Niadtong Marso 1, 1832, ang Ginoo mipadayag kang Joseph Smith sa pinadayag nga karon narekord diha sa Doktrina ug mga Pakigsaad 78. Niini nga pinadayag, ang Ginoo mimando sa Propeta sa pag-organisar og kompaniya (sa wala madugay nailhan isip United Firm) aron sa pagdumala sa mga balay tipiganan ug sa mga paningkamot sa pagmantala sa Simbahan. Ang Ginoo mihulagway usab sa mga panalangin nga madawat sa mga Santos kon mosunod sila sa sugo sa pagtukod niini nga kompaniya. Sa paningkamot nga maprotektahan kining gidumala sa Simbahan nga kompaniya gikan sa mga kaaway sa Simbahan, giilisan ang pipila sa mga pinulongan niini nga pinadayag sa dihang una kining gimantala sa 1835 nga edisyon sa Doktrina ug mga Pakigsaad. Sama pananglit, ang United Firm gitawag isip ang “kapunongan” o “nagkahiusa nga kapunongan.” Nianang sama nga higayon nga ang Ginoo misugo ni Joseph Smith sa pag-organisar sa United Firm, ang Ginoo mihatag sa mga pinadayag nga narekord diha sa Doktrina ug mga Pakigsaad 79–80. Niini nga mga pinadayag, ang Ginoo mitawag ni Jared Carter, Stephen Burnett, ug Eden Smith sa pagserbisyo isip mga misyonaryo.
Ang Ginoo misugo ni Propeta Joseph Smith sa pag-organisar sa United Firm
Ipataas ang gamay nga kantidad sa kwarta, ug ipangutana ang mosunod:
Sa unsang paagi ang kwarta gamiton para sa dautan nga mga katuyoan?
Sa unsang paagi ang kwarta gamiton sa pagpalambo og maayo nga mga kawsa?
Human makatubag ang mga estudyante, ipasabut nga niadtong Mayo 1831 ang Ginoo misugo nga usa ka balay tipiganan ang itukod aron mapundok ang sobra nga mga butang ug kwarta alang sa kaayohan sa mga kabus (tan-awa sa D&P 51). Duha ka balay tipiganan sa wala madugay gitukod: ang usa gidumala ni Sidney Gilbert sa Independence, Missouri, ug ang usa gidumala ni Newel K. Whitney sa Kirtland, Ohio. Niini nga responsibilidad, si Brother Gilbert ug Brother Whitney milihok isip mga tinugyanan sa Simbahan. Kini nga mga balay tipiganan mao ang mosangkap sa mga Santos sa gikinahanglang mga butang, samtang mokita usab og kwarta aron ipalit og mga yuta ug igasto sa pagmantala sa mga pinadayag nga nadawat ni Joseph Smith. Kini nga mga balay tipiganan motabang usab niadtong nanginahanglan (tan-awa sa D&P 72:10–12).
Aron matabangan ang mga estudyante nga makasabut sa konteksto sa pinadayag nga narekord diha sa Doktrina ug mga Pakigsaad 78, dapita ang usa ka estudyante sa pagbasa sa pasiuna niana nga seksyon sa 2013 nga edisyon sa mga kasulatan:
“Kini nga pinadayag orihinal nga nagsugo sa Propeta, Sidney Rigdon, ug Newel K. Whitney sa pagbiyahe ngadto sa Missouri ug sa pag-organisar sa mga paningkamot sa Simbahan sa pagnegosyo ug pagmantala pinaagi sa pagmugna og “kompaniya” nga modumala niini nga mga paningkamot, mokita og kwarta alang sa pag-establisar sa Zion ug alang sa kaayohan sa mga kabus. Kini nga kompaniya, nailhan isip ang United Firm, giorganisar niadtong Abril 1832 ug gibungkag niadtong 1834 (tan-awa sa seksyon 82). Human sa pagkabungkag niini, ubos sa direksyon ni Joseph Smith, ang mga pulong nga ‘sa mga buluhaton sa balay tipiganan alang sa mga kabus’ gipuli sa ‘pangnegosyo ug pangmantala nga mga establismento’ diha sa pinadayag, ug ang pulong nga ‘kapunongan’ gipuli sa pulong nga ‘kompaniya.’”
Siguroa nga makasabut ang mga estudyante nga diha sa Doktrina ug mga Pakigsaad 78, ang pulong nga kapunongan (tan-awa sa bersikulo 4) nagpasabut sa United Firm. Dapit ang usa ka estudyante sa pagbasa og kusog sa Doktrina ug mga Pakigsaad 78:3–4, ug hangyoa ang klase sa pagpangita kon unsa ang gitugot niini nga kompaniya, o kapunongan, nga mabuhat sa mga Santos.
Sumala sa bersikulo 4, unsa man ang kawsa [kahimoan] nga gusto sa Ginoo nga mouswag pinaagi sa pag-establisar niini nga kompaniya? (Ang kaluwasan sa katawhan.)
Unsa ang pipila ka mga paagi nga magamit ang kwarta sa pagpauswag sa kawsa sa kaluwasan?
Dapita ang usa ka estudyante sa pagbasa og kusog sa Doktrina ug mga Pakigsaad 78:5–6. Hangyoa ang klase sa pagsunod, nga mangita sa mga rason nganong ang Ginoo misugo sa Iyang mga Santos sa pagtabang sa “mga kabus sa [Iyang] mga katawhan” (D&P 78:3). Hangyoa ang mga estudyante sa pag-report sa ilang mga nakit-an.
Sa unsang paagi ang pagtabang sa mga kabus makatabang sa mga Santos nga mahimong “managsama diha sa yutan-on nga mga butang”?
Tingali kinahanglan nimong pahinumduman ang mga estudyante nga sa miagi nga pinadayag ang Ginoo mihulagway sa pagkasama sumala sa mga sirkumstansya, mga panginahanglan, ug mga gusto sa pamilya (tan-awa sa D&P 51:3). Busa, ang sugo nga mahimong managsama diha sa yutan-ong mga butang wala magpasabut nga ang tanan makabaton og parehas gayud nga gidaghanon sa mga kapanguhaan, apan hinoon nga ang matag pamilya adunay igo alang sa ilang mga panginahanglan ug mga gusto, sumala sa ilang indibidwal nga mga kahimtang.
Ipasabut ang mga pulong nga “langitnon nga mga butang” diha sa mga bersikulo 5–6.
Unsa kaha nga “langitnon nga mga butang” ang gitinguha sa Ginoo nga kita managsama?
Sa unsang paagi ang pagkamanagsama diha sa yutan-on nga mga butang nagtugot kanato nga managsama diha sa pag-angkon og langitnon nga mga butang?
Dapita ang usa ka estudyante sa pagbasa og kusog sa Doktrina ug mga Pakigsaad 78:7. Hangyoa ang klase sa pagsunod ug pagpangita og dugang nga rason nganong ang Ginoo misugo sa mga Santos sa pag-amuma sa mga kabus. Dapita ang mga estudyante sa pag-report sa ilang nakit-an.
Sa unsa nga mga paagi kaha nga ang pag-amuma sa mga kabus moandam sa mga Santos sa pagpanunod sa celestial nga gingharian?
Unsa nga baruganan ang atong makat-unan gikan niini nga bersikulo nga magamit nato karon? (Ang mga estudyante mahimong mogamit og lain-laing mga pulong, apan ang ilang mga tubag kinahanglang maghulagway sa mosunod nga baruganan: Ang pagkamasulundon sa mga sugo sa Ginoo mag-andam kanato nga adunay luna sa celestial nga gingharian.)
Hangyoa ang mga estudyante sa paglista og mga sugo sa Ginoo kutob sa ilang mahimo sulod sa usa ka minuto. Isulat ang ilang mga tubag diha sa pisara. Dapita ang mga estudyante nga mopili og usa sa mga sugo nga nalista diha sa pisara ug mosulat diha sa ilang mga class notebook o mga scripture study journal og pipila ka mga sentence nga nagpasabut kon sa unsang paagi ang pagsunod niana nga sugo makatabang sa pag-andam kanila alang sa celestial nga gingharian. Human sa igong panahon, dapita ang pipila ka mga estudyante sa pagpakigbahin sa unsay ilang gisulat.
Aron sa pagtabang sa mga estudyante nga dugang nga makasabut sa tuyo sa Ginoo sa paghatag kanato og mga sugo, hangyoa ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles.
Imahe
Elder Dallin H. Oaks
“Dili igo alang ni bisan kinsa ang pagbuhat lamang nga dili maghunahuna. Ang pagsunod sa mga sugo, mga ordinansa, ug mga pakigsaad sa ebanghelyo dili sama sa pagdeposito og kwarta sa langitnong pundohanan tungod kay gikinahanglan kini kanimo. Ang ebanghelyo ni Jesukristo usa ka plano nga nagpakita kanato kon unsaon nga mahimo sa unsay gitinguha sa atong Langitnong Amahan nga kita mamahimo.”(“The Challenge to Become,” Ensign, Nob. 2000, 32).
Sa unsang paagi ang pagsabut sa katuyoan sa Ginoo sa paghatag kanato og mga sugo makatabang kanato nga mosunod Kaniya nga mas matinud-anon?
Dapita ang duha ka estudyante nga magpuli-puli sa pagbasa og kusog sa Pinadayag 78:8–9. Hangyoa ang klase sa pagsunod, nga mangita sa mga ngalan niadtong gitudlo sa Ginoo sa pag-organisar sa United Firm. Dapita ang mga estudyante sa pag-report sa ilang nakit-an.
Sumala sa bersikulo 9, uban kang kinsa kining tulo ka mga tawo gisugo sa paglingkod diha sa konseho? (Tabangi ang mga estudyante nga makasabut nga ang mga pulong nga “mga santos … sa Zion” nagpasabut sa mga miyembro sa Simbahan sa Independence, Missouri.)
Ipasabut nga si Joseph Smith, Newel K. Whitney, Sidney Rigdon, Peter Whitmer Jr., ug Jesse Gause misunod niini nga sugo ug mibiyahe ngadto sa Missouri niadtong Abril 1832. Wala madugay human sa ilang pag-abut, ang tulo mipahigayon og usa ka konseho diin giorganisar nila ang United Firm sumala sa direksyon niini nga pinadayag. Kini nga kompaniya gilangkuban ni Joseph Smith, Sidney Rigdon, Newel K. Whitney, Edward Partridge, Sidney Gilbert, Oliver Cowdery, John Whitmer, William W. Phelps, ug Martin Harris.
I-summarize ang Doktrina ug mga Pakigsaad 78:10–16 pinaagi sa pagpasabut nga niini nga mga bersikulo ang Ginoo mihatag og gibug-aton nga ang mga miyembro sa kompaniya kinahanglang mopasalig sa ilang mga kaugalingon pinaagi sa usa ka pakigsaad sa pagdumala sa mga negosyo sa Simbahan. Pinaagi sa pagkamatinud-anon niini nga pakigsaad, tabangan sila sa Ginoo sa pagtuman sa Iyang mga sugo. Ang Ginoo mipasabut usab nga kon ang mga Santos mosunod sa Iyang mga panudlo, ang Simbahan makabarug nga gawasnon gikan sa tanang yutan-on nga mga binuhat.
Ang Ginoo mihulagway sa mga panalangin nga maanaa niadtong motuman sa Iyang mga sugo
Hangyoa ang mga estudyante sa pagngalan og pipila ka mga gasa o mga panalangin nga ilang nadawat sa batan-on pa nga mas gipasalamatan nila karon nga mas hingkod na sila.
Nganong mas gipasalamatan ninyo kini nga mga gasa o mga panalangin karon?
Sa unsang paagi kaha kini may kalabutan sa mga panalangin nga giandam sa atong Langitnong Amahan alang kanato?
Dapita ang usa ka estudyante sa pagbasa og kusog sa Doktrina ug mga Pakigsaad 78:17–18. Hangyoa ang klase sa pagsunod ug pagtino kon sa unsang paagi ang mga Santos sama sa gagmay nga mga bata.
Nganong lisud man usahay alang kanato nga makasabut sa mga panalangin nga giandam sa Ginoo alang kanato?
Bisan og tingali wala kita makasabut o makaantus sa tanang butang, unsa nga pagdapit ang gihatag sa Ginoo kanato? (Nga maglipay.)
Sa unsang paagi ang pagkahibalo nga ang Ginoo “mogiya [kanato]” (D&P 78:18) tadlas sa mga butang nga wala kita makasabut o makaantus makatabang kanato nga magmalipayon?
Dapita ang mga estudyante sa pagbasa og hilum sa Doktrina ug mga Pakigsaad 78:19, mangita sa tambag nga gihatag sa Ginoo ngadto sa mga Santos. Dayon dapita sila sa pag-report sa ilang nakat-unan.
Unsa ang gisulti sa Ginoo nga mahitabo alang niadtong mopili sa pagdawat sa tanang mga butang uban ang pagpasalamat? (Ang mga estudyante kinahanglang moila og baruganan nga susama sa mosunod: Kon modawat kita sa tanan nga mga butang uban ang pagpasalamat, ang Ginoo mopadaghan sa atong mga panalangin.)
Ngano kaha nga ang Ginoo mopadaghan sa mga panalangin alang niadtong modawat sa tanang mga butang uban ang pagpasalamat?
Sa unsang paagi ang pagpili sa pagdawat sa tanang mga butang uban ang pagpasalamat makatabang usab kanato nga maglipay?
Dapita ang mga estudyante sa pagpamalandong kon sa unsang paagi sila mas hingpit nga makadawat sa tanang mga butang uban ang pagpasalamat.
Hangyoa ang mga estudyante nga hilum nga mobasa sa Doktrina ug mga Pakigsaad 78:20–22, nga mangita kon unsay gisulti sa Ginoo nga angay natong buhaton isip resulta sa pagsabut sa mga saad nga gihulagway diha sa bersikulo 19. Dapita ang mga estudyante sa pagpakigbahin sa unsay ilang nakit-an.
Si Jared Carter, Stephen Burnett, ug Eden Smith gitawag sa pagserbisyo og mga misyon
Pahibaloa ang mga estudyante nga diha sa mga pinadayag nga narekord diha sa Doktrina ug mga Pakigsaad 79 ug 80, ang Ginoo mitawag og tulo ka mga lalaki aron moserbisyo isip mga misyonaryo. I-assign ang mga estudyante nga magpares sa pagtrabaho. Hangyoa ang usa ka pares sa pagtuon sa Doktrina ug mga Pakigsaad 79 ug ang lain sa pagtuon sa Doktrina ug mga Pakigsaad 80. Dapita sila sa pagpangita og mga baruganan nga magamit sa misyonaryo nga buhat samtang magtuon sila sa gi-assign kanila nga mga seksyon.
Human sa igong panahon, hangyoa ang mga estudyante sa pagpaambit ngadto sa ilang mga pares sa mga baruganan nga ilang nadiskubrihan. Dayon hangyoa ang mga estudyante sa pagsulat diha sa ilang mga class notebook o scripture study journal og usa ka baruganan nga ilang nakat-unan. Dapita sila sa pagsulat og pipila ka mga sentence mahitungod kon unsaon nila paggamit niana nga baruganan sa pagpaambit sa ebanghelyo ngadto sa tawo nga ilang kaila.
Tapusa kini nga leksyon pinaagi sa pagpaambit sa imong pagpamatuod mahitungod sa mga doktrina ug mga baruganan nga inyong gihisgutan sa klase karon.
Sa mosunod nga pamahayag, si Elder D. Todd Christofferson sa Korum sa Napulog Duha ka mga Apostoles mipasidaan sa mga miyembro sa Simbahan nga dili ipahimutang ang ilang kasingkasing sa yutan-ong mga butang:
Imahe
Elder D. Todd Christofferson
“Mahimong mangutana kita sa atong mga kaugalingon, nga nagpuyo kadaghanan kanato sa katilingban nga nagsimba sa mga kabtangan ug mga kalingawan, kon kita nagpabilin ba sa atong pagpahilayo gikan sa mga kasina ug dili maayong tinguha sa pag-angkon og dugang pa niining mga butang sa kalibutan. Ang pagkamakibutang maoy usa lamang ka pagpakita og pagsimba sa dios-dios ug garbo nga naghulagway sa Babelonia. Tingali magkat-on kita nga makontento sa unsay igo sa atong mga panginahanglan” (“Dali na diri sa Zion,”Liahona, Nob. 2008, 40).
Ang Adan-ondi-Ahman mao ang dapit diin mipanalangin si Adan sa iyang matarung nga kaliwatan tulo ka tuig sa wala pa siya mamatay (tan-awa sa D&P 107:53–56) ug asa siya moabut aron makigkita sa mga Santos sa dili pa ang panahon sa Ikaduhang Pag-anhi (tan-awa sa D&P 116).
“Si Adan mao ang usa sa mga espiritu nga gipamulong sa Ginoo ngadto ni Abraham kinsa gitudlo nga mahimong mga pangulo dinhi sa yuta. Siya mao si Miguel, usa ka prinsipe, ug anak sa Dios nga gipili nga moanhi dinhi sa yuta ug mobarug nga pangulo sa iyang kaliwatan, naghupot sa ‘mga yawe sa kaluwasan ubos sa tambag ug kamandoan sa Usa nga Balaan, kinsa walay sinugdanan sa mga adlaw o katapusan sa kinabuhi’ [D&P 78:16]. Kining Usa nga Balaan mao si Jesukristo. Dinhi sa yuta si Miguel nailhan nga si Adan. Sa kinabuhi nga wala pa dinhi sa yuta siya usa ka espiritu sama sa ubang mga anak sa Amahan” (Answers to Gospel Questions, comp. Joseph Fielding Smith Jr., 5 vols. [1957–66], 1:5–6). (Tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 173.)
Si Elder Orson Pratt mipasabut nga “dunay usa ka pinadayag nga dili kaayo pamilyar niini nga katawhan. Nagtuo ko nga wala kini mamantala, apan mamantala tingali kini isip kabahin sa kasaysayan sa simbahan. Gihatag kini pinaagi sa mga pangutana ug mga tubag. Ang unang pangutana mao, ‘Unsa man ang ngalan sa Dios sa putli nga pinulongan?’ Ang tubag nag-ingon, ‘Ahman.’ ‘Unsa man ang ngalan sa Anak sa Dios?’ Tubag, ‘Anak ni Ahman—ang labing mahinungdanon sa tanang bahin sa Dios gawas ni Ahman’” (“Discourse,” Deseret News, Mayo 23, 1855, 82 [unang bahin niini nga pakigpulong nga gimantala sa Deseret News, Mayo 16, 1855, 76]; tan-awa usab sa Documents, Volume 2: Hulyo 1831–Enero 1833, vol. 2 sa Documents nga serye sa The Joseph Smith Papers [2013], 215).
Imahe
President Joseph Fielding Smith
Si Presidente Joseph Fielding Smith mitudlo: “Si Jesukristo gitawag usab nga Anak ni Ahman. (Tan-awa sa D. & P. 95:17.) Busa ang iyang ngalan konektado sa ngalan sa dapit diin nagpuyo si Adan. Tungod niana nga rason si Elder Orson Pratt mihatag sa hubad niana isip ‘Ang Walog sa Dios’” (Church History and Modern Revelation, 2 vols. [1953], 1:310). (Tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 173.)
Si Jared Carter ug ang iyang asawa nagpasakop sa Simbahan niadtong 1831 samtang nagpuyo sa New York. Mibalhin sila uban sa mga Santos sa Colesville ngadto sa Thompson, Ohio. Si Jared nakaserbisyo og misyon sa ulahing bahin sa 1831 ug sayo sa 1832 sa Ohio, Pennsylvania, New York, ug Vermont. Wala madugay human sa iyang pag-uli sa Amherst, Ohio, mibiyahe siya ngadto sa Hiram, Ohio, aron sa pagbisita sa Propeta ug sa pagpakisayud kabahin sa iyang sunod nga misyon. Niadtong Marso 12, 1832, si Joseph Smith nakadawat og pagpadayag, nga karon narekord diha sa Doktrina ug mga Pakigsaad 79, nagtawag ni Jared Carter ngadto sa laing misyon. Mibiya siya alang niini nga misyon niadtong Abril 15, 1832. Ang iyang misyon milungtad og 6 ka bulan ug 2 ka adlaw, ug mibunyag siya og 79 ka mga kalag.
Wala pay usa ka bulan human gibunyagan ni Parley P. Pratt didto sa Kirtland, Ohio, si John Murdock mipaambit sa gipahiuli nga ebanghelyo ngadto ni Stephen Burnett ug iyang pamilya sa hinapos sa Nobyembre 1830. Sa wala pay tuig human niana, sa pagka-Oktubre 1831, si Stephen Burnett gi-orden nga high priest sa edad nga 17 sa usa ka komperensya sa Simbahan sa Orange, Ohio. Niadtong Enero 25, 1832, si Stephen nakadawat og tawag sa pagsangyaw sa ebanghelyo uban ni Ruggles Eames (tan-awa sa D&P 75:35). Ang pinadayag nga narekord diha sa Doktrina ug mga Pakigsaad 80, nga nadawat sa Marso 7, 1832, naglakip og laing tawag alang kang Stephen sa pagsangyaw sa ebanghelyo, niining higayuna kauban ni Eden Smith. Si Stephen mibiya sa iyang misyon niadtong Abril 1832 ug misugod sa pagsangyaw uban ni Eden Smith sa Agosto sa samang tuig. Si Stephen Burnett miserbisyo og mga misyon sa New Hampshire ug sa ubang mga estado sa silangan nga bahin gikan 1832 hangtud 1834.