Seminary
Leksyon 117 Doktrina ug mga Pakigsaad 109:47–80

Leksyon 117

Doktrina ug mga Pakigsaad 109:47–80

Pasiuna

Niadtong Marso 27, 1836, si Propeta Joseph Smith mipahinungod og pag-ampo alang sa Templo sa Kirtland. Kana nga pag-ampo, nga gipadayag sa Ginoo kaniya kaniadto, narekord sa Doktrina ug mga Pakigsaad 109. Mao kini ang ikaduha sa duha ka leksyon mahitungod sa pag-ampo. Naglakip kini sa pangamuyo sa Propeta alang sa Ginoo sa pagpanalangin sa mga Santos kinsa gidaug-daog didto sa Lalawigan sa Jackson, Missouri, ug sa Ginoo sa pagpanalangin sa ilang mga tigdaug-daog. Naglakip usab kini sa petisyon sa Propeta nga ang katawhan sa tibuok kalibutan, ilabi na sa nagkatibulaag nga Israel, makabig ngadto sa kahingpitan sa ebanghelyo ug nga ang Langitnong Amahan modawat sa pagpahinungod sa Templo sa Kirtland ug sa pagpanalangin sa mga pamilya sa Simbahan.

Mga Sugyot alang sa Pagtudlo

Doktrina ug mga Pakigsaad 109:47–53

Mihangyo si Joseph Smith sa Langitnong Amahan sa pagtabang sa mga Santos sa Missouri

Dapita ang mga estudyante sa paghunahuna nga usa ka higala o sakop sa pamilya nakigbisog o nag-antus. Dayon hangyoa sila sa paghunahuna nga sila walay mahimo bisan unsa sa personal sa pagtabang niini nga higala o sakop sa pamilya. Human nga sila adunay panahon sa paghunahuna, ipangutana ang mosunod nga pangutana:

  • Sa unsa nga paagi nga kamo makatabang sa paghupay sa pag-antus sa usa ka tawo, bisan og wala kamoy personal nga mahimo?

Human mopakigbahin ang mga estudyante og pipila ka mga ideya, pahinumdumi sila nga ang mga Santos sa Missouri nag-antus pag-ayo tungod sa kabayolente sa manggugubot nga panon sa Lalawigan sa Jackson. Niadtong Abril 1836, si Propeta Joseph Smith didto sa Kirtland, Ohio. Bisan nianang higayuna wala siyay mahimo sa personal sa paghupay sa pag-antus sa mga Santos sa Missouri, aduna siyay gibuhat atol sa pagpahinungod sa Templo sa Kirtland aron sa paglig-on kanila. Dapita ang usa ka estudyante sa pagbasa og kusog sa Doktrina ug mga Pakigsaad 109:47–49. Hangyoa ang klase sa pagsunod ug mangita og usa ka butang nga atong mahimo sa pagtabang sa uban panahon sa kalisud.

  • Sa pagpahinungod sa Templo sa Kirtland, unsa ang gibuhat sa Propeta alang sa mga Santos sa Missouri? (Nag-ampo siya alang kanila.)

Dapita ang usa ka estudyante nga maoy tigsulat diha sa pisara. Hangyoa ang klase sa pagsugyot og kamatuoran nga atong makat-unan gikan sa mga pulong sa pag-ampo sa Propeta niini nga mga bersikulo. Samtang nagtubag ang mga estudyante, ang tigsulat mahimong mosulat sa mosunod nga kamatuoran: Ang atong mga pag-ampo makatabang ug makalig-on niadtong kinsa nanginahanglan.

  • Kanus-a ninyo nabati o nakita ang gahum sa pag-ampo nga nakatabang sa usa ka tawo nga nanginahanglan? (Mahimo nimong ipasabut nga ang mao nga mga pag-ampo usahay natubag pinaagi sa inspirasyon nga atong madawat sa pagtabang sa uban.)

Dapita ang usa ka estudyante sa pagbasa og kusog sa Doktrina ug mga Pakigsaad 109:50. Hangyoa ang klase sa pagsunod, nga mangita sa ubang tawo nga gi-ampo sa Propeta.

  • Kinsa pa man ang gi-ampo sa Propeta?

  • Ngano kaha nga kinahanglan kitang mag-ampo alang sa atong mga kaaway? (Aron matabangan ang mga estudyante nga matubag kini nga pangutana, mahimo kang mosugyot nga basahon nila ang Doktrina ug mga Pakigsaad 109:43 ug 3 Nephi 12:43–45.)

  • Unsa nga baruganan ang atong makat-unan gikan sa Doktrina ug mga Pakigsaad 109:50 mahitungod sa paagi nga ang atong mga pag-ampo makaimpluwensya sa uban? (Human motubag ang mga estudyante, hangyoa ang tigsulat nga isulat ang mosunod nga baruganan diha sa pisara: Ang atong mga pag-ampo makatabang sa pag-impluwensya sa mga tawo sa paghinulsol. Dayon dapita ang tigsulat nga molingkod.)

Hangyoa ang mga estudyante sa pagpamalandong sa mosunod nga pangutana:

  • Unsa kaha kon ang mga tawo nga atong gi-ampo mopili nga dili maghinulsol?

Dapita ang usa ka estudyante sa pagbasa og kusog sa Doktrina ug mga Pakigsaad 109:51–53. Hangyoa ang klase sa pagsunod, nga mangita sa mga pulong nga miila sa kabubut-on sa Ginoo ug sa kabubut-on sa uban. Dapita ang mga estudyante sa pagreport kon unsa ang ilang makit-an. (Sa dili pa ang mga estudyante mobasa niini nga mga bersikulo, mahimo nimong ipasabut nga kon ang mga kasulatan maglakip og mga pamahayag mahitungod sa Ginoo nga nagpakita sa Iyang bukton, kini nagpasabut Kaniya nga nagpakita sa Iyang gahum.)

Dapita ang mga estudyante sa pagbasa pag-usab sa hilum sa Doktrina ug mga Pakigsaad 109:53, mangita kon unsay buhaton sa Langitnong Amahan niadtong kinsa maghinulsol. (Mahimo nimong ipasabut nga ang kasuko sa Dios sa kasagaran ipakita sa pagsilot o pag-antus nga ang atong masinati tungod sa atong mga sala, sumala sa Iyang kaangayan. Ang mga pulong nga “sa diha nga ikaw motan-aw sa nawong sa imong Dinihogan” nagpasabut ngadto sa kaandam sa Langitnong Amahan sa paghatag og kalooy tungod sa maulaong sakripisyo sa Iyang Anak, si Jesukristo.)

  • Ngano man nga ipahilayo sa Langitnong Amahan ang Iyang kasuko gikan niadtong kinsa maghinulsol? (Mahimong mogamit ang mga estudyante og lain-laing mga pulong, apan tabangi sila nga mahibaloan ang mosunod nga baruganan: Tungod sa maulaong sakripisyo ni Jesukristo, mahilayo ang kasuko sa Langitnong Amahan niadtong maghinulsol. Isulat kini nga baruganan diha sa pisara.)

Aron matabangan ang mga estudyante sa paghunahuna sa deskripsyon sa bersikulo 53, dapita sila sa pagbuhat sa mosunod:

Hunahunaa ang kanhi sakop sa anti-Mormon nga manggugubot nagbarug atubangan sa Dios aron pagahukman. Karon hunahunaa nga sa mga tuig sa wala pa kining tawhana mamatay, tinud-anay gayud siya nga naghinulsol ug mihangyo nga mapasaylo ug matubos pinaagi sa Pag-ula ni Jesukristo. Tungod kay si Jesukristo nag-antus sa mga sala niini nga tawo, ang Langitnong Amahan dili mopahantang og silot ug motanyag og kalooy ngadto sa mahinulsulon nga makasasala.

Awhaga ang mga estudyante sa pagpalambo niini nga kinaiya ngadto niadtong kinsa nakapasilo kanila o maoy nakaingon nga sila nag-antus. Hangyoa ang mga estudyante sa paghunahuna nga ang ingon nga mga tawo nagbarug nga mahinulsulon diha sa atubangan sa Langitnong Amahan. Dapita ang mga estudyante sa pag-ampo, sama sa gibuhat ni Joseph Smith, alang sa mga tawo kinsa nakapasilo kanila o nakasala batok kanila.

Doktrina ug mga Pakigsaad 109:54–67

Nag-ampo ang Propeta nga ang katawhan sa tibuok kalibutan makabig ngadto sa kahingpitan sa ebanghelyo

Hangyoa ang mga estudyante sa pagpataas sa ilang mga kamot kon nakahimo sila sa bisan unsa sa mosunod:

  • Nag-ampo alang sa full-time nga mga misyonaryo

  • Nag-ampo alang sa mga tawo nga nag-imbestigar sa Simbahan

  • Nag-ampo alang sa mga tawo nga wala pa makadungog sa ebanghelyo

  • Sa unsang mga paagi sa inyong hunahuna nga ang inyong mga pag-ampo makatabang niining mga tawhana?

Dapita ang usa ka estudyante sa pagbasa og kusog sa Doktrina ug mga Pakigsaad 109:54–58. Hangyoa ang katunga sa klase sa pagpangita sa mga tawo nga gihalaran og pag-ampo ni Joseph Smith. Hangyoa ang laing katunga sa pagpangita unsa ang gihangyo sa Propeta nga buhaton sa Ginoo alang niadto nga mga tawo. Dayon hangyoa ang mga estudyante nga moreport sa unsay ilang nakit-an.

  • Unsa ang giampo sa Propeta nga mahitabo sa tanan nga maminaw sa pagpamatuod sa mga sulugoon sa Ginoo?

  • Unsa nga mga baruganan ang inyong nakita niini nga mga bersikulo? (Ang mga estudyante mahimong mangita og pipila ka mga kamatuoran, lakip sa mosunod: Ang pagsimba sa templo makapaandam nato sa pagpamatuod ngadto sa uban. Kon mag-ampo kita alang sa uban, ang ilang mga kasingkasing malukmay sa pagdawat sa mga sulugoon sa Ginoo. Samtang ang mga estudyante mangita sa mga baruganan, mahimo nimong ilista kini diha sa pisara.)

Hatagi ang mga estudyante og oportunidad sa pagpamatuod sa mga baruganan nga ilang nakit-an. Mahimo usab nimong ipakigbahin ang imong pagpamatuod ug usa ka kasinatian nga may kalabutan sa leksyon.

I-summarize ang Doktrina ug mga Pakigsaad 109:59–67 pinaagi sa pagpasabut nga nag-ampo si Joseph Smith nga ang Ginoo moestablisar og daghang mga stake sa Zion aron ang mga tawo sa tibuok kalibutan makapundok nganha niini. Nag-ampo siya ilabi na sa mga kaliwatan sa propeta nga si Jacob (Israel) nga makahibalo sa kamatuoran ug makabig ngadto sa kahingpitan sa ebanghelyo. Importante kini nga paagi nga ang Israel mapundok sa ulahing mga adlaw.

Doktrina ug mga Pakigsaad 109:68–80

Ang Propeta nag-ampo alang sa Simbahan ug nanghangyo sa Ginoo sa pagdawat sa pagpahinungod sa templo

Dapita ang mga estudyante sa pagsiksik sa hilum nga paagi sa Doktrina ug mga Pakigsaad 109:68–69, 71–73, 78–80. Mahimo nimong isulat ang mga numero niini nga mga bersikulo diha sa pisara aron ang mga estudyante makagamit niini. Hangyoa ang mga estudyante sa pagpangita sa dugang nga mga hangyo nga gihimo sa Propeta sa pag-ampo sa pagpahinungod. Ikonsiderar ang pagsugyot nga ilang markahan unsay ilang nakit-an.

  • Kinsa ug unsa ang giampo ni Joseph?

  • Unsa nga mga benepisyo ang moabut sa paglakip sa maong mga hangyo sa atong mga pag-ampo?

Dapita ang mga estudyante sa pagkanta sa “The Spirit of God” (Hymns, nu. 2). Idirekta ang atensyon sa mga estudyante sa pagpasabut sa ubos sa teksto sa himno, nga nag-ingon nga ang himno nga gikanta sa pagpahinungod sa Templo sa Kirtland. (Ang choir mikanta dayon niini human sa pag-ampo sa pagpahinungod.) Padayon kining gikanta sa mga pagpahinungod sa templo karon.

Pagdapit og estudyante nga mobasa sa summary sa unsay nahitabo sa templo niadtong gabii sa Marso 27, 1836, human sa pagpahinungod sa templo:

Nianang gabhiona, ang mga korum sa priesthood nagmiting sa templo. Miingon si Joseph Smith nga siya “mihatag kanila og mga instruksyon kalabut sa espiritu sa panagna, ug mitawag sa kongregasyon sa pagpamulong. … Si George A. Smith mibarug ug nagsugod sa pagpanagna, sa dihang ‘dunay kasaba nga nadungog sama sa tingog sa usa ka naghaguros nga kusog kaayong hangin, nga mipuno sa Templo, ug ang tanang kongregasyon nagdungan og panindog, ingon nga natandog sa usa ka dili makita nga gahum; daghan ang nagsugod sa pagsulti og lain-laing pinulongan ug nanagna; ang uban nakakita og mahimayaong mga panan-awon; ug ako nakakita sa Templo nga napuno sa mga anghel, diin nga kamatuoran akong gipahayag ngadto sa kongregasyon. Ang mga tawo sa kasilinganan midagan (nakadungog sa dili kasagaran nga tingog sa sulod, ug nakakita og makasilaw nga kahayag sama sa haligi sa kalayo nga midapat sa Templo), ug natingala sa unsay nahitabo” (sa History of the Church, 2:428). Ang ubang mga tawo nakakita og mga anghel ibabaw sa templo nga nakadungog nga nanganta (tan-awa sa Church History in the Fulness of Times Student Manual, 2nd ed. [manwal sa Church Educational System, 2003], 167).

Tapusa pinaagi sa pagpamatuod sa mga panalangin nga atong madawat kon takus kitang mosulod sa templo.