Sa wala pa ang komperensya sa Simbahan nga gipahigayon niadtong Septyembre 26, 1830, si Propeta Joseph Smith nakadawat og pagpadayag sa atubangan sa unom ka mga elder. Pinaagi sa pagpadayag, nakat-on ang mga elder mahitungod sa Pagkapukan ni Adan ug Eva ug mahitungod sa katubsanan gikan sa Pagkapukan pinaagi sa Pag-ula ni Jesukristo.
Ang Manluluwas namahayag nga Siya mitubos kanato gikan sa Pagkapukan ug nga Siya nagtanyag sa kaluwasan sa atong mga sala
Ipakigbahin ang mosunod nga sitwasyon sa imong mga estudyante ug dayon ipangutana ang nagsunod nga pangutana:
Hunahunaa nga usa sa inyong mga higala miduol kaninyo ug daw nawad-an sa kadasig. Sa dihang nangutana kamo nganong nawad-an siya sa kadasig, misulti siya ninyo nga wala siya mahibalo kon ang pagbinuotan angay ba sa iyang paningkamot. Mipasabut siya nga bisan og naningkamot siya sa pagsunod sa mga sugo, wala niya makita ang iyang kinabuhi nga mas maayo kay sa kinabuhi sa iyang mga higala kinsa mipili sa pagpakasala. Dugang pa, misulti siya nga daw walay dautan nga nahitabo sa iyang mga higala tungod sa ilang sayop nga mga pagpili.
Unsaon ninyo pagtubag ang mga kabalaka sa inyong higala?
Dapita ang mga estudyante sa pagpangita og mga doktrina ug mga baruganan samtang magtuon sila sa Doktrina ug mga Pakigsaad 29 nga makatabang nila sa pagtubag sa mga kabalaka sa ilang higala.
Dapita ang usa ka estudyante sa pagbasa og kusog sa Doktrina ug mga Pakigsaad 29:31–32, ug hangyoa ang klase sa pagsunod. Aron matabangan ang mga estudyante nga makasabut sa mga pagtulun-an niini nga mga bersikulo, ipasabut ang mosunod sa dili pa mobasa og kusog ang estudyante:
Sa Paglalang, si Adan, Eva, ang yuta, ug tanang mga butang dinhi sa yuta anaa sa espirituhanong kahimtang. Bisan kon si Adan ug Eva adunay pisikal nga lawas, dili sila mamatay ug makapuyo sa presensya sa Dios hangtud sa kahangturan. Hinoon, isip kabahin sa plano sa Langitnong Amahan, ang tanan Niyang linalang mamahimong temporal. Sa laing pagkasulti, mamahimo silang temporaryo ug mahimong mamatay. Human sa pagkabanhaw, mobalik sila sa espirituhanong kahimtang—pisikal apan usab imortal.
Dapita ang usa ka estudyante sa pagbasa og kusog sa Doktrina ug mga Pakigsaad 29:34–35. Hangyoa ang mga estudyante sa pagpangita sa paagi sa pagtan-aw sa Ginoo sa mga sugo nga Iyang gihatag kanato.
Giunsa paghulagway sa Ginoo ang Iyang mga sugo? (Ang mga tubag sa mga estudyante kinahanglang mopakita sa mosunod nga doktrina: Ang tanang sugo sa Dios mga espirituhanon. Isulat kini nga doktrina diha sa pisara.)
Unsaon ninyo sa pagpasabut sa pamahayag sa Ginoo nga ang tanan Niyang mga sugo mga espirituhanon? Unsa ang pipila ka mga ehemplo sa espirituhanong mga panalangin nga moabut kon kita mosunod sa mga sugo?
Samtang motubag ang mga estudyante niini nga mga pangutana, mahimo nimong ipasabut nga daghang mga sugo, sama sa Pulong sa Kaalam ug sa balaod sa ikapulo, moresulta sa temporal nga mga panalangin. Bisan pa niana, moresulta kini sa mas dagko pa nga espirituhanong mga panalangin. Samtang ang temporal nga mga panalangin sa katapusan matapos, ang espirituhanong mga panalangin molahutay sa kahangturan.
Sa unsang paagi ang doktrina nga nasulat sa pisara makatabang sa inyong higala sa sitwasyon nga gihisgutan sa pagsugod sa leksyon?
I-summarize ang Doktrina ug mga Pakigsaad 29:36–39 pinaagi sa pagpasabut nga ang yawa mirebelde batok sa Dios sa premortal nga kalibutan sa espiritu ug mipabiya sa “ikatulo nga bahin sa mga panon sa langit.” Tungod kay ang yawa ug ang iyang mga sumusunod mirebelde, sila gisalikway.
Dapita ang usa ka estudyante sa pagbasa og kusog sa Doktrina ug mga Pakigsaad 29:39, ug hangyoa ang klase sa pagpangita sa mga rason nganong ang Ginoo mitugot sa yawa sa pagtintal kanato.
Nganong ang Ginoo mitugot sa yawa sa pagtintal kanato? Nganong importante man kanato nga dunay kapilian tali sa maayo ug dautan?
Aron maandam ang mga estudyante sa paghisgot sa mga kamatuoran diha sa Doktrina ug mga Pakigsaad 29:40–45, ipasabut nga diha sa Doktrina ug mga Pakigsaad 29:35, ang Ginoo misulti og usa ka sugo nga Iyang gihatag ngadto ni Adan sa Tanaman sa Eden (tan-awa usab sa D&P 29:40). Dapita ang mga estudyante nga hilum nga mobasa niini nga sugo sa Moises 3:16–17.
Unsa nga sugo ang gihatag sa Ginoo kang Adan? (Ang Ginoo misugo ni Adan sa dili pagkaon sa bunga sa kahoy sa kahibalo sa maayo ug dautan.) Unsay gisulti sa Ginoo nga mahitabo kon si Adan molapas niini nga sugo? (Si Adan mamatay. Gikan sa adlaw sa iyang kalapasan si Adan anaa ubos sa pisikal ug espirituhanon nga kamatayon.)
Dapita ang usa ka estudyante sa pagbasa sa Doktrina ug mga Pakigsaad 29:40–41. Hangyoa ang klase sa pagsunod, nga mangita sa kahulugan sa mga pulong nga “espirituhanon nga kamatayon.”
Sumala niini nga bersikulo, unsa man ang espirituhanon nga kamatayon? (Ang mga estudyante kinahanglang mopahayag sa mosunod nga doktrina: Ang espirituhanon nga kamatayon mao ang pagkahimulag gikan sa presensya sa Dios.)
Aron matabangan ang mga estudyante nga makasabut sa kahulugan sa mga pulong nga “ang una nga kamatayon” sa bersikulo 41, ipasabut nga adunay duha ka espirituhanon nga kamatayon. Ang una mao ang resulta sa Pagkapukan ug temporaryo lang. Ang ikaduha mao ang resulta sa wala mahinulsuli nga mga sala ug mahimong permanente alang niadtong napakyas sa paghinulsol ug pagkamasulundon.
Dapita ang usa ka estudyante sa pagbasa sa Doktrina ug mga Pakigsaad 29:42. Hangyoa ang klase sa pagsunod, nga mangita sa laing matang sa kamatayon nga moabut tungod sa kalapasan ni Adan.
Unsa nga laing matang sa kamatayon ang miabut tungod sa kalapasan ni Adan? (Temporal nga kamatayon; sa laing pagkasulti, ang kamatayon sa pisikal nga lawas. Kini nga kamatayon mao ang pagkabulag sa espiritu gikan sa lawas.)
Aron matabangan ang mga estudyante nga makasabut sa mga sangputanan sa Pagkapukan alang sa tibuok katawhan, dapita sila nga mobasa og hilum sa Helaman 14:16. Hangyoa sila sa pag-ila kinsa ang mosinati sa mga sangputanan sa kalapasan ni Adan.
Kinsa ang makasinati sa mga sangputanan sa kalapasan ni Adan? (Tanang katawhan.)
Dapita ang usa ka estudyante sa pagbasa og kusog sa Helaman 14:17. Hangyoa ang klase sa pagpangita kon unsa ang gisulti niini nga bersikulo kon unsaon pagbuntog sa mga sangputanan sa kalapasan ni Adan.
Sa unsang paagi ang mga sangputanan sa kalapasan ni Adan mabuntog? Kinsa ang modawat niini nga mga panalangin?
Isulat ang mosunod nga mga scripture reference sa pisara: Alma 33:22; 42:23. Ipasabut nga ang tanang tawo mouli ngadto sa presensya sa Dios alang sa paghukom, apan dili tanang tawo ang mahimong takus nga mopuyo diha sa Iyang presensya sa kahangturan. Dayon dapita ang mga estudyante nga hilum nga mobasa sa mga scripture passage nga imong gilista sa pisara, nga mangita og ebidensya niini nga kamatuoran. Human sa igong panahon, hangyoa sila sa pag-report sa unsay ilang nakit-an.
Dapita ang usa ka estudyante sa pagbasa og kusog sa Doktrina ug mga Pakigsaad 29:43–44. Itudlo ang deklarasyon nga kadtong pasabut sa pahayag nga kadtong “dili motuo” kang Kristo “dili matubos gikan sa ilang espirituhanon nga pagkapukan.” Ipasabut nga bisan og ang tanang katawhan matubos gikan sa Pagkapukan ni Adan ug Eva, kadtong magdumili sa pagpakita og pagtuo kang Jesukristo ug maghinulsol dili matubos gikan sa ilang kaugalingong espirituhanon nga pagkapukan.
Dapita ang usa ka estudyante sa pagbasa og kusog sa Doktrina ug mga Pakigsaad 29:42–43. Hangyoa ang klase sa pagsunod, nga mangita sa paagi nga mahimo kitang maluwas gikan sa mga sangputanan sa atong kaugalingong mga sala.
Sumala niini nga mga bersikulo, unsa ang kinahanglan natong buhaton aron maluwas gikan sa mga sangputanan sa atong kaugalinong mga sala? (Ang mga estudyante mahimong mogamit og lain-laing mga pulong, apan kinahanglan silang mopahayag sa mosunod nga doktrina: Pinaagi sa Iyang Pag-ula, si Jesukristo mitanyag og kapasayloan ug kinabuhing dayon sa tanan nga mopakita og pagtuo diha Kaniya ug maghinulsol sa ilang mga sala. Isulat kini nga doktrina diha sa pisara.)
Pagpamatuod nga ang Pagkapukan ni Adan ug Eva kabahin sa plano sa Langitnong Amahan alang sa atong kalipay. Bisan og nagpuyo kita sa presensya sa Dios sa wala pa kita matawo, ang matag usa kanato kinahanglan nga moanhi sa yuta, makadawat og pisikal nga lawas, ug makakat-on pinaagi sa kasinatian sa paggamit sa atong kabubut-on sa pagsunod ni Jesukristo. Ang atong espirituhanong kahimtang kon kita makadawat og kinabuhing dayon labaw pa kaayo kay sa espirituhanon nga kahimtang nga atong nasinati sa premortal nga kalibutan sa espiritu. Dapita ang usa ka estudyante sa pagbasa sa mosunod nga pagpasabut gikan sa Matinud-anon sa Tinuhoan:
“Ang pagkaimortal mao ang pagpakabuhi sa hangtud isip nabanhaw nga nilalang. Pinaagi sa Pag-ula ni Jesukristo, ang kada usa makadawat niini nga gasa. Ang kinabuhing dayon, o kahimayaan, mao ang pagpanunod og usa ka dapit sa pinakataas nga ang-ang sa celestial nga gingharian, diin kita mopuyo sa atubangan sa Dios ug magpadayon isip mga pamilya (tan-awa sa D&P 131:1–4). Sama sa pagkaimortal, kini nga gasa nahimong posible pinaagi sa Pag-ula ni Jesukristo. Bisan pa niana, nagkinahanglan kini sa atong ‘pagsunod sa mga balaod ug mga ordinansa sa Ebanghelyo’ (Mga Artikulo sa Hugot nga Pagtuo 1:3)” (Matinud-anon sa Tinuhoan: Usa ka Pakisayran sa Ebanghelyo [2004], 103).
Aron matabangan ang mga estudyante nga makasabut sa kaimportante sa paghimo og mga pagpili nga makatabang kanila nga makadawat sa mga panalangin sa Pag-ula sa Manluluwas, dapita ang usa ka estudyante sa pagbasa og kusog sa mosunod nga tambag gikan ni Presidente Thomas S. Monson:
Imahe
President Thomas S. Monson
“Ayaw ibutang sa peligro ang inyong kinabuhing dayon. Kon nakasala kamo, ang ingon ka dali sa pagsugod ninyo sa pagbalik, ingon usab ka dali nga inyong makaplagan ang nindot nga kalinaw ug kalipay nga moabut uban sa milagro sa pagpasaylo.
“… Kamo adunay halangdon nga kaliwatan. Ang kinabuhing dayon sa gingharian sa atong Amahan mao ang inyong tumong. Ang ingon nga tumong dili makab-ot sa usa ka mahimayaong pagsulay apan mao ang resulta sa tibuok kinabuhi nga pagkamatarung, usa ka pagtigum sa maalamong mga pagpili, gani pagkamakanunayon sa katuyoan. Sama sa bisan unsang tinud-anay nga bililhon, ang ganti nga kinabuhing dayon nagkinahanglan og paningkamot.
“… Unta mapuno kita sa pasalamat alang sa katungod sa pagpili, modawat sa kapangakohan sa pagpili, ug mas mahunahunaon sa kapadulngan sa pagpili” (“Ang Tulo ka mga K sa Pagpili,”Liahona, Nob. 2010, 69–70).
Ang Manluluwas mipahayag nga ang gagmayng mga bata ug kadtong wala makasabut natubos pinaagi sa Iyang Pag-ula
Ipasabut nga sa Doktrina ug mga Pakigsaad 29:46–50, atong makita nga ang mga sangputanan sa paglapas sa mga balaod sa Dios lahi alang sa mga bata ug sa uban nga walay tulubagon atubangan sa Dios. Makita usab nato ang dakong gahum ug kalooy ni Jesukristo. Dapita ang usa ka estudyante sa pagbasa og kusog sa Doktrina ug mga Pakigsaad 29:46–47.
Unsay buot ipasabut niini alang sa gagmay nga mga bata kinsa namatay sa wala pa sila moabut sa edad nga otso anyos? (Maluwas sila didto sa celestial nga gingharian. Tan-awa sa D&P 137:10. Mahimo nimong ipasabut nga sumala sa Hubad ni Joseph Smith, Genesis 17:11 [sa Giya ngadto sa mga Kasulatan] ug sa Doktrina ug mga Pakigsaad 68:25, ang gagmay nga mga bata magsugod nga mahimong adunay tulubagon sa atubangan sa Ginoo sa edad nga otso. Alang sa dugang nga mga pagtulun-an niini nga hilisgutan, tan-awa sa Moroni 8 ug Doktrina ug mga Pakigsaad 137:10.)
Sa unsa nga paagi kini nga tudling nakadugang sa inyong pagsabut sa Pag-ula ni Jesukristo?
Sa pagtapos, dapita ang mga estudyante nga hilum nga mobasa sa Doktrina ug mga Pakigsaad 29:49 ug personal nga pamalandungon ang ekspektasyon sa Ginoo alang kanila. Dapita ang pipila ka estudyante sa pagpaambit kon unsay kahulugan niini kanila nga makabalik sa presensya sa Langitnong Amahan ug magpabilin didto sa kahangturan. Human makatubag ang pipila ka mga estudyante, awhaga ang mga estudyante sa paghimo og mga pagpili nga makapahimo kanila sa pagpuyo diha sa presensya sa Ginoo sa kahangturan.
Komentaryo ug Background nga Impormasyon
Doktrina ug mga Pakigsaad 29:30–50.
Ang mosunod nga tsart naghulagway sa kausaban nga miabut kang Adan ug Eva tungod kay mikaon sila sa gidili nga bunga:
Sa Wala Pa ang Pagkapukan
Human sa Pagkapukan
Walay pisikal nga kamatayon; si Adan ug Eva mabuhi unta sa kahangturan kon wala pa sila makalapas (tan-awa sa2 Nephi 2:22).
Walay espirituhanon nga kamatayon; nagpuyo sila sa presensya sa Dios.
Walay posible nga pag-uswag padulong sa kahimayaan (tan-awa sa 2 Nephi 2:22).
Dili sila makabaton og mga anak (tan-awa sa 2 Nephi 2:23).
Sila mga inosente, wala masayud sa maayo ni sa dautan, sa kalipay ni sa pagkauyamot (tan-awa sa 2 Nephi 2:23).
Tanang mga butang nahimong mortal ug mahimo nga mamatay sa pisikal (tan-awa sa 2 Nephi 9:6).
Si Adan ug si Eva gipapahawa sa presensya sa Dios ug nahimo nga patay sa espirituhanong paagi (tan-awa sa D&P 29:40–42).
Nahimong posible ang mahangturong pag-uswag sumala sa plano sa Langitnong Amahan (tan-awa sa Moises 5:11).
Si Presidente Boyd K. Packer sa Korum sa Napulog Duha ka mga Apostoles mitudlo:
Imahe
President Boyd K. Packer
“Ang kinaiyanhon ug espirituhanon nga mga balaod nga nagdumala sa kinabuhi gisugdan sa wala pa ang katukuran sa kalibutan. … Kini mahangturon, ingon man ang mga sangputanan sa pagsunod o pagsupak niini. Wala kini nakabase sa sosyal o politikal nga mga konsiderasyon. Dili kini mausab. Walay pagpamugos, walay pagsupak, walay hinimo sa tawo nga balaod ang makausab niini” (“For Time and All Eternity,” Ensign,Nob. 1993, 22).
Si Presidente Joseph Fielding Smith mipasabut sa ikaduha nga espirituhanong kamatayon:
Imahe
President Joseph Fielding Smith
“Ang ikaduha nga kamatayon mao ang espirituhanon; kini mao ang pagpapahawa gikan sa presensya sa Ginoo. Susama kini sa unang espirituhanong kamatayon, nga mikuyanap sa tanang tawo kinsa nagpabilin nga wala maghinulsol ug wala makadawat sa ebanghelyo. Kadtong miantus sa unang espirituhanong kamatayon o pagbiya, nga mao ang pagpapahawa gikan sa presensya sa Dios, adunay kahigayunan nga matubos gikan niini nga kamatayon pinaagi sa pagkamasulundon sa mga baruganan sa ebanghelyo. Pinaagi sa bunyag ug kumpirmasyon sila matawo pag-usab ug sa ingon miadto balik sa espirituhanong kinabuhi, ug pinaagi sa ilang padayon nga pagkamasulundon hangtud sa katapusan, sila mahimo nga mag-aambit sa mga panalangin sa kinabuhing dayon didto sa celestial nga gingharian sa Dios.
“Kadtong moambit sa ikaduha nga kamatayon mao kadtong nakabaton sa espirituhanong kahayag ug misukol batok niini. Kini magpabilin sa ilang mga sala diha sa ilang pagpahawa” (Doctrines of Salvation, ed. Bruce R. McConkie, 3 vols. [1954–56], 2:222–23).
Si Elder Bruce R. McConkie sa Korum sa Napulog Duha ka mga Apostoles mitudlo sa kaluwasan sa gagmayng mga bata sa dili pa sila mahimong dunay tulubagon sa Dios:
Imahe
Elder Bruce R. McConkie
“Taliwala sa tanang mahimayaon nga mga kamatuoran sa ebanghelyo nga gihatag sa Dios ngadto sa iyang katawhan halos wala nay mas tam-is, mas makatagbaw sa kalag, ug makapabalaan sa kalag, sama sa usa nga nagproklamar—Ang gagmay nga mga bata maluwas. Sila buhi diha kang Kristo ug makaangkon og kinabuhing dayon. Alang kanila ang unit sa pamilya magpadayon, ug ang kahingpitan sa kahimayaan maila. Walay panalangin nga pugngan. Sila mobangon diha sa imortal nga himaya, motubo ngadto sa hingpit nga pagkahingkod, ug mabuhi sa hangtud diha sa labing taas nga langit sa celestial nga gingharian— tanan pinaagi sa kaayo ug kalooy ug grasya sa Balaang Mesiyas, tanan tungod sa maulaong sakripisyo Kaniya kinsa namatay aron kita mabuhi …
“Ang tanan ba nga gagmayng mga bata awtomatik nga maluwas didto sa celestial nga gingharian?
“Niini nga pangutana ang tubag mao ang nagdahunog nga oo, nga madungog gikan sa usa ka tumoy sa langit ngadto sa pikas tumoy. Si Jesus mitudlo niini ngadto sa iyang mga disipulo. Gibalik-balik kini pagsulti ni Mormon. Daghan sa mga propeta namulong kabahin niini, ug kini nalakip diha sa tibuok nga plano sa kaluwasan. Kay kon dili ingon niini ang katubsanan dili mahimong walay kinutuban sa paggamit niini. Ug busa, sama sa atong gipaabut, ang Panan-awon ni Joseph Smith sa Celestial nga Gingharian naglakip niini nga pamahayag: ‘Ug Ako usab nakasud-ong nga ang tanan nga mga bata kinsa namatay sa wala pa sila moabut sa panuigon sa pagkamay-tulubagon maluwas diha sa celestial nga gingharian sa langit.’ [D&P 137:10.] …
“Sa unsang paagi ug nganong maluwas sila?
“Sila giluwas pinaagi sa pag-ula ug tungod kay sila gawasnon gikan sa sala. Naggikan sila sa Dios diha sa kaputli; walay sala o lama ang mitaput kanila niini nga kinabuhi; ug mobalik sila diha sa kaputli ngadto sa ilang Magbubuhat. Ang may tulubagon nga mga tawo kinahanglang mahimo nga putli pinaagi sa paghinulsol ug bunyag ug pagkamasulundon. Kadtong walay tulubagon alang sa mga sala dili gayud mapukan sa espirituhanong paagi ug dili kinahanglang matubos gikan sa espirituhanong pagkapukan nga wala nila masinati. Busa ang panultihon nga ang gagmay nga mga bata buhi diha kang Kristo. ‘Ang gagmay nga mga bata natubos gikan sa sinugdanan sa kalibutan pinaagi sa akong Bugtong Anak,’ miingon ang Ginoo. (D&P 29:46.)” (“The Salvation of Little Children,” Ensign, Abr. 1977, 3, 4–5).