduksyon

Ang Doktrina kag mga Kasugtanan isa ka koleksyon sang diosnon nga mga rebelasyon kag inspirado nga mga pahayag nga ginhatag para sa pagpahamtang kag paggahum sang ginharian sang Dios sa duta sa ulihing mga adlaw. Bisan pa nga ang kalabanan sang mga seksyon ginapatuhoy sa mga miyembro sang Ang Simbahan ni Jesucristo sang mga Santos sa Ulihing mga Adlaw, ang mga mensahe, mga paandam, kag mga laygay para sa kaayohan sang tanan nga katawhan kag nagaunod sang imbitasyon sa tanan nga tawo bisan diin sa pagpamati sa tingug sang Ginuong Jesucristo nga nagahambal sa ila para sa ila dutan-on nga kaayohan kag sa ila wala’y katubtuban nga kaluwasan.

Kalabanan sang mga rebelasyon sa sining koleksyon nabaton paagi kay Joseph Smith Jr., ang una nga propeta kag pangulo sang Ang Simbahan ni Jesucristo sang mga Santos sa Ulihing mga Adlaw. Ang iban ginhatag paagi sa pila sang mga nagbulos sa iya sa Pangulohan (tan-awa sa mga introduksyon sang DK 135, 136, kag 138, kag Opisyal nga mga Pahayag 1 kag 2).

Ang libro nga Doktrina kag mga Kasugtanan isa sang salandigan nga balaan nga mga kasulatan sang Simbahan kaupod ang Balaan nga Biblia, ang Libro ni Mormon, kag ang Perlas nga Bilidhon. Apang, pinasahi ang Doktrina kag mga Kasugtanan bangod indi ini linubad nga dumaan nga dokumento kundi moderno ang ginhalinan sini kag ginhatag sang Dios paagi sa Iya pinili nga mga propeta para sa pagpanumbalik sang Iya balaan nga buluhaton kag sa pagpahamtang sang ginharian sang Dios sa duta sa sining mga adlaw. Sa mga rebelasyon, mabatian sang bumalasa ang malulo apang malig-on nga tingug sang Ginuong Jesucristo nga liwat nga nagahambal sa dispensasyon sang kabug-osan sang mga panahon; kag ang buluhaton nga ginsugdan diri pagpanghanda sa Iya Ika-duha nga Pagkari, bilang katumanan sang kag nagasanto sa mga pulong sang tanan nga balaan nga propeta halin sa ginsuguran sang kalibutan.

Si Joseph Smith Jr. natawo sang ika-23 sang Disyembre 1805 sa Sharon, Windsor County, Vermont. Sang bata pa sia, nagbalhin ang ila pamilya sa ginatawag na subong nga Manchester, sa weste nga bahin sang New York. Samtang nagapuyo sia didto sang tigpamulak sang 1820, nga nagaedad katorse anyos, naeksperiyensyahan niya ang iya una nga panan-awon sa diin ginbisitahan sia mismo sang Dios, nga Wala’y Katapusan nga Amay, kag Iya Anak nga si Jesucristo. Ginhambalan sia sa sining panan-awon nga ang matuod nga Simbahan ni Jesucristo nga ginpahamtang sa mga panahon sang Bag-ong Katipan, kag naghatag sang kabug-osan sang ebanghelyo wala na sa duta. Nagsunod ang iban pa nga diosnon nga mga pagpahayag sa diin gintudloan sia sang madamo nga anghel; ginpahayag sa iya nga ang Dios may pinasahi nga buluhaton nga ipahimo sa iya sa duta kag nga paagi sa iya ang Simbahan ni Jesucristo mapanumbalik sa duta.

Sa pagligad sang panahon, ginhatagan si Joseph Smith sang ikasarang paagi sa diosnon nga bulig sa paglubad kag pagbantala sang Libro ni Mormon. Sa sini man nga tion sia kag si Oliver Cowdery gin-ordinan ni Juan Bautista sa Pagkapari ni Aaron sang Mayo 1829 (tan-awa sa DK 13), kag pagkatapos gin-ordinan man sila sang dumaan nga mga Apostoles nga sanday Pedro, Santiago, kag Juan (tan-awa sa DK 27:12) sa Pagkapari ni Melquisedec. Nagsunod ang iban pa nga mga ordinasyon sa diin ang mga yabi sang pagkapari ginhatag nanday Moises, Elias, Elias, kag madamo pa nga dumaan nga mga propeta (tan-awa sa DK 110; 128:18, 21). Ining mga ordinasyon, sa pagkamatuod, pagpanumbalik sang diosnon nga awtoridad sa tawo sa duta. Sang ika-6 sang Abril 1830 sa idalom sang langitnon nga direksyon, ang Propetang si Joseph Smith nag-organisar sang Simbahan, kag gani ang matuod nga Simbahan ni Jesucristo sa liwat nagahikot bilang isa ka institusyon sa tunga sang katawhan nga may awtoridad sa pagtudlo sang ebanghelyo kag pagdumala sang mga ordinansa sang kaluwasan. (Tan-awa sa DK 20 kag sa Perlas nga Bilidhon, Joseph Smith—Kasaysayan 1.)

Ining sagrado nga mga rebelasyon nabaton bilang sabat sa pangamuyo sa mga tinion sang panginahanglan, kag nagresulta halin sa matuod-tuod nga mga sitwasyon sa kabuhi nga may kahilabtanan sa matuod-tuod nga mga tawo. Ang Propeta kag iya mga kaupod nagpangayo sang diosnon nga giya, kag ining mga rebelasyon nagapamatuod nga nabaton nila ini. Sa mga rebelasyon, makita ang pagpanumbalik kag amat-amat nga pagpahayag sang ebanghelyo ni Jesucristo kag ang pagsugod sang dispensasyon sang kabug-osan sang mga panahon. Ang pagpanglakaton sang Simbahan pa-weste halin sa New York kag Pennsylvania pakadto sa Ohio, sa Missouri, sa Illinois, kag sang ulihi sa Great Basin sang weste nga bahin sang Amerika kag ang tuman nga pagpangabudlay sang mga Santos sa pagtinguha nga mapasad ang Sion sa duta sa moderno nga mga panahon ginapakita man sa sining mga rebelasyon.

Pila sang una nga mga seksyon ang nagalakip sang mga butang parte sa paglubad kag pagbantala sang Libro ni Mormon (tan-awa sa mga seksyon 3, 5, 10, 17, kag 19). Ang pila ka ulihi nga mga seksyon nagapakita sang mga binuhatan sang Propetang Joseph Smith sa paghimo sang inspirado nga paglubad sang Biblia nga sa amo nga tion madamo sang mga seksyon nga nagaunod sang importante nga mga doktrina ang nabaton (tan-awa, halimbawa, sa mga seksyon 37, 45, 73, 76, 77, 86, 91, kag 132 nga ang tagsa sini may direkta nga kahilabtanan sa paglubad sang Biblia).

Sa mga rebelasyon, ang mga doktrina sang ebanghelyo ginpresentar nga may mga pagpaathag parte sa importante nga mga butang pareho sang kinaugali sang Pangulohan sang Dios, ang ginhalinan sang tawo, ang pagkamatuod ni Satanas, ang katuyoan sang kabuhi sa duta, ang kakinahanglanon sang pagkamatinumanon, ang kakinahanglanon sang paghinulsol, ang mga paghikot sang Balaan nga Espiritu, ang mga ordinansa kag mga paghikot parte sa kaluwasan, ang kapalaran sang duta, ang palaabuton nga mga kondisyon sang tawo pagkatapos sang Pagkabanhaw kag sang Paghukom, ang kawala’y katapusan sang relasyon sang mag-asawa, kag ang wala’y katapusan nga kinaugali sang pamilya. Sa amo man, ang amat-amat nga pagpahayag sang administratibo nga istraktura sang Simbahan ginapakita sa pagtawag sang mga obispo, sang Unang Pangulohan, sang Konseho sang Dose, kag sang Sitenta kag sa pagpahamtang sang iban pa nga nagapangulo nga mga palangakoan kag mga korum. Sa katapusan, ang testimonya nga ginhatag parte kay Jesucristo—sa Iya pagkadiosnon, Iya pagkahari, Iya pagkaperpekto, Iya gugma, kag Iya nagatubos nga gahum—nagahimo sining libro nga labing importante sa tawhanon nga pamilya kag “nagabili sa Simbahan sang katumbas sang mga manggad sang bilog nga Kalibutan” (tan-awa sa introduksyon sang DK 70).

Ang mga rebelasyon orihinal nga ginrekord sang mga tagsulat ni Joseph Smith, kag ang mga miyembro sang Simbahan malipayon nga nagpaambit sang sinulat nga mga kopya sa isa kag isa. Agud makahimo sing mas permanente nga rekord, ginkopya dayon sang mga tagsulat ining mga rebelasyon sa mga libro sang manuskrito nga gingamit sang mga lider sang Simbahan sa paghanda sa pag-imprinta sang mga rebelasyon. Ginkabig ni Joseph kag sang nauna nga mga Santos ang mga rebelasyon pareho sang ila pagkabig sa Simbahan: buhi, nagatubo, kag mapauswag pa gid sa dugang nga rebelasyon. Ginkilala man nila nga may di-hungod nga mga sala nga ayhan natabo paagi sa proseso sang pagkopya sang mga rebelasyon kag paghanda sang mga ini para sa pagbantala. Gani, isa ka komperensya sang Simbahan ang nagpangabay kay Joseph Smith sang 1831 nga “tadlongon inang mga sala ukon mga sayop nga mahimo niya matukiban paagi sa Balaan nga Espiritu.”

Pagkatapos nga marepaso kag matadlong ang mga rebelasyon, ang mga miyembro sang Simbahan sa Missouri nagsugod sa pag-imprinta sang libro nga gintig-ulohan A Book of Commandments for the Government of the Church of Christ (Isa ka Libro sang mga Kasugoan sa Pagdumala sang Simbahan ni Cristo), nga nagaunod sang madamo nga una nga mga rebelasyon sang Propeta. Apang, ining una nga pagtinguha sa pagbantala sang mga rebelasyon nauntat sang ginguba sang mga nagapanggamo nga guban ang imprintahan sang mga Santos sa Jackson County sang ika-20 sang Hulyo 1833.

Pagkatapos nga mabatian nila ang parte sa pagguba sang imprintahan sa Missouri, si Joseph Smith kag iban pa nga mga lider sang Simbahan nagsugod sang mga pagpanghanda sa pagbantala sang mga rebelasyon sa Kirtland, Ohio. Sa pagtadlong liwat sang mga sala, pagklaro sang mga pulong, kag pagkilala sang pag-uswag sang doktrina kag organisasyon sang Simbahan, si Joseph Smith ang nagdumala sang pagtadlong sang teksto sing pila ka rebelasyon agud ihanda ang mga ini sa pagbantala sang 1835 bilang ang Doctrine and Covenants of the Church of the Latter Day Saints (Doktrina kag mga Kasugtanan sang Simbahan sang mga Santos sa Ulihing mga Adlaw). Si Joseph Smith nag-awtorisar sang isa pa ka edisyon sang Doktrina kag mga Kasugtanan nga ginbantala pila lamang ka bulan pagkatapos nga ginpatay ang Propeta sang 1844.

Ginpakamahal sang nauna nga mga Santos sa Ulihing mga Adlaw ang mga rebelasyon kag ginkabig ang mga ini bilang mga mensahe halin sa Dios. Sa isa ka tion sang hingapusan nga bahin sang 1831, pila ka mga elder sang Simbahan ang naghatag sing hugot nga testimonya nga ang Ginuo nagpamatuod sa ila mga kalag sang kamatuoran sang mga rebelasyon. Ini nga testimonya ginbantala sa 1835 nga edisyon sang Doktrina kag mga Kasugtanan bilang sinulat nga testimonya sang Dose ka Apostoles:

Testimonya sang
Dose ka Apostoles sa Kamatuoran sang
Libro nga Doktrina kag mga Kasugtanan

Ang Testimonya sang mga Saksi sa Libro sang mga Kasugoan sang Ginuo, nga ang amo nga mga kasugoan Iya ginhatag sa Iya Simbahan paagi kay Joseph Smith Jr. nga ginpili sang tingug sang Simbahan para sa sining katuyoan:

Gani, handa kami sa pagpamatuod sa bilog nga kalibutan sang katawhan, sa tagsa ka tinuga sa ibabaw sang duta nga nagpamatuod ang Ginuo sa amon mga kalag paagi sa Balaan nga Espiritu nga ginpadala sa amon, nga ining mga kasugoan ginhatag paagi sa inspirasyon sang Dios, kag mapuslanon para sa tanan nga tawo kag matuod gid.

Ginahatag namon ining testimonya sa kalibutan, ang Ginuo bilang amon manugtabang; kag paagi sa grasya sang Dios nga Amay, kag Iya Anak nga si Jesucristo nga gintugotan kami nga maangkon ining pribilihiyo sa pagpamatuod sa kalibutan, nga ginakalipay gid namon, nga nagapangamuyo pirme sa Ginuo nga mangin mapuslanon ini sa mga anak sang katawhan sa sini nga paagi.

Ang mga ngalan sang Dose:

Thomas B. Marsh
David W. Patten
Brigham Young
Heber C. Kimball
Orson Hyde
William E. McLellin
Parley P. Pratt
Luke S. Johnson
William Smith
Orson Pratt
John F. Boynton
Lyman E. Johnson

Sa nagsunod nga mga edisyon sang Doktrina kag mga Kasugtanan, dugang pa nga mga rebelasyon ukon iban pa nga importante nga mga sinulatan ang gindugang suno sa pagbaton kag pag-ugyon sang awtorisado nga mga pagtililipon ukon mga komperensya sang Simbahan. Sa 1876 nga edisyon nga ginhanda ni Elder Orson Pratt sa idalom sang direksyon ni Brigham Young, naplastar ang mga rebelasyon sing pasunod kag natigayon ang bag-o nga mga introduksyon nga nagalakip sang mga pauna nga nagatandog sa kasaysayan.

Sugod sa 1835 nga edisyon, nalakip man ang serye sang pito ka leksyon sa teolohiya; ang mga ini gintig-ulohan Lectures on Faith (Mga Pamulongpulong sa Pagtuo). Ginhanda ang mga ini agud gamiton sa Eskwelahan sang mga Propeta sa Kirtland, Ohio halin 1834 tubtob 1835. Bisan pa nga mapuslanon para sa doktrina kag pagtudlo, ining mga pamulongpulong gindula sa Doktrina kag mga Kasugtanan halin pa sang 1921 nga edisyon bangod wala ginhatag ukon ginpresentar ang mga ini bilang mga rebelasyon sa bilog nga Simbahan.

Sa 1981 nga edisyon sa Ingles sang Doktrina kag mga Kasugtanan, tatlo ka dokumento ang ginlakip sa una nga tion. Ini ang mga seksyon 137 kag 138 nga nagapahayag sang mga tig-una nga mga prinsipyo sang kaluwasan para sa mga minatay; kag Opisyal nga Pahayag 2 nga nagapahibalo nga ang tanan nga nagakaangay nga lalaki nga miyembro sang Simbahan mahimo ordinan sa pagkapari bisan ano pa ang rasa ukon kolor.

Natadlong na sa tagsa ka bag-o nga edisyon sang Doktrina kag mga Kasugtanan ang nagligad nga mga kasaypanan kag may nadugang pa nga bag-o nga impormasyon partikular sa mga bahin sang kasaysayan sa mga introduksyon sang seksyon. Ginapasibo pa sa subong nga edisyon ang mga petsa kag mga ngalan sang mga lugar kag ginahimo ang iban pa nga mga pagtadlong. Ining mga pagbag-o ginhimo agud ipasanto ining kasulatan sa labing husto nga impormasyon sang kasaysayan. Ang iban pa nga espesyal nga mga bahin sining pinakabag-o nga edisyon nagalakip sang ginbag-o nga mga mapa nga nagapakita sang mayor nga mga lugar sa ibabaw sang duta kon diin nabaton ang mga rebelasyon, kag mas manami nga mga letrato sang makasaysayan nga mga lugar sang Simbahan, mga reperensia, mga introduksyon sang mga seksyon, kag mga pagpalip-ot sang mga topiko, nga tanan sini gindesinyo agud buligan ang mga bumalasa nga mahangpan kag magkalipay sa mensahe sang Ginuo nga ginhatag sa Doktrina kag mga Kasugtanan. Ang impormasyon sa mga introduksyon sang seksyon ginkuha halin sa Manuskrito sang Kasaysayan sang Simbahan kag sa ginbantala nga History of the Church (Kasaysayan sang Simbahan) (tingob nga ginatumod sa mga introduksyon bilang kasaysayan ni Joseph Smith) kag sa Joseph Smith Papers (Mga Dokumento ni Joseph Smith).