Seksyon 74
Rebelasyon nga ginhatag kay Joseph Smith nga Propeta sa Wayne County, New York sang tuig 1830. Bisan antes pa ginpahamtang ang Simbahan, may nagluntad na nga mga pamangkot parte sa husto nga pamaagi sang pagbunyag nga nagtulod sa Propeta sa pagpangita sang mga sabat parte sini. Nagasiling sa kasaysayan ni Joseph Smith nga ining rebelasyon isa ka pagpaathag sang 1Â Mga Taga-Corinto 7:14, isa ka balaan nga kasulatan nga masami ginagamit sa pagpakamatarong sang bunyag sang magagmay nga kabataan.
1–5, Si Pablo naglaygay sa Simbahan sang iya panahon nga indi pagtumanon ang mga layi ni Moises; 6–7, Ang magagmay nga kabataan balaan kag natinloan paagi sa Pagbayad-Sala.
1 Kay ang wala nagatuo nga bana ginapakabalaan paagi sa asawa, kag ang wala nagatuo nga asawa ginapakabalaan paagi sa bana; kay kon indi di-matinlo ang inyo mga anak apang subong balaan na sila.
2 Karon, sa panahon sang mga apostoles ang layi sang sirkumsisyon ginhimo sa tanan nga Judio nga wala nagapati sa ebanghelyo ni Jesucristo.
3 Kag natabo ini nga may nagluntad nga dako nga pagbinaisay sa tunga sang mga tawo parte sa layi sang sirkumsisyon bangod ang wala nagatuo nga bana luyag nga ang iya mga anak dapat paagyon sa sirkumsisyon kag mapaidalom sa mga layi ni Moises nga ang amo nga layi natuman na.
4 Kag natabo ini nga ang mga anak nga ginpadako sa idalom sang mga layi ni Moises nagsunod sa mga tradisyon sang ila mga amay kag wala nagapati sa ebanghelyo ni Cristo nga paagi sini nangin di-balaan sila.
5 Gani, kay sa sini nga rason nagsulat ang apostoles sa simbahan nga nagahatag sa ila sang kasugoan, indi halin sa Ginuo kundi halin sa iya mismo nga ang isa ka tumuluo indi dapat nga makasal sa isa ka indi tumuluo luwas nga ang mga layi ni Moises dulaon na sa tunga nila,
6 Agud nga ang ila mga anak magpabilin nga wala napaagi sa sirkumsisyon; kag agud nga ang tradisyon nga nagasiling nga ang magagmay nga kabataan di-balaan madula na kay ginpatuman ini sa mga Judio;
7 Apang balaan ang magagmay nga kabataan nga natinloan paagi sa pagbayad-sala ni Jesucristo; kag amo ini ang kahulugan sang balaan nga mga kasulatan.