Sa Nobyembre 1, 1831, si Propeta Joseph Smith nakigkita sa usa ka grupo sa mga elder didto sa Hiram, Ohio, alang sa usa ka espesyal nga komperensya. Gihisgutan nila ang pagmantala sa Book of Commandments, usa ka koleksyon sa mga pagpadayag nga nadawat sa Propeta. Upat sa mga elder diha sa komperensya mihangyo ni Joseph Smith sa pagpangutana sa Ginoo mahitungod sa Iyang kabubut-on alang kanila. Agi og tubag niini nga hangyo, nadawat sa Propeta ang usa ka pagpadayag nga karon gi-rekord diha sa Doktrina ug mga Pakigsaad 68. Naglakip ang pagpadayag og tambag ngadto sa gitawag sa pagsangyaw sa ebanghelyo, mga panudlo mahitungod sa calling sa bishop, ug usa ka sugo nga ang mga ginikanan kinahanglang motudlo sa ilang mga anak sa mga baruganan ug mga ordinansa sa ebanghelyo.
Nagtambag ang Ginoo niadtong kinsa gitawag sa pagsangyaw sa ebanghelyo
Kon kamo o usa ka tawo nga suod ninyo nakaserbisyo og misyon alang sa Simbahan, sugdi ang klase pinaagi sa pagpakigbahin og pipila ka mga pagbati nga nasinati sa mga tawo samtang sila nangandam sa pagbiya sa panimalay ug mahimong full-time nga mga misyonaryo. Dayon pangutan-a sa mosunod:
Unsa nga mga kaguol o mga kabalaka ang tingali maanaa sa usa ka tawo mahitungod sa pagserbisyo og usa ka full-time nga misyon?
Unsa ang pipila ka mga rason nga ang mga tawo usahay mobati og ka nerbyos mahitungod sa pagpakigbahin sa ebanghelyo sa ilang miyembro sa pamilya ug mga higala?
Ipasabut nga atol sa usa ka komperensya nga gihimo kaniadtong Nobyembre 1, 1831, upat ka mga elder kinsa moserbisyo isip mga misyonaryo miduol ni Joseph Smith ug mihangyo nga mahibalo sa kabubut-on sa Ginoo kalabut kanila. Agi og tubag, mipadayag ang Ginoo og sumbanan alang sa pagsangyaw sa ebanghelyo. Dapita ang lima ka mga estudyante sa pagpuli-puli sa pagbasa og kusog gikan sa Doktrina ug mga Pakigsaad 68:1–5. Hangyoa ang klase sa pagsunod, nga mangita sa mga elemento niana nga sumbanan. Sa dili pa sila mobasa, ipasabut nga ang mga bersikulo 2 ug 3 naglangkub sa pulong nga panig-ingnan. Ang panig-ingnan maoy usa ka sumbanan o modelo.
Unsay inyong nakita niini nga mga bersikulo mahitungod sa unsa nga paagi kita kinahanglang mosangyaw sa ebanghelyo?
Sa mga bersikulo 3–5, unsa nga saad ang gihatag sa Ginoo ngadto sa Iyang mga sulugoon?
Unsay mahimo sa dinasig nga mga pulong sa mga misyonaryo alang niadtong nagdawat niini? (Ang mga estudyante mahimong mogamit og lahi nga mga pulong, apan kinahanglan ilang ilhon ang mosunod nga baruganan: Kon ang mga sulugoon sa Ginoo nadasig pinaagi sa Espiritu Santo, ang ilang mga pulong mogiya sa mga tawo ngadto sa kaluwasan. Isulat sa pisara kini nga baruganan.)
Unsay atong mabuhat aron sa pagdapit sa impluwensya sa Espiritu Santo samtang kita mopakigbahin sa ebanghelyo?
Ipasabut nga samtang kadtong kinsa gi-orden sa pagsangyaw sa ebanghelyo makatabang sa mga tawo nga makaangkon og pagpamatuod sa kamatuoran, ang Presidente lamang sa Simbahan ang adunay katungod sa pagdawat ug sa pagpahayag sa kabubut-on sa Ginoo alang sa tibuok Simbahan. Ubos sa iyang direksyon, ang ubang miyembro sa Unang Kapangulohan ug ang mga miyembro sa Korum sa Napulog Duha ka mga Apostoles usab adunay awtoridad sa pagpahayag sa kabubut-on sa Dios alang kanato.
Dapita ang usa ka estudyante sa pagbasa og kusog sa Doktrina ug mga Pakigsaad 68:6. Hangyoa ang klase sa pagsunod, nga mangita sa dugang nga pag-awhag nga gihatag sa Ginoo ngadto sa Iyang mga sulugoon.
Unsa nga mga kamatuoran ang inyong makita dinhi niini nga bersikulo nga tingali magdala og kalipay ngadto sa usa ka misyonaryo?
Nganong importante kini alang kaninyo nga mahibalo nga ang Ginoo makig-unong sa Iyang matinud-anong mga sulugoon?
Ipasabut nga ang bersikulo 6 nag-outline sa unang responsibilidad sa mga sulugoon a Ginoo: sa pagpamatuod kabahin ni Jesukristo ug sa Iyang misyon kaniadto, karon, ug sa umaabut. Dayon i-summarize ang Doktrina ug mga Pakigsaad 68:7–12 pinaagi sa pagpasabut nga ang Ginoo nagtawag og matinud-anong mga elder sa Simbahan sa pagsangyaw sa ebanghelyo ug sa pagbunyag niadtong kinsa nagtuo.
Ikonsiderar ang pagpakigbahin og kasinatian diin ikaw nagiyahan sa Espiritu nga mahibalo kon unsaon sa pagpakigbahin sa ebanghelyo ngadto sa usa ka tawo.
Nagpadayag ang Ginoo nga ang Unang Kapangulohan mao ang modumala sa pagtawag og mga bishop
Hangyoa ang mga estudyante sa paghunahuna nga usa ka higala sa laing tinuohan nangutana, “Giunsa pagpili ang inyong bishop?”
Unsaon ninyo sa pagtubag?
Ipasabut nga si Edward Partridge mao ang unang bishop nga gitawag sa gipahiuli nga Simbahan ni Jesukristo (sa Pebrero 4, 1831; tan-awa sa D&P 41:9). Sa wala pa madawat ni Joseph Smith ang pagpadayag nga gi-rekord diha sa Doktrina ug mga Pakigsaad 68 (sa Nobyembre 1831), si Bishop Partridge mao lamang ang bishop sa Simbahan. Ang ubang mga bishop gitawag sa wala madugay human nadawat sa Propeta kini nga pagpadayag.
Dapita ang usa ka estudyante sa pagbasa og kusog sa Doktrina ug mga Pakigsaad 68:14–15. Hangyoa ang klase sa pagsunod, nga mangita sa unsa nga paagi gipili ang mga bishop.
Pahinumdom: Ang mga bersikulo 15–20 naglangkub og mga panudlo kabahin sa tinuod nga mga kaliwat ni Aaron kinsa mahimong tawgon isip ang Presiding Bishop. Ang pulong nga “tinuod nga kaliwat ni Aaron” nagpasabut ngadto sa mga kaliwat sa igsoong lalaki ni Moises nga si Aaron sa Daang Tugon. Ang mao nga kaliwat maanaay katungod ngadto sa katungdanan sa Presiding Bishop kon siya tawagon ug aprobahan sa Unang Kapangulohan. Ang mga bersikulo 16–20 kalabut lamang ngadto sa Presiding Bishop, dili ngadto sa mga bishop sa mga ward (tan-awa sa Joseph Fielding Smith, Doctrines of Salvation, comp. Bruce R. McConkie, 3 bols. [1954–56], 3:92–93). Ang mga nag-unang sinulat sa Simbahan kasagaran nagpasabut ngadto ni Bishop Partridge isip ang Presiding Bishop. Ang mga katungdanan sa Presiding Bishop milambo ug nausab sulod sa misunod nga daghang mga katuigan. Ubos sa direksyon ni Presidente Brigham Young, ang mga katungdanan sa Presiding Bishop mas hingpit nga giklaro niadtong 1847 didto sa Winter Quarters, uban ni Bishop Newel K. Whitney nga midawat niana nga calling.
Mahimo nimo nga ipasabut nga sa unang mga adlaw sa Simbahan, ang mga miyembro sa Unang Kapangulohan mi-orden ug mi-set apart sa tanang mga bishop. Sa Simbahan karon, kini mao gihapon alang sa Presiding Bishop. Hinoon, ang pagtawag, pag-orden, ug pag-set apart sa mga bishop gipahigayon sa mga stake president ubos sa direksyon sa Unang Kapangulohan. Ang usa ka stake president, uban sa suporta gikan sa iyang mga counselor sa stake presidency, mangayo og pagpadayag aron mahibalo kon kanus-a motawag og bag-ong bishop ug kinsa ang tawagon. Ipadala niya ang iyang rekomendasyon ngadto sa Unang Kapangulohan aron aprobahan. Kon aprobahan sa Unang Kapangulohan ang calling, hatagan nila og awtoridad ang stake president sa pag-orden ug pag-set apart sa bag-ong bishop. (Alang sa dugang nga impormasyon, tan-awa sa Handbook 2: Administering the Church [2010], 19.6.)
Nganong importante alang kaninyo nga mahibalo nga ang Unang Kapangulohan miaprobar sa pagtawag sa inyong bishop?
Ang Ginoo nagmando sa mga ginikanan sa pagtudlo sa ebanghelyo ngadto sa ilang mga anak
Hangyoa ang mga estudyante sa paghunahuna mahitungod sa kamatuoran nga sila mahimong mga ginikanan sa pipila ka mga tuig. Ipasabut nga gisalig sa Ginoo sa mga inahan ug mga amahan ang dakong mga responsibilidad—sila kinahanglan motudlo sa ebanghelyo ngadto sa ilang mga anak pinaagi sa pulong ug sa ehemplo (tan-awa sa D&P 29:46–50 ug “Ang Pamilya: Usa ka Pamahayag ngadto sa Kalibutan,” nga anaa sa appendix sa katapusan niini nga manwal). Dapita sila sa paglista diha sa ilang mga class notebook o scripture study journal og tulo ka mga baruganan nga gusto nilang itudlo ngadto sa ilang mga anak.
Ipares-pares ang mga estudyante. Hangyoa sila sa pagbasa sa ilang mga lista ngadto sa usag usa. Dayon dapita sila sa pagbasa og dungan sa Doktrina ug mga Pakigsaad 68:25–27, nga mangita sa mga butang nga ilang ikadugang sa ilang mga lista.
Unsay gimando sa Ginoo sa mga ginikanan nga itudlo sa ilang mga anak? (Ang mga estudyante kinahanglang moila sa mosunod nga doktrina: Misugo ang Ginoo sa mga ginikanan sa pagtudlo sa ilang mga anak sa pagsabut sa doktrina sa paghinulsol, hugot nga pagtuo diha kang Kristo, bunyag, ug sa gasa sa Espiritu Santo. Mahimo nimong dapiton ang mga estudyante nga markahan ang mga pulong diha sa bersikulo 25 nga nagtudlo niini nga doktrina.)
Ngano kaha nga importante alang sa gagmay nga mga bata ang pagsabut sa paghinulsol? Hugot nga pagtuo diha kang Jesukristo? Bunyag? Ang gasa sa Espiritu Santo?
Dapita ang mga estudyante sa pagsulat mahitungod sa usa ka panahon nga sila nakakita og mga ginikanan nga nagtudlo sa mga baruganan ug mga ordinansa nga ginganlan diha sa Doktrina ug mga Pakigsaad 68:25. Human sila dunay panahon sa pagsulat, hangyoa ang pipila ka mga estudyante sa pagpakigbahin unsay ilang nasulat.
Hangyoa ang mga estudyante sa pagpadayon og trabaho nga magpares alang sa sunod nga kalihokan. Ipasabut nga diha sa Doktrina ug mga Pakidsaad 68:28–31, ang Ginoo mihatag og dugang nga tambag ngadto sa mga ginikanan. Hatagi og kopya sa mosunod nga impormasyon ang kada pares. Awhaga ang mga pares sa pagbasa sa kada tudling sa kasulatan ug sa pag-uban og hisgot sa mga pangutana. Ipasabut nga kon nahuman na sila, moreport sila sa ilang mga nakaplagan ngadto sa klase.
Basaha ang Doktrina ug mga Pakigsaad 68:28, ug pangitaa unsay gimando sa Ginoo sa mga ginikanan nga itudlo sa ilang mga anak.
Ngano sa inyong hunahuna importante alang kaninyo ang pagtudlo sa inyong mga anak sa pag-ampo?
Giunsa mo pagtudlo sa pag-ampo? Sa unsa nga paagi ang pag-ampo mipanalangin kaninyo ug sa inyong pamilya?
Unsa kaha ang ipasabut sa “paglakaw nga matarung atubangan sa Ginoo”?
Unsa ang inyong nakat-unan mahitungod sa pagbalaan sa adlaw nga Igpapahulay?
Unsa ang inyong mahimo aron mabalaan ang adlaw nga Igpapahulay?
Basaha ang Doktrina ug mga Pakigsaad 68:30, ug pangitaa ang pahimangno sa Ginoo. Hinumdumi nga ang pulong nga tapulan nagpasabut ngadto sa usa ka tawo kinsa dili gustong motrabaho.
Kanus-a mo nakakita og mga panalangin nga miabut gumikan sa pagtrabaho og maayo?
Basaha ang mosunod nga seleksyon gikan sa Alang sa Kalig-on sa mga Kabatan-onan:
Ang Ginoo mimando kanato nga dili magtinapulan. Ang pagkatapulan moresulta sa dili angay nga kinaiya, nadaot nga mga relasyon, ug sala. Usa ka matang sa pagkatapulan mao ang paggahin og sobra kaayo nga panahon sa mga kalihokan nga mopahilayo kaninyo sa mabungahong trabaho, sama sa paggamit sa Internet, pagdula og mga video game, ug pagtan-aw og telebisyon” (Alang sa Kalig-on sa mga Kabatan-onan [booklet, 2011], 40).
Sa unsa nga paagi ang pagtinapulan modangat ngadto sa pagkadautan?
Unsa ang pipila ka mga butang nga makatabang sa usa ka tawo sa pagbuntog sa kahilig nga mahimong tapulan?
Sa unsa nga paagi kaha ang kahakog makaapekto sa usa ka pamilya?
Unsa ang atong mahimo sa atong mga kinabuhi sa pagbuntog sa kalaog ug kahakog?
Human makompleto sa mga estudyante kini nga kalihokan, hangyoa sila sa pagreport unsa ang ilang nakat-unan. (Ikonsiderar ang paghangyo sa usa ka estudyante sa pagsulat sa mga tubag sa ubang mga estudyante diha sa pisara.) Usa ka baruganan nga mahimo nimong hatagan og gibug-aton gikan sa mga bersikulo 31 ug 32 mao nga kita kinahanglan nga mowagtang sa pagkatapulan ug pagkahakog gikan sa atong mga kinabuhi. (Samtang ang mga estudyante naghisgot niini nga baruganan, mahimo nimong ipasabut nga kita wala magkinahanglang makaangkon sa tanang butang nga anaa sa atong mga higala aron magmalipayon.)
Ngano kaha nga importante alang sa mga ginikanan sa pagtudlo ug sa pagsunod sa mga sumbanan sa ebanghelyo?
Unsa ang mabuhat sa mga batan-ong mga lalaki ug mga babaye aron matabangan ang ilang mga pamilya sa “paglakaw nga matarung sa atubangan sa Ginoo”?
Kon ikaw usa ka ginikanan, ikonsiderar ang pagpahayag og pasalamat alang sa mga paagi nga ang imong mga anak nagtabang kanimo sa pagsunod sa mga sugo sa Ginoo diha sa Doktrina ug mga Pakigsaad 68. Dayon dapita ang mga estudyante sa pagsulat og tumong nga motabang kanila sa pag-andam nga mahimong maayo nga mga ginikanan. O dapita sila sa pagsulat og usa ka tumong aron matabangan ang ilang mga ginikanan sa ilang mga responsibilidad. Kon motugot ang panahon, mahimo nimong hangyoon ang pipila ka mga estudyante sa pagpakigbahin sa ilang mga tumong diha sa klase.
Gipasabut ni Presidente J. Reuben Clark nga mga sakop lamang sa Unang Kapangulohan ug sa Korum sa Napulog Duha ka mga Apostoles ang adunay katungod, gahum, ug awtoridad sa pagpahayag sa hunahuna ug kabubut-on sa Dios ngadto sa Iyang katawhan:
Imahe
President J. Reuben Clark
“Kinahanglan gayud nga [atong] hinumduman nga pipila sa mga General Authority gihatagan sa espesyal nga calling; duna silay espesyal nga gasa; gi-sustain sila nga mga propeta, manalagna, ug tigpadayag, nga naghatag nila og espesyal nga espirituhanong tuga kalabut sa ilang pagpanudlo sa mga tawo. Duna silay katungod, gahum, ug awtoridad sa pagpahayag sa hunahuna ug kabubut-on sa Dios ngadto sa katawhan, ubos sa tanang gahum ug awtoridad sa Presidente sa Simbahan. Ang uban sa mga General Authority wala hatagi niining espesyal nga espirituhanong tuga ug awtoridad sa ilang pagpanudlo; sila may limitasyon, ug ang limitasyon sa ilang gahum ug awtoridad sa pagpanudlo mao usab ngadto sa ubang opisyales ug sa mga miyembro sa Simbahan, kay walay usa kanila nga espirituhanong gitugahan isip propeta, manalagna ug tigpadayag. Dugang pa, sigon sa giingon, ang Presidente sa Simbahan adunay dugang ug espesyal nga espirituhanong tuga niini nga bahin, kay siya ang Propeta, Manalagna, ug Tigpadayag sa tibuok Simbahan” (“When Are Church Leaders’ Words Entitled to Claim of Scripture?”Church News, Hulyo 31, 1954, 9–10).
Gipasabut ni Elder D. Todd Christofferson sa Korum sa Napulog Duha ka mga Apostoles nga ang usa ka propeta mamulong lamang isip usa ka propeta kon nadasig sa Espiritu Santo:
Imahe
Elder D. Todd Christofferson
“Kinahanglang hinumduman nga dili tanang pahayag nga gihimo sa usa ka lider sa Simbahan, kaniadto o karon, maglangkob gayud og doktrina. Nasabtan na sa Simbahan nga ang pahayag nga himoon sa usa ka lider sa usa ka okasyon sagad magrepresentar sa personal, bisan maayo ang tuyo, opinyon, wala magpasabut nga opisyal kini nga para gayud sa tibuok Simbahan. Si Propeta Joseph Smith mitudlo nga ang ‘propeta [usa] ka propeta kon siya [anaa] naglihok sa sama niini’ [sa History of the Church, 5:265]. Si Presidente [J. Reuben] Clark … miobserbar: …
“‘… Ang Simbahan masayud pinaagi sa pagpamatuod sa Espiritu Santo nga ihatag sa mga miyembro kon ang Kaigsoonan namulong ba nga giaghat sa ‘Espiritu Santo’; ug sa kaulahian kana nga kahibalo ipakita’ [J. Reuben Clark Jr., “When Are Church Leaders’ Words Entitled to Claim of Scripture?” Church News, Hulyo 31, 1954, 10.]” (“Ang Doktrina ni Kristo,” Liahona, Mayo 2012, 88, 89).
Gitudlo ni Presidente Joseph Fielding Smith nga ang mga panudlo sa Ginoo diha sa Doktrina ug mga Pakigsaad 68:15–21 magamit lamang ngadto sa katungdanan sa Presiding Bishop sa Simbahan:
Imahe
President Joseph Fielding Smith
“Ang tawo nga gihisgutan diha sa mga pagpadayag ingon nga adunay katungod pinaagi sa kaliwat ngadto sa bishopric mao ang usa kinsa ang unang natawo. Pinaagi sa iyang pagkatawo siya may katungod sa paghupot ‘sa mga yawe o pagtugot sa mao.’ Kini adunay kalabutan lamang ngadto sa usa kinsa nagdumala sa Aaronic Priesthood. Kini walay kalabutan bisan unsa ngadto sa mga bishop sa mga ward. Dugang pa, ang mao kinahanglan gayud nga gitudlo sa Unang Kapangulohan sa Simbahan ug nakadawat sa iyang … ordinasyon ubos sa ilang mga kamot. Ang pagpadayag nagagikan sa Kapangulohan, dili gikan sa patriyarka, aron sa pag-estabilisar og pag-angkon ngadto sa katungod sa pagdumala niini nga katungdanan. Kon wala ang kahibalo kalabut sa maong kaliwatan, bisan kinsa nga high priest, pinili sa Kapangulohan, mahimong maghupot sa katungdanan sa Presiding Bishop ug magserbisyo uban ang mga counselor” (Doctrines of Salvation, ed. Bruce R. McConkie, 3 bols. [1954–56], 3:92–93; mga italics orihinal).