Ang miaging leksyon naglangkob sa unang 16 ka mga bersikulo sa Doktrina ug mga Pakigsaad 38. Kini nga leksyon naglangkob sa nahibilin sa seksyon. Agig tubag sa tinguha sa mga Santos nga masayud og dugang pa bahin sa sugo nga magpundok sa Ohio, ang Ginoo mipadayag sa pipila ka panalangin nga moabut sa mga matarung atol sa Milenyum. Gisugo dayon niya ang mga Santos nga magkahiusa ug mipasabut nganong gisugo Niya sila nga magpundok sa Ohio. Sa katapusan, ang Ginoo mihatag og mga sugo nga makatabang sa mga Santos nga masayud kon unsaon pagsugod sa panagpundok.
Gipadayag sa Ginoo ang pipila ka panalangin nga moabut sa mga matarung karon ug atol sa Milenyum
Pangutan-a ang mga estudyante kon unsa ang kabilin ug kinsa ang kasagaran nga makadawat niini.
Nganong ganahan man mo og kabilin?
Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 38:17–22. Hangyoa ang klase sa pagsunod ug sa pagtino sa kabilin nga gisaad sa Ginoo nga ihatag ngadto sa Iyang katawhan.
Unsa ang gisulti sa Ginoo nga kinahanglang buhaton sa Iyang katawhan aron makadawat sa kabilin nga gihisgutan niining mga bersikulo? (Mangita niini uban sa tibuok nilang mga kasingkasing [tan-awa sa D&P 38:19]; maminaw sa Iyang tingog ug mosunod Kaniya [tan-awa sa D&P 38:22].)
Dapita ang usa ka estudyante sa pag-istorya sa background sa Doktrina ug mga Pakigsaad 38 nga ilang nakat-unan atol sa miaging leksyon. Kon gikinahanglan, pahinumdumi ang mga estudyante nga ang pipila ka Santos sa New York mihangyo og dugang impormasyon kalabut sa sugo sa Ginoo nga mobalhin ngadto sa Ohio.
Sa unsang paagi kaha nga ang pagtudlo sa mga Santos bahin sa ilang mahangturong kabilin nakaimpluwensya sa ilang mga pagbati bahin sa sugo nga mobalhin ngadto sa Ohio?
Awhaga ang mga estudyante sa pagpangita og dugang nga mga rason nganong ang Ginoo mihatag sa sugo nga ang mga Santos magpundok sa Ohio samtang magtuon sila sa nahibilin sa Doktrina ug mga Pakigsaad 38.
Sa dili pa magklase, pagdrowing sa pisara og simple nga sketch sa gawas nga bahin sa usa ka building nga makita diha sa inyong dapit. O pagdrowing og simple nga hulagway sa usa ka balay, sama sa gipakita dinhi. Ilakip ang mahinungdanong mga elemento sa building, lakip na ang entrance, bintana, mga bongbong, ug atup. Pangutan-a ang mga estudyante kon unsang bahina sa building ang labing mahinungdanon. Samtang motubag ang mga estudyante, tabangi sila nga makita nga ang matag bahin sa building dunay gikinahanglan nga katuyoan.
Imahe
house outline
Sa unsang paagi nga ang mga bahin sa building matandi sa mga tawo sa usa ka pamilya sa ward o branch? (Ingon nga ang matag bahin sa building importante, ang matag tawo sa usa ka pamilya o ward o branch bililhon ug dunay mahinungdanon nga tahas.)
Dapita ang mga estudyante sa pagbasa og hilum sa Doktrina ug mga Pakigsaad 38:23–25 ug mangita sa mga pulong nga nagtudlo kon unsaon nato sa pagtan-aw ang ubang tawo. Hangyoa ang mga estudyante sa pag-report sa unsay ilang nakat-unan.
Unsa kaha ang gipasabut nga ang usa ka tawo “motamud sa iyang igsoon sama sa iyang kaugalingon”? (Human makatubag ang mga estudyante, isulat ang mosunod nga baruganan sa pisara: Kita angayang mohatag og bili sa uban sama sa atong paghatag og bili sa atong kaugalingon.
Aron matabangan ang mga estudyante nga mahinumdom niini nga baruganan, isulat sa pisara ang mosunod ang pamahayag ni Presidente Boyd K. Packer sa Korum sa Napulog Duha ka mga Apostoles. Mahimo nimong isugyot nga kopyahon kini sa mga estudyante diha sa ilang mga kasulatan, mga class notebook, o mga scripture study journal. (Ang pamahayag makita diha sa “Ang Huyang ug ang Yano sa Simbahan,”Liahona, Nob. 2007, 7.)
“Adunay talagsaong pagkaangay sa mga miyembro [sa Simbahan]. Walay usa kanato ang mokonsiderar sa iyang kaugalingon nga mas bililhon kay sa uban (tan-awa sa D&P 38:24–25)” (Presidente Boyd K. Packer).
Unsa ang mahitabo kon ang mga tawo maghunahuna nga sila mas bililhon, o mas maayo, kay sa uban?
Sa unsang paagi nga ang Simbahan mapanalanginan kon kita wala mokonsiderar sa atong kaugalingon nga mas bililhon kay sa uban?
Sultihi ang mga estudyante nga ang Manluluwas nagtudlo og usa ka sambingay nga naghulagway nganong kinahanglan natong hatagan og bili ang uban sama sa atong kaugalingon. Dapita ang usa ka estudyante sa pagbasa og kusog niini nga sambingay gikan sa Doktrina ug mga Pakigsaad 38:26. Hangyoa ang klase sa pagsunod ug mangita kon giunsa pagtratar sa tawo ang iyang mga anak nga lalaki dinhi niini nga sambingay.
Unsay inyong bation kon kamo mao pa ang anak nga lalaki nga nakadawat og nuog dinhi niini nga sambingay?
Unsay mahimo sa anak nga lalaki nga nakadawat og mga kupo aron mapalambo kini nga sitwasyon?.
Unsa kaha ang mensahe sa Ginoo ngari kanato dinhi niini nga sambingay?
Dapita ang mga estudyante sa pagbasa og hilum sa Doktrina ug mga Pakigsaad 38:27 ug mangita sa usa ka baruganan nga gusto sa Ginoo nga atong masabtan gikan niini nga sambingay. (Ang mga estudyante mahimong mogamit og lain-laing mga pulong, apan kinahanglan sila nga mopahayag og butang sama sa mosunod: Kon kita dili magkahiusa, kita dili mahimong katawhan sa Ginoo. Isulat kini nga baruganan diha sa pisara duol sa unang baruganan nga imong gisulat. Mahimo usab nimong isugyot nga markahan sa mga estudyante ang mga pulong diha sa ilang mga kasulatan nga nagtudlo niini nga baruganan.)
Diha sa konteksto sa bersikulo 27, unsa ang gipasabut sa “paghiusa”? (Ang makighiusa sa uban ug sa Ginoo diha sa pagkamatarung.)
Sa unsang paagi kaha nga ang paghatag og bili sa uban sama sa paghatag nato og bili sa atong kaugalingon makatabang kanato nga mahiusa sa usag usa? Sa unsang paagi kaha nga kini makatabang kanato nga mahiusa sa Ginoo?
Ngano kaha nga dili man kita mahimong katawhan sa Ginoo kon kita wala magkahiusa?
Ipasabut nga ang unang mga miyembro sa Simbahan kinsa gitawag sa pagpundok ngadto sa Ohio miabut gikan sa nagkadaiyang mga background. Ang pipila nanag-iya og malampuson nga mga kaumahan ug tinahud sa ilang mga komunidad, samtang ang uban adunay gamay lang nga kabtangan ug gikonsiderar nga anaa sa mas ubos nga estado sa katilingban.
Sa unsa kaha nga paagi nga ang mga baruganan diha sa pisara nakapanalangin sa mga Santos samtang nagpundok sila uban sa laing mga miyembro sa Simbahan didto sa Ohio?
Sa dili pa magklase, mahimong mag-andam ka og handout alang sa matag estudyante nga naglangkob sa mosunod nga pamahayag ni Presidente Henry B. Eyring sa Unang Kapangulohan. Dapita ang usa ka estudyante sa pagbasa og kusog sa pamahayag. Hangyoa ang klase sa pagsunod, nga mangita sa mga paagi nga ang sugo nga maghiusa dunay kalabutan sa sugo sa Dios alang sa Iyang katawhan nga magpundok.
Imahe
Presidente Henry B. Eyring
“Kita nasayud gikan sa kasinatian nga ang hingpit nga kalipay moabut kon kita panalanginan og panaghiusa. … Ang tinguha sa [Langitnong Amahan] mao ang paghatag kanato nianang sagrado nga pangandoy nga magkahiusa gikan sa Iyang gugma alang kanato.
Siya dili mahimong mohatag niini ngari kanato isip mga indibidwal. Ang hingpit nga kalipay sa panaghiusa nga gusto Niya ihatag kanato dili alang sa mga indibidwal lamang. Kita kinahanglan nga motinguha niini ug mopasarang alang niini uban sa lain. Mao nga dili ikatingala nga ang Dios miawhag kanato sa pagpundok aron Siya makapanalangin kanato. Iyang gusto nga kita magkapundok diha sa pamilya. Siya mi-establisar og mga klase, mga ward, ug mga branch ug misugo kanato sa pagtigum kanunay. Diha niadto nga mga panagpundok, nga gipahiangay sa Dios alang kanato, anaa ang atong dakong oportunidad. Kita mahimong mag-ampo ug sa pagbuhat alang sa panaghiusa nga maghatag kanato og hingpit nga kalipay ug mopadako sa atong gahum sa pagserbisyo” (“Ang Atong mga Kasingkasing Nabugkos diha sa Panaghiusa,” Ensign o Liahona, Nob. 2008, 69).
Sumala ni Presidente Eyring, nganong gusto sa Ginoo nga magpundok kita? (Aron makapanalangin siya kanato ug makatabang kanato nga magtambayayong ngadto sa panaghiusa.) Unsa ang mga panalangin sa panaghiusa? (Hingpit nga kalipay ug paglambo sa atong gahum nga moserbisyo.)
Sa unsang paagi nga ang pamahayag ni Presidente Eyring makatabang kanato nga makasabut kon nganong kita magpundok isip mga pamilya? Isip mga miyembro sa Simbahan? Isip usa ka klase sa seminary?
Kanus-a kamo nakasinati sa mga panalangin nga miabut tungod sa pakigpundok uban sa lain?
Dapita ang mga estudyante sa paggahin og pipila ka minuto nga magsulat diha sa ilang mga class notebook o mga scripture study journal kon unsay ilang mabuhat aron magkahiusa uban sa ilang mga pamilya, uban sa mga batan-ong lalaki ug mga batan-ong babaye diha sa ilang mga korum ug mga klase sa simbahan, ug uban sa Ginoo. Human sa igong panahon, dapita ang pipila ka estudyante nga ipakigbahin kon unsay ilang gisulat.
Gipasabut sa Ginoo nganong Siya misugo sa Iyang Simbahan nga magpundok didto sa Ohio
Ipasabut nga gipadayag sa Ginoo ang laing mga rason nganong Siya misugo sa mga Santos nga mobiya sa New York ug magpundok didto sa Ohio. Dapita ang usa ka estudyante sa pagbasa og kusog sa Doktrina ug mga Pakigsaad 38:28–30, ug hangyoa ang klase sa pagpangita og laing mga rason nga gisugo ang mga Santos nga magpundok didto sa Ohio.
Unsa ang gipasidaan sa Ginoo ngadto sa mga Santos?
Sumala sa bersikulo 30, unsa ang mabuhat sa katawhan sa Ginoo aron dili mahadlok sa ilang mga kaaway? (Mahimo nimong isugyot nga markahan sa mga estudyante ang mga pulong nga nagtudlo sa mosunod nga baruganan: Kon kita andam dili kita mahadlok.)
Aron matabangan ang mga estudyante nga makasabut ug makagamit sa kamatuoran nga ilang nahibaloan, ipares-pares sila ug dapita ang matag parisan nga hisgutan ang mga tubag sa mosunod nga mga pangutana. (Mahimo nimong isulat kini nga mga pangutana diha sa pisara.)
Ngano kaha nga ang pagpangandam makahatag kanato og pagsalig kon magsagubang og pagsupak o kapeligro?
Unsay atong mabuhat aron maandam batok sa mga paningkamot sa kaaway nga modaut kanato?
Pahinumdumi ang mga estudyate nga niadtong 1831, pipila sa mga Santos sa New York mikwestyon nganong gisugo sila sa pag-adto sa Ohio. Hangyoa ang usa ka estudyante sa pagbasa og kusog sa Doktrina ug mga Pakigsaad 38:31–33. Hangyoa ang klase sa pagsunod ug sa pagtino sa mga paagi nga ang mga Santos mapanalanginan kon motuman sila sa sugo sa Ginoo nga magpundok didto sa Ohio. Ang mga estudyante kinahanglang mahibalo sa upat ka mga panalangin: (1) sila “unta makalingkawas sa gahum sa kaaway”; (2) sila “pagapundukon [ngadto sa Dios] ang matarung nga mga katawhan”; (3) sila makadawat sa balaod sa Dios; ug (4) sila “pagatugahan uban sa gahum nga gikan sa kahitas-an.”
Isulat ang mosunod nga baruganan diha sa pisara: Ang Dios mopundok sa Iyang katawhan aron sa pagpanalipod kanila ug sa paglig-on kanila sa espirituhanong paagi.
Sa unsang paagi nga ang pagpundok uban niadtong pareha ninyo og mga sumbanan makatabang nga mobati kamo nga gipanalipdan gikan sa gahum ni Satanas?
Sa unsang paagi nga ang pagdawat sa mga balaod sa Dios makatabang sa paglig-on kanato sa espirituhanong paagi?
Ang Simbahan gihatagan og mga sugo kalabut sa pagpundok didto sa Ohio
I-summarize ang Doktrina ug mga Pakigsaad 38:34–42 pinaagi sa pagpasabut nga ang Ginoo mihatag og pipila ka sugo ug tambag ngadto sa mga Santos nga makaabag kanila sa ilang pagbalhin ngadto sa Ohio. Ipasabut usab nga alang sa daghang mga Santos, ang ilang bugtong tinubdan sa panginabuhian mao ang ilang mga umahan. Tungod kay daghan kaayong mga miyembro sa Simbahan nga namaligya sa ilang kabtangan sa samang higayon, daghan sa mga Santos ang nag-atubang og problema nga maalkansi sa ilang mga umahan o dili na hinoon makabaligya niini. Ang abundang suplay sa igbabaligya nga yuta makapaminos sa mga presyo ug makatugot sa mga mamalit sa pagpalit sa mga umahan sa mga Santos sa grabe kaayo nga diskwento.
Dapita ang mga estudyante sa pagbasa og hilum sa Doktrina ug mga Pakigsaad 38:37, 39 ug mangita sa tambag sa Ginoo kalabut sa mga umahan ug mga katigayunan sa mga Santos. Dapita ang mga estudyante sa pag-report sa unsay ilang nakit-an.
Sa unsang paagi nga ang pagkasayud sa mahangturong mga saad nga gihatag sa Ginoo kaninyo nakatabang kaninyo nga motuman sa Iyang mga sugo?
Ipasabut nga pipila sa mga Santos naglisud sa pagbaligya sa ilang mga umahan human mahatag kini nga sugo. Ang uban mibaligya sa ilang mga umahan nga naalkansi; ang uban wala gayud makabaligya sa ilang kabtangan. Ang pipila ka matinud-anong mga miyembro mibiya na lang sa wala mahalin nila nga mga panimalay ug kabtangan ug miadto gihapon sa Ohio.
Mahimo nimong tapuson pinaagi sa pagpakigbahin sa imong pagpamatuod mahitungod sa mga kamatuoran nga nahibaloan dinhi niini nga leksyon. Dapita ang mga estudyante nga lihukon ang mga butang nga ilang gibati ug narekord atol sa leksyon.
Si Presidente Boyd K. Packer mipakigbahin og usa ka istorya nga naghulagway sa mga pagtulun-an sa Ginoo diha sa Doktrina ug mga Pakigsaad 38:24–25:
Imahe
President Boyd K. Packer
“Sa batan-on pa ko, usa ako ka home teacher sa usa ka tigulang na kaayo nga sister. Iya akong gitudloan gikan sa iyang kasinatian sa kinabuhi.
“Sa dihang gamay pa siya nga bata, si Presidente Brigham Young miabut sa Siyudad sa Brigham, usa ka dakong kalihokan sa lungsod nga gipangalan kaniya. Aron sa pagpasidungog kaniya, ang mga bata sa Primary, tanan nagsul-ob og puti, gipalinya sa daplin sa karsada padulong sa lungsod, ang matag usa adunay basket sa mga bulak nga isabwag atubangan sa karwahe sa Presidente sa Simbahan.
“Adunay wala makapahimuot kaniya. Imbis nga moitsa sa iyang mga bulak, mipatid siya og bato sa atubangan sa karwahe, nga nag-ingon, ‘Dili siya mas maayo pa kay sa akong Lolo Lovelund.’ Nadunggan kana, ug labihan siya nga nakasab-an.
“Sigurado gayud ako nga si Presidente Brigham Young mao ang una nga mouyon kang batang Janie Steed. Dili siya mokonsiderar sa iyang kaugalingon nga mas maayo pa kay ni Lolo Lovelund o ni bisan kinsa nga takus nga miyembro sa Simbahan” (“Ang Huyang ug ang Yano sa Simbahan,”Liahona, Nob. 2007, 7).
Niini nga pagpadayag, ang Ginoo misugo sa mga Santos nga magkahiusa ug moatiman sa mga kabus. Duha kini sa sukaranang mga sugo bahin sa balaod sa pagpahinungod. Kining duha ka sugo gihatagan usab og gibug-aton diha sa Moises 7:18 ug 4 Nephi 1:2–3. Sa dihang gisulayan pagsunod sa mga Santos ang balaod sa pagpahinungod didto sa Missouri, wala sila magmalampuson tungod kay sila “[wala] mohatag sa ilang kabuhian … ngadto sa mga kabus” ug wala sila “magkahiusa” (D&P 105:3–5).