Ang Doktrina ug mga Pakigsaad 121–123 naglangkob sa mga pinili sa usa ka epistola, o sulat, gikan ni Propeta Joseph Smith ngadto sa Simbahan, nga gipetsahan og Marso 20, 1839. Si Joseph Smith midiktar sa sulat samtang siya ug pipila ka kauban nabilanggo didto sa Liberty Jail. Diha sa sulat, gilakip sa Propeta ang pipila sa iyang mga pag-ampo, nga naghangyo sa Ginoo sa pagpanalangin kaniya ug sa iyang mga kauban ug sa tanang mga Santos kinsa nag-antus tungod sa mga binuhatan sa ilang mga kaaway. Iya usab nga gilakip ang mga tubag nga iyang nadawat niadtong mga pag-ampo.
Nag-ampo si Joseph Smith alang sa nag-antus nga mga Santos
Dapita ang mga estudyante sa paghunahuna nga dunay usa ka higala o minahal sa kinabuhi nga nakasinati og lisud nga kasinatian. Mitug-an siya nimo nga wala siya makasabut nganong nakasinati siya sa maong kasakit ug nga iyang gibati nga morag gipasagdan siya sa Dios.
Unsa may imong isulti sa imong higala? Unsa kaha ang imong buhaton kon ikaw pa ang nakasinati niining mga kasakit?
Ipasabut nga gitambagan ug gihupay sa Ginoo si Joseph Smith atol sa usa ka hilabihan ka lisud nga kasinatian. Awhaga ang mga estudyante nga mangita og mga paagi nga ang mga pulong sa Ginoo sa pagtambag ug paghupay diha sa Doktrina ug mga Pakigsaad 121–123 makatabang kanila sa ilang kaugalingong mga pagsulay.
Ipasabut nga niadtong Oktubre 31, 1838, si George Hinkle, usa ka miyembro sa Simbahan ug usa ka koronel sa militia sa estado sa Missouri, miluib kang Joseph Smith. Gisultihan ni Hinkle si Joseph Smith nga ang mga sakop sa militia sa Missouri, kinsa miataki sa mga Santos didto sa Far West, Missouri, gustong makighimamat alang sa usa ka interbyu aron masulbad ang mga panagsumpaki sa malinawong paagi. Sa dihang miabut si Joseph ug ang ubang mga lider sa Simbahan alang sa interbyu, gipugos sila pagdala sa militia isip mga piniriso atol sa gubat. Sa misunod nga bulan, si Joseph Smith ug ang iyang kaubanan giabuso ug giinsulto, samtang gibilanggo sila didto sa Independence, Missouri, ug sa Richmond, Missouri. Samtang nagpaabut gihapon sa husay, nga gibase sa sayop nga mga pasangil ug gibuhat nga dili pinasubay sa hustong proseso, si Joseph Smith ug ang ubang mga lider sa Simbahan gibalhin ngadto sa usa ka bilanggoan sa Liberty, Missouri, niadtong Disyembre 1.
Atol sa sunod nga upat ka bulan, ang Propeta, ang iyang igsoon nga si Hyrum, sila si Alexander McRae, Lyman Wight, ug Caleb Baldwin gitanggong sa ubos nga bahin sa bilanggoan sa Liberty Jail atol sa usa ka hilabihan ka tugnaw nga winter. Si Sidney Rigdon nakauban usab nila kadali, apan usa ka huwes ang mitugot nga buhian siya sa hinapos sa Enero 1839. Kay nahadlok sa mga pagpanghulga gikan sa mga kaaway, si Brother Rigdon wala mobiya sa bilanggoan hangtud sa sayong bahin sa Pebrero.
Aron matabangan ang mga estudyante nga makabati sa grabe nga mga kahimtang nga giatubang sa Propeta ug sa iyang mga higala samtang anaa sa Liberty Jail, mahimong mogamit ka og tape o laing pamaagi sa pagmarka og usa ka kwadro diha sa salog nga 14 feet by 14 feet (4.3 meters by 4.3 meters). Ipasabut nga kini ang gibana-bana nga gidak-on sa salog sa bilanggoan. Ang kisame anaa sa 6 ug 6.5 ka pye ang gitas-on (anaa sa 1.8 ug 2 ka metros).
Mahimo usab nimong isugyot nga motan-aw ang mga estudyante sa hulagway sa Liberty Jail diha sa ilang mga kasulatan (tan-awa sa Mga Hulagway sa Kasaysayan sa Simbahan, Hulagway 12, “Bilanggoan sa Liberty”). Ipahunahuna sa mga estudyante kon unsa kaha ang mapriso sa ingon ka gamay nga dapit nga dunay 4 o 5 ka lalaki sulod sa 4 ka bulan sa winter. Duha ka gamayng bintana nga dunay kabilya ang nakahatag og gamay ra kaayong kahayag, ug gikan sa gawas niining mga bintana, ang mga tawo mibiay-biay ug miinsulto sa mga piniriso. Ang mga piniriso nangatulog sa hugaw nga dagami diha sa salog. Ang gamayng kasangkapan naglakip sa usa ka balde alang sa hugaw sa tawo. Sulod sa pipila ka higayon, si Joseph walay habol, nga mao lamang ang proteksyon sa mga piniriso gikan sa katugnaw. Ang pagkaon usahay butangan og hilo, ug sa ubang higayon hilabihan kini ka ngil-ad nga mokaon na lang sila niini tungod sa grabe ka gutom. Panagsa ra sila tugutan nga dunay mga bisita ug nasakitan og maayo sa pagkadungog bahin sa pag-antus sa mga Santos nga gipugos sa pagpapahawa gikan sa Missouri sa tunga-tunga sa winter.
Unsa kaha ang inyong bation ug hunahunaon kon kamo pa ang anaa sa dapit ni Joseph?
Ipasabut nga ang Doktrina ug mga Pakigsaad 121–123 naglangkob og mga pinili sa usa ka sulat gikan sa Propeta ngadto sa mga Santos, nga gisulat sa hinapos sa iyang pagkapriso didto sa Liberty Jail. Ang sulat naglakip sa pipila sa mainampuong mga pangamuyo ni Joseph ngadto sa Ginoo.
Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 121:1–6. Hangyoa ang klase sa pagpangita sa mga pangutana ug mga pangamuyo nga gipahayag sa Propeta ngadto sa Ginoo. (Aron matabangan ang mga estudyante nga makasabut sa bersikulo 1 ug 4, mahimo nimong ipasabut nga ang gambalay [pavilion] usa ka building o laing estruktura nga naghatag og kapasilungan.)
Unsa nga mga pangutana ug mga pangamuyo ang inyong nakit-an? Unsa pa ang nakapadani kaninyo mahitungod niini nga mga bersikulo?
Ipasabut nga ang ubang mga tubag sa Ginoo ngadto sa mga pag-ampo ni Joseph Smith makita diha sa Doktrina ug mga Pakigsaad 121:7–25 ug 122:1–9. Dapita ang usa ka estudyante sa pagbasa og kusog sa Doktrina ug mga Pakigsaad 121:7–10. Hangyoa ang klase sa pagsunod, nga mangita sa mga baruganan nga nakatabang ni Joseph Smith ug sa iyang mga kauban panahon nga didto sila sa Liberty Jail. Dapita ang mga estudyante sa pagsulat sa mga doktrina ug mga baruganan nga ilang nakat-unan gikan niining mga bersikulo diha sa ilang mga class notebook o sa mga scripture study journal.
Human sa igong panahon, hangyoa ang mga estudyante sa pagpakigbahin sa mga doktrina ug mga baruganan nga ilang nahibaloan. Isulat ang ilang mga tubag diha sa pisara. Ang mosunod nga mga baruganan mao ang tulo nga mahimo nilang mahibaloan:
Kon motawag kita sa Ginoo sa mga panahon sa kalisdanan ug kasakit, makadawat kita sa Iyang kalinaw.
Kon molahutay gayud kita sa mga pagsulay sa mortalidad, panalanginan kita sa Dios karon ug sa kahangturan.
Sa mga panahon sa pagsulay, makakaplag kita og kapahulayan pinaagi sa suporta sa atong tinuod nga mga higala.
Ipares-pares ang mga estudyante, ug dapita sila sa paghisgot sa mosunod nga mga pangutana. Itagsa-tagsa lang og pangutana, nga maghatag og igong panahon alang sa panaghisgutan.
Unsa man ang kalainan tali sa paglahutay sa pagsulay ug paglahutay gayud sa pagsulay?
Kinsa ang inyong nailhan nga usa ka ehemplo sa paglahutay gayud sa pagsulay?
Awhaga ang pipila ka estudyante sa pagpakigbahin ngadto sa tibuok klase kon unsay ilang nahisgutan uban sa ilang mga partner.
Miingon ang Ginoo nga ang kalisdanan ug mga kasakit ni Joseph Smith “sulod lamang sa mubo nga higayon” (D&P 121:7). Unsa kaha ang gipasabut niini? Sa unsang paagi nga kini nga panglantaw makatabang kanato nga makalahutay gayud sa atong mga pagsulay?
Hatagi ang mga estudyante og oportunidad sa pagpakigbahin sa mga kasinatian nga ilang nasinati sa dihang nakadawat sila sa kalinaw sa Manluluwas sa mga panahon sa kalisud.
Isulat ang mosunod nga pangutana diha sa pisara: Kinsa ang magtinguha og tambag ug mga panalangin pinaagi ni Propeta Joseph Smith?
Dapita ang mga estudyante sa pagpangita sa mga tubag niini nga pangutana samtang magbasa sila sa hilum sa Doktrina ug mga Pakigsaad 122:1–4. Human sa igo nga panahon, dapita sila sa pagpamalandong kon ang mga bersikulo 2–3 naghulagway ba kanila.
Sa unsang mga paagi nga padayon kitang makadawat og tambag gikan ni Joseph Smith? Sa unsang mga paagi nga makadawat kita og awtoridad ug mga panalangin tungod kaniya?
Unsa nga mga saad ang gipadangat sa Ginoo ngadto ni Joseph Smith?
Dapita ang tulo ka estudyante nga magpuli-puli sa pagbasa og kusog sa Doktrina ug mga Pakigsaad 122:5–7. Hangyoa ang klase sa pagsunod ug sa pagpangita sa usa ka baruganan nga gitudlo sa Ginoo kang Joseph Smith mahitungod sa mga kalisud nga nasinati niya ug sa uban.
Sumala sa bersikulo 7, unsa ang positibo nga mga resulta nga moabut tungod sa kalisdanan ug mga kasakit? (Samtang motubag ang mga estudyante niini nga pangutana, isulat ang mosunod nga baruganan diha sa pisara: Ang mga kasakit makahatag kanato og kasinatian ug alang sa atong kaayohan.
Dapita ang usa ka estudyante sa pagbasa sa mosunod nga pamahayag ni Elder Joseph B. Wirthlin sa Korum sa Napulog Duha ka mga Apostoles. Hangyoa ang klase sa pagpaminaw kon sa unsang paagi nga ang mga kasakit mahimong alang sa atong kaayohan.
Imahe
Elder Joseph B. Wirthlin
“Kamo mahimo nga mobati nga kamo gipili kon kasakit mosulod sa imong kinabuhi. Inyong ilingo-lingo ang inyong ulo ug matingala, ‘Nganong ako?’
“Apan sa katapusan ang kaguol moabut sa matag usa kanato. Sa usa ka panahon o sa lain, ang matag usa kanato kinahanglan gayud nga makasinati og kasubo. Walay usa nga gilingkawas. …
“Ang pagkakat-on sa paglahutay sa mga panahon sa pagkawalay kadasig, pag-antus, ug kasubo kabahin sa atong aktwal nga pagbansay sa kinabuhi. Kini nga mga kasinatian, samtang kanunay lisud nga antuson niana nga panahon, mao ang tukma nga mga matang sa mga kasinatian nga molugway sa atong panabut, molig-on sa atong kinaiya, ug modugang sa atong kalooy alang sa uban” (“Bisan Unsa ang Mahitabo, ug Dawata Kini,”Liahona, Nob. 2008, 27).
Unsa ang gisulti ni Elder Wirthlin nga mahimo sa atong lisud nga mga kasinatian alang kanato?
Dapita ang mga estudyante nga isulat diha sa ilang mga class notebook o mga scripture study journal kon sa unsang paagi nga ang usa ka pagsulay nakahatag kanila og kasinatian ug alang sa ilang kaayohan. Human sa igong panahon, mahimo nimong hangyuon ang pipila ka estudyante sa pagpakigbahin sa unsay ilang gisulat.
Dapita ang usa ka estudyante sa pag-adto sa pisara ug mahimong tigsulat. Hangyoa siya sa pagdrowing og pinahigda [horizontal] nga linya mga ikatulong bahin gikan sa ubos sa pisara. Dayon hangyoa ang mga estudyante sa paglista sa mahagitong mga sitwasyon nga nasinati sa mga tawo. Hangyoa ang tigsulat sa pagsulat sa ilang mga tubag sa ibabaw sa linya.
Human makabaton og igong panahon ang mga estudyante sa paghimo og lista, pangutan-a sila kon nakadungog na ba sila og usa ka tawo nga nag-ingon, “Walay nakasabut sa unsay akong naagian.” Dapita sila sa pagbasa og hilum sa Doktrina ug mga Pakigsaad 122:8, nga mangita kon unsa kaha ang ikasulti sa Ginoo agig tubag niini nga komentaryo. Samtang moreport sila sa ilang mga tubag, hangyoa ang tigsulat sa pagsulat og Jesukristo ubos sa linya diha sa pisara.
Unsa kaha ang gipasabut nga ang Manluluwas “mikunsad ubos kanilang tanan”? (Sa dili pa motubag ang mga estudyante, mahimo nimo silang dapiton sa pagbasa sa 2 Nephi 9:20–21, Alma 7:11, ug Doktrina ug mga Pakigsaad 88:5–6. Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga doktrina: Ang Manluluwas nag-antus sa mga kasakit ug mga kalisdanan sa tanang katawhan.)
Sa unsa kaha nga paagi nga kining kamatuoran nakatabang kang Joseph Smith ug sa iyang mga kauban didto sa Liberty Jail?
Aron matabangan ang mga estudyante nga makasabut niini nga doktrina, dapita ang usa ka estudyante sa pagbasa og kusog sa mosunod nga pamahayag ni Elder Wirthlin:
Imahe
Elder Joseph B. Wirthlin
“Tungod si Jesukristo miantus sa hilabihan, Siya nakasabut sa atong mga pag-antus. Siya nakasabut sa atong kasubo. Kita nagsinati og lisud nga mga butang aron kita usab mahimong modugang og kalooy ug pagsabut ngadto sa uban.
“Hinumdumi ang halangdon nga mga pulong sa Manluluwas ngadto ni Propeta Joseph Smith sa dihang siya nag-antus uban sa iyang mga kauban diha sa hilabihan nga kangitngit sa Liberty Jail. …
“… Si Joseph nahupay gikan niini nga mga pulong, ug kita makahimo usab” (“Bisan Unsa ang Mahitabo, ug Dawata Kini,” 27).
Sa unsang mga paagi nga ang inyong mga kasinatian sa “lisud nga mga butang” nakapadugang sa inyong kalooy ug pagsabut alang sa uban?
Dapita ang mga estudyante sa pagbasa og hilum sa Doktrina ug mga Pakigsaad 122:9 ug sa pagpamalandong kon sa unsang paagi nga kini nga bersikulo adunay kalabutan sa kinabuhi ug pangalagad ni Propeta Joseph Smith.
Sa unsang paagi nga ang Doktrina ug mga Pakigsaad 122:9 adunay kalabutan nganha kaninyo? Sa unsang paagi nga kining bersikulo makapalig-on kaninyo atol sa lisud nga mga kasinatian?
Ipasabut nga pagkahuman dayon nga nahimo kini nga sulat, giablihan sa Ginoo ang agianan aron sila si Joseph ug ang iyang mga kauban magkahiusa uban sa mga Santos didto sa Illinois. Ipamatuod nga ang Dios nagauban sa Iyang sulugoon nga si Joseph Smith sa tibuok kinabuhi ni Joseph. Tabangi ang mga estudyante nga makasabut nga kon magpabilin kitang matinud-anon atol sa mga pagsulay, ang Dios magauban usab kanato. Sa pagtapos, ipakigbahin ang mosunod nga pagpamatuod, nga gihatag ni Joseph Smith sa hinapus nga bahin sa iyang kinabuhi: “Ang Dios nga Labawng Makagagahum mao ang akong taming; ug unsa may mahimo sa tawo kon ang Dios mao ang akong higala?” (sa History of the Church, 5:259).
“Si Propeta Joseph Smith ug ang iyang mga kauban (sila si Hyrum Smith, Lyman Wight, Caleb Baldwin, Alexander McRae ug, kabahin niana nga panahon, si Sidney Rigdon) hilabihang nag-antus samtang gitanggong sila sa prisohan nga naghulat sa husay base sa sayop nga mga pasangil: ‘Daghan ang gipahamtang ngadto kanila nga dili tawhanon samtang didto sila. Kulang ug dili angay nga pagkaon ang ilang gikaon matag adlaw; usahay ang inspirasyon lamang sa Ginoo ang nakaluwas kanila gikan sa hiniloan nga pagkaon, diin tanan nabantayan. [Si Alexander McRae miingon, “Dili namo kini makaon hangtud nga mapugos na lang mi tungod sa kagutom” (B. H. Roberts, A Comprehensive History of the Church, 1:521).]
“‘Ang prisohan walay mga katulganan, ug sa ingon napugos sila sa pagpahulay ug pagpaayo diha sa mga higdaanan nga dagami nga gibutang sa gahi nga kahoy ug mga salog nga bato. [Gitugutan] sila og gamay ra kaayong panahon nga dunay kontak sa taga-gawas, ilabi na atol sa unang bulan o sobra pa sa ilang pagkabilanggo. Ug kini, atol sa usa ka mahinungdanon kaayo nga panahon sa dihang ang mga Santos sa Ulahing mga Adlaw nakasinati sa grabe kaayo nga pagpanggukod didto sa Missouri, ug nagkinahanglan gayud sa ilang propeta ug lider’ [Alvin R. Dyer, The Refiner’s Fire, 2nd ed. [1968], 276].
“Usahay gitugutan sila nga mabisitahan og mga higala diha sa prisohan ug gitugutan nga makapadala ug makadawat og sulat. Sa tunga-tunga sa 20 sa Marso ug 25 sa Marso 1839, si Propeta Joseph midiktar og usa ka taas nga komunikasyon nga gipirmahan sa tanang mga piniriso (sa tinuod lang dunay duha ka sulat, bisan kon ang Propeta mitino nga ang ikaduha usa ka sumpay sa pirmero). Si Presidente Joseph Fielding Smith misulat bahin niini nga sulat: ‘Usa kini sa pinakanindot nga mga sulat nga sukad nahimo sa kamot sa tawo. Gani resulta kadto sa mapainubsanong inspirasyon. Usa kini ka pag-ampo ug panagna ug tubag pinaagi sa usa ka pagpadayag gikan sa Ginoo. Walay lain gawas sa usa ka halangdon nga tawo nga napuno sa diwa sa gugma ni Kristo ang makahimo niana nga sulat. Maghunahuna sa [ilang mga pag-antus], dili ikatingala nga ang Propeta mituaw diha sa tumang kaguol sa iyang kalag alang sa kahupayan. Apan, sa iyang kinasingkasing nga pangamuyo, dunay usa ka diwa sa pagkamatugtanon ug gugma alang sa iyang isigkatawo.’ Church History and Modern Revelation, 2 vols. [1953], 2:176.)
“Ang mga seksyon sa 121–23 gikuha gikan niini nga komunikasyon ug gilakip sa 1876 nga edisyon sa Doktrina ug mga Pakigsaad. Ang edisyon sa Doktrina ug mga Pakigsaad nga naglakip niining tulo ka seksyon gipaluyohan isip kasulatan sa Oktubre 1880 nga komperensya sa Simbahan” (Doctrine and Covenants Student Manual, 2nd ed. [manwal sa Church Educational System, 2001], 295–96).
Doktrina ug mga Pakigsaad 121:1–3. “Hangtud kanus-a sila mag-antus niini nga mga kadautan ug dili makatarunganon nga mga pagdaug-daug?”
Sa wala pa gipriso si Joseph Smith didto sa Liberty Jail, siya ug ang pipila ka lider sa Simbahan, lakip na ni Parley P. Pratt, dili makiangayong gipriso didto sa Richmond, Missouri. Samtang didto sa bilanggoan sa Richmond, nakadungog sila sa mga gwardya sa prisohan nga naghulagway, sa binastos nga pinulongan, sa sinalbahis nga binuhatan sa pagpangawat, paglugos, ug pagpatay nga gihimo batok sa mga Santos sa Ulahing mga Adlaw. Miistorya si Parley P. Pratt nga human makapaminaw niini og taud-taud, mitubag si Joseph:
Imahe
Parley P. Pratt
“Sa kalit [si Joseph] mibarug, ug namulong ingon sa usa ka tingog sa dugdug, sama sa nagngulob nga leon, nagsulti, kutob sa akong mahinumduman, sa mosunod nga mga pulong:
“‘HILUM, kamo mga banyaga sa impyerno. Sa ngalan ni Jesukristo ako mobadlong kaninyo, ug momando kaninyo sa paghilum; dili ko mabuhi og laing minuto nga makadungog sa ingon nga pinulongan. Hunong sa ingon nga sinultihan, o kamo o ako mamatay KARON DAYON!’”
Ang mga gwardya “nangayo niya og pasaylo, ug nagpabilin nga hilum hangtud nag-ilis og mga gwardya.” Si Parley sa wala madugay nahinumdom niini nga kasinatian: “Nakakita ko sa mga ministro sa kaangayan … didto sa mga Hukmanan sa England; nakasaksi ko og Kongreso sa solemne nga sesyon aron mohatag og mga balaod sa kanasuran; … apan nakakita ko og kausa ra, samtang nagbarug kini nga kinadenahan, sa tungang gabii, sa usa ka bilanggoan sa hilit nga balangay sa Missouri” (Autobiography of Parley P. Pratt, ed. Parley P. Pratt Jr. [1938], 211; tan-awa usab sa pahina 210).
Nagpasabut sa Doktrina ug mga Pakigsaad 121–122, si Elder Orson F. Whitney sa Korum sa Napulog Duha ka mga Apostoles nagtudlo mahitungod sa usa ka rason nga atong masinati ang kalisdanan:
Imahe
Elder Orson F. Whitney
“Alang kini sa atong paglambo, sa atong pagkalimpyo, sa atong pagtubo, sa atong edukasyon ug pag-uswag, nga makabenepisyo kita sa mapintas nga mga balud sa kasubo ug kawalay swerte; ug mas malig-on ug mas momaayo kita kon malangoy nato ang baha ug magbarug sa mas layo nga baybayon” (“A Lesson from the Book of Job,” Improvement Era, Nob. 1918, 6).