Sukad sa pagsugod sa Pagpahiuli, ang buhat sa Ginoo gipalapdan sa tibuok kalibutan. Nagpuyo kita sa panahon nga ang Ginoo mipadali sa Iyang buhat. Ang kabatan-onan sa Simbahan adunay daghang kapanguhaan ug mga oportunidad nga ikatampo sa pagpadali sa buhat sa Ginoo.
Mga Sugyot alang sa Pagtudlo
Ang Ginoo mipadali sa Iyang buhat
Dapita ang usa ka estudyante sa paglakaw gikan sa pikas habig sa lawak ngadto sa pikas sa normal nga gikusgon. Dayon hangyoa ang estudyante sa paglabang og usab sa kwarto ug magdali siya. Samtang ang estudyante milabang sa kwarto sa ikaduhang higayon, pangutan-a ang klase sa mosunod:
Unsa ang buot ipasabut sa pagpadali sa usa ka butang? (Pakusgan kini.) Unsa ang pipila ka mga rason nga ang usa ka tawo mahimong mopadali, o mopakusog, sa usa ka tahas?
Dapita ang usa ka estudyante sa pagbasa og kusog sa Doktrina ug mga Pakigsaad 88:73. Hangyoa ang klase sa pagsunod, nga mangita kon unsay gisulti sa Ginoo nga Iyang ipadali. Hangyoa ang mga estudyante sa pagreport kon unsay ilang makit-an.
Unsa kaha ang gipasabut sa Ginoo sa pagpadali sa Iyang buhat?
Nag-refer ngadto sa Doktrina ug mga Pakigsaad 88:73, si Elder Russell M. Nelson miingon, “Kana nga panahon sa pagpadali mao karon” (“Thus Shall My Church Be Called,” Ensign, Mayo 1990, 17). Isulat ang mosunod nga doktrina diha sa pisara: Nagpuyo kita sa panahon nga gipadali sa Ginoo ang Iyang buhat.
Unsa ang pipila ka mga paagi nga ikaw nakasaksi nga ang Ginoo mipadali sa Iyang buhat?
Dapita ang usa ka estudyante sa pagbasa og kusog sa Doktrina ug mga Pakigsaad 133:10. Hangyoa ang klase sa pagsunod, nga mangita kon unsa ang gisugyot niini nga bersikulo ug nganong ang Ginoo mopadali sa Iyang buhat.
Unsa ang gisugyot niining bersikulo kon nganong ang Ginoo mopadali sa Iyang buhat? (Aron matabangan ang mga tawo alang sa Iyang Ikaduhang Pag-anhi.)
I-display ang litrato ni Presidente Spencer W. Kimball (Libro sa mga Hulagway sa Ebanghelyo [2009], nu. 133; tan-awa usab sa LDS.org). Ipasabut nga atol sa pagserbisyo ni Presidente Spencer W. Kimball isip Presidente sa Simbahan, mipadali ang Ginoo sa Iyang buhat. Sama pananglit, ang misyonaryo nga buhat gipalapdan, ug ang Simbahan mimantala sa bag-ong mga edisyon sa mga kasulatan. Samtang siya mi-awhag sa mga miyembro sa Simbahan sa pagpadayon, si Presidente Kimball miingon nga “igo na ang gidugayon nga naghunong ang Simbahan”(“Let Us Move Forward and Upward,” Ensign, Mayo 1979, 82). Gitudlo usab niya nga, “Kita kinahanglan gayud nga mopalambo sa atong paningkamot ug kinahanglan gayud nga buhaton kini karon” (“Always a Convert Church: Some Lessons to Learn and Apply This Year,” Ensign, Sept. 1975, 3).
Imahe
President Spencer W. Kimball
Unsa kaha ang gipasabut ni Presidente Kimball sa dihang miingon siya nga kita kinahanglan gayud nga “mopalambo sa atong paningkamot”?
Aron matabangan ang mga estudyante nga masabtan ang pipila ka mga paagi nga ang Ginoo mipadali sa Iyang buhat karon ug ang pipila ka mga paagi nga sila makasalmot sa Iyang buhat, ipahigayon ang mosunod nga kalihokan:
Bahina ang klase ngadto sa tulo ka grupo, ug hatagi ang mga estudyante diha sa matag grupo og kopya sa usa sa mosunod nga mga assignment sa pagtudlo. Hatagi ang mga estudyante og pipila ka minuto sa pagtuon ug pagpangandam sa pagtudlo sa ilang mga assignment ngadto sa ilang mga classmate. Human sa igong panahon, i-organisar ang mga estudyante nga magtinagutlo sa grupo, magkuha og tag-usa gikan sa orihinal nga grupo. Dapita ang mga estudyante nga magpuli-puli og tudlo sa ilang mga grupo mahitungod sa paagi nga gipadali sa Ginoo ang Iyang buhat ug sa unsang paagi nga sila makaapil niana nga buhat.
Assignment sa Pagtudlo 1: Pagpadali sa misyonaryo nga buhat
Si Presidente Spencer W. Kimball misulti sa mga Santos nga ang Ginoo andam sa pagbukas sa kahigayunan alang kanila sa pagpakigbahin sa ebanghelyo, lakip na sa mga nasud nga wala magtugot og misyonaryo nga buhat. Hinoon, miingon usab siya nga ang mga Santos kinahanglan nga mangandam sa ilang kaugalingon sa pagdawat niadto nga mga oportunidad. Si Presidente Kimball mipamatuod usab nga kon ang matag batan-ong lalaki andam sa pagserbisyo og usa ka full-time nga misyon, ang Ginoo mobukas sa mga kahigayunan ug mohatag og paagi aron ang misyonaryo nga buhat magpadayon sa tibuok kalibutan. Siya namahayag:
Imahe
President Spencer W. Kimball
“Nakahibalo ko nga adunay mga kurtina, sama sa mga kurtina nga puthaw ug mga kurtina nga kawayan. Nakahibalo ko kon unsa kini ka lisud tungod kay naghimo kita og mga paningkamot. … Apan wala koy makitang maayo nga rason nganong ang Ginoo mobukas sa mga kahigayunan nga kita wala maandam sa pagsulod. Nganong iya man nga tumbahon ang Kurtina nga Puthaw o ang Kurtina nga Kawayan o ang bisan unsang kurtina kon kita dili gihapon andam sa pagsulod?” (“When the World Will Be Converted,” Ensign, Okt. 1974, 5, 7).
Ang mga miyembro sa Simbahan misunod sa tambag ni Presidente Kimball ug miandam sa pagpakigbahin sa ebanghelyo. Atol sa administrasyon ni Presidente Kimball ang gidaghanon sa full-time nga mga misyonaryo misaka og labaw sa 50 porsyento. Sa ulahing bahin sa mga 1980 ug sa sayong bahin sa mga 1990, ang mga gobyerno sa East Germany, mga nasud nga sulod ra sa kanhi Soviet Union, ug lain pang mga nasud diin ang misyonaryo nga buhat kanhi nang gidili misugod na sa pagtugot og mga misyonaryo sa pagpakigbahin sa ebanghelyo niining mga nasura. Ang gipanagna ni Presidente Kimball natuman.
Niadtong Oktubre 2008, si Presidente Thomas S. Monson misubli sa pagtambag nianang nahatag ni Presidente Kimball:
Imahe
President Thomas S. Monson
“Dihay nagpabilin nga … mga dapit sa kalibutan diin ang atong impluwensya limitado ug diin wala kita tuguti sa pagpakigbahin sa ebanghelyo sa gawasnon nga paagi. Sama sa gihimo ni Presidente Spencer W. Kimball labaw sa 32 ka tuig na ang milabay, ako kamo nga giawhag sa pag-ampo alang sa pag-abli niadtong mga dapit, nga unta kita makapakigbahin sa uban kanila sa hingpit nga kalipay sa ebanghelyo. Sama sa atong pag-ampo kaniadto agig tubag sa mga pangamuyo ni Presidente Kimball, atong nakita ang mga milagro nga nahinabo samtang mga nasud human sa laing nasud, nga sa nangagi midumili sa Simbahan, giablihan. Ang ingon mahitabo pag-usab samtang kita mag-ampo uban sa hugot nga pagtuo (“Maayong Pagtambong sa Komperensya,”Liahona, Nob. 2008, 6).
Ipasabut nga samtang si Presidente Kimball nag-awhag sa mga miyembro sa Simbahan sa pagpalambo sa ilang paningkamot, giklaro niya ang responsibilidad sa kada batan-ong lalaki sa Simbahan. Dapita ang usa ka sakop sa inyong grupo sa pagbasa og kusog sa mosunod nga pamahayag:
Imahe
President Spencer W. Kimball
“Ang kanunayng gipangutana mao nga: Kinahanglan ba nga kada batan-ong lalaki magmisyon? Ug ang tubag nahatag na sa Ginoo. Kini mao ang ‘Oo.’ Ang kada batan-ong lalaki kinahanglang magmisyon”(“When the World Will Be Converted,” 8).
Pahinumdumi ang mga sakop sa inyong grupo nga ang mga propeta mipadayon sa pag-awhag sa kada takus, makahimo nga batan-ong lalaki sa pagserbisyo og full-time nga misyon. Gi-welcome usab sa mga propeta ang mga batan-ong babaye sa pagserbisyo og full-time nga mga misyon kon sila magtinguha sa ingon. Niadtong Oktubre 2012, si Presidente Thomas S. Monsson mipahibalo sa giusab nga edad sa misyonaryo nga magmisyon, nga nagtugot sa mga batan-ong lalaki nga magsugod sa pagserbisyo sa edad nga 18 ug ang mga batan-ong babaye sa edad nga 19.
Hisguti ang mosunod nga mga pangutana diha sa grupo:
Sumala sa mga propeta sa ulahing mga adlaw, unsa ang gilauman sa Ginoo alang sa mga batan-ong lalaki kalabut sa full-time nga misyonaryo nga buhat? (Bisan og ang mga sakop sa grupo mahimong mogamit og lain-laing mga pulong, ang ilang mga tubag kinahanglang magpakita sa mosunod nga baruganan: Kada batan-ong lalaki kinahanglang mangandam sa pagserbisyo og usa ka full-time nga misyon ug ipabilin ang iyang kaugalingon nga takus sa pagserbisyo.)
Nganong ang kada batan-ong lalaki mangandam sa pagserbisyo og full-time nga misyon?
Sa unsang paagi nga ang pag-andam alang sa usa ka misyon karon makatabang ninyo nga makatampo sa buhat sa Ginoo?
Sa unsa kaha nga paagi nga ang dinasig nga pag-usab sa edad alang sa full-time nga mga misyonaryo nakatampo sa pagpadali sa buhat sa Ginoo?
Assignment sa Pagtudlo 2: Bag-ong mga edisyon sa mga kasulatan
Hangyoa ang mga sakop sa inyong grupo sa pagkonsiderar unsa ang ilang buhaton kon ang usa ka suod nga higala mangutana kanila nga, “Gusto ko nga maduol ngadto sa Dios. Unsay akong buhaton?” Dayon ipangutana ang mosunod:
Unsay inyong isulti ngadto sa inyong higala?
Basaha ang mosunod nga pamahayag ni Presidente Spencer W. Kimball:
Imahe
President Spencer W. Kimball
“Akong nasuta nga kon dili kaayo nako hatagan og bili ang akong pakigrelasyon sa unsay balaanon ug kon kini ingon nga walay balaan nga dalunggan nga nagpaminaw ug walay balaan nga tingog nga namulong, ako layo, layo kaayo. Kon akong isubsob ang akong kaugalingon sa mga kasulatan ang gilay-on magkaduol ug ang pagka-espirituhanon mobalik” (The Teachings of Spencer W. Kimball, ed. Edward L. Kimball [1982], 135).
Pahibaloa ang mga sakop sa inyong grupo nga ang pamahayag ni Presidente Kimball nagpasabut sa dakong panginahanglan alang kanato nga adunay access ngadto sa mga kasulatan. Dapita ang usa ka sakop sa inyong grupo sa pagbasa og kusog sa Doktrina ug mga Pakigsaad 104:58-59. Hangyoa ang grupo sa pagsunod ug motino kon nganong gusto sa Ginoo nga imantala sa mga lider sa Simbahan ang mga pinadayag.
Sa unsang paagi nga ang pagtuon sa mga kasulatan makatabang kanato sa pagpalambo sa atong paningkamot ug sa pagpadali sa buhat sa Ginoo?
Ipasabut nga sa sayong bahin sa mga 1970, ang mga lider sa Simbahan miila sa panginahanglan alang sa mga miyembro sa Simbahan nga mas mapamilyar sa mga kasulatan ug magbaton og usa ka standard nga edisyon sa Biblia alang sa pagtuon ug pagtudlo. Niadtong 1979, human sa katuigan sa dinasig, makugihong mga paningkamot, ang Simbahan miimprinta sa usa ka opisyal nga Iningles nga LDS nga edisyon sa King James nga Biblia. Kini nga Biblia naglangkob og daghang tabang sa pagtuon nga wala sa nangagi, lakip sa daghang mga footnote nga may mga cross-reference ug uban pang mga tabang; gipalambo nga mga ulohan sa kapitulo; mga kinutlo gikan sa Hubad ni Joseph Smith; ang Topical Guide; ug ang Bible Dictionary. Niadtong 1981, ang Simbahan mimantala og usa ka bag-ong edisyon sa Iningles nga triple combination nga gilakipan og gipalambo nga mga footnote, mga ulohan sa kapitulo, mga mapa, ug usa ka index. Niadtong 2009, ang Simbahan mimantala sa LDS nga edisyon sa Biblia nga Reina-Valera sa Spanish.
Dapita ang usa ka estudyante sa pagbasa sa mosunod nga pamahayag ni Presidente Boyd K. Packer sa Korum sa Napulog Duha ka mga Apostoles, nga gihimo usa ka tuig human sa paggawas sa 1981 nga Iningles nga triple combination. Hangyoa ang mga estudyante sa pagpaminaw kon sa unsang paagi nga iyang nalantaw kining bag-ong mga edisyon sa mga kasulatan nga mopanalangin sa mga kinabuhi ug sa pagpadayon sa buhat sa Dios.
Imahe
President Boyd K. Packer
“Sa paglabay sa mga katuigan, kini nga mga kasulatan makahimo og sunod-sunod nga mga henerasyon sa matinud-anong mga Kristiyano kinsa nakaila ni Ginoong Jesukristo ug desidido nga mosunod sa Iyang kabubut-on.
“… Mopalambo sila og pagkamakinaadmanon sa ebanghelyo labaw pa nianang nakab-ot sa ilang katigulangan. Makaangkon sila og pagpamatuod nga si Jesus mao ang Kristo ug mahimong sarang sa pagsangyaw Kaniya ug manalipod Kaniya” (“Scriptures,” Ensign, Nob. 1982, 53).
Ipakigbahin ang imong pagpamatuod nga ang mga kasulatan nagpamatuod nga si Jesus mao ang Kristo. Ang pagtuon sa mga kasulatan makatabang kanato nga makadawat og usa ka pagpamatuod ni Jesukristo ug makatabang nga mapuno ang atong kinabuhi sa Balaang Espiritu.
Ipasabut nga ang dakong mga paningkamot gihimo ug padayon nga gihimo aron mahatagan ang mga miyembro sa Simbahan sa mga kasulatan ug sa makatabang nga abag sa pagtuon diha sa ilang lumad nga mga pinulongan.
Hisguti ang mosunod nga mga pangutana diha sa grupo:
Nganong importante man ang inadlaw-adlaw nga pagtuon sa kasulatan?
Sa unsang paagi nga ang inyong personal nga pagtuon sa kasulatan nakatabang kaninyo nga moabag diha sa buhat sa Ginoo?
Assignment sa Pagtudlo 3: Pagpadali sa buhat sa templo ug sa family history
Hangyoa ang inyong grupo sa pagtag-an kon pila ka mga templo ang natukod sulod sa 143 ka tuig tali sa organisasyon sa Simbahan niadtong 1830 ug sa pagtawag ni Presidente Spencer W. Kimball niadtong 1973 (17 ka mga templo). Dayon hangyoa ang grupo sa pagtag-an kon pila ka mga templo ang gipahibalo o gitukod sulod sa 40 ka tuig tali sa 1973 ug 2013 (153 ka mga templo).
Ipasabut nga dako kaayo ang pagsaka sa pagtukod sa templo ubos sa direksyon ni Presidente Gordon B. Hinckley. Dapita ang usa ka sa inyong grupo sa pagbasa sa mosunod nga pamahayag ni Presidente Hinckley:
Imahe
President Gordon B. Hinckley
“Dako kaayo ang akong tinguha nga ang usa ka templo mahimutang sa resonable nga dapit nga maabut sa mga Santos sa Ulahing mga Adlaw sa tibuok kalibutan. … Ang buhat naglihok ingon kapaspas sumala sa atong mahimo. Mao kini ang kanunay nakong giampo nga sa bisan unsang paagi nga kini mapakusgan aron nga mas daghan sa atong katawhan ang mas makaadto sa sagrado nga balay sa Ginoo” (“Of Missions, Temples, and Stewardship,” Ensign, Nob. 1995, 52, 53).
Dapita ang usa ka estudyante sa pagbasa og kusog sa Doktrina ug mga Pakigsaad 128:15, 17. Hangyoa ang klase sa pagsunod, nga mangita kon unsay atong responsibilidad ngadto sa atong mga katigulangan. Dayon basaha og kusog ang mosunod nga pamahayag sa doktrina nga gihatag ni Elder David A. Bednar sa Korum sa napulog Duha ka mga Apostoles: Kita adunay responsibilidad nga pakigsaad sa pagsiksik sa atong mga katigulangan ug paghatag kanila sa makaluwas nga mga ordinansa sa ebanghelyo” (“Ang mga Kasingkasing sa mga Anak Mobati,”Liahona, Nob. 2011, 25).
Ipasabut nga ang pagtukod og mga templo ug pag-uswag diha sa buhat sa family history mao ang ebidensya nga ang Dios nagpadali sa Iyang buhat sa pikas bahin sa tabil. Dapita ang usa ka estudyante sa pagbasa sa mosunod nga pamahayag ni Elder Bednar. Hangyoa ang grupo sa pagpaminaw kon sa unsang paagi nga sila makatampo sa buhat sa Ginoo.
Imahe
Elder David A. Bednar
“Dili kini sulagma nga ang FamilySearch ug uban nga mga gamit nia na sa panahon nga ang kabatan-onan pamilyar kaayo sa mga teknolohiya sa impormasyon ug komunikasyon. Ang inyong mga tudlo maayo na kaayo mo-text ug mo-tweet aron mapaspas ug mapalambo ang buhat sa Ginoo—dili lang aron makakontak dayon sa inyong mga higala. Ang mga kahanas ug abilidad nga makita sa kadaghanan sa atong kabatan-onan karon usa ka pagpangandam sa pagtabang sa buhat sa kaluwasan” (“Ang mga Kasingkasing sa mga Anak Mobati,”Liahona, Nob 2011, 26).
Hisguti ang mosunod nga pangutana kauban sa inyong grupo:
Unsang positibo nga mga kasinatian ang inyong naangkon sa paghimo sa buhat sa family history o pag-adto sa templo aron moapil sa mga ordinansa alang sa mga patay?
Ang atong responsibilidad sa pagpadayon sa buhat
Human makakompleto ang mga estudyante sa ilang pagtudlo sa ginagmay nga grupo, dapita ang pipila ka mga estudyante sa pagpakigbahin sa ilang mga hunahuna ug mga pagbati bahin sa pagpadali sa buhat sa Ginoo.
Dapita ang usa ka estudyante sa pagbasa sa mosunod nga pamahayag ni Elder David B. Haight sa Korum sa Napulog Duha ka mga Apostoles. Hangyoa ang klase sa pagpaminaw alang sa unsay mahitabo kon kita mosalmot sa buhat sa Ginoo.
Imahe
Elder David B. Haight
“Mga kaigsoonan, ang Ginoo miabli sa agianan ug naghimo niining posible sa pagpalapad sa Iyang buhat sa tibuok kalibutan, ug pagkanindot niini nga panalangin alang kanatong tanan—matag usa sa iyang kaugalingong paagi—nga moapil. …
“Kinsa gawas sa mga propeta lang sa Dios ang makaangkon og panglantaw sa milagro sa paspas nga pagdako sa buhat sa Ginoo? Sa pagkatinuod, sumala sa gipanagna sa Ginoo diha sa seksyon 88 sa Doktrina ug mga Pakigsaad, Siya mipadali sa Iyang buluhaton diha sa angay nga panahon (tan-awa sa D&P 88:73)” (“Missionary Work—Our Responsibility,” Ensign, Nob. 1993, 61, 62).
Sumala ni Elder Haight, unsa ang mahitabo kon kita moapil sa buhat sa Ginoo? (Samtang motubag ang mga estudyante, isulat ang mosunod nga kamatuoran diha sa pisara: Mapanalanginan kita pinaagi sa pag-apil sa pagpadali sa buhat sa Ginoo.)
Unsa nga mga panalangin ang inyong nasinati samtang kamo miapil sa pagpadali sa buhat sa Ginoo?
Dapita ang mga estudyante sa pagkonsiderar sa mga oportunidad nga ilang matampo ngadto sa pagpadali sa buhat sa Ginoo. Hangyoa sila nga tubagon ang mosunod nga mga pangutana diha sa ilang mga class notebook o mga scripture study journal:
Unsa ang pipila ka mga paagi nga makaapil kamo sa pagpadali sa buhat sa Ginoo?
Human sa igong panahon, dapita ang mga estudyante sa paghimo og usa ka tumong sa pag-follow up kon unsay ilang nasulat. Tapusa pinaagi sa pagpamatuod bahin sa pagpadali sa buhat sa Ginoo ug sa atong mga responsibilidad ug mga oportunidad sa pag-apil sa Iyang buhat.
Komentaryo ug Background nga Impormasyon
“Kita kinahanglan gayud nga mopalambo sa atong paningkamot”
Si Presidente Spencer W. Kimball mitudlo:
Imahe
President Spencer W. Kimball
“Kita ba, usab, adunay butang nga kinahanglan natong ikapaambit? Oo! Anaa kanato ang ebanghelyo ni Jesukristo, ang ebanghelyo sa kalinaw, ang ebanghelyo sa kalipay. Anaa kanato ang mga kamatuoran nga makapahimo ni bisan kinsang tawo nga mas maayo ug mas malampuson, kaminyoon nga mas malipayon ug mas nindot, panimalay nga mas sama sa langit. Anaa kanato ang gahum sa priesthood sa Dios sa pagpanalangin sa atong mga panimalay ug mga kinabuhi ug sa mga kinabuhi sa uban. Oo, para kini sa atong kaugalingon, sa atong panimalay, sa atong mga korum, sa atong mga klase, sa atong mga assignment sa Simbahan nga kinahanglan gayud kitang magmadasigong modala niadtong mga butang nga atong nadawat. Ug para kini sa atong dili miyembro nga mga silingan ug mga kauban nga kita karon gihangyo nga ‘mohatag usab sa unsay anaa kanato.’ Ang Ginoo nagsugo kanato sa pagbuhat sa ingon. Kita kinahanglan gayud nga mopalambo sa atong paningkamot ug kinahanglan gayud nga buhaton kini karon” (“Always a Convert Church: Some Lessons to Learn and Apply This Year,” Ensign, Sept. 1975, 3).
Ang mga Korum sa Seventy
Ang pagpadako sa mga Korum sa Seventy mao ang ebidensya nga ang Ginoo mipadali sa Iyang buhat.
Niadtong 1976, si Presidente Spencer W. Kimbal mi-organisar sa Unang Korum sa Seventy, ug dugang nga mga Korum sa Seventy ang napuno samtang nagkadako ang Simbahan. Ang gidaghanon sa mga korum magpadayon sa pagdaghan kon gikinahanglan.
“[Hangtud 2014] adunay … walo ka mga Korum sa Seventy. Ang matag korum mahimo nga adunay hangtud sa 70 ka mga sakop. Ang mga sakop sa mga Korum sa Seventy sa kanunay gi-refer isip mga ‘Seventy.’ Ang mga Seventy gitawag sa pagsangyaw sa ebanghelyo ug sa pagpalig-on sa Simbahan. Sila nagtrabaho ubos sa direksyon sa Korum sa Napulog Duha ka mga Apostoles ug sa Kapangulohan sa Seventy. …
“… Ang mga sakop sa Una ug Ikaduha nga mga Korum sa Seventy ang gikonsiderar nga mga General Authority, nagpasabut nga sila adunay awtoridad sa pagserbisyo bisan asa nga dapit sa kalibutan. Ang mga sakop sa nahabilin nga mga korum gitawag nga mga Area Seventy, ug ang ilang mga awtoridad limitado ngadto sa area diin sila nagserbisyo” (“Quorums of the Seventy,” LDS.org).