Gilarawan ni Propeta Joseph Smith ang daghang makahuluganong mga hitabo nga iyang nasinati tali sa mga edad nga 17 ug 22. Kini nga mga hitabo naglakip sa iyang mga kahago sa pagtabang og pagsangkap sa iyang pamilya, sa kamatayon sa iyang igsoong lalaki nga si Alvin, ug sa iyang kaminyoon ngadto ni Emma Hale. Gisulat usab ni Joseph nga human sa mga katuigan sa mga panudlo gikan ni anghel Moroni, gihatagan siya og responsibilidad sa mga palid ug gisugdan ang paghubad sa Basahon ni Mormon. Gipakita ni Martin Harris ang kopya sa pipila ka mga titik gikan sa mga palid ug ang hubad niini ngadto sa mga iskolar sa New York. Kini nga mga iskolar mipanghimatuod sa pagkatinuod sa mga titik ug sa katukma sa hubad niini. Hinoon, usa ka iskolar midumili sa istorya kon giunsa ni Joseph Smith pagbaton ang mga palid, nagtuman sa usa ka panagna gikan sa basahon ni Isaias (tan-awa sa Isaias 29:11–12 ug 2 Nephi 27:15–20).
Si Joseph Smith nagtrabaho ni Josiah Stoal ug nangasawa ni Emma Hale
Pahinumdom: Sa Joseph Smith—Kasaysayan, ang Propeta nagpasabut ngadto ni Josiah Stoal. Sa pipila ka makasaysayanong mga rekord, si Stoal makita usab isip si Stowell o ubang mga klase.
Dapita ang pipila ka mga estudyante sa paghingalan og mahinungdanong hitabo nga nahitabo sa ilang mga kinabuhi sulod sa milabay nga pipila ka mga tuig. Hangyoa sila sa pagpasabut kon sa unsa nga paagi kini nga hitabo mi-impluwensya sa ilang kinaiya ug sa ilang kaugmaon. Dayon hangyoa ang klase sa paghingalan og pipila ka mahinungdanong mga hitabo nga ilang gipaabut nga mahitabo sa ilang mga kinabuhi sulod sa sunod lima ka tuig. Ipasabut nga sa leksyon karon makat-unan nila ang mahitungod sa mahinungdanong mga hitabo sulod sa lima ka tuig nga gidugayon diha sa kinabuhi ni Propeta Joseph Smith. Ipasabut nga diha sa istorya nga girekord sa Joseph Smith—Kasaysayan 1:55–65, si Joseph Smith diha sa mga pangidaron tali sa 17 ug 22—duol sa edad sa daghang mga estudyante sa seminary.
Dapita ang mga estudyante sa pagbasa og hilum sa Joseph Smith—Kasaysayan 1:55–58 nga mangita sa importanting mga nahitabo diha sa kinabuhi ni Joseph Smith.
Unsang mahinungdanong mga hitabo ang nahitabo sulod niining yugto sa panahon sa kinabuhi ni Joseph Smith? (Ang mga tubag sa mga estudyante mahimong maglakip sa mosunod: gsoong lalaki ni Joseph nga si Alvin namatay; mitrabaho si Joseph ni Josiah Stoal; nangasawa si Joseph ni Emma Hale.)
Nadawat ni Joseph ang mga palid ug nagsugod sa paghubad niini
Pagdala og butang gikan sa panimalay (o pag-ila og butang diha sa inyong classroom) nga gituohan nimo nga adunay dakong bili ug nga imong giampingan. Ipasabut ang kamahinungdanon sa butang ug nganong giampingan nimo kini og maayo.
Nakakita ka na ba sukad og usa ka tawo kinsa nagpasagad o napakyas sa pag-atiman og usa ka butang nga may bili? Nganong ang pipila ka mga tawo mobuhat niini?
Ipasabut nga si Joseph Smith gisaligan og usa ka butang nga mahinungdanon kaayo. Awhaga ang mga estudyante sa paghunahuna kon unsay ilang makat-unan gikan sa iyang ehemplo samtang sila magtuon sa Joseph Smith—Kasaysayan 1:59–62.
Dapita ang usa ka estudyante sa pagbasa og kusog sa Joseph Smith—Kasaysayan 1:59. Hangyoa ang klase sa pagsunod ug sa pag-ila sa mahinungdanong mga butang nga gihatag ni Moroni ngadto ni Joseph Smith.
Unsa nga mga butang ang gisalig ni Moroni ngadto ni Joseph Smith? (Ang bulawang mga palid, ang Urim ug Thummim ug ang panagang sa dughan [taming]. Ipasabut nga ang Urim ug Thummim usa ka balaanong giandam nga instrumento nga nagtabang sa usa ka manalagna diha sa buhat sa paghubad ug sa pagdawat og pagpadayag.)
Unsa nga sugo ang gihatag ni Moroni ngadto ni Joseph Smith kalabut sa mga palid? (Mahimo nimong isugyot nga markahan sa mga estudyante ang mga pulong nga “mogamit sa akong tanan nga mga panlimbasug sa pag-amping kanila.”)
Isulat ang mosunod nga pamahayag diha sa pisara: Samtang atong dawaton ang responsibilidad ug ang pag-amping niana nga gihatag sa Ginoo kanato, Siya .
Unsa ang gisaad sa Ginoo ni Joseph kon siya responsable sa iyang pag-atiman sa mga palid?
Dapita ang mga estudyante sa pagsugyot og mga paagi sa pagkompleto sa pamahayag diha sa pisara. Ang mosunod maoy usa ka paagi nga sila tingali motubag: Samtang among dawaton ang responsibilidad ug ang pag-amping niana nga gihatag sa Ginoo kanamo, Siya mohatag sa Iyang proteksyon ug panabang.
Aron matabangan ang mga estudyante sa pagpahisama sa kasinatian ni Joseph ngadto sa ilang kaugalingong mga sitwasyon, ipangutana ang mosunod:
Unsa ang pipila ka mga ehemplo sa sagradong mga pagsalig nga gihatag sa Ginoo kanato? (Ang mga tubag mahimong maglakip sa pag-atiman sa atong mga lawas uban sa balaang pagtahud, mga pakigsaad sa bunyag ug sa templo, awtoridad ug mga katungdanan sa priesthood, mga calling sa Simbahan, ang atong responsibilidad sa pag-amuma sa atong mga hunahuna ug mga espiritu, ang atong mga responsibilidad sa pamilya ug mga relasyon, ug ang atong mga pagpamatuod.)
Dapita ang usa ka estudyante sa pagbasa og kusog sa Joseph Smith—Kasaysayan 1:60. Hangyoa ang klase sa pagsunod ug sa pag-ila og usa ka sentence nga nagpakita nga ang Ginoo mituman sa Iyang saad samtang si Joseph nagmatinud-anon ngadto sa pagsalig nga gihatag kaniya. (“Apan pinaagi sa kaalam sa Dios, nagpabilin sila nga luwas diha sa akong mga kamot, hangtud ako nakatapos unsa ang gikinahanglan gikan sa akong mga kamot.”)
Aron sa pagpakita kon giunsa sa Ginoo paglugway ang Iyang proteksyon ug panabang samtang si Joseph Smith makugihong naningkamot sa pag-amping sa mga palid, dapita ang usa ka estudyante sa pagbasa og kusog sa mosunod nga istorya. Sa dili pa basahon sa estudyante, ipasabut nga kana usa ka kinutlo gikan sa istorya sa inahan ni Joseph Smith, si Lucy Mack Smith, mahitungod sa unsay nahitabo sa wala madugay human makuha ni Joseph Smith ang mga palid gikan ni Moroni didto sa Bungtod sa Cumorah. Ipasabut usab nga sa dihang nadawat ni Joseph Smith ang mga palid gikan ni Moroni, sa sinugdan gitago kini niya sa usa ka dunot nga kahoyng birch nga mga 4.8 ka kilometro ang gilay-on gikan sa iyang panimalay. Girekord sa inahan ni Joseph Smith kon unsay nahitabo samtang sa kadugayan iyang gikuha ang mga palid gikan sa iyang gitagoan nga dapit ug gidala kini sa panimalay:
Imahe
Lucy Mack Smith
“Si Joseph, sa pagduol niini, mikuha niini gikan sa ilang gitagoan nga dapit, ug, giputos kini sa iyang taas nga kupo, gisipitan niya ug mipadulong sa panimalay.
“Human makalakaw og diyutay nga distansya, nahunahuna niya nga mas luwas ang dili pag-agi sa dalan ug moadto agi sa kakahoyan. Nakalakaw og pipila ka distansya human mibiya sa dalan, miabut siya sa usa ka dakong kahoy nga natumba, ug sa iyang paglukso ibabaw sa dakong kahoy, usa ka tawo mitumaw gikan sa luyo niini ug gibunalan siyag kusog kaayo gamit ang pusil. Mituyok si Joseph ug gitumba niya siya, dayon midagan sa iyang labing kusog nga pagdagan. Mga 800 metros ang gilay-on giatake na usab siya sa samang paagi; gitumba niya kining tawo sa samang paagi sa una ug midagan na usab; ug sa wala pa siya moabut sa panimalay siya giatake sa ikatulong higayon. Sa pagsumbag sa katapusang tawo, napiang ang iyang kumagko, nga, bisan pa niana, wala siya kamatikod hangtud makita na ang balay, sa dihang milingkod siya sa kanto sa koral aron maulian sa iyang pagginhawa. Sa dihang naulian na siya, mitindog siya ug misulod sa balay. Sa gihapon siya dili pa hingpit nga makasulti gumikan sa kahadlok ug kakapoy sa pagdagan” (sa Lucy Mack Smith, History of Joseph Smith by His Mother, ed. Preston Nibley [1958], 108).
Kanus-a kamo (o usa ka tawo nga inyong kaila) nakadawat sa proteksyon ug panabang sa Ginoo samtang makugihon ninyong gipaningkamutan nga magmatinuoron sa sagradong pagsalig gikan sa Ginoo?
Aron matabangan ang mga estudyante nga makahunahuna sa ilang tinguha sa pag-amping sa sagradong mga pagsalig nga gihatag sa Ginoo kanila, hangyoa ang usa ka estudyante sa pagbasa sa mosunod nga pamahayag ni Elder D. Todd Christofferson sa Korum sa Napulog Duha ka mga Apostoles:
Imahe
Elder D. Todd Christofferson
“Magmaalamon sa unsay gihatag sa Ginoo kanimo. Kini usa ka pagsalig. …
“Kay sa magpasagad, unta ang inyong kinabuhi usa ka nagtubo sa hingpit nga pagkamasulundon. Nanghinaut ako nga kamo mohunahuna ug mobati ug manaput ug molihok sa mga paagi nga nagpakita og balaang pagtahud alang sa sagradong mga butang, sagradong mga dapit, sagradong mga okasyon” (“A Sense of the Sacred” [Church Educational System fireside alang sa young adults, Nob. 7, 2004], 9, 10; speeches.byu.edu).
Dapita ang usa ka estudyante sa pagbasa og kusog sa Joseph Smith—Kasaysayan 1:61–62. Hangyoa ang klase sa pagsunod ug sa pagpangita og mga ehemplo kon giunsa pagpanalangin sa Ginoo si Joseph ug si Emma Smith tungod sa ilang pagkamatinud-anon sa pagkaresponsable alang sa sagradong mga butang.
Sa unsa nga paagi ang Ginoo nagpanalangin sa Propeta ug sa iyang asawa niini nga panahon? (Tabangi ang mga estudyante nga makakita nga ang Ginoo mitabang ni Joseph sa pagtuman sa Iyang kabubut-on pinaagi sa tabang ni Martin Harris.)
Nagpakita si Martin Harris og mga titik gikan sa mga palid ngadto sa mga iskolar sa New York
Kon mahimo, ipakita sa mga estudyante ang kaubang larawan, nga nagpakita og mga ehemplo sa mga titik nga nasulat diha sa bulawang mga palid. Sa 1828, gikopya ni Joseph Smith ang pipila ka mga titik ngadto sa usa ka papel. Nangutana si Martin Harris kon makapakita ba siya og kopya sa pipila ka mga titik gikan sa mga palid ngadto sa mga iskolar sa New York kinsa adunay kahibalo sa karaang mga pinulongan ug mga sibilisasyon. (Samtang nagpakita ka sa larawan, mahimo nimong hisgutan nga daghang mga kopya sa titik ang gipanghimo. Wala mahibaloi kon mao ba kini ang aktwal nga kopya nga gipakita ni Martin Harris ngadto sa mga iskolar.)
Imahe
characters from plates
Isulat ang Joseph Smith—Kasaysayan 1:63–65 ug Isaias 29:10–12 diha sa pisara. Ipasabut nga ang reference gikan sa Joseph Smith—Kasaysayan naghulagway sa miting ni Martin Harris sa mga iskolar. Ang reference sa Isaias naglangkob og panagna mahitungod sa ulahing mga adlaw. Dapita ang mga estudyante sa pagtrabaho nga magpares ug magpuli-puli og basa og kusog niini nga mga tudling ngadto sa usag usa. Tudloi sila sa pagbasa og una sa tudling sa Joseph Smith—Kasaysayan. Mahimo nimong isugyot nga basahon nila ang ulohan sa kapitulo sa Isaias 29 sa dili pa nila basahon ang tudling sa Isaias. Samtang magbasa sila sa mga bersikulo sa Isaias 29, papangitaa sila og mga pagkasusama sa istorya ni Martin Harris. Human mabasa ug mahisgutan sa mga estudyante ang duha ka tudling ipangutana ang mosunod:
Unsa nga mga kamatuoran ang gitudlo kanato niini nga mga tudling mahitungod sa pagkahibalo nang daan sa Ginoo ug sa mga panagna sa Iyang mga sulugoon? (Mahimo nimong hisgutan nga sa dihang gipakita ni Martin Harris ang mga titik gikan sa mga palid ngadto sa mga iskolar sa New York, mitabang siya sa pagtuman sa panagna nga girekord diha sa Isaias 29:11–12).
Bisan og ang mga estudyante mogamit og lahi nga mga pulong, kinahanglan nilang ilhon ang mosunod nga kamatuoran: Ang mga panagna sa mga sulugoon sa Ginoo mahitabo. Mahimo nimong isulat kini nga kamatuoran diha sa pisara. Mahimo usab nimong isugyot nga isulat kini diha sa ilang mga kasulatan tupad sa Joseph Smith—Kasaysayan 1:65. Pangutan-a ang mga estudyante kon sila makahunahuna ba og mga scripture mastery passage nga nagtudlo niining sama nga kamatuoran (sama pananglit, tan-awa sa D&P 1:37–38 ug Amos 3:7). Mahimo nimong isugyot nga ilang isulat kini nga mga reference tupad sa Joseph Smith—Kasaysayan 1:65.
Sa unsa nga paagi nga ang katumanan sa balaang mga saad o propetikanhong mga pamahayag naglig-on sa inyong pagtuo?
Dapita ang mga estudyante sa pagsulat og pipila ka mga sentence diha sa ilang mga class notebook o mga scripture study journal nga nag-summarize unsay ilang nakat-unan sa leksyon karon ug nganong importante kini kanila. Aron sa pagtugot sa mga estudyante og higayon sa pagpasabut ug pagpamatuod sa mga kamatuoran nga ilang nakat-unan, dapita ang pipila kanila sa pagpakigbahin unsay ilang nasulat sa klase.
Gi-report ni Lucy Mack Smith nga sa wala pa mamatay si Alvin Smith, gisulti niya ang mosunod nga mga pulong ngadto sa iyang manghud nga si Joseph:
“Gusto kong magbinuotan ka nga batang lalaki, ug mobuhat sa tanan nga anaa sa imong gahum sa pagkuha sa Rekord. Pagmatinud-anon sa pagdawat sa panudlo, ug sa pagsunod sa tanang sugo nga gihatag kanimo. Ang imong igsoong Alvin kinahanglan gayud nga mobiya kanimo; apan hinumdumi ang ehemplo nga iyang gipakita kanimo; ug ipakita ang samang ehemplo alang sa kabataan nga mas manghud kanimo, ug sa kanunay pagmanggiloloy-on ngadto ni papa ug mama” (Lucy Mack Smith, History of Joseph Smith by His Mother, ed. Preston Nibley [1958], 87).
Joseph Smith—Kasaysayan 1:56. “Sukad niadto mitungha ang nagpasulabi nga sugilanon nga ako usa ka tigkalot og salapi”
Sukad sa unang mga adlaw sa Pagpahiuli, ang mga tigsaway miatake sa kinaiya ni Joseph Smith tungod kay siya gipatrabaho isip usa ka batan-ong tigkalot og salapi. Ang mga tigsaway mihingalan sa iyang mga paninguha isip “pagkalot og salapi” o “pagpangita og bahandi” usa ka paninguha nga bulingan ang iyang kinaiya. Nagdako si Joseph sa usa ka panahon ug kultura diin ang pagpangita og bahandi o pagkalot og gilubong nga bulawan ug plata sagad ug gidawat. Sa iyang kasaysayan, nagpasabut si Joseph Smith nga siya ug ang iyang pamilya gisuholan sa pagkalot og plata (tan-awa sa Joseph Smith—Kasaysayan 1:56).
Ang pipila nangutana: Kita ba adunay mga detalye kon giunsa paghubad ang Basahon ni Mormon? Si Elder Neal A. Maxwell sa Korum sa Napulog Duha ka mga Apostoles mihatag sa mosunod nga tubag:
Imahe
Elder Neal A. Maxwell
“Daghan kinsa nagbasa sa Basahon ni Mormon masabtan nga nagtinguha nga mahibalo pa mahitungod sa pagtungha niini, lakip ang aktwal nga proseso sa paghubad. Mao usab kini sa matinud-anon ug maunungon nga si Hyrum Smith. Sa dihang nangutana, giingnan si Hyrum ni Propeta Joseph nga ‘dili tuyo nga sultian ang kalibutan sa tanang mga detalye sa pagtungha sa Basahon ni Mormon’ ug nga ‘dili angay nga iyang ipakigbahin kini nga mga butang’ (History of the Church, 1:220). Busa igo na ang atong nahibaloan mahitungod sa aktwal nga pagtungha sa Basahon ni Mormon, apan dili kini malukpanon. …
“Bisan unsa ang mga detalye sa proseso, nagkinahanglan kini og naghingapin, personal nga mga paningkamot ni Joseph uban sa tabang sa mga instrumento sa pagpadayag. Tingali nausab ang proseso samtang milambo ang kapabilidad ni Joseph, naglakip sa Urim ug Thummim apan tingali dili na kaayo magsalig sa maong mga instrumento diha sa kaulahiang buhat sa Propeta sa paghubad. Si Elder Orson Pratt sa Korum sa Napulog Duha ka mga Apostoles miingon nga gisultihan siya ni Joseph Smith nga migamit siya sa Urim ug Thummim sa dihang wala pa siyay kasinatian sa paghubad apan nga sa kadugayan wala na niya kini kinahanglana, sama sa paghubad ni Joseph sa daghang mga bersikulo sa Biblia (tan-awa sa Latter-day Saints’ Millennial Star, 11 Ago. 1874, 498–99). …
“Nganong kita wala nay dugang pag-asoy kalabut sa proseso sa paghubad sa Basahon ni Mormon? Tingali ang hingpit nga proseso wala i-asoy tungod kay kita dili andam sa pagsabut niini, bisan og ihatag. Tingali, usab, buot sa Ginoo nga ang atong pagtuo sa Basahon ni Mormon i-base sa hugot nga pagtuo, bisan og puno kini sa importanting ebidensya. Bisan pa, gitudloan ni Kristo si Mormon, kinsa nagribyu sa kaugalingong mga pagtulun-an sa Manluluwas taliwala sa mga Nephite, sa dili pagrekord sa tanan niini diha sa mga palid tungod kay ‘Ako mosulay sa hugot nga pagtuo sa akong mga katawhan’ (3 Ne. 26:11). Tingali ang mga detalye sa paghubad gipugngan usab tungod kay gituyo nga atong ipaunlod ang atong mga kaugalingon diha sa unod sa basahon kay sa mahimong hilabihan ra ka interesado sa proseso sa atong pagdawat niini” (“By the Gift and Power of God,” Ensign, Ene. 1997, 39, 41).
Bisan og kita wala mahibalo sa tanang mga detalye mahitungod kon giunsa paghubad ang Basahon ni Mormon, nahibalo kita nga kini gihubad “pinaagi sa gasa ug gahum sa Dios” (D&P 135:3) ug nga ang bahin nga nahubad tinuod (tan-awa sa D&P 17:6).
Ang Urim ug Thummim “usa ka himan nga giandam sa Dios aron sa pagtabang sa tawo sa pagbaton og pagpadayag gikan sa Ginoo ug sa paghubad sa mga pinulongan” (Giya ngadto sa mga Kasulatan, “Urim ug Thummim”). Gigamit ni Joseph Smith ang Urim ug Thummim sa pagtabang og hubad sa Basahon ni Mormon. Agi og dugang sa Urim ug Thummim, ang Propeta migamit og bato sa manalagna sa proseso sa paghubad.
Si Elder Neal A. Maxwell sa Korum sa Napulog Duha ka mga Apostoles miingon sa mosunod mahitungod sa proseso sa paghubad ug sa paggamit ni Joseph Smith sa Urim ug Thummim ug sa bato sa manalagna:
Imahe
Elder Neal A. Maxwell
“Si Propeta Joseph lamang ang nasayud sa tibuok nga proseso, ug tuyo niyang dili ihulagway ang mga detalye. Wala kaayo namo hatagi og dakong importansya ang mga pulong nila ni David Whitmer, Joseph Knight, ug Martin Harris, kinsa mga tig-obserbar, dili mga tighubad. Mipahayag si David Whitmer nga samtang migamit ang Propeta sa balaan nga mga instrumento nga gihatag aron sa pagtabang kaniya, ‘ang mga hieroglyphic motungha, ug usab ang hubad sa Iningles nga pinulongan … diha sa hayag nga mga letra.’ Dayon basahon ni Joseph ang mga pulong ngadto kang Oliver (gikutlo diha sa James H. Hart, “About the Book of Mormon,” Deseret Evening News, 25 Mar. 1884, 2). Miasoy si Martin Harris mahitungod sa bato sa manalagna: ‘Motungha ang mga sentence ug basahon sa Propeta ug isulat ni Martin’ (gikutlo gikan sa Edward Stevenson, “One of the Three Witnesses: Incidents in the Life of Martin Harris,” Latter-day Saints’ Millennial Star, 6 Peb. 1882, 86–87). Mihimo og susama nga obserbasyon si Joseph Knight (tan-awa sa Dean Jessee, “Joseph Knight’s Recollection of Early Mormon History,” BYU Studies 17 [Tinglarag 1976]: 35).
“Giingon nga mipamatuod si Oliver Cowdery diha sa korte nga ang Urim ug Thummim mipahimo ni Joseph nga ‘mabasa sa Iningles, ang mga titik sa inusab nga Ehiptohanon, diin gikulit diha sa mga palid’ (“Mormonites,” Evangelical Magazine and Gospel Advocate, 9 Abr. 1831). Kon tukma kini nga mga report, nagpasabut kini og usa ka proseso nga nagpakita nga mihatag ang Dios kang Joseph og ‘panan-aw ug gahum sa paghubad’ (D&P 3:12).
“Kon pinaagi niining balaang mga instrumento ang Propeta nakakita og karaang mga pulong nga gihubad sa Iningles ug dayon nagdiktar, dili gyud maingon nga siya gikinahanglan ug kanunay nga magtuki sa mga pulong diha sa mga palid— ang sagad nga proseso sa paghubad sa pagbalik-balik tali sa pagpamalandong og karaang sinulat ug sa paghatag og modernong hubad.
“Klaro nga ang proseso sa pagpadayag wala nagkinahanglan sa Propeta nga mahimong usa ka eksperto sa karaan nga pinulongan. …
“Bisan unsa ang mga detalye sa proseso, nagkinahanglan kini og naghingapin, personal nga mga paningkamot ni Joseph uban sa tabang sa mga instrumento sa pagpadayag. Tingali nausab ang proseso samtang milambo ang kapabilidad ni Joseph, naglakip sa Urim ug Thummim apan tingali dili na kaayo magsalig sa maong mga instrumento diha sa kaulahiang buhat sa Propeta sa paghubad. Si Elder Orson Pratt sa Korum sa Napulog Duha ka mga Apostoles miingon nga gisultian siya ni Joseph Smith nga migamit siya sa Urim ug Thummim sa dihang siya wala pay kasinatian sa paghubad apan sa kadugayan wala na niya kini kinahanglana, sama sa paghubad ni Joseph sa daghang mga bersikulo sa Biblia (tan-awa sa Latter-day Saints’ Millennial Star, 11 Ago. 1874, 498–99)” (By the Gift and Power of God,” Ensign, Ene. 1997, 39).
Gibisitahan ni Martin Harris ang labing minos tulo ka mga lalaki kinsa adunay mga reputasyon isip hanas nga mga tighubad. Sa Albany, New York, nakigsulti siya ni Luther Bradish, usa ka diplomat, dakong tawo sa kagamhanan, tigbiyahe sa kalibutan, ug estudyante sa mga pinulongan. Sa Siyudad sa New York gibisitahan niya si Dr. Samuel Mitchell, bise presidente sa Rutgers Medical College. Gibisitahan usab niya ang usa ka tawo kinsa nakahibalo og daghang mga pinulongan lakip ang Hebreohanon ug Babylonian. Kini mao si Propesor Charles Anthon sa Columbia College sa Siyudad sa New York, kinsa usa sa nag-unang iskolar sa karaang pinulongan sa iyang panahon. Sa panahon sa pagbisita ni Martin Harris, si Charles Anton usa ka assistant nga propesor sa Griyego ug Latin. Kahibalo siya og French, German, Griyego, ug Latin ug pamilyar, kon ang mga basahon sa iyang libreriya mga ebidensya, sa pinakabag-ong mga nadiskubre kalabut sa Ehiptohanong pinulongan, lakip ang unang buhat sa Champollion.