Wase 46
Na veika sa vakatakilai yani mai vei Josefa Simici na Parofita, me tukuna ki na lotu, mai Katiladi, Oaio, ena 8 ni Maji, 1831. Ena veigauna taumada oqo ni Lotu, e se bera ni tauyavutaki rawa e dua na ivalavala tudei ni kena liutaki na veisoqoni ni Lotu. Ia sa vakabau raraba tu ga me ra tiko wale ga ena soqoni ni sakaramede kei na soqoni ni lotu ko ira na lewe ni lotu kei ira era sa vakadikeva tiko vagumatua na Lotu. E qai vakaraitaki mai ena ivakatakila oqo na nona inaki na Turaga me baleta na kena cicivaki ka liutaki na soqoni vakaoqori kei na Nona idusidusi ena vakasaqarai kei na kilai ni isolisoli ni Yalo.
1–2, Me ra liutaka na veisoqoni na italatala qase ni lotu me vaka na veivakauqeti ni Yalo Tabu; 3–6, Me ra kakua ni vakuai ena lotu ni sakaramede ko ira sa vakasaqara tiko na dina; 7–12, Kerea vua na Kalou ka vakasaqara na isolisoli ni Yalo; 13–26, Sa tuvai e so na isolisoli oqori; 27–33, Sa soli na kaukauwa vei ira na iliuliu ni lotu me ra rawa ni kila na isolisoli ni Yalo.
1 Dou vakatudaliga, oi kemudou na tamata ena noqu lotu; niu sa kaya vakaidina vei kemudou, sa tukuni vei kemudou na veika oqo me yaga vei kemudou, ka mo dou vuku kina.
2 Ia e dina ga ni sa tu na veika sa volai, ia sa dau soli tu vei ira na qase ni noqu lotu mai na ivakatekivu, ka na vaka tu ga kina, me ra liutaka na soqoni me vaka na veidusimaki kei na veituberi ni Yalo Tabu.
3 Ia dou sa vakaroti mo dou kakua sara ni vakasava tani e dua mai na nomudou soqoni dola raraba sa caka e matai vuravura.
4 Dou sa vakaroti talega mo dou kakua ni vakasava tani e dua na lewe ni lotu mai na nomudou soqoni ni sakaramede; ia, kevaka e dua sa talaidredre, me kakua mada ni vakaitavi kina me yacova ni sa veivutuni.
5 Kau sa kaya tale vei kemudou, dou kakua ni vakasava tani e dua sa vakasaqara tiko vagumatua na matanitu mai na nomudou soqoni ni sakaramede—au vosa tiko me baleti ira era sega ni lewe ni lotu.
6 Kau sa kaya tale vei kemudou, me baleta na nomudou soqoni ni veivakadeitaki, kevaka e tiko kina e dua e sega ni lewena na lotu, ka sa vakasaqara tiko vagumatua na matanitu, dou kakua ni vakasava tani.
7 Raica dou sa vakaroti mo dou kerea vua na Kalou na veika kecega, ko koya sa dau solia vakalevu; ia na veika sa vakadinadinataka vei kemudou na Yalo, mo dou kitaka sara ena savasava ni yalomudou, io mo dou lako vakadodonu e mataqu, ka nanuma tiko na vua ni nomudou vakabulai, ka vakayacora na ka kecega ena masumasu kei na vakavinavinaka, me kakua kina ni rawai kemudou na yalo e dauveivakacalai, se na ivunau ni tevoro, se na ivakaro ni tamata; raica e so sa vu mai vua na tamata ka so tale sa vu mai vua na tevoro.
8 Ia, dou qarauni kemudou vinaka, mo dou kakua ni vakacalai; dou vakasaqara vagumatua na isolisoli uasivi duadua mo dou kakua kina ni vakacalai, mo dou dau nanuma tikoga na inaki era a soli kina;
9 Ni’u sa kaya vakaidina vei kemudou, sa soli na veika oqo me yaga vei ira sa lomani au ka muria na noqu ivakaro kece sara, io vei koya sa segata sara me vakayacora; io me yaga vei ira kecega sa vakasaqara se kerea vei au, io vei ira sa sega ni kerea e dua na ivakatakilakila me ra rawata kina na nodra gagadre ca.
10 Ka dua tale, au sa kaya vakaidina vei kemudou, au gadreva mo dou dau nanuma tikoga, ka maroroya tikoga ena nomudou vakanananu na veisolisoli oqori, sa soli ki na lotu.
11 Raica sa sega ni rawata na isolisoli kecega na tamata yadua; ni sa vuqa tu na isolisoli, ka sa soli ki na tamata yadua mai vua na Yalo ni Kalou.
12 Sa soli e dua vei ira e so, ka dua tale vei ira e so tani, io me dui yaga vei ira.
13 Raica sa soli vei ira e so ena cakacaka ni Yalo Tabu, me ra kila ni sai Jisu Karisito na Luve ni Kalou, ka ni a vakoti ki na kauveilatai ena vuku ni ivalavala ca ni vuravura.
14 Sa soli vei ira e so tale, me ra vakabauta na nodra vosa; raica era na rawata na bula tawamudu kevaka era sa yalodina tiko ga.
15 Kei na dua tale, sa soli vei ira e so tale ena cakacaka ni Yalo Tabu, me ra kila na duidui ni itavi ni veiqaravi, me vaka sa vinaka vua na Turaga e duabau ga, me vaka sa donu vua na Turaga, me veiganiti kei na nona loloma uasivi, me vaka na kedra ituvaki na luve ni tamata.
16 Kei na dua tale, sa soli mai vua na Yalo Tabu vei ira eso me ra kila na duidui ni veicakacaka, se era sa mai vua na Kalou, me soli kina na veivakatakilai ni Yalo ki na tamata yadua me yaga vei ira kece.
17 Kei na dua tale, au sa kaya vakaidina vei kemudou, sa soli vei ira e so tale ena cakacaka ni Yalo ni Kalou, me ra kila na vosa ni yalomatua.
18 Ki vua tale e dua sa soli me kila na vosa ni kila ka, me ra vakavulici kina na tamata kecega me ra vuku ka kila ka.
19 Kei na dua tale, sa soli vei ira eso na vakabauta me ra vakabulai kina;
20 Ka vakakina vei ira tale eso sa soli kina na vakabauta me ra veivakabulai kina.
21 Ka dua tale, sa soli vei ira eso me ra caka mana;
22 Ka sa soli vei ira e so tale me ra parofisai;
23 Kei ira e so tale me ra kila na duidui ni isolisoli vakayalo.
24 Ka dua tale, sa soli vei ira eso me ra vosataka na dui vosavosa;
25 Ia sa soli vei ira e so tale me ra vakadewataka na vosa tani e so.
26 Raica sa vu mai vua na Kalou na veisolisoli kece oqo, io me yaga vei ira na luve ni Kalou.
27 Ka sa soli vua na bisopi ni lotu, ka vakakina vei ira sa lesia na Kalou ka tabaka me ra vakatawana na lotu ka me ra italatala qase ni noqu lotu, me na soli vei ira me ra kila na duidui ni veisolisoli oqori, de so vei kemudou sa kaya sa tu vua, ia sa sega ni vu mai vua na Kalou.
28 Ka na qai yaco, ko koya sa kerekere ena veivakauqeti ni Yalo, ena ciqoma ena Yalo;
29 Ia ena soli vei ira e so na isolisoli kece oqo, me dua kina na iliuliu, me rawa ni yaga vei ira kece na lewenilotu.
30 Ko koya sa kerekere ena veivakauqeti ni Yalo sa kerekere me vaka na inaki ni Kalou; ia ena rawata vakaidina na ka sa kerea.
31 Ka dua tale, au sa kaya vei kemudou, na veika kecega me vakayacori ena yacai Karisito, na veika kecega dou sa vakayacora ena Yalo Tabu;
32 Raica sa kilikili sara mo dou vakavinavinakataka vua na Kalou ena veivakauqeti ni Yalo, na veivakalougatataki kecega dou sa vakalougatataki kina.
33 Ia mo dou ivalavala savasava ka caka dodonu tikoga e mataqu. Io me vakakina. Emeni.