Niadtong Disyembre 9, 1830, duha ka adlaw sa wala pa mabunyagi si Edward Partridge, ang Ginoo mihatag kaniya og usa ka pagpadayag pinaagi ni Propeta Joseph Smith. Niini nga pagpadayag, nga narekord karon diha sa Doktrina ug mga Pakigsaad 36, ang Ginoo mipasaylo sa mga sala ni Edward Partridge ug mitawag kaniya sa pagsangyaw sa ebanghelyo. Ang Ginoo mihatag og usa ka sugo alang sa tanang naghupot sa priesthood sa pagsangyaw sa ebanghelyo. Wala madugay human madawat kini nga pagpadayag, si Joseph Smith nakadawat sa pagpadayag nga nalangkob diha sa Doktrina ug mga Pakigsaad 37, diin ang Ginoo misugo sa mga Santos nga mobiya sa New York ug magpundok didto sa Ohio.
Ang Ginoo mipasaylo sa mga sala ni Edward Partridge ug mitawag kaniya sa pagsangyaw sa ebanghelyo
Pagdala sa klase og usa ka maleta (o backpack) nga naglangkob sa mga item nga mahimong kinahanglanon sa misyonaryo kon magserbisyo og full-time nga misyon. Pananglitan, mahimo nimong ilakip ang mga kasulatan, puti nga mga polo, mga kurbata, mga sapatos para ipares sa sinina, ug usa ka kopya sa Isangyaw ang Akong Ebanghelyo. Ipakita sa mga estudyante ang sirado nga maleta ug dapita sila sa paghunahuna nga kini giimpake alang sa usa ka misyonaryo kinsa nagpadulong sa pagserbisyo og full-time nga misyon. Pangutan-a sila kon unsay ilang gilauman nga tingali anaa sa sulod sa maleta. Dayon ablihi ang maleta ug ipakita ang mga sulod niini. (O, mahimo nimong dapiton ang mga estudyante nga magpares sa paghimo og lista o sa pagdrowing og mga hulagway sa mga item nga mahimong gikinahanglan sa mga misyonaryo sa ilang mga misyon.)
Ipasabut nga dunay laing mga butang nga gikinahanglan sa mga misyonaryo nga dili mapaigo sa usa ka maleta (o backpack). Ang Ginoo mihisgot sa pipila niining mga butang diha sa usa ka pagpadayag nga gitumong ngadto ni Edward Partridge. Kini nga pagpadayag makita karon diha sa Doktrina ug mga Pakigsaad 36. Dapita ang mga estudyante sa pagpangita kon unsay gikinahanglan sa misyonaryo sa dili pa siya maandam nga moserbisyo og misyon samtang magtuon sila niini nga pagpadayag. (Samtang ang mga estudyante motino sa mga kamatuoran atol niining leksyon, mahimo nimong isulat kadtong mga kamatuoran sa mga piraso sa papel. Dayon ipapilit o itaud ang mga piraso sa papel ngadto sa gawas sa maleta o backpack aron makita sa mga estudyante. Mahimo usab nimo kining ilista lang diha sa pisara.)
Dapita ang usa ka estudyante sa pagbasa og kusog sa mosunod nga background nga impormasyon alang sa Doktrina ug mga Pakigsaad 36. Hangyoa ang klase sa pagpaminaw kon unsay nakatabang ni Edward Partridge nga nakadesisyon nga magpabunyag.
Sulod sa pipila ka semana sa pag-abut ni Elder Oliver Cowdery ug sa iyang mga kauban sa amihanang-silangang Ohio, daghang mga tawo ang nabunyagan ngadto sa gipahiuli nga Simbahan ni Jesukristo. Bisan kon ang asawa ni Edward Partridge, nga si Lydia, naapil niadtong nakabig ug nabunyagan sa mga misyonaryo, wala lang gihapon hingpit nga makumbinser si Edward. Nagtinguha siya nga mobisita ni Propeta Joseph Smith sa dili mo modesisyon. Siya ug si Sidney Rigdon miabut sa Waterloo, New York, samtang anaa si Joseph Smith sa tunga-tunga sa usa ka wali. Sa dihang nahuman na og pamulong ang Propeta, mibarug si Edward aron mamulong. Mi-report siya nga sa ilang pagpaingon ngadto sa Waterloo, nakig-istorya siya sa mga silingan nga duol sa umahan sa pamilyang Smith didto sa Manchester bahin sa kinaiya sa pamilyang Smith. Natagbaw sa unsay iyang nahibaloan, mihangyo si Edward kon pwede ba siyang magpabunyag ni Joseph. (Tan-awa sa Documents, Volume 1: Hunyo 1828–Hulyo 1831, vol. 1 sa Documents series sa The Joseph Smith Papers [2013], 197, 199, 224.)
Dapita ang mga estudyante sa pagbasa og hilum sa Doktrina ug mga Pakigsaad 36:1, nga mangita kon unsay gisulti sa Ginoo ni Edward Partridge human siya nabunyagan.
Unsa nga panalangin ang nadawat ni Edward Partridge isip resulta sa iyang bunyag? (Ang Ginoo mipasaylo sa iyang mga sala.)
Unsa nga responsibilidad ang nabatunan ni Edward Partridge human siya nabunyagan?
Nganong importante kaha alang niadtong gitawag sa pagsangyaw sa ebanghelyo nga maghinulsol ug mapasaylo sa ilang mga sala?
Aron matabangan ang mga estudyante nga makasabut nganong importante alang sa umaabut nga mga misyonaryo nga maghinulsol sa ilang mga sala, dapita ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles. (Mahimo nimong ipasabut nga sa dihang gigamit ni Elder Holland ang mga pulong nga “modula para sa kaaway” ug “pagpakig-angay sa Manluluwas,” gipakasama niya ang gubat tali sa maayo ug sa dautan ngadto sa usa ka athletic nga kompetisyon.) Ikonsiderar ang pag-andam og kopya niining pamahayag alang sa matag estudyante.
Imahe
Elder Jeffrey R. Holland
“Niini nga gubat tali sa maayo ug sa dautan, dili kamo mahimong modula para sa kaaway sa matag higayon nga moabut ang tintasyon ug dayon maglaum sa pagpakig-angay sa Manluluwas sa panahon nga mosulod sa templo ug magmisyon ingon og walay nahitabo. … Ang Dios dili matamay. …
“… Ang Ginoo mibutang og mga linya sa katakus alang niadtong gitawag sa paghago uban Kaniya niini nga buhat. “Walay misyonaryo nga wala maghinulsol sa sekswal nga kalapasan o malaw-ay nga sinultihan o pagtan-aw og pornograpiya ug dayon magpaabut nga mohagit sa ubang tawo sa paghinulsol niadtong nahimo nga samang mga butang! … Ang Espiritu dili makig-uban kaninyo, ug ang mga pulong moungot sa inyong tutunlan samtang litukon ninyo kini. Dili kamo mahimong mosubay sa unsay giingon ni Lehi nga ‘gidili nga mga dalan’ [1 Nephi 8:28] ug magpaabut nga mogiya sa uban ngadto sa ‘higpit ug pig-ot’ [2 Nephi 31:18] nga dalan—dili kana mahimo” (“Apil Kitang Tanan,”Liahona, Nob. 2011, 45).
Aron matabangan ang mga estudyante nga makasabut kon unsay ilang mahimo karon aron malimpyo alang sa misyonaryo nga pagserbisyo, dapita ang usa ka estudyante sa pagbasa og kusog sa mosunod nga pagdapit nga maghinulsol, nga gikan usab ni Elder Holland:
Imahe
Elder Jeffrey R. Holland
“Bisan kinsa pa kamo ug bisan unsay inyong nahimo, kamo mapasaylo. Ang matag usa kaninyo … makabiya sa bisan unsang kalapasan diin kamo nakiglimbasug. Mao kini ang milagro sa pagpasaylo; mao kini ang milagro sa Pag-ula ni Ginoong Jesukristo. Apan dili ninyo kana mahimo nga walay aktibong pasalig sa ebanghelyo, ug dili ninyo kana mahimo kon walay paghinulsol diin kini gikinahanglan. Naghangyo ako kaninyo … nga mag-aktibo ug magmalimpyo. Kon gikinahanglan, mohangyo ako kaninyo nga mag- aktibo ug mag malimpyo” (“Apil Kitang Tanan,” 45).
Ipasabut nga bisan kon nabunyagan na si Edward Partridge sa wala pa madawat kini nga pagpadayag, wala pa niya madawat ang gasa sa Espiritu Santo. Dapita ang mga estudyante sa pagbasa og hilum sa Doktrina ug mga Pakigsaad 36:2–3, nga mangita kon unsay gisulti sa Ginoo ni Edward Partridge bahin sa gasa sa Espiritu Santo. Dapita ang mga estudyante sa pag-report kon unsay ilang makit-an.
Base sa unsay gisulti sa Ginoo ngadto ni Edward Partridge, nganong nagkinahanglan man ang mga misyonaryo sa Espiritu Santo isip ilang kauban?
Sumala sa bersikulo 2, unsay itudlo sa Espiritu Santo ngadto ni Edward Partridge? Unsa kaha ang gipasabut sa pagkat-on “sa malinawon nga mga butang sa gingharian”? (Aron matabangan ang mga estudyante sa pagtubag niining pangutana, ipabasa nila ang Doktrina ug mga Pakigsaad 42:61.)
Mahimo nimong dapiton ang mga estudyante sa pagpakigbahin sa ilang mga kasinatian sa dihang ang Espiritu Santo mitudlo kanila sa malinawon nga mga butang sa gingharian. (Pahinumdumi ang mga estudyante nga ang ubang mga kasinatian sagrado o personal ra kaayo aron ipakigbahin.)
Ang Ginoo mihatag og usa ka sugo kalabut niadtong gitawag sa pagsangyaw sa ebanghelyo
Dapita ang usa ka estudyante sa pagbasa og kusog sa Doktrina ug mga Pakigsaad 36:4–5, 7. Sa dili pa mobasa ang mga estudyante, ipasabut nga niining mga bersikulo, ang Ginoo namulong ngadto sa “mga anciano sa [Iyang] simbahan” (D&P 36:7). Hangyoa ang klase sa pagsunod, nga mangita sa usa ka responsibilidad nga gihatag sa Ginoo ngadto sa mga naghupot sa priesthood.
Unsa nga responsibilidad ang gihatag sa Ginoo ngadto sa mga naghupot sa priesthood? (Human makatubag ang mga estudyante, isulat ang mosunod nga kamatuoran diha sa pisara: Ang mga naghupot sa priesthood gitawag sa pagsangyaw sa ebanghelyo.)
Aron matabangan ang mga estudyante nga makasabut sa kaimportante niining kamatuoran ug kon unsaon kini paggamit sa atong panahon, dapita ang usa ka estudyante sa pagbasa og kusog sa mosunod nga pamahayag ni Presidente Thomas S. Monson.
Imahe
President Thomas S. Monson
“Akong balikon ang dugay nang gitudlo sa mga propeta—nga ang matag takus, makahimo nga batan-ong lalaki kinahanglan nga mangandam sa pagserbisyo og misyon. Ang misyonaryo nga pagserbisyo usa ka katungdanan sa priesthood—usa ka obligasyon nga gipaabut sa Ginoo kanato kinsa gihatagan og hilabihan ka daghan” (Samtang Kita Nagkatigum Pag-usab,”Liahona, Nob. 2010, 5–6).
Sumala sa Doktrina ug mga Pakigsaad 36:5, unsa ang kinahanglang buhaton sa mga naghupot sa priesthood sa dili pa sila maordinahan ug mapadala aron sa pagsangyaw sa ebanghelyo?
Unsaon sa usa ka batan-ong lalaki sa pagpakita sa Ginoo nga iyang gihangup ang sugo sa pagsangyaw sa ebanghelyo?
Kinsa ang inyong nailhan nga mihangup sa sugo sa pagsangyaw sa ebanghelyo? Sa unsang paagi nga ang ehemplo niini nga tawo nakaimpluwensya kaninyo?
Mahimo nimong ipasabut nga bisan kon ang full-time nga misyonaryo nga pagserbisyo usa ka katungdanan sa priesthood, ang mga batan-ong babaye mahimo usab nga moserbisyo. Si Presidente Thomas S. Monson miingon:
Imahe
President Thomas S. Monson
“Usa ka tambag alang kaninyo batan-ong mga sister: ingon nga kamo wala sa samang responsibilidad sa priesthood sama sa batan-ong mga lalaki sa pagserbisyo isip full-time nga mga misyonaryo, makahimo usab kamo og bililhong kontribusyon isip mga misyonaryo, ug among gihangup ang inyong pagserbisyo” (“Samtang Kita Nagkatigum Pag-usab,” 6).
Dapita ang mga estudyante sa pagbasa og hilum sa Doktrina ug mga Pakigsaad 36:6, nga mangita sa sukaranang mensahe nga gisugo sa Ginoo nga itudlo sa Iyang mga misyonaryo. Aron matabangan ang mga estudyante nga makasabut sa mga pulong nga “mga saput nga gibulingan sa unod,” ipasabut nga sa karaang Israel, ang sinina nga nakontaminar sa sakit sunugon aron malikayan ang pagkatap sa sakit. Niini nga bersikulo, gitandi sa Ginoo ang sakit ngadto sa sala ug sa ingon nagsugo kanato sa paglikay sa bisan unsa nga may kalabutan sa sala. (Tan-awa sa Bruce R. McConkie, Doctrinal New Testament Commentary, 3 vols. [1965–73], 3:428.)
Dapita ang usa ka estudyante sa pagbasa og kusog sa Doktrina ug mga Pakigsaad 36:7. Hangyoa ang klase sa pagsunod, nga mangita sa pamaagi nga ang mga naghupot sa priesthood mohangup sa ilang calling.
Sa unsang paagi nga ang usa ka naghupot sa priesthood “mohangup [sa iyang calling] uban sa usa ka katuyoan sa kasingkasing”? (Ang mga tubag mahimong maglakip sa pagkamapasaligon ngadto sa iyang calling ug pagserbisyo uban sa kasinsero ug kaligdong.)
Kon nakaserbisyo ka og full-time nga misyon, ikonsiderar ang pagpakigbahin sa imong kasinatian sa paghangup sa tawag sa pagsangyaw sa ebanghelyo.
Ang Ginoo misugo sa Iyang Simbahan nga magpundok didto sa Ohio
Ipasabut nga samtang sila si Sidney Rigdon ug Edward Partridge nagpakisusi sa Simbahan sa Ohio, ang pagpanggukod sa mga Santos sa New York nagkakusog. Sa pipila ka kahimtang, ang mga pagpanghulga gihimo ngadto sa kinabuhi sa mga lider sa Simbahan, ug ang ilang mga kaaway tinago nga nagtagbo aron planuhon ang ilang kalaglagan (tan-awa sa D&P 38:13, 28–29). Sa hinapus nga bahin sa Disyembre 1830, pipila ka semana human miabut silang Sidney Rigdon ug Edward Partridge sa New York, si Joseph Smith nakadawat og usa ka pagpadayag diin ang Ginoo misugo sa mga Santos sa pag-eskapo sa ilang mga kaaway ug mobalhin ngadto sa Ohio.
Dapita ang tulo ka estudyante nga magpuli-puli sa pagbasa og kusog sa Doktrina ug mga Pakigsaad 37:2–4. Hangyoa ang klase sa pagsunod, nga mangita sa mga pagpangandam nga gusto sa Ginoo nga himoon ni Joseph sa dili pa siya moadto sa Ohio. Dapita ang mga estudyante sa pag-report kon unsay ilang makit-an.
Nganong gisugo man sa Ginoo si Joseph Smith nga moadto sa mga Santos sa Colesville?
Unsa nga mga baruganan ang atong makat-unan gikan niining mga bersikulo bahin sa pag-ampo? (Ang mga estudyante mahimong mogamit og lain-laing mga pulong, apan siguroa nga mahibaloan nila ang mosunod nga mga baruganan: Kon mag-ampo kita inubanan sa hugot nga pagtuo, ang Ginoo motubag sa atong mga pag-ampo. Ang Ginoo sa kasagaran mogamit sa uban sa pagtubag sa atong mga pag-ampo.)
Kanus-a man nga ang laing tawo nahimong tubag sa inyong mga pag-ampo?
Kon aghaton sa Espiritu, ipakigbahin ang imong pagpamatuod bahin sa mga doktrina ug mga baruganan nga gihisgutan niini nga leksyon. Dapita ang mga estudyante nga lihukon kon unsay ilang gibati samtang nagtuon sila niining mga pagpadayag.
Unang nadungog ni Edward Partridge ang gipahiuli nga ebanghelyo sa mga Oktubre 1830, sa dihang ang mga misyonaryo nga gipadala ngadto sa mga Lamanite mihunong sa Kirtland, Ohio, sa pagpaingon nila ngadto sa Missouri (tan-awa sa D&P 28:8; 32:2–3). Hinoon, wala siya mabunyagi, hangtud mga duha ka bulan human niana. Si Lucy Mack Smith, ang inahan sa Propeta, misulat sa mosunod bahin sa desisyon ni Edward Partridge nga magpabunyag: “Sa Disyembre sa samang tuig [1830], miiskedyul si Joseph og usa ka miting sa among balay. Samtang nagsangyaw siya, sila si Sidney Rigdon ug Edward Partridge misulod ug milingkod sa kongregasyon. Sa dihang nahuman na si Joseph sa iyang pakigpulong, gihatagan niya og kahigayunan si bisan kinsa nga dunay gustong isulti. Niining puntoha, mibarug si Mr. Partridge, ug miingon nga gikan pa siya sa Manchester, uban sa katuyoan nga makabaton og dugang nga impormasyon kalabut sa doktrina nga among gisangyaw; apan, kay wala makakita kanamo, nagpakisusi siya sa among mga silingan kalabut sa among mga kinaiya, nga ilang gisulti nga dalaygon, hangtud nga si Joseph milingla kanamo [kanila] kalabut sa Basahon ni Mormon. Miingon usab siya nga nagsuroy-suroy siya sa among umahan, ug nakaobserbar sa maayo pagkahan-ay ug pagkakugihan nga nakita diha niini; ug, kay nakakita kon unsay among gisakripisyo alang sa among gituohan, ug kay nakadungog nga ang among kamatinud-anon wala gikwestyon sa bisan unsang punto gawas nianang sa among relihiyon, mituo siya sa among pagpamatuod, ug andam na nga magpabunyag, ‘kon,’ miingon siya, ‘si Brother Joseph mobunyag kanako’” (History of Joseph Smith by His Mother, ed. Preston Nibley [1958], 191–92). Si Edward Partridge gibunyagan ni Joseph Smith niadtong Disyembre 11, 1830.
Si Edward Partridge sa wala madugay nahimong unang bishop sa Simbahan ug nag-antus og daghang pagpanggukod didto sa Missouri. Namatay siya nga usa ka matinud-anong miyembro sa Simbahan niadtong 1840 didto sa Nauvoo, Illinois, sa edad nga 47. (Alang sa dugang nga impormasyon bahin ni Edward Partridge, tan-awa sa Doktrina ug mga Pakigsaad 36:1–7; 41:9–11; 42:10; 50:39; 51:1–4, 18; 52:24; 57:7; 58:14–16, 24–25, 61–62; 60:10; 64:17; 124:19; tan-awa usab sa Church History in the Fulness of Times Student Manual, 2nd ed. [manwal sa Church Educational System, 2003], 82; Doctrine and Covenants Student Manual, 2nd ed. [manwal sa Church Educational System, 2001], 72.)
“Kini nga pangutana kanunayng gipangutana, Kinahanglan ba nga ang matag batan-ong lalaki magmisyon? Ang tubag niining pangutana gihatag na sa Ginoo. Usa kini ka oo. Matag batan-ong lalaki kinahanglang magmisyon.
“Samtang ang matag batan-ong lalaki kinahanglang moserbisyo og misyon, among naamguhan nga ang matag batan-ong lalaki dili andam sa pisikal, emosyonal, o sa moral nga paagi. Isip sangputanan, ang uban mahimong mahikawan sa misyonaryo nga mga oportunidad. Apan ang tanan kinahanglang andam nga moadto—nga mahimong takus nga moserbisyo sa Ginoo” (“Our Commission to Take the Gospel to All the World,” Ensign, Mayo 1984, 45).
Si Presidente Spencer W. Kimball mitudlo:
Imahe
President Spencer W. Kimball
“Kini nga pangutana kanunay nang gipangutana, Ang programa sa misyon pinugsanay ba? Ang tubag, tinuod gyud, nga dili. Ang tanan gihatagan sa gawasnong kabubut-on. Gipangutana kini: Kinahanglan ba nga ang matag batan-ong lalaki magmisyon? Ug ang tubag sa Simbahan oo, ug ang tubag sa Ginoo oo. Sa pagpalambo niini nga tubag moingon kita: Sigurado nga ang matag lalaki nga miyembro sa Simbahan kinahanglang magmisyon, sama nga siya kinahanglang mobayad sa iyang ikapulo, sama nga siya kinahanglang motambong sa iyang mga miting, sama nga siya kinahanglang mopabilin sa iyang kinabuhi nga limpyo ug gawasnon sa kangil-ad sa kalibutan ug magplano og usa ka celestial nga kaminyoon diha sa templo sa Ginoo” (“Planning for a Full and Abundant Life,” Ensign, Mayo 1974, 87).
Ang Ginoo misugo sa tanang mga miyembro sa Iyang Simbahan sa pagpakigbahin sa ebanghelyo. Ang ubang mga babaye mihangup niini nga sugo pinaagi sa pagserbisyo og full-time nga mga misyon, bisan kon dili sila ubos sa samang obligasyon sa pagbuhat sa ingon sama sa mga batan-ong lalaki.
Si Presidente Ezra Taft Benson miingon:
Imahe
Presidente Ezra Taft Benson
“Hinumdumi, mga batan-ong babaye, mahimo usab kamong makabaton sa oportunidad nga moserbisyo og full-time nga misyon. … Ang uban sa atong labing maayo nga mga misyonaryo mao ang batan-ong mga sister” (“To the Young Women of the Church,” Ensign, Nob. 1986, 83).
Si Presidente Gordon B. Hinckley nagtudlo:
Imahe
President Gordon B. Hinckley
“Nagkinahanglan kita og pipila ka batan-ong mga babaye. Naghimo sila og talagsaon nga mga buhat. Makasulod sila og mga panimalay diin ang mga elder dili makahimo.
“… Ang Unang Kapangulohan ug ang Konseho sa Napulog Duha nagkahiusa sa pag-ingon ngadto sa atong batan-ong mga sister nga dili sila ubos sa obligasyon nga magmisyon. Manghinaut ko nga akong masulti kon unsay kinahanglan nakong masulti sa paagi nga dili makapasilo ni bisan kinsa. Ang batan-ong mga babaye kinahanglang dili mobati nga sila adunay katungdanan sama sa batan-ong mga lalaki. Ang pipila kanila gusto gayud nga moadto. Kon mao, kinahanglan silang makigtambag sa ilang bishop ingon man usab sa ilang mga ginikanan” (“Some Thoughts on Temples, Retention of Converts, and Missionary Service,” Ensign, Nob. 1997, 52).
Ag pulong nga hiwi nagpasabut og kabadlungon ug lisud dumalaon. Busa, ang hiwi nga katawhan badlungon, masinupakon nga katawhan kansang kinabuhi wala mapahiangay ngadto sa Ginoo. Si Presidente Joseph Fielding Smith, nga nagpasabut niadtong anaa sa ulahing mga adlaw, miingon, “Kini mao ang hiwi nga kaliwatan, nga naglakaw diha sa espirituhanong kangitngit” (Church History and Modern Revelation, 2 vols. [1953], 1:163). Kini nga pagpahayag makita usab diha sa Mga Buhat 2:40. (Tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 73.)
Doktrina ug mga Pakigsaad 36:6. Unsay buot ipasabut sa “biya gikan sa kalayo, masilag bisan sa mga saput nga gibulingan sa unod”?
Nagpasabut ngadto sa Judas 1:23, nga naglangkob og pinulongan nga susama sa mga pulong sa Ginoo diha sa Doktrina ug mga Pakigsaad 36:6, si Elder Bruce R. McConkie sa Korum sa Napulog Duha ka mga Apostoles misulat: “Aron mapugngan ang pagkatap sa sakit sa karaang Israel, ang sinina nga nabulingan sa makatakud nga mga sakit gisunog. (Lev. 13:47–59; 15:4–17.) Ug mao usab sa sala diha sa Simbahan, ang mga santos kinahanglang molikay nga maduol niini; sa mga saput mismo, sama kaniadto, sa mga makasasala nga pagasunugon, buot ipasabut nga bisan unsang butang nga maimpluwensya sa mga dautan kinahanglan gayud nga isalikway. Ug mao usab niadtong anaa pa sa kalibutan nga gidapit nga moapil sa gingharian” (Doctrinal New Testament Commentary, 3 vols. [1965–73], 3:428). (Tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 73.)
Ang Doktrina ug mga Pakigsaad 37:1 nagpasabut ngadto sa Hubad ni Joseph Smith sa Biblia. Si Propeta Joseph Smith nakahuman na sa paghubad sa Basahon ni Mormon. Apan bisan kon ang iyang buhat kalabut sa Biblia importante kaayo, ang panginahanglan nga mobalhin ngadto sa Ohio “tungod sa kaaway” maoy prayoridad (D&P 37:1). Nagpadayon siya sa buhat sa pag-usab sa Biblia sa wala madugay didto sa Ohio. (Tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 74.)
Nagmisyon si Oliver Cowdery sukad pa sa tunga-tungang bahin sa Oktubre 1830 (tan-awa sa D&P 30:5–6; 32:2). Kini nga misyon midala kaniya ug sa iyang mga kauban sa 1,400 ka milya nga biyahe agi sa New York, Indiana, Illinois, ug Ohio ngadto na sa Missouri, diin kinahanglan sila nga mosangyaw sa mga Native American nga nagpuyo sa utlanan sa kasadpang Missouri ug mitakda sa dapit diin pagatukuron ang templo ug ang Bag-ong Jerusalem (tan-awa sa “Covenant of Oliver Cowdery and Others, 17 October 1830,” sa Documents, Volume 1: July 1828–June 1831, vol. 1 sa Documents series sa The Joseph Smith Papers [2013], 202–5). Ang mga Santos gisugo nga mobalhin ngadto sa Ohio ug maghulat sa pagbalik ni Oliver Cowdery. Kini nga pagbalhin ngadto sa Ohio agi og pagpangandam sa pagdawat og dugang nga mga instruksyon kalabut sa pag-establisar sa Zion (tan-awa sa D&P 38:31–33). Sa katapusan, si Oliver Cowdery wala mobalik, apan iya hinoong gipadala si Parley P. Pratt. (Tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 74.)