1 Na Vosa kei na nona iNaki na Turaga ena vuku ni Keba ni Isireli, ena nodra ilakolako ki na Ra.

2 Na tamata kece e Na Lotu i Jisu Karisito ni Yalododonu Edaidai, kei ira era na lako vata, me ra na cokonaki ki na veikabani eso, vata kei na dua na kena veiyalayalati kei na yalayala me ra na muria na ivakaro kei na lawa ni Turaga na noda Kalou.

3 Na veikabani yadua me cokonaki vata kei ira na turaga ni veiyadrau, na turaga ni yalimasagavulu, kei na turaga ni yatini, vata kei na dua na peresitedi kei rau na nona daunivakasala me rau liutaki ira, ena nodratou veidusimaki na iApositolo Le Tinikarua.

4 Ia me vakaoqo na noda veiyalayalati—me da bula muria na veicakacaka vakalotu ni Turaga.

5 Me ra vakarautaki ira vinaka na veikabani yadua ena ose, na qiqidreti, na kakana, isulu, kei na veika tale eso era rawata me baleta na ilakolako.

6 Ia ni ra sa cokonaki na veikabani me ra ia ena nodra igu, ka vakavakarau me baleti ira era na wawa tiko mai.

7 Na veikabani yadua, vata kei ira na nodra turaga kei na peresitedi, me ra lewa me lewe vica era rawa ni lako ena vulaitubutubu ka tarava; me ra qai digitaki e dua na iwiliwili vakarauta ni tamata nuitaki ka momoqaqa vinaka, me ra kauta na qiqidreti, na sorenikau, kei na iyaya ni teitei, me ra lako me vaka ni ra isevu ni tawa vanua ka vakarautaka na qele me teivaki na itei ni vulaitubutubu.

8 Me ra wasei vakatautauvata ki na veikabani, me vaka na wasewasei ni nodra iyauqaqa, me ra kauti ira na dravudravua, na dawai, na sega ni vakatamani, kei na nodra matavuvale o ira era sa lako ki na mataivalu, me kakua kina ni rogo yani vua na Turaga na nodra tagi na dawai kei na sega ni vakatamani me ra beitaki kina na tamata oqo.

9 Me ra vakarautaka tale ga na veikabani yadua na veivale, kei na iteitei me teivaki kina na kakana, me baleti ira e ra na tiko mai ena gauna oqo; ka sai koya oqori na nona inaki na Turaga me baleti ira na nona tamata.

10 Me ra solia na tamata yadua na nodra igu kei na nodra iyauqaqa me ra tokitaki kina na tamata oqo ki na vanua ena biuta kina na Turaga e dua na iteki kei Saioni.

11 Ia kevaka dou sa vakayacora oqo ena loma e savasava, ena yalodina, dou na vakalougatataki; dou na vakalougatataki ena nomudou qele ni manumanu yavaiva lalai, kei na nomudou qele ni manumanu yavaiva lelevu, kei na nomudou iteitei, kei na nomudou vale, kei na nomudou matavuvale.

12 Ia me rau cokonaka e dua na kabani na noqu tamata ko Esera T. Benisoni kei Irasitusi Sinou.

13 Ka rau cokonaka e dua na kabani ko Osoni Pereta kei Wilivote Uturavu na noqu tamata.

14 Me rau cokonaka talega e dua na kabani ko Amasa Laimeni kei Joji A. Simici na noqu tamata.

15 Ka lesia na peresitedi kei na turaga ni veiyadrau, ni yalimasagavulu kei na yatini.

16 Ia me ra lako yani na noqu tamata era sa lesi ka vakavuvulitaka na lomaqu, vei ira na yalododonu, me ra vakarau me ra lako ki na dua na vanua ni sautu.

17 Dou lako yani ka kitaka me vaka au sa vakarota vei kemudou, ka kakua ni rerevaka na nomudou meca; ni na sega vei ira na kaukauwa me ra tarova kina na noqu cakacaka.

18 Raica ena qai sereki ko Saioni ena gauna au sa lewa.

19 Ia kevaka e dua sa segata me vakalevulevui koya, ka sega ni vakasaqara na noqu ivakasala, ena sega vua na kena kaukauwa, ka na vakavotui na nona sesewa.

20 Dou vakasaqara; ka dina ena nomudou veiyalayalati vakataki kemudou; ka kakua ni kocova na nona ka na wekamu.

21 Dou maroroi kemudou mai na ivalavala ca ena kena sega ni cavuti walega na yaca ni Turaga, ni sai Au na Turaga na nomudou Kalou, io na nodra Kalou na nomudou qase, na Kalou i Eparaama kei Aisake kei Jekope.

22 Sai au sa kauti ira tani na luvei Isireli mai na vanua ko Ijipita; ia sa dodo tu na ligaqu ena veisiga mai muri, me’u vakabulai ira na noqu tamata, na Isireli.

23 Dou muduka na nomudou veileti vakataki kemudou; mo dou muduka na vosa veivakacacani vakataki kemudou.

24 Dou muduka na daumateni; ka me veivakatataki cake na nomudou vosa.

25 Kevaka ko kerea e dua na ka mai vua na wekamu, mo vakalesuya tale vua na ka ko kerea; ia kevaka ko sa sega ni vakasuka rawa, mo lako sara ka tukuna vua, me kakua ni cudruvi iko kina.

26 Kevaka ko kunea na ka sa vakayalia na wekamu, mo vakasaqarai koya sara vagumatua me yacova ni ko sa solia rawa vua.

27 Mo gumatua sara ena nomu maroroya na veika sa tu vei iko, mo dauveiqaravi vinaka kina; ni sa isolisoli soli wale ni Turaga na nomu Kalou, ia ko iko na nona dauveiqaravi.

28 Kevaka ko sa marau, vakacaucautaka na Turaga ena sere, ena ivakatagi, ena meke, ka vakakina ena masu ni vakacaucau kei na vakavinavinaka.

29 Kevaka ko sa yalorarawa, masuta na Turaga na nomu Kalou ena vakatakekere, me reki kina na yalomu.

30 Kakua ni rerevaki ira na nomu meca, ni ra sa tiko ena qeteqete ni ligaqu, ka’u na kitaka vei ira na veika au sa lewa.

31 Sa dodonu me ra vakatovolei ena ka kecega na noqu tamata, me ra vakavakarau kina me ra ciqoma na lagilagi e tu vei au me nodra, io na lagilagi kei Saioni; ia ko koya ena sega ni vosota rawa na veika rarawa, sa sega ni kilikili kaya na noqu matanitu.

32 Ko koya sa lecaika me vulica na vuku ena nona vakamalumalumutaki koya ka masuta na Turaga na nona Kalou, me dolavi na matana me raica, ka dolavi na daligana me rogoca;

33 Ni sa talai yani ki vuravura na Yaloqu me vakararamataki ira na yalomalumalumu ka yaloraramusumusu, ka me ra cudruvi na sega ni vakalou.

34 Era sa cati kemudou kei na nomudou ivakadinadina ko ira na wekamudou, io na matanitu sara mada ga sa vakasavi kemudou tani;

35 Ia oqo sa yaco mai na nodra veisiga ca, io na veisiga ni nodra rarawa, me vaka na yalewa sa taratara; ia ena levu cake na nodra rarawa kevaka era sa sega ni veivutuni, io, me totolo sara.

36 Ni ra a vakamatei ira na parofita, kei ira era a talai yani vei ira; ka ra sa vakadavea na dra tawacala, ka sa tagi mai na qele ka beitaki ira.

37 O koya mo dou kakua kina ni kurabui ena vuku ni veika oqo, ni dou se bera ni savasava sara; dou se bera mada kina ni rawa ni taura na noqu lagilagi; ia dou na raica kevaka dou sa yalodina ena muria na noqu vosa kecega ka’u sa solia vei kemudou, mai na gauna i Atama vei Eparaama, mai vei Eparaama ki vei Mosese, mai vei Mosese ki vei Jisu kei iratou na nona iapositolo, ka vakakina mai vei Jisu kei iratou na nona iapositolo ki vei Josefa Simici, o koya au sa kaciva mai vei ira na noqu agilosi, o ira na noqu italai dauveiqaravi, ka vakakina mai na domoqu mai lomalagi, me vakayacora na noqu cakacaka;

38 Na yavu a tura ko koya, ka qai yalodina tikoga; kau qai tauri koya vei au.

39 E vuqa era kurabuitaka na nona mate; ia sa kilikili me dregata ena nona dra na nona ivakadinadina, me vakarokorokotaki kina ko koya ka ra cudruvi na tamata caka ca.

40 Au a sega li ni vakabulai kemudou mai vei ira na nomudou meca, ka laiva kina vei kemudou e dua na ivakadinadina ena yacaqu?

41 Ia mo dou vakarorogo, na lewe ni noqu lotu; kei kemudou na italatala qase dou vakarorogo vata mai; koi kemudou sa ciqoma na noqu matanitu.

42 Dou gumatua ni muria na noqu ivakaro kecega, de na tau vei kemudou na cudru, ka lailai mai na nomudou vakabauta, ka rawai kemudou na nomudou meca. Me sa tini mada eke. Emeni ka Emeni.