Niadtong Enero sa 1831, usa ka Protestante nga ministro nga ginganlan og James Covel nakighimamat ni Joseph Smith didto sa Fayette, New York, ug “nakigsaad ngadto sa Ginoo nga mosunod siya sa bisan unsa nga sugo nga ihatag sa Ginoo pinaagi sa iyang sulugoon nga si Joseph” (tan-awa sa Documents, Volume 1: July 1828–June 1831, vol. 1 sa Documents series sa The Joseph Smith Papers [2013], 233–34). Ang tubag sa Ginoo girekord diha sa Doktrina ug mga Pakigsaad 39. Diha sa pagpadayag, ang Ginoo nanawagan kang James Covel nga magpabunyag ug mosangyaw sa kahingpitan sa ebanghelyo didto sa Ohio. Hinoon, usa ka adlaw human madiktar ang pagpadayag, si James Covel mibiya sa Fayette ug “mibalik ngadto sa iyang kanhing mga baruganan ug katawhan” (History of the Church, 1:145). Ang Ginoo mihatag dayon og usa ka pagpadayag ngadto ni Joseph Smith ug Sidney Rigdon nga nagpasabut nganong wala motuman si Covel sa sugo nga gihatag ngadto kaniya. Ang pagpadayag narekord diha sa Doktrina ug mga Pakigsaad 40.
Si Jesukristo midapit kang James Covel nga modawat sa Iyang ebanghelyo ug magpabunyag
Hangyoa ang mga estudyante sa paghunahuna nga bag-o pa lang sila nga nahatagan og gasa sa usa ka ginikanan o laing minahal sa kinabuhi. Sa pag-abli nila sa gasa, ilang nadiskubrihan nga butang kini nga ila gayung ganahan.
Dawaton ba ninyo kini nga gasa? Aduna bay bisan unsang rason nganong pilion ninyo nga dili modawat sa gasa?
Makahunahuna ba kamo og bisan unsang mga gasa o mga halad gikan sa Langitnong Amahan nga gipili sa Iyang mga anak nga dili dawaton?
Dapita ang usa ka estudyante sa pagbasa og kusog sa Doktrina ug mga Pakigsaad 39:1–3. Hangyoa ang klase sa pagpangita sa unsay gipili sa pipila ka tawo nga dili dawaton.
Unsa ang gipili niining mga tawo nga dili dawaton?
Unsa kaha ang gipasabut sa pagdawat kang Jesukristo?
Gikan sa unsay inyong nahibaloan bahin sa pangalagad sa Manluluwas dinhi sa yuta, unsa ang pipila ka rason nga ang Iyang katawhan wala modawat Kaniya?
Isulat sa pisara ang mosunod nga dili kompleto nga pamahayag: Kon dawaton nato si Jesukristo, Siya …
Hangyoa ang usa ka estudyante sa pagbasa og kusog sa Doktrina ug mga Pakigsaad 39:4. Dapita ang klase sa pagsunod, nga mangita kon unsaon pagkompleto ang pamahayag diha sa pisara aron makahimo og usa ka baruganan. Hangyoa ang mga estudyante sa pag-report sa unsay ilang nakat-unan.
Ipasabut nga bisan kon ang bersikulo nag-ingon nga “anak nga mga lalaki,” ang Ginoo nagtudlo nga ang kababayen-an mahimong anak nga mga babaye ni Jesukristo (tan-awa sa D&P 25:1). Dayon kompletuha ang pamahayag diha sa pisara sama sa mosunod: Kon dawaton nato si Jesukristo, Siya mohatag kanato og gahum nga mahimong Iyang mga anak.
Aron matabangan ang mga estudyante nga makasabut kon unsay buot ipasabut sa mahimong mga anak ni Jesukristo, dapita ang usa ka estudyante sa pagbasa sa mosunod nga pamahayag ni Presidente Joseph Fielding Smith. (Mahimo nimong isulat kining pamahayag diha sa pisara sa dili pa magklase o ihatag kini isip usa ka handout.)
Imahe
President Joseph Fielding Smith
“Ang Manluluwas nahimo natong Amahan, sa kahulugan nga kining termino gigamit diha sa mga kasulatan, tungod kay nagtanyag siya kanato og kinabuhi, kinabuhing dayon, pinaagi sa pag-ula nga iyang gihimo alang kanato” (Doctrines of Salvation, comp. Bruce R. McConkie, 3 vols. [1954–56], 1:29).
Ipasabut nga diha sa Basahon ni Mormon atong nakat-unan nga kadtong kinsa nausab ang ilang kasingkasing pinaagi sa hugot nga pagtuo diha sa ngalan ni Jesukristo espirituhanon Niyang mga anak. Nahimo sila nga Iyang mga anak nga lalaki ug mga anak nga babaye (tan-awa sa Mosiah 5:7). Sa yanong pagkasulti, ang mga anak nga lalaki ug mga anak nga babaye ni Kristo mao “kadto kinsa nakadawat sa ebanghelyo ni Jesukristo” (Giya ngadto sa mga Kasulatan, “Mga Anak ni Kristo,” scriptures.lds.org).
Sumala sa pamahayag ni Presidente Smith, nganong mahimo man kitang mga anak ni Jesukristo?
Dapita ang mga estudyante sa pagbasa og hilum sa Doktrina ug mga Pakigsaad 39:5–6, nga mangita kon sa unsang paagi nato madawat si Jesukristo ug makapahimulos sa unsay Iyang gitanyag kanato aron mahimo kita nga Iyang mga anak.
Base sa unsay inyong nakat-unan gikan niining mga bersikulo, unsaon ninyo sa pagpasabut kon unsay kinahanglan gayud natong buhaton aron mahimong mga anak ni Jesukristo?
Ipsabut nga ang mga pulong sa Ginoo niining mga bersikulo gitumong ngadto kang James Covel, kinsa nahimong usa ka respetado kaayo nga ministro sa Methodist sulod sa mga 40 ka tuig. Sa wala pa madawat ni Joseph Smith kining pagpadayag, nahibaloan ni James Covel ang bahin sa gipahiuling ebanghelyo ni Jesukristo. Bisan dili siya miyembro sa Simbahan, nakigsaad siya nga motuman sa bisan unsa nga sugo nga iyang nadawat pinaagi ni Joseph Smith. (Hinumdumi nga ang bag-ong pag-research naghatag og dugang nga impormasyon bahin sa tawo kang kinsa gihatag kini nga pinadayag. Kon ang mga estudyante wala sa labing bag-o nga edisyon sa mga kasulatan, ang pasiuna nga seksyon dili mopakita sa kinabag-ohan nga impormasyon.)
Kay nasayud nga si James Covel dili miyembro sa Simbahan sa dihang nadawat kini nga pagpadayag, sa unsa kaha nga paagi nga ang mga pagtulun-an diha sa mga bersikulo 5–6 nagamit ngadto niya?
Ngano kaha nga magkinahanglan og dakong pagtuo aron dawaton ni James Covel si Jesukristo ug ang Iyang ebanghelyo ug magpabunyag? (Isip usa ka ministro, kon magpabunyag si James Covel, kinahanglan niyang biyaan ang mga posisyon, mga kaila, ug kita nga iyang naestablisar sobra sa 40 ka tuig.)
Dapita ang usa ka estudyante sa pagbasa og kusog sa Doktrina ug mga Pakigsaad 39:7–9. Hangyoa ang klase sa pagsunod, nga mangita sa ebidensya nga nakaila ang Ginoo kang James Covel. Human maka-report ang mga estudyante sa unsay ilang nakat-unan, ipangutana ang mosunod:
Kon kamo pa ang naa sa posisyon ni James Covel, unsa kaha ang inyong bation human makadungog niining mga pulong? Ngano man?
Unsa ang gisulti sa Ginoo bahin sa kondisyon sa kasingkasing ni James Covel niining panahona? Unsa kaha ang gipasabut sa ang iyang kasingkasing “karon matarung diha sa atubangan” sa Ginoo? (Mahimo nimong dapiton ang mga estudyante sa pagmarka sa pulong nga karon diha sa bersikulo 8.)
Sumala sa bersikulo 9, nganong gisalikway man ni James Covel ang Ginoo sa makadaghang higayon?
Kopyaha ang mosunod nga tsart diha sa pisara:
Kon kamo …
Nan …
Dapita ang tulo ka estudyante nga magpuli-puli sa pagbasa og kusog sa Doktrina ug mga Pakigsaad 39:10–12. Sa dili pa sila mosugod sa pagbasa, hangyoa ang katunga sa klase nga pangitaon unsa ang gisugo sa Ginoo kang James Covel nga buhaton. Hangyoa ang laing katunga nga pangitaon unsa ang gisaad sa Ginoo kang James Covel nga iyang madawat kon mosunod siya sa Ginoo.
Samtang mag-report ang mga estudyante sa unsay ilang nakat-unan, isulat ang ilang mga tubag ubos sa tukma nga ulohan diha sa tsart. Aron matabangan ang mga estudyante nga maanalisar kining mga bersikulo, ipangutana ang mosunod:
Sa unsang mga paagi nga madawat ni James Covel ang mas dagkong mga panalangin ug makahimo og mas mahinungdanong buhat kon midawat siya sa pagdapit sa Ginoo nga magpabunyag? (Tabangi ang mga estudyante nga makita nga gitanyagan sa Ginoo si James sa kahingpitan sa ebanghelyo, nga naglakip sa mga responsibilidad ug mga panalangin nga wala pa niya mabatuni kaniadto, sama sa gasa sa Espiritu Santo ug sa ordinasyon ngadto sa priesthood.)
Ipasabut ang pulong nga kon diha sa Doktrina ug mga Pakigsaad 39:10 ug 11. Mahimo nimong isugyot nga markahan sa mga estudyante kini nga pulong diha sa ilang mga kasulatan.
Unsa kaimportante ang pulong nga kon dinhi niining mga bersikulo? (Ang gisaad nga mga panalangin sa Ginoo ngadto ni James Covel nakakondisyon sa pagpatalinghug ni James ngadto sa tingog sa Ginoo.)
Unsa nga baruganan ang atong makat-unan gikan sa paggamit sa Ginoo sa pulong nga kon dinhi niining mga bersikulo? (Bisan kon ang mga estudyante mahimong mogamit og lain-laing mga pulong, kinahanglan nilang mahibalo sa mosunod nga baruganan: Ang gisaad nga mga panalangin sa Ginoo nakakondisyon sa atong pagpatalinghug ngadto sa Iyang tingog. Isulat sa pisara kini nga baruganan.)
Hangyoa ang mga estudyante sa pagkonsiderar sa hilum sa pipila ka panalangin nga gisaad sa Ginoo kanila. Dayon hangyoa sila sa pagpamalandong sa mosunod nga pangutana:
Unsa nga mga kondisyon ang gihatag sa Ginoo kaninyo sa dili pa kamo makadawat niadtong mga panalangin?
Gitawag si James Covel sa pagsangyaw sa kahingpitan sa ebanghelyo didto sa Ohio
I-summarize ang Doktrina ug mga Pakigsaad 39:13–24 pinaagi sa pagpahibalo nga ang Ginoo mitawag kang James Covel sa pagsangyaw sa ebanghelyo didto sa Ohio. Gihatagan siya sa Ginoo og mga instruksyon kon unsay itudlo ug unsaon sa pagtudlo niini.
Dapita ang usa ka estudyante sa pagbasa og kusog sa Doktrina ug mga Pakigsaad 39:22. Hangyoa ang klase sa pagsunod, nga mangita kon sa unsang paagi nga kining bersikulo dunay kalabutan sa mga baruganan nga inyo nang nahisgutan diha sa leksyon.
Unsa kaha ang inyong reaksyon kon dili kamo miyembro sa Simbahan ug ang mga instruksyon niini nga pagpadayag gihatag nganha ninyo?
Gipadayag sa Ginoo nganong gisalikway ni James Covel ang Iyang mga pulong
Pahibaloa ang mga estudyante nga sa adlaw human nga ang pagpadayag nga nailhan isip Doktrina ug mga Pakigsaad 39 gidiktar, si James Covel mibiya sa Fayette, New York, ug “mibalik ngadto sa iyang kanhing mga baruganan ug katawhan” (History of the Church, 1:145). Ang Ginoo mipadayag ngadto nila ni Joseph Smith ug Sidney Rigdon nganong wala motuman si James Covel sa mga instruksyon sa Ginoo ug wala makadawat sa mga panalangin nga gi-outline diha sa seksyon 39.
Dapita ang tulo ka estudyante nga magpuli-puli sa pagbasa og kusog sa Doktrina ug mga Pakigsaad 40:1–3. Hangyoa ang klase sa pagsunod, nga mangita sa rason nga si James Covel wala mopatalinghug sa tingog sa Ginoo.
Sumala sa Doktrina ug mga Pakigsaad 40:2, unsay nakaingon nga sa katapusan gisalikway ni James Covel ang pulong sa Ginoo?
Unsa nga mga baruganan ang inyong mahibaloan sa bersikulo 2? (Ang mga estudyante mahimong mahibalo og lain-laing mga baruganan, apan siguroa nga ang kahadlok ug mga kabalaka sa kalibutan makapahimo kanato sa pagsalikway sa pulong sa Dios. Isulat kini nga kamatuoran diha sa pisara. Mahimo nimong isugyot nga isulat kini sa mga estudyante diha sa ilang mga kasulatan.)
Unsa ang pipila ka kabalaka sa kalibutan nga mahimong makapugong sa mga tawo sa pagsunod sa Ginoo?
Dapita ang mga estudyante sa pagsulat diha sa ilang mga class notebook o mga scripture study journal sa pipila ka kahadlok ug mga kabalaka sa kalibutan nga makapugong kanila sa pagsunod kang Jesukristo ug sa pagtuman sa Iyang ebanghelyo. Hangyoa dayon sila sa pagsulat kon unsay ilang mabuhat aron makabaton og hugot nga pagtuo nga mabuntog ang ilang mga kahadlok o mga kabalaka. Awhaga sila nga buhaton kon unsay ilang gisulat.
Aron matabangan ang mga estudyante nga ma-summarize kon unsay ilang nakat-unan, isulat ang pulong nga kon diha sa pisara. Dayon ipangutana ang mosunod:
Sa unsang paagi nga kining pulonga dunay kalabutan ngadto ni James Covel?
Sa unsang paagi nga kini dunay kalabutan ngari kanato?
Sa pagtapos sa leksyon, dapita ang pipila ka estudyante sa pagpakigbahin sa dihang nakadawat sila og panalangin gikan sa Ginoo tungod kay mituman sila sa mga kondisyon nga gilangkuban niana nga panalangin. Mahimo usab nimong ipakigbahin ang imong pagpamatuod bahin sa mga panalangin nga atong madawat kon motuman kita sa mga sugo.
Ang pinakaunang kopya sa Doktrina ug mga Pakigsaad 39 nagpakita lamang nga usa kini ka pagpadayag nga gihatag alang sa usa ka tawo nga ginganlan og James. Ang namantalang kopya sa pagpadayag nga midugang sa ngalan sa tigdawat ngadto sa “James (C.,).” Sa 1835 nga edisyon sa Doktrina ug mga Pakigsaad, ang iyang ngalan nailhan isip “James Covill.” Sa 1981 nga edisyon sa Doktrina ug mga Pakigsaad, nailhan siya isip usa ka ministro nga Baptist. Hinoon, ang bag-ong pag-research nagpakita nga kini nga pagpadayag gihatag ngadto kang James Covel, kinsa usa ka ministro nga Methodist.
Niadtong 1831, ang pipila ka miyembro sa Simbahan sa United Methodist wala motuo sa pagpabunyag og usab; ni sila mituo nga bisan kinsa nga tawo dunay gahum sa pagtugyan sa Espiritu Santo. Si James Covel, kinsa usa ka ministro nga Methodist, tingali nabalaka sa sugo nga magpabunyag og usab (tan-awa sa D&P 39:10). Dugang pa, si James Covel migahin og pito ka tuig isip circuit rider (usa ka nagbiyahe nga ministro) ubos sa yano ug lisud nga mga kahimtang. Miretiro siya sa pagkahimong nagbiyahe nga ministro niadtong 1797. Sa dihang gitawag siya sa Ginoo nga magsugod sa pagmisyon, tingali gibati ni Covel nga ang buluhaton sa pagbiyahe ngadto sa dapit sa kamingawan hilabihan gayud ka dakong sakripisyo. Mahimong kabahin kini sa “mga kabalaka sa kalibutan” (D&P 40:2) nga nakapahimo kaniya sa pagsalikway sa pakigsaad nga iyang gihimo.