Seksyon 49
Rebelasyon nga ginhatag paagi kay Joseph Smith nga Propeta kanday Sidney Rigdon, Parley P. Pratt, kag Leman Copley sa Kirtland, Ohio sang ika-7 sang Mayo 1831. Ginbaton ni Leman Copley ang ebanghelyo apang nagpati sa gihapon sa pila ka mga panudlo sang mga Shakers (United Society of Believers in Christ’s Second Appearing [Nagaisang Katilingban sang mga Tumuluo sa Ika-duha nga Pagpakita ni Cristo]) nga sa diin nangin kabahin sia sadto. Ang pila sang mga ginapatihan sang mga Shakers amo nga ang Ika-duha nga Pagkari ni Cristo natabo na kag nagpakita na sia sa dagway sing isa ka babayi nga si Ann Lee. Wala nila ginkabig nga importante ang bunyag paagi sa tubig. Ginsikway nila ang pag-asawahay kag nagpati sa kabuhi nga bug-os nga selibasiya. Ang pila ka mga Shakers nagdumili man sang pagkaon sang karne. Bilang introduksyon sa pagsulat sining rebelasyon, ang kasaysayan ni Joseph Smith nagasiling: “Agud nga mahangpan sing mas lubos ang parte sa topiko, nagpamangkot ako sa Ginuo, kag nakabaton sang masunod.” Ginabais sang rebelasyon ang pila sing tig-una nga mga konsepto sang grupo sang Shaker. Ang ginsambit nga mga kauturan nagdala sang kopya sang rebelasyon sa komunidad sang Shaker (malapit sa Cleveland, Ohio) kag ginbasa ang kabug-osan sini sa ila apang wala nila ini ginbaton.
1–7, Ang adlaw kag ang oras sang pagkari ni Cristo indi gid mahibaloan tubtob nga magkari na Sia; 8–14, Ang mga tawo kinahanglan maghinulsol, magpati sa ebanghelyo, kag magtuman sang mga ordinansa agud makabaton sang kaluwasan; 15–16, Ang pag-asawahay gin-ordin sang Dios; 17–21, Ang pagkaon sang karne ginatugotan; 22–28, Ang Sion magauswag kag ang mga Lamanhon magabuskad pareho sang rosas antes sang Ika-duha nga Pagkari.
1 Dungga ang akon pulong, Sidney, kag Parley, kag Leman, mga alagad ko; kay tan-awa, sa pagkamatuod ginasiling ko sa inyo nga ginahatagan ko kamo sing isa ka kasugoan nga maglakat kamo kag iwali sa mga Shakers ang akon ebanghelyo nga inyo nabaton, sa amo man nga nabaton ninyo ini.
2 Tan-awa, ginasiling ko sa inyo nga luyag nila mahibaloan ang kamatuoran apang bahin lamang kag indi ang tanan kay indi sila matarong sa akon panulok kag kinahanglan nga maghinulsol.
3 Gani, ginapadala ko kamo, Sidney kag Parley, mga alagad ko, nga magwali sang ebanghelyo sa ila.
4 Kag ang akon alagad nga si Leman dapat ordinan sa sining buluhaton agud nga mapaintiende niya sila indi suno sa sinang iya natun-an sa ila kundi suno sa sinang igatudlo ninyo sa iya, mga alagad ko; kag sa iya paghimo sini pakamaayohon ko sia, indi gani indi sia magmadinalag-on sa pagwali sang ebanghelyo sa mga Shakers.
5 Ini ang siling sang Ginuo; kay ako ang Dios, kag ginpadala ko ang akon Bugtong nga Anak sa kalibutan sa pagtubos sang kalibutan, kag nagmando nga sia nga nagabaton sa iya maluwas, kag sia nga wala nagabaton sa iya pagasilotan—
6 Kag ginhimo nila sa Anak sang Tawo ang ila luyag; kag nabaton niya ang iya gahum sa tuo nayon nga kamot sang himaya sang Dios, kag subong nagahari sa kalangitan, kag magahari tubtob nga magpanaog sia sa duta agud tasakon ang mga kaaway sa idalom sang iya mga tiil sa diin ang amo nga tion malapit na—
7 Ako, nga Ginuong Dios, naghambal sini; apang ang natalana nga oras kag adlaw wala sing may nakahibalo, bisan pa ang mga anghel sa langit, kag indi sila makahibalo tubtob nga magkari na sia.
8 Karon, buot ko nga ang tanan nga tawo maghinulsol kay ang tanan yara sa idalom sang sala luwas sinang mga ginpain ko sa akon kaugalingon nga balaan nga mga tawo nga wala kamo makahibalo.
9 Karon, ginasiling ko sa inyo nga ginpadala ko sa inyo ang akon wala’y katubtuban nga kasugtanan bisan pa inang halin sa ginsuguran.
10 Kag inang akon ginpromisa natuman ko, kag ang mga nasyon sang duta magaduko sa sini; kag kon indi sila magduko sa ila mismo kagustuhan, mahulog sila kay inang matinaastaason pakauboson paagi sa puwersa.
11 Gani, ginahatagan ko kamo sing isa ka kasugoan nga maglakat kamo sa tunga sining katawhan, kag magsiling sa ila pareho sa akon apostoles sang dumaan nga panahon nga ang ngalan si Pedro:
12 Magpati sa ngalan sang Ginuong Jesus nga sadto yara sa duta, kag magakari, ang ginsuguran kag ang katapusan;
13 Maghinulsol kag magpabunyag sa ngalan ni Jesucristo suno sa balaan nga kasugoan para sa kapatawaran sang mga sala;
14 Kag kon sin-o man ang nagahimo sini magabaton sang dulot sang Balaan nga Espiritu paagi sa pagtakdong sang mga kamot sang mga elder sang simbahan.
15 Kag sa liwat, sa pagkamatuod ginasiling ko sa inyo nga kon sin-o man ang nagadumili sang pag-asawahay wala gin-ordin sang Dios kay ang pag-asawahay gin-ordin sang Dios sa tawo.
16 Gani, ginatugot sang layi nga isa lang ang iya asawa, kag sila nga duha mangin isa ka unod, kag ini tanan agud nga ang duta magatuman sang katuyoan sang pagtuga sini;
17 Kag agud nga mapuno ini sang kadamuon sang tawo suno sa pagtuga sa iya sang Dios antes ginhimo ang kalibutan.
18 Kag kon sin-o man ang nagadumili sa pagkaon sang mga karne, nga ang tawo indi dapat magkaon sini wala gin-ordinan sang Dios;
19 Kay tan-awa, ang mga kasapatan sang kapatagan kag ang mga kapispisan sang kahanginan, kag inang nagagwa halin sa duta ginhatag sang Dios para gamiton sang tawo bilang pagkaon kag panapton, kag agud nga mangin bugana sia.
20 Apang wala ginatugot nga ang isa ka tawo mag-angkon sing labaw sangsa iban; gani, ang kalibutan nahamtang sa sala.
21 Kag kalisud sa tawo nga nagapaagay sang dugo sang mga sapat ukon nagausik sang ila unod kag wala sang kinahanglan sini.
22 Kag sa liwat, ginasiling ko sa inyo nga ang Anak sang Tawo magakari indi sa dagway sing isa ka babayi ukon sing isa ka lalaki nga nagapanglakaton sa duta.
23 Karon, indi magtalang kundi magpadayon sa kalig-on kag katampad nga nagapaabot sang pag-uyog sang kalangitan, kag sang pagkurog kag paghabyog sang duta pareho sang hubog nga tawo, kag sang pag-alsa sang mga kapatagan, kag pag-usmod sang kabukiran, kag pagtapan sang mga lugar nga kudol-kudol—kag ini tanan matabo kon ang anghel magapatunog sang iya trumpeta.
24 Apang antes mag-abot ang dako nga adlaw sang Ginuo, si Jacob magauswag sa kamingawan, kag ang mga Lamanhon magabuskad pareho sang rosas.
25 Ang Sion magauswag sa mga bungyod kag magasinadya sa mga bukid, kag magatipon sa lugar nga akon ginpili.
26 Tan-awa, ginasiling ko sa inyo, maglakat pareho sa akon ginsugo sa inyo; maghinulsol sang tanan ninyo nga sala; magpangayo kag magabaton kamo; magpanuktok kag pagabuksan ini sa inyo.
27 Tan-awa, magauna ako sa inyo kag mangin yara sa ulihi ninyo; kag yara ako sa tunga ninyo, kag indi kamo mapaslawan.
28 Tan-awa, ako si Jesucristo, kag magakari ako sing madasig. Kag gani amo sini. Amen.