Doktrina ug mga Pakigsaad 72–76:80 (Unit 16)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 72–76:80 (unit 16) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Doktrina ug mga Pakigsaad 72–74)

Samtang gitun-an sa mga estudyante ang calling nga gihatag sa Ginoo ngadto ni Newel K. Whitney isip usa ka bishop, ilang nakat-unan nga ang mga calling sa pagserbisyo diha sa Simbahan ni Jesukristo naggikan sa Manluluwas. Nakat-unan usab nila nga ang mga bishop ug mga branch president nagdumala sa temporal ug espirituhanon nga mga kalihokan sa Simbahan sa ilang mga ward ug branch. Samtang nagkat-on sa buhat ni Propeta Joseph Smith sa dinasig nga paghubad sa Biblia, nahibaloan sa mga estudyante ang baruganan nga ang gagmayng mga bata mga balaan, gibalaan pinaagi sa Pag-ula ni Jesukristo.

Day 2 (Doktrina ug mga Pakigsaad 75)

Pinaagi sa pagtuon sa mga instruksyon sa Ginoo ngadto sa usa ka grupo sa mga elder sa Simbahan, nakakat-on ang mga estudyante sa mga panalangin nga gihatag sa Ginoo ngadto niadtong kinsa nagmatinud-anon sa pagsangyaw sa ebanghelyo. Gikan sa tambag sa Ginoo ngadto sa lahi nga grupo sa mga elder, nadiskubrihan sa mga estudyante nga ang Ginoo nagsugo kanato nga magmakugihon sa tanang mga butang.

Day 3 (Doktrina ug mga Pakigsaad 76:1–49)

Samtang namalandong si Propeta Joseph Smith ug Sidney Rigdon sa kahulugan sa Juan 5:29, gihatagan sila og panan-awon gikan sa Ginoo. Sa dili pa tun-an ang panan-awon, nadiskubrihan sa mga estudyante ang mga baruganan kalabut sa kaandam sa Ginoo sa pagbutyag sa kamatuoran ngari kanato. Samtang gitun-an sa mga estudyante ang unang bahin sa panan-awon, ilang nahibaloan ang lain-laing mga doktrina mahitungod ni Jesukristo ug ni Satanas. Nakat-unan usab sa mga estudyante nga pinaagi sa Pag-ula ni Jesukristo, ang tanang anak sa Dios gawas sa mga anak sa perdisyon mahimong maluwas gikan sa sala ug kamatayon.

Day 4 (Doktrina ug mga Pakigsaad 76:50–80)

Samtang nagtuon sa unsay nakita ni Propeta Joseph Smith ug ni Sidney Rigdon diha sa panan-awon kalabut sa celestial nga gingharian, natino sa mga estudyante ang mahangturon nga mga panalangin nga mahatag niadtong kinsa modawat sa pagpamatuod ni Jesukristo ug motuman sa Iyang mga sugo. Nadiskubrihan usab sa mga estudyante nga kita mahimong hingpit pinaagi sa Pag-ula ni Jesukristo. Pinaagi sa pagtandi sa mga kalainan tali sa celestial ug terrestrial nga mga gingharian, nakat-unan sa mga estudyante nga kon kita magmaisugon diha sa pagpamatuod kang Jesus, makaangkon kita sa celestial nga gingharian sa Dios.

Pasiuna

Kini nga leksyon nag-focus sa unsay nakat-unan ni Propeta Joseph Smith ug ni Sidney Rigdon bahin sa Manluluwas ug sa celestial ug terrestrial nga mga gingharian pinaagi sa panan-awon nga narekord diha sa Doktrina ug mga Pakigsaad 76.

Mga Sugyot alang sa Pagtudlo

Pahinumdom: Aron matabangan ang mga estudyante sa ilang mga paningkamot sa pagmemorya sa scripture mastery passage sa Doktrina ug mga Pakigsaad 76:40–41, mahimo nimong i-recite kini ngadto kanila diha sa sinugdanan o sa katapusan sa klase.

Doktrina ug mga Pakigsaad 76:20–24

Si Joseph Smith ug Sidney Rigdon nakakita og usa ka panan-awon sa Langitnong Amahan ug ni Jesukristo

Alang sa debosyonal nga himno, dapita ang klase sa pagkanta sa “I Know That My Redeemer Lives” (Hymns, nu. 136). Ang mga pulong niining himno mahimong makatabang sa mga estudyante nga mobati sa gahum sa mga baruganan nga ilang makat-unan karon.

Dapita ang mga estudyante sa pagkonsiderar sa mosunod nga sitwasyon: Samtang naglingkod sa usa ka klase diha sa eskwelahan, ang inyong magtutudlo nagsugod sa paghisgot og mga relihiyon sa kalibutan. Sa dihang nahisgutan ang Kristiyanismo, ang magtutudlo nangutana kon aduna bay mga Kristiyano sa klase nga andam nga mopakigbahin sa ilang pagtuo mahitungod kang Jesukristo.

Kon kamo ang anaa niining sitwasyon, unsa ang inyong isulti nga inyong gituohan ug nahibaloan mahitungod kang Jesukristo?

Ipasabut nga makakat-on kita og daghan nga mga kamatuoran mahitungod ni Jesukristo diha sa Doktrina ug mga Pakigsaad 76. Tabangi ang mga estudyante sa pagribyu sa konteksto niining pagpadayag pinaagi sa pagpangutana sa mosunod:

Unsa ang gibuhat ni Propeta Joseph Smith ug Sidney Rigdon sa wala pa nila nadawat ang panan-awon nga narekord sa Doktrina ug mga Pakigsaad 76? (Kon gikinahanglan, awhaga ang mga estudyante sa pagribyu sa pasiuna sa seksyon.)
Kinsa man ang unang nakita ni Joseph Smith ug ni Sidney Rigdon sa panan-awon? (Kon dili makahinumdom ang mga estudyante, dapita sila sa pagpakli ngadto sa Doktrina ug mga Pakigsaad 76: 20–24 aron makit-an ang tubag.)

Dapita ang usa ka estudyante sa pagbasa og kusog sa Doktrina ug mga Pakigsaad 76:20–24. Hangyoa ang klase sa pagsunod, nga mangita sa mga kamatuoran nga nakat-unan ni Joseph Smith ug Sidney Rigdon mahitungod ni Jesukristo.

Unsa nga mga kamatuoran ang nakat-unan ni Joseph Smith ug ni Sidney Rigdon mahitungod ni Jesukristo pinaagi niining panan-awon? (Dapita ang usa ka estudyante sa paglista sa mga tubag diha sa pisara.)

Mahimong mahibaloan sa mga estudyante ang lain-laing mga doktrina, lakip sa mosunod: Si Jesukristo usa ka buhi, nahimaya nga Binuhat; ang Langitnong Amahan ug si Jesukristo managlahi nga personahe; si Jesukristo mao ang Bugtong Anak sa Langitnong Amahan sa unod; si Jesukristo mao ang Tiglalang niining kalibutan ug sa ubang mga kalibutan; ug kita mga anak nga lalaki ug mga anak nga babaye sa Dios. (Aron matabangan ang mga estudyante nga mas makasabut sa katapusan nga baruganan, mahimo nimo silang dapiton sa pagbasa sa Mosiah 5:7.)

Hain nga mga kamatuoran ang nalista sa pisara nga kamo makapamatuod? Giunsa man ninyo sa pagkahibalo nga kini tinuod?

Ikonsiderar ang pagpakigbahin sa imong kaugalingong pagpamatuod bahin sa Manluluwas.

Pahinumdumi ang mga estudyante nga ang Doktrina ug mga Pakigsaad 76:22–24 usa ka scripture mastery passage. Hangyoa sila sa paghingalan sa ubang tawo nga gipakitaan ni Jesukristo gawas ni Propeta Joseph Smith ug Sidney Rigdon. (Sa ilang home-study nga leksyon alang sa Day 3, gi-assign ang mga estudyante sa pagpangita sa mga cross-reference ngadto sa laing mga istorya diha sa mga kasulatan diin ang mga propeta nagpamatuod sa pagkakita sa Manluluwas. Sama pananglit, tan-awa sa Exodo 33:11; 1 Mga Hari 11:9; ug Isaias 6:5; tan-awa usab sa Mateo 5:8.)

Doktrina ug mga Pakigsaad 76:50–80

Si Joseph Smith ug si Sidney Rigdon nakakita sa celestial ug terestrial nga mga gingharian diha sa panan-awon

Hangyoa ang mga estudyante sa paghingalan og pipila ka mga dapit nga ganahan nilang adtuon alang sa bakasyon o holiday. (Ilista sa pisara ang ilang mga tubag.) Lingini ang usa sa mga destinasyon nga nalista diha sa pisara. Hangyoa ang mga estudyante sa paghulagway sa dalan nga kinahanglan nilang biyahion aron makaabut sa gipili nga destinasyon. Pilia ang laing destinasyon gikan niadtong nalista sa pisara nga dunay dakong kalainan sa unang destinasyon nga imong gilinginan.

Kon imong sundon ang dalan nga imong gihulagway alang sa unang destinasyon, modala ba kini kanimo ngadto niining laing destinasyon?
Sa unsang paagi nga ang destinasyon nga imong gipili makaimpluwensya sa dalan nga kinahanglan gayud nimong agian aron moabut didto?

Dapita ang mga estudyante sa pag-abli sa ilang mga giya sa pagtuon sa estudyante sa “Doktrina ug mga Pakigsaad 76: Outline sa Panan-awon” nga diagram diha sa leksyon alang sa Day 3.

Imahe

kingdoms of glory

Sa unsang paagi nga ang atong panaghisgutan bahin sa mga dalan ug mga destinasyon may kalabutan ngadto sa panan-awon nga narekord sa Doktrina ug mga Pakigsaad 76? (Gikan niining panan-awon kita nakakat-on mahitungod sa mga dalan, o mga pagpili, mga mopadulong sa mahangturon nga mga destinasyon nga posible sa matag usa kanato.)

Dapita ang usa ka estudyante sa pagbasa og kusog sa Doktrina ug mga Pakigsaad 76:51–53, nga naghulagway sa dalan sa kahimayaan sa celestial nga gingharian. Hangyoa ang laing estudyante sa pagbasa og kusog sa Doktrina ug mga Pakigsaad 76:72–79, nga naghulagway sa dalan ngadto sa terrestrial nga gingharian. Hangyoa ang klase sa pagsunod, nga mangita kon sa unsang paagi nga ang mga dalan paingon sa celestial ug terrestrial nga gingharian managlahi.

Unsa ang pipila ka mga kalainan nga inyong nabantayan tali niadtong kinsa makapanunod sa kahimayaan didto sa celestial nga gingharian ug niadtong kinsa makapanunod sa terrestrial nga gingharian? (Usa sa dakong kalainan nga mahimong natiman-an sa mga estudyante mao nga kadtong makapanunod sa terrestrial nga gingharian “dili mga maisug diha sa pagpamatuod ni Jesus” [D&P 76:79].)

Hangyoa ang mga estudyante sa pagribyu sa Doktrina ug mga Pakigsaad 76:51–53, nga mangita sa baruganan nga gitudlo niadto nga mga bersikulo.

Isulat ang mosunod nga baruganan nga dili kompleto diha sa pisara: Kon kita magmaisugon diha sa pagpamatuod ni Jesus, …

Gikan sa unsay inyong nakat-unan sa mga bersikulo 51–53, unsaon ninyo pagkompleto kining baruganan? (Mahimo silang mogamit og laing mga pulong, apan ang mga estudyante kinahanglang makahibalo sa mosunod nga baruganan: Kon kita magmaisugon diha sa pagpamatuod ni Jesus, makadawat kita og kahimayaan diha sa celestial nga gingharian sa Dios.)

Aron matabangan ang mga estudyante nga mas masabtan kining baruganan, hisguti ang mosunod nga pangutana:

Unsa kaha ang kalainan tali sa pagbaton og pagpamatuod sa Manluluwas ug sa mahimong maisugon diha niana nga pagpamatuod?
Unsa ang pipila ka mga buhat ug mga kinaiya nga inyong makita niadtong kinsa nagmaisugon sa ilang pagpamatuod sa Manluluwas?
Unsa ang nakatabang ninyo nga mahimong maisugon diha sa inyong pagpamatuod ni Jesukristo?

Ipakigbahin ang imong pagpamatuod nga ang matag usa kanila adunay potensyal sa pagdawat og kahimayaan diha sa celestial nga gingharian. Dapita sila sa pagpamalandong kon ang mga pagpili nga ilang gihimo makadala ba kanila ngadto sa mahangturon nga destinasyon nga makahatag kanila sa hilabihan nga kalipay. Awhaga sila nga magmaisugon diha sa ilang pagpamatuod ni Jesukristo.

Sunod nga Unit (Doktrina ug mga Pakigsaad 76:81–119; 77–83)

Aron maandam ang mga estudyante alang sa ilang pagtuon atol sa mosunod nga semana, mahimo nimo silang dapiton sa pagkonsiderar sa mosunod: Nganong ang Ginoo naglaum og mas dako gikan niadtong kinsa nakadawat og mas dakong kahayag ug kahibalo? Agig dugang sa paghuman sa ilang pagtuon sa panan-awon nga gihatag ngadto ni Propeta Joseph Smith ug Sidney Rigdon nga narekord diha sa Doktrina ug mga Pakigsaad 76, sa sunod nga unit ang mga estudyante makakat-on kon unsay gilauman sa Ginoo niadtong kinsa Iyang gihatagan og daghan. Mabasa usab sa mga estudyante ang pagpasabut bahin sa “upat ka mga buhing binuhat” nga gipasabut sa Pinadayag 4:6–9.