1 Ia oqo, raica, au sa kaya vei iko, me baleta ni ko a solia na veika volai ka a tu vei iko na kaukauwa mo vakadewataka kina ena veivuke ni Urimi kei na Cumimi, ki na ligana e dua na tamata ca, ko sa vakayalia kina.

2 Ka ko sa vakayalia talega kina na nomu isolisoli ena gauna vata ko ya, ka sa lecaika kina na nomu vakasama.

3 Ia, sa vakalesui tale vei iko na ka oqo; o koya qarauna mo yalodina ka tomana tikoga me yacova ni ko sa vakaotia rawa na cakacaka ni vakavakadewa me vaka ga na nomu a tekivuna.

4 Mo kakua ni cici vakatotolo se cakacaka vakaukauwa me sivia na nomu igu kei na veigacagaca sa vakarautaki tu me rawa kina vei iko mo vakavakadewa; ia mo gumatua tiko ga me yacova na ivakataotioti.

5 Mo dau masu tikoga, me rawa ni nomu na qaqa; io, mo rawa ni qaqa kina vei Setani, ka me rawa ni ko drovaka kina na ligadra na italai nei Setani ka tarova tiko na cakacaka oqo.

6 Raica, era sa segata me ra vakarusai iko; io, ko koya sara mada ga na tamata ko sa vakabauta sa segata talega me vakarusai iko.

7 A ka oqo au sa vakatokai koya kina me tamata dau caka ca, ni sa segata ko koya me kauta tani na veika sa nuitaki vei iko; io sa segata tale tikoga me vakarusa na nomu isolisoli.

8 Ia me vaka ni ko sa solia ki ligana na itukutuku volai ena liga, raica, sa ra taura mai kina vei iko na tamata dau caka ca.

9 O koya, ko sa solia tani kina, io, na veika sa tabu, vei ira na tamata ca.

10 Ia, raica, ko Setani sa tugana ki na lomadra me ra vukica na vosa ko sa vakavuna me volai, se me vaka ko sa vakadewataka, ka sa cawadru tani mai ligamu.

11 Ia raica, au sa kaya vei iko, baleta ni ra sa vukica na vosa, sa duatani kina na kena ibalebale mai na veika ko sa vakadewataka se vakavuna me volai;

12 Ia, ena sala oqo, sa segata na tevoro me biuta e dua na ilawaki qaseqase, me vakarusa kina na cakacaka oqo;

13 Me vaka ni sa tugana ki na lomadra me ra kitaka vakaoqo, ena nodra lasu era na kaya kina ni ra sa toboki iko ena vosa ko mai lasutaka tiko ni ko vakadewataka.

14 Ia, au sa kaya vakaidina vei iko, au na sega ni vakatarai Setani me vakayacora na nona inaki ca ena veika oqo.

15 Ia raica, sa uqeta na lomadra ko koya me ra veretaki iko mo vakatovolea na Turaga na nomu Kalou, ena nomu kerea mo vakadewataka vou tale.

16 Ia, raica, era sa kaya ka nanuma e lomadra—Keimami raica mada ke sa solia na Kalou vua na kaukauwa me vakavakadewa; kevaka e vakakina, ena solia tale vua ko koya na kaukauwa;

17 Ia kevaka sa solia tale vua na Kalou na kaukauwa, se kevaka sa vakavakadewa tale ko koya, se, ena dua tale na kena vosa, kevaka e tautauvata tikoga na vosa e vakayagataka, raica, sa tiko rawa oqo vei keda, ka da sa vukica oti tu;

18 O koya era na sega kina ni tautauvata, ka da na kaya ni sa lasu ko koya ena nona vosa, ka ni sega na nona isolisoli, ka sega talega na nona kaukauwa;

19 O koya eda na vakarusai koya, kei na cakacaka talega; ka da na kitaka oqo me da kakua ni madua kina mai muri, ia ena vakalagilagi keda ko vuravura.

20 E dina, e dina, au sa kaya vei iko, ni sa lewa tu na lomadra ko Setani; a sa vakayavalati ira sara me ra caka cala ka vorata na veika vinaka kecega;

21 Raica sa ca vakalevu na lomadra, ka sa sinai ena ivalavala ca kei na itovo vakasisila; era sa domona na butobuto mai na rarama, baleta ni sa ca na nodra ivalavala; o koya era sa sega ni kereai kina vei au.

22 Sa vakayavalati ira tiko ga ko Setani, me rawa ni kauta kina na yalodra ki na rusa.

23 O koya oqo sa navuca kina e dua na ilawaki qaseqase, ka nanuma ni na vakarusa kina na cakacaka ni Kalou; ia au na tarogi ira ena ka oqo; io era na vakamaduataki ka cudruvi kina ena siga ni veilewai.

24 Io, sa vakayavalata na lomadra me ra cudruvaka na cakacaka oqo.

25 Io, sa kaya vakaoqo vei ira: Lawaki ka wawa me da toboki ira, me ra rusa kina; raica, sa sega ni cala oqo. Io sa cavilaki ira, ka kaya vei ra ni sega ni ivalavala ca me ra lasu, me coriti kina e dua ena lasu, me rawa ni ra vakarusai koya kina.

26 Ia sa cavilaki ira, ka liutaki ira tikoga me yacova ni sa yarataka sobu na yalodra ki eli; raica e sa vakavuna me ra coko tale ena icori era a birika.

27 Ia sa lako cake ka lako sobu, sa veilakoyaki vaka ka vaka e vuravura, ka segata me vakarusa na yalo ni tamata.

28 E dina, e dina, au sa kaya vei iko, ena ca ko koya sa lasu me veivakasewasewani kina baleta ni nanuma ni a lasu e dua tale me veivakasewasewani, ni veika vaka ko ya sa sega ni tarovi kina na lewa dodonu ni Kalou.

29 Ia oqo, raica, era sa vukica na veivosa oqo, baleta ni sa kaya ko Setani vei ira: Sa lawakitaki kemudou ko koya—ia sa cavilaki ira vakaoqori me ra caka cala, ka sagai kemuni mo ni vakatovolea na Turaga na nomuni Kalou.

30 Raica, au sa kaya vei iko, mo kakua sara ni vakadewataka tale na veivosa ka sa kaliraki tani mai ligamu;

31 Ia, raica, era na sega sara ni rawata na nodra inaki ca ena lasu ni veivosa ko ya. Ia, raica, kevaka ko na vakayagataka na vosa vata ga koya era na tukuna ni ko sa lasu, ko lasutaka na nomu vakavakadewa, ia ko sa na saqati iko ga vakataki iko.

32 Ia, raica, era na vakatetea yani na ka oqo, ena vakaukauwataka ko Setani na lomadra na tamata ka vakayavalata me ra cudruvi iko, ka ra na sega ni vakabauta na noqu vosa.

33 Ia sa nanuma ko Setani me vakamalumalumutaka na nomu ivakadinadina ena itabatamata oqo, me kakua kina ni basika mai na cakacaka oqo ena itabatamata oqo.

34 Ia raica, sai koya oqo na yalomatua, me vaka niu sa vakaraitaka vei iko na yalomatua, ka solia vei iko na ivakaro me baleta na veika oqo, oqo na ka mo na kitaka, kakua ni vakatakila ki vuravura kecega me yacova ni ko sa vakacavara na cakacaka ni vakavakadewa.

35 Mo kakua ni kurabui niu sa kaya oqo vei iko: Sai koya oqo na yalomatua, kakua ni vakatakila ki vuravura—niu sa kaya, kakua ni vakatakila ki vuravura, mo na maroroi kina.

36 Raica, Au sega ni kaya mo na kakua ni vakaraitaka vei ira na yalododonu;

37 Ia me vaka ni sa dredre mo lewa na tamata yalododonu, se ni sa dredre mo kila na tamata dau caka ca mai na yalododonu, o koya kau sa kaya kina vei iko mo toka lo ka kakua mada ni vakatakila me yacova niu sa kila ni sa ganita me vakatakilai yani ki vuravura na ka oqo.

38 Ia oqo, au sa kaya vakaidina vei iko, ni itukutuku ni veika kece ko sa vola, ka sa yali mai na ligamu, e ceuti tale tu ga ena peleti i Nifai;

39 Io, ko a nanuma ni a tukuni ena itukutuku volai ena liga ko ya, ni sa tu na kena itukutuku matata cake na veika oqo ena peleti i Nifai.

40 Ia oqo, me vaka ni matata cake na kena itukutuku ka ceuti tu ena peleti i Nifai me baleta na veika, ena noqu yalomatua, au na kauta mai ki na nodra kilaka na tamata ena itukutuku oqo—

41 O koya, mo na vakadewataka na veika ka ceuti tu ena peleti i Nifai, me yacova sara na gauna ni lewa i Penijamini na tui; se me yacova na vanua sa yala toka kina na nomu vakavakadewa, ko se maroroya tiko;

42 Ia raica, mo na tukuna ni sa ivolatukutuku ni Nifai; au sa kitaka oqo me’u vakamaduataki ira kina era sa vakatanitaka na noqu vosa.

43 Io au na sega ni vakatara me ra vakarusa na noqu cakacaka; io, au na vakaraitaka vei ira ni noqu yalomatua e uasivia sara na ilawaki qaseqase ni tevoro.

44 Raica, sa tiko wale ga vei ira e dua na kena iwase, se dua na ivakalekaleka ni itukutuku i Nifai.

45 Raica, e vuqa sara na ka era ceuti tu ena peleti i Nifai era vakamatatataka vinaka na noqu kosipeli; o koya oqo sa noqu lewa yalomatua, mo sa na vakadewataka na itukutuku mai na itekivu ni peleti i Nifai, ka vakarautaki yani ena vuku ni cakacaka oqo.

46 Ia, raica, na vo kece ni cakacaka oqo e tiko kece kina na veitiki ni noqu kosipeli ka ra a masuta na noqu parofita yalododonu, io, kei ira talega na noqu tisaipeli, me vakatakilai vei ira na tamata oqo.

47 Kau sa qai kaya vei ira, ni dodonu me soli vei ira me vaka na nodra vakabauta ena nodra masu;

48 Io, ka sa vakaoqo na nodra vakabauta—ni noqu kosipeli, kau a vakatakila vei ira me ra vunautaka ena nodra gauna, de na qai lako mai vei ira na wekadra na Leimanaiti, kei ira kece era sa yaco me ra Leimanaiti me baleta na nodra veileti.

49 Ia oqo, e sega ni o koya wale ga o ya—na nodra vakabauta ena nodra masu sai koya me na vakatakilai talega na kosipeli oqo, kevaka e rawa vei ira kecega era na mai tawana na vanua oqo;

50 Raica era sa mai biuta kina e dua na veivakalougatataki ena vanua oqo ena nodra masu, ko ira kecega ena vanua oqo era na vakabauta na kosipeli oqo era na rawata na bula tawamudu:

51 Io, me na tu vakarawarawa ga vei ira na veimatanitu, veimataqali, duivosavosa se tamata kecega.

52 Ia oqo, raica, mai na nodra vakabauta ena nodra masu au na vakatakila kina na tiki ni noqu kosipeli me ra kila na noqu tamata. Raica, au sa sega ni vakatakila mai me vakarusa na veika era sa taukena, ia me tarai cake ga kina.

53 A ka oqo au sa kaya kina: Kevaka era sa sega ni vakaukauwataka na lomadra na itabatamata oqo, au na tauyavutaka na noqu lotu ena kedra maliwa.

54 Ia oqo au sa sega ni tukuna meu vakarusa kina na noqu lotu, ia au sa tukuna meu tara cake kina na noqu lotu;

55 O koya, ko ira kecega na lewe ni noqu lotu me ra kakua ni rere, ni sai ira sa vakaoqo era na rawata na matanitu vakalomalagi.

56 Ia ko ira era sa sega ni rerevaki au, ka sega ni muria na noqu ivakaro ia era sa vakaduria na nodra lotu vakai ira me ra rawa iyau kina, io, kei ira kece era sa caka ca ka tara cake na matanitu ni tevoro—io, e dina, e dina, au sa kaya vei iko, sai ira oqori kau na vakararawataki ira, ka vakavuna me ra rere ka sautaninini vakaidina.

57 Raica, koi Au ko Jisu Karisito, na Luve ni Kalou. Au sa lako mai vei ira na kai noqu, ka ra qai sega ni ciqomi au na kai noqu.

58 Koi Au na rarama sa cilava na butobuto, ia na butobuto sa sega ni kunea.

59 Sai Au sa kaya—vei ira na noqu tisaipeli, e so tani tale na Noqu sipi era sa sega ni tiko ena bai oqo—ka vuqa e kea era sa sega ni kila na ibalebale ni noqu vosa.

60 Ia au na vakatakila vei ira na tamata oqo ni tiko dina e so tale na noqu sipi, ka ra sa taba ni mataqali i Jekope;

61 Ia au na vakatakila mai na cakacaka e veivakurabuitaki, era a vakayacora ena yacaqu;

62 Io, au na vakatakila tale ga mai na noqu kosipeli ka a vunautaki vei ira, io, raica, era na sega ni cakitaka na veika ko sa ciqoma, ia era na tara cake, ka vakavotuya mai na veitikina dina ni noqu ivunau, io, na ivunau taudua ga ka tiko vei au.

63 Au sa kitaka na ka oqo meu vakadeitaka kina na noqu kosipeli, me kakua soti kina na veileti; io, ko Setani sa vakayavalata na lomadra na tamata ki na veileti ena veitikina dina ni noqu ivunau; ena veika oqo era sa cala kina, ni ra sa vakatanitaka na ivolanikalou ka sega ni kila na kena ibalebale.

64 O koya, au na vakatakila vei ira na veika e vuqa sa vuni tu;

65 Ia, raica, au na vakasoqoni ira vata me vaka na toa yalewa sa vakasoqoni ira na luvena e ruku ni tabana, kevaka era sa sega ni vakaukauwataka na lomadra;

66 Io, kevaka era na lako mai, me ra lako mai, ka gunuva wale ga na wai ni bula.

67 Raica, oqo na noqu ivunau—ko koya sa veivutuni ka lako mai vei au, sai koya na lewe ni noqu lotu.

68 Ia ko koya yadua sa vakuria se musuka na ka oqo, sa sega ni noqu ko koya, ia sa noqu meca; o koya sa sega kina ni lewe ni noqu lotu.

69 Ia oqo, raica, ko koya yadua sa lewe ni noqu lotu, ka vosota tiko ena noqu lotu me yacova na ivakataotioti, sai koya ena yavutaki ena noqu uluvatu, ena sega ni rawati koya na matamata ki eli.

70 Ia oqo, mo nanuma na nona vosa ko koya na vu-ni-bula kei na rarama kei vuravura, na nomu Dauveivueti, na nomu Turaga, ka nomu Kalou. Emeni.