Kini nga pinadayag, gihatag sa Pebrero 1829 ngadto ni Joseph Smith Sr., ang amahan sa Propeta, mao ang una sa daghang nag-unang mga pagpadayag nga gihatag ngadto sa mga indibidwal kinsa nagtinguha sa pagtabang sa Ginoo sa Iyang buhat (tan-awa usab sa D&P 11–12; 14–16; 25). Niini, si Joseph Smith Sr. gitawag sa pagtrabaho diha sa pagserbisyo sa Dios. Agi og dugang, gilatid sa Ginoo ang mga kwalipikasyon ug importanting mga kinaiya alang niadtong magserbisyo Kaniya.
Si Joseph Smith Sr. gitawag sa pagtrabaho diha sa pagserbisyo sa Dios
Sugdi pinaagi sa paghangyo sa mga estudyante sa pagpamalandong sa mosunod nga pangutana:
Gibati ba ninyo sukad ang tinguha sa pagserbisyo sa Dios ug gusto nga mahibalo sa Iyang kabubut-on kalabut sa unsa nga paagi kamo labing makatabang sa pagtrabaho sa Iyang buhat?
Ipasabut nga ang amahan ni Joseph Smith mibati sa ingon nga tinguha, apan wala siya makahibalo unsay gusto sa Ginoo kaniya nga ipabuhat. Sa Pebrero 1829, si Joseph Smith Sr. ug ang iyang asawa, si Lucy, miduaw sa ilang anak nga si Joseph Smith Jr. sa Harmony, Pennsylvania. Atol niana nga pagduaw, si Joseph Smith Jr. nakadawat og pagpadayag agi og tubag sa pangutana sa iyang amahan. Ang Doktrina ug mga Pakigsaad 4 mao ang tubag sa Ginoo, diin iyang gilatid ang mga hiyas nga Iyang gipaabut niadtong motabang diha sa Iyang buhat.
Pahinumdumi ang mga estudyante nga sa panahon niini nga pagpadayag, ang Simbahan wala pa matukod ug ang priesthood wala pa mapahiuli. Dapita ang mga estudyante sa pagbasa og hilum sa Doktrina ug mga Pakigsaad 4:1 nga mangita kon giunsa paghulagway sa Ginoo ang Pagpahiuli nga mao pay pagsugod sa paglambo.
Unsa nga pulong ang gigamit sa Ginoo sa paghulagway sa Pagpahiuli sa ebanghelyo sa ulahing mga adlaw?
Sa unsa nga paagi nga ang Pagpahiuli sa ebanghelyo “kahibulongan”?
Dapita ang usa ka estudyante sa pagbasa og kusog sa Doktrina ug mga Pakigsaad 4:2. Hangyoa ang klase sa pagsunod, nga mangita kon unsay gipangayo sa Ginoo niadtong kinsa anaa sa pag-alagad Kaniya. (Mahimo nimong ipasabut nga ang pulong nga anaa nangahulugan og mosugod.)
Sumala niini nga bersikulo, unsa ang gipaabut sa Ginoo niadtong kinsa moserbisyo Kaniya?
Unsay gipasabut sa pagbuhat og usa ka butang “sa tibuok ninyo nga kasingkasing, gahum, hunahuna ug kusog”?
Aron matabangan ang mga estudyante nga mas makasabut niini nga mga pulong, hangyoa sila sa paghulagway unsa nga mga lihok o mga kinaiya nga tingali ilang paabuton nga makita diha sa usa ka tawo kinsa naninguha sa pagserbisyo sa Dios uban sa tibuok niyang kasingkasing, gahum, hunahuna, ug kusog. Mahimo usab nimong dapiton sila sa paghatag og mga ehemplo sa mga tawo nga ilang kaila kinsa nagserbisyo sa Ginoo niini nga paagi.
Isulat ang mosunod nga wala mahuman nga pamahayag diha sa pisara: Kon kita nag-alagad sa Dios uban sa tibuok natong kasingkasing, gahum, hunahuna, ug kusog, .
Aron matabangan ang mga estudyante sa pag-ila og baruganan nga gitudlo diha sa Doktrina ug mga Pakigsaad 4:2, ipangutana ang mosunod:
Sumala sa Doktrina ug mga Pakigsaad 4:2, unsa nga mga panalangin ang moabut gikan sa pagserbisyo sa Dios “sa tibuok [natong] kasingkasing, gahum, hunahuna ug kusog”? (Samtang nagtubag ang mga estudyante, hangyoa ang usa kanila sa pagkompleto sa pamahayag diha sa pisara. Kini kinahanglan nga mabasa susama sa mosunod: Kon kita nag-alagad sa Dios uban sa tibuok natong kasingkasing, gahum, hunahuna, ug kusog, mahimo kitang mobarug nga walay lama atubangan Kaniya sa katapusan nga adlaw. Mahimo nimong isugyot nga markahan sa mga estudyante kini nga mga pulong diha sa ilang mga kasulatan.)
Ngano kaha nga ang pagserbisyo sa Ginoo uban sa tibuok natong kasingkasing, gahum, hunahuna, ug kusog motugot kanato sa pagbarug nga walay lama sa atubangan sa Dios?
Awhaga ang mga estudyante sa pagpamalandong unsa kaha ang bation nga mobarug sa atubangan sa Dios ug makita nga “walay lama.” Mahimo nimong dapiton ang usa o duha ka mga estudyante sa pagpakigbahin sa ilang mga hunahuna.
Dapita ang usa ka estudyante sa pagbasa og kusog sa Doktrina ug mga Pakigsaad 4:3. Hangyoa ang mga estudyante sa pagsunod, nga mangita sa kinaiya nga gikinahanglan sa mga indibidwal aron makatabang sa Ginoo sa Iyang buhat.
Unsa nga kinaiya ang gikinahanglan nga aduna ang usa ka tawo aron makatabang sa Ginoo sa Iyang buhat? (Usa ka tinguha sa pagserbisyo sa Dios.)
Mahimo nimong ipasabut nga ang pipila nagkonsiderar sa Doktrina ug mga Pakigsaad 4 nga usa lamang ka tawag alang sa full-time nga serbisyo sa misyonaryo. Hinoon, ang amahan ni Joseph Smith, kang kini nga pagpadayag gihatag, wala tawga isip usa ka full-time nga misyonaryo. Hinoon, iyang gisunod ang tambag diha sa Doktrina ug mga Pakigsaad 4:2–3 sa nahibilin niyang kinabuhi, nagserbisyo uban ang pasalig bisan diin ug bisan kanus-a siya tawgon. Siya usa sa Walo ka mga Saksi sa Basahon ni Mormon ug usa sa unang gibunyagan sa dihang ang Simbahan opisyal nga natukod sa Abril 6, 1830. Miserbisyo usab siya isip ang unang Patriyarka sa Simbahan ug Assistant nga Tigtambag sa Unang Kapangulohan.
Ang tambag nga gihatag dinhi niini nga seksyon magamit sa tanan kinsa nagtinguha sa pagserbisyo sa Ginoo ug ngadto sa daghan nga mga paagi nga kita makatukod sa gingharian sa Dios.
Dugang sa full-time nga misyonaryo nga pagserbisyo, unsa ang pipila ka mga paagi nga kita makatabang sa Ginoo sa Iyang buhat?
Aron mahatagan ang mga estudyante og mga ideya kon sa unsa nga paagi sila makalihok sa ilang tinguha sa pagtabang diha sa buhat sa Ginoo karon, dapita ang usa ka miyembro sa klase sa pagbasa og kusog sa mosunod nga pamahayag gikan sa Alang sa Kalig-on sa mga Kabatan-onan:
“Pipila sa labing importante nga serbisyo nga inyong mahatag mahitabo sulod sa inyong kaugalingong panimalay. Kamo makaserbisyo usab diha sa inyong mga calling sa Simbahan, sa eskwelahan, ug sa komunidad. Kamo makaserbisyo pinaagi sa paghimo sa buhat sa templo ug sa family history. Kamo makaserbisyo pinaagi sa pagpakigbahin sa ebanghelyo ngadto sa uban karon ug isip usa ka full-time nga misyonaryo sa umaabut. Sa kasagaran ang labing makahuluganon nga serbisyo mapadayag pinaagi sa yano, matag adlaw nga mga buhat sa kaayo. Tinguhaa matag adlaw ang giya sa Espiritu Santo aron mahibaloan kinsa ang serbisyohan ug unsaon sa pagtabang nga matubag ang ilang mga panginahanglan. Sunda ang ehemplo sa Manluluwas samtang magserbisyo kamo sa uban” (Alang sa Kalig-on sa mga Kabatan-onan [booklet, 2011], 32).
Dapita ang mga estudyante sa pagsulat diha sa ilang mga class notebook o mga scripture study journal og usa ka piho nga paagi nga sila gustong motabang sa Ginoo sa Iyang buhat niini nga panahon sa ilang mga kinabuhi.
Kon posible, pagdala og gamay nga sampol sa usa ka lugas diha sa klase. Kon walay makuha, pakit-a ang mga estudyante og larawan sa usa ka humayan, o pagdrowing og yano nga larawan sa pungango sa trigo diha sa pisara. Ipasabut nga ang mga lugas nga sama sa trigo o sebada mausab ang kolor samtang sila nagtubo. Kon ang lugas linghod kini berde, apan samtang kini magkahinog mag-anam kini ka luspad. Kon ang lugas andam na nga anihon, kasagaran kining gihulagway nga “puti.”
Imahe
wheat drawing
Isulat ang mosunod nga mga pulong diha sa pisara: umahan, ani, sanggot. Dapita ang usa ka estudyante sa pagbasa og kusog sa Doktrina ug mga Pakigsaad 4:4. Sa dili pa siya mobasa, ipasabut nga niini nga bersikulo gitandi sa Ginoo ang mga tawo sa kalibutan ngadto sa umahan sa lugas. Hangyoa ang klase sa pagsunod, nga mangita kon sa unsa nga paagi gihulagway sa Ginoo ang umahan (o ang mga tawo sa kalibutan).
Unsa ang gisulti sa Ginoo mahitungod sa Iyang umahan (o sa mga tawo sa kalibutan)?
Unsa kaha ang gipasabut sa mga pulong “ang umahan puti ug andam na sa pag-ani”? (Ang mga tawo sa kalibutan andam nga mapundok ngadto sa Ginoo ug sa Iyang Simbahan.)
Pangutana kon aduna bay usa nga makapasabut kon unsa ang garab ug unsa ang gamit niini. (Ang garab usa ka baliko nga kotsilyo nga gamiton sa pag-ani og lugas. Mahimo kang magdrowing og yanong larawan sa usa ka garab diha sa pisara.)
Imahe
drowing sa garab
Unsa kaha ang gipasabut sa mogalab sa imong garab uban sa imong tibuok kusog? (Motrabaho nga makugihon aron sa pagdala sa uban ngadto ni Jesukristo.)
Sumala sa Doktrina ug mga Pakigsaad 4:4, unsa nga mga panalangin ang moabut ngadto niadtong nagtrabaho nga makugihon sa pagdala sa uban ngadto ni Jesukristo? (Ang mga estudyante mahimong mogamit og lahi nga mga pulong, apan siguroha nga ilang ilhon ang mosunod nga kamatuoran: Samtang kita nagtrabaho nga makugihon sa pagdala sa uban ngadto ni Jesukristo, makadawat usab kita og kaluwasan alang sa atong mga kaugalingon. Mahimo nimong isulat sa pisara kini nga baruganan.)
Sa unsa nga paagi nga ang pagtabang sa uban sa pagduol ngadto ni Jesukristo nagtabang kanato pagduol usab ngadto Kaniya?
Aron matabangan ang mga estudyante sa paglig-on sa ilang mga pagpamatuod niini nga baruganan, dapita ang pipila kanila sa paghatag og mga ehemplo sa unsa nga paagi sila mibati nga mas duol ngadto sa Langitnong Amahan ug ni Jesukristo samtang sila nagtrabaho aron pagtabang sa uban sa pagduol ngadto Kanila. Mahimo usab nimong ipakigbahin ang imong kaugalingong mga kasinatian o pagsaksi niini nga baruganan.
Ang Ginoo naglatid sa mga kwalipikasyon ug importanting mga kinaiya alang sa pagserbisyo Kaniya
Hangyoa ang mga estudyante sa paghingalan og pipila ka mga trabaho. Pagpili og usa o duha sa mga trabaho nga ilang gihinganlan, ug hangyoa sila sa pag-ila og mga kwalipikasyon ug gikinahanglan nga mga kinaiya nga kinahanglanon sa usa ka tawo aron molampos niana nga trabaho. Dapita ang mga estudyante sa pagbasa og hilum sa Doktrina ug mga Pakigsaad 4:5 nga mangita sa mga kinaiya nga makasarang sa usa ka tawo sa pagtabang diha sa buhat sa Ginoo. (Mahimo nimong dapiton ang usa ka estudyante sa paglista niini nga mga kinaiya diha sa pisara samtang ang klase nag-ila niini. Mahimo usab nimong isugyot nga markahan sa mga estudyante kini diha sa ilang mga kasulatan.)
Dapita ang usa ka estudyante sa pagbasa og kusog sa Doktrina ug mga Pakigsaad 4:6. Hangyoa ang klase sa pagsunod, nga timan-an ang dugang nga mga kinaiya nga gitambag sa Ginoo sa Iyang mga sulugoon nga “hinumdum[an].” (Mahimo nimong hangyoon ang usa ka estudyante sa pagsulat niini nga mga kinaiya diha sa pisara tupad sa mga pulong gikan sa bersikulo 5.)
Hangyoa ang mga estudyante sa pag-ila og usa ka kamatuoran gikan sa mga bersikulo 5–6 mahitungod sa unsa ang makatugot nato nga buhaton sa pagpalambo og balaang mga kinaiya. Ang mga estudyante mahimong mogamit og lain-laing mga pulong, apan kinahanglan silang mahibalo sa mosunod nga kamatuoran: Ang atong mga paningkamot sa pagpalambo sa balaang mga kinaiya motabang nato nga makasarang sa pagtabang sa buhat sa Ginoo. (Mahimo nimong isulat kini nga baruganan diha sa pisara. Mahimo ka usab nga mosugyot nga ang mga estudyante mosulat niini diha sa ilang mga kasulatan tupad sa Doktrina ug mga Pakigsaad 4:5–6.)
Sa unsa nga paagi kaha nga ang pagpalambo sa matag usa sa mga kinaiya diha sa mga bersikulo 5–6 nagtabang kanato nga mas epektibo sa pagtabang diha sa buhat sa Ginoo?
Hain sa mga kinaiya nga gilista diha niini nga mga bersikulo gusto nimong magpalambo sa mas hingpit nga paagi? Ngano man?
Hangyoa ang usa ka estudyante sa pagbasa og kusog sa Doktrina ug mga Pakigsaad 4:7 samtang ang klase nagsiksik sa unsa nga paagi kita mangita ug magpalambo niini nga mga kinaiya.
Unsa ang buot ipasabut sa “pangayo” ug “tuktok”?
Sa unsang paagi kaha ang pag-ampo makatabang kanato sa pagpalambo og balaang kinaiya?
Sa pagtapos sa leksyon, mahimo nimong dapiton ang mga estudyante sa pagpamatuod sa mga panalangin nga ilang nadawat samtang sila nagtabang sa buhat sa Ginoo.
Si Presidente Joseph Fielding Smith sa Unang Kapangulohan mipahayag:
Imahe
President Joseph Fielding Smith
Ang “[Doktrina ug mga Pakigsaad 4] mubo kaayo, pito lamang ka bersikulo, apan naglangkob kini og igo nga tambag ug panudlo alang sa tibuok kinabuhi nga pagtuon. Wala pay usa nga naka-master niini. Kini dili tuyo isip usa ka personal nga pagpadayag ngadto ni Joseph Smith, apan nga mahimong kaayohan ngadto sa tanan kinsa nagtinguha nga mohatag og serbisyo sa Dios. Kini usa ka pagpadayag ngadto sa kada miyembro sa Simbahan, ilabi na ngadto sa tanan kinsa naghupot sa Priesthood. Tingali walay laing pagpadayag sa tanan natong mga kasulatan nga naglangkob og mas dako nga panudlo kalabut sa matang sa kwalipikasyon sa mga miyembro sa Simbahan alang sa serbisyo sa Dios, ug sa ingon ka mubo nga porma kay sa niini nga pagpadayag. Kini sama ka malukpanon, sama ka taas ug ka lawom sa kahangturan. Walay elder sa Simbahan nga makasarang sa pagtudlo diha sa Simbahan, o magdala sa mensahe sa Kaluwasan ngadto sa kalibutan, hangtud iyang mapatuhop, bisan sa labing gamay nga bahin, kining pinadala sa langit nga panudlo” (Church History and Modern Revelation, 2 ka mga bol. [1953], 1:35).