Seksyon 85
Rebelasyon nga ginhatag paagi kay Joseph Smith nga Propeta sa Kirtland, Ohio sang ika-27 sang Nobyembre 1832. Ini nga seksyon pinili nga bahin sa sulat sang Propeta kay William W. Phelps nga nagapuyo sa Independence, Missouri. Ginasabat sini ang mga pamangkot parte sinang mga Santos nga nagsaylo sa Sion apang wala nagtuman sang kasugoan nga ikonsagrar ang ila mga pagkabutang kag gani wala nakabaton sang ila mga panublion suno sa ginpahamtang nga sistema sa Simbahan.
1–5, Ang mga panublion sa Sion dapat mabaton paagi sa pagkonsagrar; 6–12, Isa nga gamhanan kag makusog ang magahatag sa mga Santos sang ila panublion sa Sion.
1 Tulumanon sang klerk sang Ginuo nga iya ginpili, ang magsulat kag magtipig sang kasaysayan, kag pangkabilogan nga rekord sang simbahan parte sa tanan nga butang nga nagakalatabo sa Sion, kag parte sa tanan sinang nagakonsagrar sang mga pagkabutang, kag nagabaton sang mga panublion sing legal halin sa obispo;
2 Kag amo man parte sa ila pamaagi sang pagpangabuhi, ila pagtuo, kag mga binuhatan; kag amo man parte sa mga tawo nga nagtalikod sa simbahan pagkatapos nga nabaton ang ila mga panublion.
3 Batok sa pagbuot kag kasugoan sang Dios nga malista upod sa katawhan sang Dios ang mga ngalan sinang wala nagabaton sang ila panublion paagi sa pagkonsagrar suno sa iya layi nga iya ginhatag sa pagpabayad sang iya katawhan sang ika-pulo agud ihanda sila para sa adlaw sang pagbalos kag pagsunog.
4 Kag indi man dapat pag-isulat kag imentinar ang lista sang ila kaliwatan ukon ibutang ini sa kon ano pa man nga mga rekord ukon kasaysayan sang simbahan.
5 Indi dapat masulat sa libro sang layi sang Dios ang ila mga ngalan, ukon ang mga ngalan sang ila mga amay, ukon ang mga ngalan sang ila mga anak, siling sang Ginuo sang mga Kasoldadohan.
6 Huo, ini ang siling sang mahinay diutay nga tingug nga nagahutik kag nagalapos sa tanan nga butang, kag sa masami nagapakurog sang akon mga tul-an sa pagpahayag sini sang iya kaugalingon nga nagasiling:
7 Kag matabo ini nga ako, nga Ginuong Dios, magapadala sing isa nga gamhanan kag makusog nga nagakapot sang setro sang gahum sa iya kamot, nga nasul-oban sang kasanag bilang biste, nga ang baba magahambal sang mga pulong, wala’y katapusan nga mga pulong; kag ang iya tagipusuon mangin tuburan sang kamatuoran agud ipahamtang sa kahusay ang panimalay sang Dios, kag agud areglahon paagi sa pagbahin-bahin sang mga lote nga panublion sang mga santos nga ang mga ngalan, kag ang mga ngalan sang ila mga amay, kag ila mga anak nalista sa libro sang layi sang Dios;
8 Apang ang ina nga tawo nga gintawag sang Dios kag ginpili, nga nagauntay sang iya kamot agud punggan ang kaban sang Dios, mahulog sa pana sang kamatayon pareho sing isa ka kahoy nga gin-igo sing matalom nga kilat.
9 Kag sila tanan nga wala nasulat sa libro sang handumanan indi makabaton sang panublion sa adlaw sang paghukom kundi bulagon sila halin sa mga sumulunod sang Dios, kag hatagan sang ila bahin upod sang mga indi tumuluo, nga sa diin ang mga tawo maganguyngoy kag magabagrot sang mga ngipon.
10 Ining mga butang wala ko ginahambal halin sa akon kaugalingon; gani, bangod ang Ginuo nagahambal, pagatumanon man niya.
11 Kag sila nga yara sa Mataas nga Pagkapari nga ang mga ngalan wala nasulat sa libro sang layi ukon nasalapoan sila nga nagtalikod sa simbahan, ukon gin-ekskomunikar halin sa simbahan, kag amo man ang sa mas manubo nga pagkapari ukon ang mga miyembro, sa adlaw sang paghukom indi makabaton sang panublion upod sa mga santos sang Labing Mataas;
12 Gani, pagakabigon sila pareho sa mga anak sang pari nga nasulat sa ika-duha nga kapitulo kag ika-61 kag 62 nga mga bersikulo sang Esdras.