Niadtong Pebrero 1846, gisugdan sa pagbiya sa mga Santos ang Nauvoo ug mibiyahe sa kasadpan tabok sa teritoryo sa Iowa. Nakadawat si Brigham Young og pagpadayag nga girekord sa Doktrina ug mga Pakigsaad 136 didto sa Winter Quarters, Nebraska, niadtong Enero 1847. Kini nga leksyon maghisgot sa Doktrina ug mga Pakigsaad 136:1–18, nga naglakip sa tambag sa Ginoo aron sa pagtabang sa mga Santos sa pag-organisar sa ilang mga kaugalingon ug mangandam sa pagpadayon sa ilang biyahe sa kasadpan.
Mga Sugyot alang sa Pagtudlo
Gitabok sa mga Santos sa Ulahing mga Adlaw ang Iowa ug miestablisar og mga punoang buhatan didto sa Winter Quarters
Taptapi ang usa ka estudyante ug ipahimutang siya sa daplin sa lawak. Dayon usba sa paghan-ay ang mga butang diha sa kwarto, nga maghimo og kasaba aron ang estudyante makaingon nga ang mga butang gibalhin. Pangutan-a ang gitaptapan nga estudyante sa pagpili og usa ka kauban aron makasulti sa direksyon sa pagtabang niya nga makaadto sa pikas nga bahin sa kwarto. Kon ang estudyante mopili og usa ka tawo, ipangutana:
Nganong gipili man nimo kana nga tawo?
Sa unsang paagi nga ang atong pagsalig sa laing tawo makaimpluwensya kon unsaon nato sa pagsunod ang ilang mga direksyon?
Hangyoa ang mogiya sa paghatag sa mga direksyon aron ang gitaptapan nga estudyante makalakaw nga luwas ngadto sa pikas bahin sa lawak. Dayon sultihi ang duha ka estudyante sa pagbalik ngadto sa ilang mga lingkuranan.
Dapita ang usa ka estudyante sa pagbasa og kusog sa mosunod nga paragraph mahitungod sa pagbiya sa mga Santos gikan sa Nauvoo. Hangyoa ang klase sa pagpaminaw sa mga paagi nga ang kasinatian sa mga Santos mahimong sama sa kasinatian sa estudyante nga gigiyahan sa pagtabok sa classroom.
Ubos sa mga hulga sa kabayolente gikan sa manggugubot nga panon, ang mga Santos nagsugod sa pagbiya sa Nauvoo niadtong Pebrero 1846, nga nagpanaw paingon sa kasadpan latas sa estado sa Iowa. “Ang pagbiya sa Nauvoo mao ang usa ka buhat sa hugot nga pagtuo alang sa mga Santos. Mibiya sila nga dili sigurado asa gayud sila mopaingon o kon kanus-a sila maabut sa usa ka dapit nga kapuy-an. Ang ila lang nahibaloan nga sila gipalayas sa Illinois pinaagi sa ilang mga kaaway ug ang ilang mga lider nakadawat og pagpadayag sa pagpangita og usa ka kadangpan didto sa Rocky Mountains” (Church History in the Fulness of Times Student Manual, 2nd ed. [manwal sa Church Educational System, 2003], 309).
Sa unsang paagi nga ang kasinatian sa mga Santos sa pagbiya sa Nauvoo susama sa kasinatian sa estudyante kinsa gigiyahan tabok sa classroom? (Misalig sila sa panan-awon ug direksyon sa usa ka tawo nga ilang gisaligan sa pagtabang kanila nga makaabut sa ilang padulngan.)
Unsay atong makat-unan gikan sa kasinatian sa mga Santos sa pagbiya sa Nauvoo? (Ang mga estudyante mahimong mogamit og lain-laing mga pulong, apan kinahanglan silang mopahayag sa mosunod nga baruganan: Gipakita nato ang hugot nga pagtuo kon kita mosunod sa tambag ug direksyon sa atong mga lider sa Simbahan.)
Dapita ang usa ka estudyante sa pagbasa og kusog sa mosunod nga istorya mahitungod ni William Clayton. Hangyoa ang mga estudyante sa pagpaminaw sa mga ehemplo sa hugot nga pagtuo ni Brother Clayton.
“Si William Clayton gitawag nga maapil sa usa sa unang mga grupo nga mobiya sa Nauvoo ug mibiya sa iyang asawa, si Diantha, uban sa iyang ginikanan, usa ka bulan na lang aron ihimugso ang iyang unang anak. Mitaak sa mga lapukon nga mga dalan ug ang pagpuyo sa mga tolda nga tugnaw kaayo nakapabalaka kaniya mahitungod sa pagkabutang ni Diantha. Duha ka bulan ang milabay, wala pa gihapon siya mahibalo kon luwas ba ang paghimugso sa bata apan sa katapusan nakadawat og makalipay nga pahibalo nga usa ka ‘himsog nga batang lalaki’ natawo. Pagkadawat gayud dayon niya sa balita, si William milingkod ug misulat og awit nga dili lamang dunay espesyal nga kahulugan ngadto niya apan nahimong usa ka awit sa kadasig ug pagpasalamat ngadto sa mga miyembro sa Simbahan sulod sa mga henerasyon. Ang kanta mao ang: ‘Dali, Ngari, Kamo mga Santos’” (Ang Atong Panulundon: Usa ka Mubong Kasaysayan sa Ang Simbahan ni Jesukristo sa Mga Santos sa Ulahing mga Adlaw [1996], 88).
Dapita ang klase nga manganta og dungan sa unang tulo ka mga bersikulo sa “Come, Come Ye Saints” (Hymns, nu. 30). (O pagkontak daan og usa ka estudyante o grupo sa mga estudyante ug dapita sila nga mangandam sa pagkanta sa unang tulo ka mga bersikulo sa himno.) Sa dili pa kantahon ang himno, hangyoa ang mga estudyante sa pagpangita o pagpaminaw sa mga pulong nga nagpakita sa hugot nga pagtuo sa mga Santos diha kang Jesukristo ug sa pagsalig sa ilang mga lider.
Human makanta ang unang tulo ka bersikulo, ipangutana:
Sa unsang paagi nga kining himno nakapakita sa hugot nga pagtuo sa mga Santos diha kang Jesukristo ug sa pagsalig sa ilang mga lider?
Dapita ang usa ka estudyante sa pagbasa og kusog sa mosunod nga istorya ni Orson ug Catherine Spencer. Hangyoa ang klase sa pagpaminaw sa mga ehemplo sa hugot nga pagtuo ug pagsalig sa mga Spencer.
“Human mibiya sa Nauvoo, si [Catherine], talandugon kaayo ug luyahon, ang panglawas paspas kaayong mikunhod tungod sa nagkadaghan nga kalisdanan. Ang nagmagul-anon nga bana misulat sa mga ginikanan sa asawa, nga naghangyo kanila sa pagdawat kaniya sa ilang panimalay hangtud ang mga Santos makakita og dapit nga kapuy-an. Miabut ang tubag, ‘Pabiyai niya ang iyang makauulaw nga pagtuo ug siya makabalik, apan dili gayud mahitabo hangtud buhaton niya kana.’
“Sa dihang ang sulat gibasa ngadto kaniya, nihangyo siya sa iyang bana sa pagkuha sa iyang Biblia ug mipakli ngadto sa basahon ni Ruth ug gibasa ang unang kapitulo, sa ika-disesais ug ikadisesiyete nga mga bersikulo: ‘Ayaw ako paghangyoa aron sa pagbiya kanimo, ug sa pagbalik gikan sa pagsunod kanimo; kay bisan asa ikaw moadto, ako moadto, ug bisan asa ikaw mopuyo, adto ako mopuyo. Ang imong katawhan mamahimo nga akong katawhan ug ang imong Dios mamahimo nga akong Dios’” (Memoirs of John R. Young: Utah Pioneer 1847 [1920], 17–18). Si Catherine Spencer namatay sa wala madugay human niana.
Dapita ang mga estudyante sa pagkanta sa ikaupat nga bersikulo sa “Come, Come, Ye Saints.” Hangyoa sila sa paghunahuna bahin kon sa unsang paagi nga ang mga pulong niining bersikulo may kalabutan ngadto ni Catherine Spencer. Human nila makanta ang bersikulo, ipangutana:
Sa unsang paagi nga ang mga pulong niining bersikulo may kalabutan ngadto ni Catherine Spencer?
Dapita ang mga estudyante sa paghimo og usa ka tumong sa paggamit sa hugot nga pagtuo diha kang Jesukristo ug mas mosunod sa mga tambag ug direksyon sa ilang mga lider sa Simbahan.
Dapita ang mga estudyante sa pagpakli ngadto sa Mapa 6 (“Ang Paingon sa Kasadpan nga Kalihokan sa Simbahan”) diha sa seksyon sa Mga Mapa sa Kasaysayan sa Simbahan sa ilang mga kasulatan ug tultola ang Nauvoo ug Winter Quarters. Ipasabut nga tungod sa naghinubra nga ulan ug dili igo nga kagamitan, ang mga Santos nga mibiya sa Nauvoo niadtong Pebroro 1846 migahin og upat ka bulan sa 300 ka milya nga pagbiyahe tabok sa Iowa. Mihinay ang pag-abante sa grupo tungod niini nga mga kahimtang ug tungod kay sila nawad-an og kapin sa 500 ka baskog nga mga Santos sa Ulahing mga Adlaw nga mga kalalakin-an. Kini nga mga kalalakin-an, kinsa naila isip ang Mormon Battalion, mitubag sa tawag ni Presidente Brigham Young sa pag-apil sa United States Army aron makakwarta aron itabang sa kabus nga mga miyembro sa Simbahan nga makabiyahe sa kasadpan. Kini nga sakripisyo nakatabang sa daghang mga paagi, apan daghan usab nga mga pamilya ang napasagdan nga wala ang mga bana ug mga amahan sa usa ka bahin panahon sa panaw. Naghunahuna niining hinay nga pag-abante, ang mga lider sa Simbahan nakahukom sa dili pagpadayon paingon sa kasadpan ngadto sa Rocky Mountains hangtud sa tingpamulak sa 1847. Sila mitambag sa mga Santos sa pagpahimutang alang sa tingtugnaw. Usa sa pinakadakong mga pinuy-anan, ang Winter Quarters, nahimutang sa kasadpan nga bahin sa Suba sa Missouri, diha sa moderno nga estado sa Nebraska.
Dapita ang usa ka estudyante sa pagbasa og kusog sa mosunod nga deskripsyon sa Winter Quarters ug sa ubang temporaryong pinuy-anan:
Daghan sa mga Santos nagpuyo sa mga balay nga ginama sa troso ug mga willow ug yuta. Daghang tawo ang nakulangan og kapasilungan gikan sa tugnaw nga panahon. Mga sakit sama sa malaria, pneumonia, tuberculosis, cholera ug scurvy miresulta sa daghang pag-antus ug kamatayon. Sobra sa pito ka gatus ka mga tawo ang nangamatay didto sa mga kampo sa pagtapos sa unang tingtugnaw. (Tan-awa sa Our Heritage, 71–72; Church History in the Fulness of Times Student Manual, 319–20.)
Kon naapil pa kamo sa mga Santos didto sa Winter Quarters, unsa kaha ang inyong bation, kay nakaamgo nga kinahanglan pa gihapon kamo nga mobiyahe og gatusan ka milya?
Ang Ginoo mitambag sa mga Santos sa pag-organisar sa ilang mga kaugalingon ug mangandam sa pagpadayon sa ilang biyahe sa kasadpan
Hangyoa ang mga estudyante sa pagbasa og dali sa seksyon sa pasiuna sa Doktrina ug mga Pakigsaad 136, nga mangita kon diin nahatag kini nga pagpadayag ug kinsa ang nakadawat niini. Hangyoa sila sa pag-report kon unsay ilang nakit-an.
Sa unsa kaha nga paagi nga nakatabang sa mga Santos nga makahibalo nga ang Ginoo nagpadayon sa pagpadayag sa Iyang kabubut-on ngadto kanila? (Ang mga tubag mahimong maglakip nga kining pagpadayag nakatabang kanila nga makahibalo nga ang Ginoo nagpakabana kanila, nga Siya motabang nila sa ilang pagpadayon sa biyahe paingon sa kasadpan, ug nga Siya namulong pinaagi ni Presidente Brigham Young sama nga Siya namulong pinaagi ni Propeta Joseph Smith.)
Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 136:2–5. Hangyoa ang klase sa pagsunod, nga mangita kon unsay gisugo sa Ginoo nga buhaton sa mga Santos sa pagpangandam sa pagpadayon sa ilang panaw ngadto sa kasadpan.
Unsaon pag-organisar sa mga pundok?
Ngano kaha nga nakatabang man ang pag-organisar sa mga Santos ngadto sa mga grupo inubanan sa napili nga mga lider? Sa unsang paagi nga kini susama sa paagi sa pag-organisar sa Simbahan karon? (Human makatubag ang mga estudyante niining mga pangutana, mahimo nimong isulat ang mosunod nga kamatuoran diha sa pisara: Ang Ginoo nag-organisar sa Iyang mga Santos ngadto sa mga grupo aron ang matag tawo magiyahan ug maamumahan.)
Unsa ang gisugyot sa bersikulo 4 mahitungod kon sa unsang paagi nga ang mga Santos makadawat og kalig-on?
Ipasabut nga tungod sa mga sakit ug kamatayon didto sa Winter Quarters ug sa nagpalibut nga mga kampo, daghang mga pamilya ug mga indibidwal ang nagkinahanglan og panabang aron sila makapadayon sa ilang biyahe paingon sa kasadpan.
Ipares-pares ang mga estudyante. Hangyoa sila nga magdungan sa pagtuon sa Doktrina ug mga Pakigsaad 136:6–11, nga mangita og mga paagi nga ang mga Santos makaatiman niadtong nanginahanglan. Sa dili pa mobasa ang mga estudyante niining tudling, ipasabut nga dili tanang mga Santos ang hingpit nga mibiya sa Winter Quarters sa samang higayon. Ang mga pulong nga “niadto kinsa magpabilin” sa bersikulo 6 nagpasabut sa mga Santos nga nagpabilin sulod sa usa ka panahon sa Winter Quarters ug sa palibut sa mga kampo.
Unsa nga mga pulong diha sa mga bersikulo 6–11 nga nagpakita kon sa unsang paagi nga ang mga Santos kinahanglang moatiman niadtong mga nanginahanglan?
Unsa nga pulong diha sa bersikulo 7 ang nagpasabut sa mga tawo kinsa miandam sa agianan alang sa uban? (Mga pioneer.)
Isulat ang mosunod nga kahulugan diha sa pisara. (Kini kinutlo gikan sa Oxford English Dictionary, 2nd ed. [1989], “pioneer.”)
Pioneer: Usa ka tawo kinsa mag-una aron sa pag-andam o pag-abli sa agianan alang sa uban nga mosunod.
Sumala sa bersikulo 11, unsa ang gisaad sa Ginoo niadtong kinsa motabang sa uban nga nanginahanglan ug moandam sa agianan alang kanila? Unsay atong makat-unan gikan niini? (Human makatubag ang mga estudyante, mahimo nimong isulat ang mosunod nga baruganan diha sa pisara: Ang Ginoo mopanalangin kanato kon kita motabang sa uban nga nanginahanglan ug moandam sa agianan alang kanila.)
Dapita ang mga estudyante sa paghisgot sa mosunod nga pangutana uban sa ilang mga pares:
Kinsa ang nag-andam sa agianan alang kaninyo aron matagamtam ang mga panalangin sa ebanghelyo?
Hangyoa ang mga estudyante sa pagpamalandong sa mosunod nga mga pangutana. Dayon dapita ang pipila sa pagpakigbahin sa ilang mga tubag ngadto sa klase.
Unsa ang inyong buhaton aron mahimong usa ka pioneer—aron matabangan ang uban nga nanginahanglan ug mangandam sa agianan alang kanila aron matagamtaman ang mga panalangin sa ebanghelyo?
I-summarize ang Doktrina ug mga Pakigsaad 136:12–18 pinaagi sa pagpasabut nga ang Ginoo mimando sa Iyang mga sulugoon sa pagtudlo niining pinadayag ngadto sa mga Santos.
Tapusa pinaagi sa pagpamatuod sa mga kamatuoran nga inyong nahisgutan ug sa pag-awhag sa mga estudyante sa pagbuhat base niadtong mga kamatuoran.
“Usa ka diksyonaryo mihulagway sa usa ka pioneer isip ‘usa ka tawo nga nag-una aron sa pag-andam o pagbukas og agianan aron mosunod ang uban’ [Oxford English Dictionary, 2nd ed. (1989), “pioneer”]. Mahimo bang madasig kita sa kaisug ug sa pagkamakanunayon sa katuyoan nga naghulagway sa mga pioneer sa nag-una nga henerasyon? Mahimo bang kamo ug ako, sa tinuoray, mahimong mga pioneer?
Si Elder Parley P. Pratt mihatag og usa ka istorya sa unsay gibuhat sa mga Santos aron maandam ang agianan alang niadtong nagsunod:
Imahe
Parley P. Pratt
“Ang tanang mga butang gipahiuyon ug gihan-ay, ang mga kampo mipadayon. Naabut sa usa ka lugar sa usa ka branch sa Grand River taud-taud kaming nagkampo, kay layo kaayo ang gibiyahe taliwala sa grabe ug nagpadayon nga ulan, lapok ug lamak. Dinhi nangural kami ug nag-uma alang sa kadaghanan sa gatusan ka ektarya ug magsugod sa pagpamuyo, alang sa kaayohan sa pipila kinsa mopabilin ug niadtong kinsa nagsunod kanamo gikan sa Nauvoo. Kami mitawag sa lugar nga ‘Garden Grove’” (Autobiography of Parley P. Pratt, ed. Parley P. Pratt Jr. [1938], 342).
Niadtong Mayo 1846, si Jesse C. Little, usa ka representante sa Simbahan, nakigkita sa mga opisyal sa gobyerno sa Estados Unidos didto sa Washington, D.C. Ang Simbahan mihangyo kon ang mga Santos sa Ulahing mga Adlaw makahatag ba og buhat sa serbisyo ngadto sa gobyerno agig baylo sa pinansyal nga tabang alang sa paglalin sa mga Santos ngadto sa Kasadpan. Ang Kongreso sa Estados Unidos bag-ohay lang nga mideklarar og pakiggubat batok sa Mexico, ug nahisgutan ni Presidente James Polk uban ni Jesse C. Little ang ideya nga ang mga kalalakin-an nga mga Santos sa Ulahing mga Adlaw magpalista sa United States Army ug gamiton ang ilang mga suhol sa pagtabang sa mga Santos sa ilang pagbaktas. Samtang ang mga Santos mitabok sa Iowa, ang mga tig-recruit sa United States Army mihangyo sa mga miyembro sa Simbahan sa pagserbisyo sa Gubat sa Mexico ug Amerika. Sa sinugdanan ang mga Santos mibalibad, apan si Presidente Brigham Young midasig sa mga kalalakin-an sa pagsalmot isip usa ka paagi nga makatigum og kwarta aron mapundok ang mga kabus gikan sa Nauvoo ug tabangan ang mga Santos sa pagbalhin sa kasadpan. Tungod sa tambag ni Presidente Young, sobra sa 500 ka kalalakin-an ang mipalista sa United States Army. Kini nga grupo gitawag nga Mormon Battalion. Daghan sa kababayen-an ug kabataan ang miuban sa battalion samtang sila nagmartsa sa sobra sa 3,200 ka kilometros ngadto sa habagatang bahin sa California, diin miserbisyo sila isip mga tropa nga tigbantay sa nasakop nga dapit.
Pagka-Hulyo 4, 1846, si Daniel B. Rawson miingon; “Mibati ko og kasuko sa Gobyerno nga mitugot nga ako hasion ug gipalayas sa akong panimalay. Nakasulti ko og bati nga mga pulong nga ‘makita nako silang tanan nga gipanghimaraut ug diha sa Impyerno.’ Dili ko moapil. Sa pagpaingon ngadto sa Bluffs nahimamat namo si Presidente Brigham Young, si Heber C. Kimball ug W. Richards nga mibalik, nagtawag og mga recruit. Miingon sila nga ang kaluwasan sa Israel mag-agad sa pagpadaghan sa kasundalohan. Sa dihang nadungog ko kini nausab ang akong hunahuna. Mibati ko nga akong katungdanan ang pag-adto” (sa Norma Baldwin Ricketts, The Mormon Battalion [1996], 13).