Kini nga leksyon naglakip sa mga doktrina nga gitudlo ni Joseph Smith atol sa usa ka miting sa Simbahan didto sa Ramus, Illinois, niadtong Abril 2, 1843. Kining mga pagtulun-an narekord diha sa Doktrina ug mga Pakigsaad 130. Nagtudlo ang Propeta mahitungod sa umaabut nga mga panghitabo, lakip na sa Ikaduhang Pag-anhi ni Jesukristo. Nagtudlo usab siya mahitungod sa atong abilidad nga mapabilin ang kahibalo ug salabutan human kita mamatay ug mipasabut kon sa unsang paagi nga madawat nato ang mga panalangin sa Dios.
Gitudlo ni Joseph Smith ang mahitungod sa Ikaduhang Pag-anhi
Sa dili pa magsugod ang klase, isulat ang mosunod nga pamahayag diha sa pisara: Daghan ang naghunahuna mahitungod sa eksaktong petsa sa Ikaduhang Pag-anhi.
Aduna bay higayon nga ikaw gustong masayud kon kanus-a gayud mahitabo ang Ikaduhang Pag-anhi ni Jesukristo?
Ipasabut nga sa panahon ni Joseph Smith, usa kaa prominente nga Kristiyanong tigsangyaw nga ginganlan og William Miller ang nangangkon nga ang Ikaduhang Pag-anhi ni Jesukristo mahitabo niadtong Abril 3, 1843. Usa ka adlaw sa wala pa ang gipanagna nga petsa ni Miller sa Ikaduhang Pag-anhi, namulong si Propeta Joseph Smith ngadto sa mga Santos didto sa Ramus, Illinois, ug naghisgot nga nag-ampo siya aron masayud sa panahon sa Ikaduhang Pag-anhi.
Dapita ang usa ka estudyante sa pagbasa og kusog sa Doktrina ug mga Pakigsaad 130:14–17. Hangyoa ang klase sa pagsunod, nga mangita kon unsay nahibaloan ni Joseph Smith sa dihang nag-ampo siya mahitungod sa panahon sa Ikaduhang Pag-anhi ni Jesukristo.
Gipadayag ba sa Ginoo ngadto kang Joseph Smith ang eksaktong petsa sa Ikaduhang Pag-anhi?
Unsa ang gisulti sa Ginoo nga buhaton ni Joseph Smith? (Human makatubag ang mga estudyante, mahimo nimong isugyot nga ilang markahan ang mga pulong nga “ayaw na pagsamok kanako mahitungod niini nga butang” diha sa ilang mga kasulatan.
Hangyoa ang usa ka estudyante sa pagbasa og kusog sa mosunod nga pamahayag ni Elder M. Russell Ballard sa Korum sa Napulog Duha ka mga Apostoles:
Imahe
Elder M. Russell Ballard
“Gitawag ko nga usa sa mga Apostoles aron mahimong linain nga saksi ni Kristo, … ug wala ko masayud kon kanus-a Siya moanhi pag-usab. Sa akong nahibaloan, walay usa sa akong mga kaigsoonan diha sa Korum sa Napulog Duha o gani diha sa Unang Kapangulohan ang nasayud. Ug mapaubsanon akong mosugyot nga kon wala kami masayud, nan walay usa nga nasayud. … Miingon ang Manluluwas nga ‘niana nga adlaw, ug takna, walay usa nga nasayud; wala, bisan ang mga anghel sa Dios sa langit, apan ang akong Amahan lamang’ [Joseph Smith—Mateo 1:40].
“Mituo ko nga sa dihang miingon ang Ginoo nga ‘walay usa’ nga nasayud, buot gayud Niyang ipasabut nga walay usa nga nasayud” (When Shall These Things Be?” Ensign, Dis. 1996, 56).
Unsay atong makat-unan gikan sa Doktrina ug mga Pakigsaad 130:14–17 ug sa pamahayag ni Elder Ballard? (Ang mga estudyante mahimong mahibalo og nagkalain-laing mga kamatuoran, apan kinahanglan nilang mahibaloan ang mosunod: Bugtong ang Dios lamang ang nasayud sa eksaktong panahon nga mahitabo ang Ikaduhang Pag-anhi.)
Ipasabut nga sa atong panahon, pipila ka indibidwal ang misulay sa pagtag-an sa eksaktong panahon sa Ikaduhang Pag-anhi o sa katapusan sa kalibutan.
Sa unsang paagi nga ang paghinumdom niining baruganan makatabang kaninyo nga dili mahisalaag pinaagi sa sayop nga mga pangangkon?
Nagtudlo si Joseph Smith mahitungod sa kaimportante sa pagbaton og kahibalo ug salabutan dinhi niini nga kinabuhi
Kon mahimo, i-display ang usa ka maleta o bag. Dapita ang mga estudyante sa paghunahuna nga mobiya sila sa panimalay ug moadto sa usa ka dapit nga wala pa nila maadtui sukad. Gitugutan sila sa pagdala lamang sa unsay masulog sa maleta (o bag).
Unsa may inyong isulod sa maleta? (Dapita ang usa ka estudyante sa paglista sa mga tubag diha sa pisara.)
Hangyoa ang mga estudyante sa paghunahuna nga ang ilang destinasyon mao ang kalibutan sa espiritu, kon asa kita moadto kon mamatay kita.
Hain sa mga item diha sa pisara ang inyong madala kon mamatay kamo?
Dapita ang usa ka estudyante sa pagbasa og kusog sa Doktrina ug mga Pakigsaad 130:18–19. Hangyoa ang klase sa pagsunod, nga mangita kon unsay atong madala gikan niini nga kinabuhi kon mamatay kita.
Sumala sa mga bersikulo 18–19, unsa may madala nato human kita mamatay? Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga kamatuoran: Ang kahibalo ug salabutan nga atong mabatunan niini nga kinabuhi madala nato sa pagkabanhaw.
Aron matabangan ang mga estudyante nga makasabut kon unsay gipasabut sa mga pulong nga kahibalo ug salabutan, dapita ang usa ka estudyante sa pagbasa og kusog sa mosunod nga pamahayag ni Elder Neal A. Maxwell sa Korum sa Napulog Duha ka mga Apostoles:
Imahe
Elder Neal A. Maxwell
“Kon mamalandong lamang kita kon unsay atong madala sa pagkabanhaw, daw klaro nga ang atong salabutan atong madala, buot ipasabut dili lamang ang atong IQ, apan ang ato usab nga kapasidad sa pagdawat ug paggamit sa kamatuoran. Ang atong mga talento, mga kinaiya, ug mga kahanas atong madala; sigurado usab nga ang atong kapasidad sa pagkat-on, ang atong pagdisiplina sa kaugalingon, ug ang atong kapasidad sa pagtrabaho” (We Will Prove Them Herewith [1982], 12).
Sumala ni Elder Maxwell, unsa may gipasabut sa pulong nga salabutan diha sa mga bersikulo 18–19?
Sumala sa bersikulo 19, unsaon nato pagkab-ut og dugang nga kahibalo ug salabutan? (Mahimo nimong ipasabut nga ang ubang kahibalo ug salabutan makab-ut lamang “pinaagi sa … kakugi ug pagkamasulundon.”)
Kanus-a kamo nakakab-ut og kahibalo ug salabutan pinaagi sa inyong kakugi ug pagkamasulundon? (Mahimong usab nimong ipakigbahin ang usa ka kasinatian.)
Ipasabut nga sumala sa bersikulo 19, kadtong makakab-ut og daghan pa nga kahibalo ug salabutan dinhi niini nga kinabuhi adunay kahigayunan didto sa kalibutan nga umaabut.
Sa unsa kaha nga paagi nga ang pagkab-ut og kahiblao ug salabutan dinhi niini nga kinabuhi makahatag kanato og kahigayunan didto sa kalibutan nga umaabut?
Ipasabut nga kon unsay atong makat-unan dinhi niining kinabuhi, sa temporal ug sa espirituhanong paagi, makatabang kanato sa tibuok kahangturan. Makahimo kita sa pagpalambo sa kahibalo nga atong makab-ut niini nga kinabuhi aron mas mahisama sa Langitnong Amahan.
Aron matabangan ang mga estudyante sa pagpadayon sa pagkab-ut og kahiblao ug salabutan, awhaga sila sa pagpadayon sa pag-apil sa seminary karon ug sa pagplano sa pagtambong sa institute human sila makagradwar gikan sa seminary. Dapita ang mga estudyante sa pagsulat og usa ka tumong nga makatabang nila nga makakab-ut og daghan pa nga kahibalo ug salabutan.
Gipasabut ni Joseph Smith kon unsaon nato pagkab-ut sa mga panalangin
Dapita ang mga estudyante sa paghunahuna nga gusto nila nga mapalambo ang ilang sinulatan, mao nga nakahukom sila nga modagan og tulo ka milya, lima ka adlaw sa usa ka semana, sulod sa usa ka bulan.
Unsa may mahimong resulta? Ngano man?
Unsa man ang inyong buhaton aron mapalambo ang inyong sinulatan?
Ipasabut nga ingon nga kinahanglan natong masabtan kon unsaon pagkab-ut ang mga resulta nga atong gitinguha, kinahanglan natong masabtan kon unsaon pagkab-ut sa mga panalangin nga gustong ihatag sa Langitnong Amahan ngari kanato.
Dapita ang usa ka estudyante sa pagbasa og kusog sa Doktrina ug mga Pakigsaad 130:20–21. Hangyoa ang klase sa pagsunod, nga mangita kon sa unsang paagi nato makab-ut ang mga panalangin nga gustong ihatag sa Langitnong Amahan ngari kanato. (Mahimo nimong ipasabut nga ang “gipasikad” nagpasabut og “gibasihan” ug nga ang balaod nga “dili mausab nga sugo” permanente ug dili mailisan.)
Sumala sa mga bersikulo 20–21, unsaon man nato pagkab-ut ang usa ka panalangin gikan sa Dios?
Dapita ang mga estudyante sa pagsulat og “kon–nan” nga baruganan base sa mga bersikulo 20–21. Human sa igong panahon, hangyoa ang pipila ka estudyante sa pagbasa og kusog sa ilang mga pamahayag. Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga baruganan: Kon gusto kita nga makakab-ut og usa ka panalangin gikan sa Dios, nan kinahanglan gayud kitang motuman sa balaod nga diha kini gipasikad.
Aron matabangan ang mga estudyante sa pagpalambo sa ilang panabut bahin niining kamatuoran, kopyaha ang mosunod nga tsart diha sa pisara (mahimo nimo kining buhaton sa dili pa magklase). Dapita ang mga estudyante sa pagkopya sa tsart diha sa ilang mga class notebook o mga scripture study journal. Dapita ang usa ka estudyante sa pagbasa og kusog sa unang tudling sa kasulatan nga gilista. Hangyoa ang klase sa pagsunod, nga mangita sa balaod ug sa nag-uban nga panalangin. Samtang moreport sila sa ilang mga tubag, sulati ang tukma nga mga luna diha sa pisara. Dapita ang mga estudyante sa pagkompleto sa ilang mga tsart nga sila ra.
Kon gusto kita nga makakab-ut og usa ka panalangin gikan sa Dios, nan kinahanglan gayud kitang motuman sa balaod nga diha kini gipasikad.
Human makompleto sa mga estudyante kini nga kalihokan, hangyoa sila sa paghunahuna mahitungod sa mga panalangin nga ilang nadawat tungod kay mituman sila og usa ka balaod. Dapita sila sa pagpakigbahin sa ilang mga kasinatian.
Dapita ang mga estudyante sa pagsulat sa mga panalangin nga gusto nilang makab-ut. Dayon dapita sila sa pagsulat kon unsa nga balaod o mga balaod ang kinahanglan nilang tumanon aron madawat kadtong mga panalangin.
Ipasabut nga ang ubang mga balaod ug mga panalangin piho kaayo samtang ang uban para sa kadaghanan. Ipasabut usab nga ang ubang gisaad nga mga panalangin mahimong moabut sa sunod nga kinabuhi.
Sa pagtapos sa leksyon karon, dapita ang mga estudyante sa pagribyu sa pipila ka kamatuoran nga ilang nakat-unan gikan sa mga pagtulun-an ni Joseph Smith nga narekord diha sa Doktrina ug mga Pakigsaad 130.
Sa unsang paagi nga ang mga kamatuoran diha sa Doktrina ug mga Pakigsaad 130 makatabang kaninyo nga makadayeg kang Joseph Smith?
Tapusa pinaagi sa pagdapit og usa ka estudyante sa pagbasa sa mosunod nga pamahayag ni Presidente Brigham Young mahitungod sa abilidad ni Joseph Smith sa pagpasabut sa mga butang bahin sa Dios.
Imahe
President Brigham Young
“Ang kahamili sa himaya sa kinaiya ni Brother Joseph Smith mao nga iyang mapasabut ang langitnong mga butang aron masabtan sa mga tawo nga adunay kinutuban ang pagsabut. Kon siya mosangyaw ngadto sa mga tawo—mopadayag sa mga butang sa Dios, sa kabubut-on sa Dios, sa plano sa kaluwasan, sa katuyoan ni Jehova, sa atong relasyon ngadto kaniya ug sa tanang mga langitnong mga binuhat, iyang gihimong sayon ang iyang mga pagtulun-an ngadto sa kapasidad sa matag lalaki, babaye, ug bata, mihimo niini nga yano sama sa maayo nga pagkahulagway nga dalan. Kini makapakita unta sa kamatuoran sa matag tawo nga sukad nakadungog kaniya sa iyang balaan nga awtoridad ug gahum, kay walay laing tawo ang makatudlo sama sa iyang pagtudlo, ug walay tawo ang makapadayag sa mga butang sa Dios, apan pinaagi sa mga pagpadayag ni Jesukristo” (Mga Pagtulun-an sa mga Presidente sa Simbahan: Brigham Young [1997], 399).
Tapusa pinaagi sa pagpakigbahin sa imong pagpamatuod bahin sa calling ni Joseph Smith isip usa ka propeta, manalagna, ug tigpadayag. Dapita ang mga estudyante sa pagbuhat sa mga doktrina ug mga baruganan nga ilang nakat-unan samtang nagtuon sila sa mga pagtulun-an sa Propeta diha sa Doktrina ug mga Pakigsaad 130.
Si Presidente Boyd K. Packer sa Korum sa Napulog Duha ka mga Apostoles mitudlo:
Imahe
President Boyd K. Packer
“Kamo … kinahanglan nga dili moreklamo mahitungod sa pag-eskwela. Ayaw patuyangi ang inyong kaugalingon diha sa sobra ka teknikal nga dili na kamo makakat-on sa mga butang nga praktikal. Ang tanan ninyong makat-unan nga praktikal—sa balay, sa pagpangluto, sa nataran—makaayo alang kaninyo. Ayaw gayud pagreklamo kabahin sa pag-eskwela. Pagtuon og maayo, ug eskwela kanunay. …
“Makakat-on kamo sa pagpang-ayo og mga butang ug sa pagpamintal og mga butang ug bisan gani sa pagtahi ug bisan unsa pa nga praktikal. Trabaho kana nga angay buhaton. Kon wala kini maghatag og piho nga kaayohan kaninyo, makatabang kini kaninyo kon kamo magserbisyo sa ubang tawo” (“Tambag alang sa mga Young Men,”Liahona, Mayo 2009, 51).