Doktrina ug mga Pakigsaad 76:81–119; 77–83 (Unit 17)

Materyal sa Pagpangandam alang sa Home-Study Teacher

Summary sa Daily Home-Study nga mga Leksyon

Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang gitun-an nila ang Doktrina ug mga Pakigsaad 76:81–119; 77–83 (unit 17) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.

Day 1 (Doktrina ug mga Pakigsaad 76:81–119; 77)

Sa pagtapos sa mga estudyante sa ilang pagtuon sa panan-awon sa mga gingharian sa himaya, ilang nakat-unan nga kadtong makapanunod sa telestial nga gingharian kinahanglang mag-antus gayud sa impyerno sa dili pa sila matubos sa Manluluwas. Nakat-unan usab nila nga ang gingharian sa himaya nga atong mapanunod matino pinaagi sa atong mga binuhatan niini nga kinabuhi ug sa mga tinguha sa atong kasingkasing.

Day 2 (Doktrina ug mga Pakigsaad 78–80)

Samtang nagtuon sa sugo sa Ginoo sa pagmugna og Nagkahiusang Kapunongan, ang mga estudyante nakakat-on nga ang pagbuhat sa mga butang nga gimando sa Ginoo mag-andam kanato alang sa usa ka dapit sa celestial nga gingharian. Nakat-unan usab nila nga kon atong dawaton ang tanang butang uban sa kamapasalamaton, ang Ginoo mopilo-pilo sa atong mga panalangin.

Day 3 (Doktrina ug mga Pakigsaad 81)

Samtang nakakat-on ang mga estudyante sa mga instruksyon sa Ginoo ngadto sa mga magtatambag sa Unang Kapangulohan, ilang nadiskubrihan nga ang Kapangulohan sa Halangdon nga Priesthood mao ang naggunit sa mga yawe sa gingharian sa Dios dinhi sa yuta. Agig dugang, ilang nakat-unan nga ang mga magtatambag sa usa ka kapangulohan moabag ug mopalig-on sa presidente. Nakat-unan usab sa mga estudyante nga kon kita matinud-anon sa atong mga calling, makahimo kita og dakong kaayohan para sa uban.

Day 4 (Doktrina ug mga Pakigsaad 82–83)

Gikan sa mga instruksyon sa Ginoo ngadto sa nag-unang mga lider sa Simbahan, nakat-unan sa mga estudyante nga “kaniya ngadto kinsa daghan ang gihatag daghan ang gikinahanglan” (D&P 82:3). Natun-an sa mga estudyante ang pasidaan sa Ginoo nga kon kita makasala pag-usab human makahinulsol, ang atong mga sala kaniadto mobalik. Nakat-unan usab nila nga kon kita mosunod sa Ginoo, Siya sa kanunay motuman sa Iyang mga saad sa pagpanalangin kanato.

Pasiuna

Kini nga leksyon makatabang sa mga estudyante nga mahibaloan ang mga baruganan gikan sa ehemplo nga gipakita ni Propeta Joseph Smith sa dihang nangutana siya sa Ginoo mahitungod sa basahon sa Pinadayag.

Mga Sugyot alang sa Pagtudlo

Pahinumdom: Nakat-unan sa mga estudyante ang mahitungod sa duha ka scripture mastery passage niining semanaha. Sila migamit sa Doktrina ug mga Pakigsaad 78:19 sa pagsulat og duha ka minuto nga pakigpulong. Mahimo nimong dapiton ang pipila ka mga estudyante sa pagpresentar sa ilang mga pakigpulong ngadto sa klase. Naningkamot usab sila nga masag-ulo ang Doktrina ug mga Pakigsaad 82:10. Ikonsiderar ang pagdapit sa klase nga magdungan sa pag-recite niini nga bersikulo.

Doktrina ug mga Pakigsaad 77

Gitubag sa Ginoo ang mga pangutana ni Joseph Smith mahitungod sa basahon sa Pinadayag

Hangyoa ang mga estudyante nga ikonsiderar sa hilum kon unsa ang ilang bag-ohay lang nga nakat-unan diha sa ilang personal nga pagtuon sa kasulatan. Dapita ang pipila kanila sa pagpakigbahin og usa ka ideya nga ilang naangkon. Dayon hangyoa ang pipila sa pagpakigbahin og mga pangutana nga ilang nahunahunaan atol sa ilang personal nga pagtuon. Tingali kini maglakip sa mga pangutana mahitungod sa kahulugan sa usa ka pulong o mga pulong, sa historical background sa unsay ilang gibasa, o sa kaimportante sa usa ka piho nga bersikulo. (Ang katuyoan niining kalihokan dili ang pagtubag sa mga pangutana sa mga estudyante mahitungod sa mga kasulatan apan ang paghatag og gibug-aton sa kaimportante sa pagpangutana samtang nagtuon kita.) Human sa pagpakigbahin sa pipila ka mga estudyante, ipangutana ang mosunod:

Unsay nakatabang kaninyo nga mas masabtan ang mga kasulatan ug makaplagan ang mga tubag sa inyong mga pangutana?

Aron matabangan ang mga estudyante nga makasabut sa konteksto sa Doktrina ug mga Pakigsaad 77, dapita sila sa pagbasa sa pasiuna sa seksyon ug mangita sa unsay gibuhat ni Propeta Joseph Smith dihang siya nakadawat niini nga pagpadayag. Human maka-report ang mga estudyante sa unsay ilang nakit-an, mahimo nimong ipasabut nga ang mga pulong nga “kalabut sa paghubad sa mga Kasulatan” nagpasabut ngadto sa mando sa Ginoo nga si Joseph Smith maghimo og dinasig nga mga pag-usab sa King James Version sa Biblia. Kini nga mga pag-usab giila na karon isip ang Hubad ni Joseph Smith. Ipasabut nga samtang si Joseph Smith nagtrabaho sa basahon sa Pinadayag, nangutana siya sa Ginoo mahitungod sa kahulugan sa pipila ka mga bersikulo. Ang iyang mga pangutana ug ang mga tubag nga gipadayag sa Ginoo narekord diha sa Doktrina ug mga Pakigsaad 77. Awhaga ang mga estudyante sa pagpangita og mga ideya samtang sila magtuon sa Doktrina ug mga Pakigsaad 77 nga makatabang nila nga mapalawman ang ilang pagsabut sa mga kasulatan.

Dapita ang mga estudyante nga timan-an kon sa unsang paagi nga ang pagkahan-ay sa Doktrina ug mga Pakigsaad 77 lahi kay sa ubang mga seksyon sa Doktrina ug mga Pakigsaad. Kinahanglan nilang bantayan ang mga letra nga P ug T tupad sa matag bersikulo o paragraph sa tibuok seksyon. Ipasabut nga ang matag P unhan og pangutana gikan ni Joseph Smith, ug matag T unhan og tubag sa Ginoo.

Pangutan-a kon si kinsa ang nakabasa sa pipila o tanan sa basahon sa Pinadayag.

Unsa man ang lisud mahitungod sa pagbasa sa basahon sa Pinadayag? (Kon ang mga estudyante wala maghisgot niini, mahimo nimong ipasabut nga ang basahon sa Pinadayag mahimong lisud sabton tungod sa simbolismo nga anaa niini.)

Sa paghatag og pananglitan sa simbolikanhong hulagway diha sa basahon sa Pinadayag, dapita ang pipila sa mga estudyante nga magpuli-puli sa pagbasa og kusog gikan sa Pinadayag 4:2–8. Hangyoa ang klase sa pagsunod, nga mangita sa mga simbolo nga anaa niining mga bersikulo. Dapita ang klase sa paghingalan niining mga simbolo, ug hangyoa ang usa ka estudyante sa pagsulat niini sa pisara. (Ang mga tubag mahimong maglakip og usa ka bangaw nga nagliyok sa trono, upat ug baynte ka mga trono, mga korona nga bulawan, pito ka nagdilaab nga sulo sa kalayo, dagat nga bildo, ug upat ka mga buhing binuhat [mananap].)

Dapita ang usa ka estudyante sa pagbasa og kusog sa pangutana ni Joseph Smith diha sa Doktrina ug mga Pakigsaad 77:1. Hangyoa ang usa ka estudyante nga linginan ang simbolo diha sa pisara nga gipangutana ni Joseph sa Ginoo aron matabangan siya nga makasabut (sa dagat nga bildo). Dayon hangyoa ang laing estudyante sa pagbasa sa pagpasabut sa Ginoo diha sa Doktrina ug mga Pakigsaad 77: 1.

Sa unsang paagi nga kining tubag makatabang kanato nga mas makasabut sa Pinadayag 4:6?

Ipares-pares ang mga estudyante. Hangyoa ang matag parisan nga magdungan og basa sa Doktrina ug mga Pakigsaad 77:2–5, nga mangita sa dugang nga mga pangutana ni Joseph Smith mahitungod sa mga simbolo diha sa Pinadayag 4 ug sa mga tubag nga gihatag sa Ginoo niadtong mga pangutana. Human sa igong panahon, dapita ang pipila ka mga estudyante sa pagpakigbahin kon sa unsang paagi nga ang mga tubag sa Ginoo sa mga pangutana ni Joseph Smith makatabang kanila nga masabtan ang pipila ka simbolikanhong hulagway sa Pinadayag 4:2–8.

Dapita ang mga estudyante sa pagpamalandong kon unsaon nila sa paggamit sa unsay ilang nakat-unan gikan sa Doktrina ug mga Pakigsaad 77 aron ma-summarize unsay gihulagway ni Juan diha sa Pinadayag 4:2–8. Dapita ang pipila ka mga estudyante sa pagpakigbahin sa ilang mga summary. Dayon ipangutana ang mosunod:

Unsa ang atong makat-unan gikan sa Doktrina ug mga Pakigsaad 77 mahitungod sa tahas sa usa ka propeta sa pagtabang kanato nga makasabut sa kahulugan sa kasulatan? (Bisan og ang mga estudyante mahimong mogamit og lain-laing mga pulong, kinahanglan nilang ipahayag ang mosunod nga doktrina: Ang Ginoo nagbutyag sa husto nga paghubad sa kasulatan pinaagi sa Iyang mga propeta. Mahimo nimong isugyot nga isulat sa mga estudyante kining doktrina diha sa ilang mga kasulatan duol sa sinugdanan sa Doktrina ug mga Pakigsaad 77.)
Ngano kaha nga importante nga makat-on kon unsa ang gitudlo sa mga propeta kalabut sa unsay atong gitun-an diha sa mga kasulatan?
Asa man nato makita ang mga pagtulun-an sa mga propeta mahitungod sa kahulugan sa unsay atong mabasa diha sa mga kasulatan?

Samtang motubag ang mga estudyante niining pangutana, ipasabut nga ang Doktrina ug mga Pakigsaad 77 nagpakita nga ang mga pulong sa mga propeta nga narekord diha sa mga kasulatan makatabang sa pagpasabut sa uban nga mga kasulatan. Sa makadaghang higayon, usa ka tudling sa kasulatan mopasabut o mohubad kon unsay nabutyag sa laing tudling. Ipasabut nga ang mga footnote nga anaa sa mga kasulatan kanunayng adunay mga pakisayran niining makatabang nga mga tudling.

Sa paghulagway niining punto, dapita ang mga estudyante sa pagbasa og hilum sa Pinadayag 5:1, nga mangita kon unsay nakita ni Juan diha sa kamot sa tawo nga naglingkod sa trono. Hangyoa ang mga estudyante sa pag-report sa unsay ilang nakaplagan. Kon ang mga estudyante naggamit sa Latter-day Saint nga edisyon nga King James Version sa Biblia footnote b sa Pinadayag 5:1 (D&P 77:6). (Kon ang mga estudyante walay magamit nga LDS nga edisyon sa King James nga Biblia, dapita sila sa pagpakli direkta ngadto sa Doktrina ug mga Pakigsaad 77:6 human nila nahulagway unsay ilang nakit-an sa Pinadayag 5:1.)

Dapita ang usa ka estudyante sa pagbasa og kusog sa Doktrina ug mga Pakigsaad 77:6–7. Hangyoa ang klase sa pagsunod, nga mangita sa mga pangutana ni Joseph Smith mahitungod sa Pinadayag 5:1 ingon man usab sa mga tubag sa Ginoo. Tingali makatabang ang pagpasabut nga ang 7,000 ka tuig nagpasabut sa panahon sukad sa Pagkapukan ni Adan ug Eva. Wala kini magpasabut sa aktwal nga gidugayon sa yuta lakip ang mga panahon sa paglalang.

Hangyoa ang mga estudyante sa paggamit sa ilang kaugalingong mga pulong sa pag-summarize sa mga pangutana ug mga tubag. Human sa pagkompleto niining kalihokan, ipasabut kon sa unsang paagi nga ang paggamit sa mga footnote samtang kita magtuon sa mga kasulatan makatabang kanato sa pagdiskubre kon unsa ang gisulti sa mga propeta mahitungod sa mga kasulatan nga atong gibasa.

Ipasabut nga bisan og ang mga propeta lang ang dunay awtoridad sa paghubad sa mga kasulatan alang sa kalibutan, matag usa kanato kinahanglang mangita alang sa pagsabut ug sa personal nga paggamit samtang magtuon kita sa mga kasulatan sa indibidwal nga paagi.

Unsaon nato sa pagpahisama ang nabuhat ni Joseph Smith samtang nagtuon ug namalandong siya sa basahon sa Pinadayag ngadto sa atong personal nga pagtuon sa kasulatan? (Mahimong mahibaloan sa mga estudyante ang usa ka baruganan sama sa mosunod: Kon kita mangutana sa Ginoo, Siya makatabang kanato nga masabtan ang mga kasulatan.)
Nganong importante nga mangita sa hustong kahulugan sa mga kasulatan ug dayon tinguhaon ang personal nga paggamit niini?

Hangyoa ang mga estudyante sa pagpamalandong sa usa ka panahon sa dihang sila nangayo sa Ginoo aron tabangan sila nga masabtan ang mga kasulatan ug unsaon sa paggamit sa mga pagtulun-an diha sa mga kasulatan ngadto sa ilang kaugalingong mga kahimtang. Dapita ang pipila ka mga estudyante sa pagpakigbahin sa ilang mga kasinatian.

Ipasabut nga ang nahibilin sa Doktrina ug mga Pakigsaad 77 naglangkob og dugang nga mga pangutana ni Joseph Smith mahitungod sa basahon sa Pinadayag ug mga tubag sa Ginoo niini nga mga pangutana. I-summarize ang Doktrina ug mga Pakigsaad 77:8–15 pinaagi sa pagsulti sa mga estudyante nga kini nga pinadayag nagtugot ni Joseph Smith sa pagkat-on mahitungod sa pipila ka mga panghitabo nga mahitabo sa dili pa ang Ikaduhang Pag-anhi sa Manluluwas.

Pahibaloa ang mga estudyante nga kon sila magtuon sa basahon sa Pinadayag sa umaabut, ang mga tubag sa Ginoo diha sa Doktrina ug mga Pakigsaad 77 makatabang kanila nga makasabut sa kahulugan sa mga simbolikanhong hulagway diha sa basahon.

Tapusa kini nga leksyon pinaagi sa pagpakigbahin sa imong pagpamatuod sa mga doktrina ug mga baruganan nga nahisgutan dinhi niining leksyon o pinaagi sa pagpakigbahin og imong kasinatian isip resulta sa pagdangup ngadto sa Ginoo alang sa tabang sa pagsabut sa mga kasulatan.

Sunod nga Unit (Doktrina ug mga Pakigsaad 84–87)

Aron maandam ang mga estudyante alang sa ilang pagtuon atol sa umaabut nga semana, mahimo nimo silang dapiton sa pagkonsiderar sa mosunod: Gikonsiderar ba gayud ninyo ang tanan nga anaa sa Langitnong Amahan? Nasayud ba kamo nga Siya misaad sa pagpaambit sa tanan nga anaa Kaniya ngari kanato? Ang inyong pagtuon sa Doktrina ug mga Pakigsaad 84–87 makatabang kaninyo nga mas makasabut kon unsay kinahanglan gayud ninyong buhaton aron makaila sa Dios ug makaangkon sa tanang panalangin nga Iyang giandam alang kaninyo.