Niadtong Disyembre 26, 1835, si Lyman Sherman, usa ka matinud-anon nga sakop sa Kampo sa Zion ug usa sa pito ka mga Presidente sa Korum sa Seventy, misunod sa espirituhanon nga impresyon sa pagpangayo ni Propeta Joseph Smith og direksyon kabahin sa iyang katungdanan. Doktrina ug mga Pakigsaad 108 naglangkob sa pagpadayag nga gihatag ngadto ni Lyman pinaagi sa Propeta.
Ang Ginoo mipasaylo ni Lyman Sherman sa iyang mga sala
Sugdi ang klase pinaagi sa pagpangutana sa mosunod nga mga pangutana:
Naaghat na ba kamo sa Espiritu sa pagbuhat og usa ka butang? Unsa nga mga panalangin ang inyong nadawat sa dihang misunod kamo sa mga aghat sa Espiritu?
Dapita ang mga estudyante sa pagbasa og hilom sa seksyon sa pasiuna sa Doktrina ug mga Pakigsaad 108, mangita kon kinsa ang miduol sa Propeta nga nangayo og pagpadayag.
Dapita ang usa ka estudyante sa pagbasa og kusog sa mosunod nga impormasyon mahitungod ni Lyman Sherman:
Si Lyman Sherman usa ka matinud-anong miyembro sa Simbahan kinsa nakaserbisyo sa Kampo sa Zion ug natawag isip usa sa pito ka mga Presidente sa Korum sa Seventy. Girekord ni Propeta Joseph Smith sa iyang journal nga niadtong Disyembre 26, 1835, si “Brother Lyman Sherman miabut, ug nanghangyo sa pulong sa Ginoo pinaagi kanako; ‘kay,’ miingon siya, ‘gisugo ako sa pagpahibalo kanimo sa akong mga pagbati ug mga tinguha, ug gisaaran nga ako makadawat og pagpadayag nga magpahibalo sa akong katungdanan’” (sa History of the Church, 2:345; tan-awa usab sa Journals, Volume 1: 1832–1839, vol. 1 of the Journals series of The Joseph Smith Papers [2008], 137).
Unsa sa inyong hunahuna ang gipasabut ni Lyman sa dihang miingon siya nga siya “gisugo” sa pagpakigsulti ngadto ni Joseph Smith?
Dapita ang usa ka estudyante sa pagbasa og kusog sa Doktrina ug mga Pakigsaad 108:1. Hangyoa ang klase sa pagsunod ug mangita sa panalangin nga gihatag sa Ginoo ngadto ni Lyman Sherman tungod kay siya misunod sa aghat sa pagpakigsulti sa Propeta. Hangyoa ang mga estudyante sa pag-report kon unsay ilang makit-an.
Base sa unsay gipadayag sa Ginoo ngadto ni Lyman Sherman, unsa nga panalangin ang atong gidapit sa atong mga kinabuhi kon kita andam nga mosunod sa tingog sa Ginoo? (Mahimong mogamit ang mga estudyante og lain-laing mga pulong, apan kinahanglan nga ilang mailhan ang mosunod nga baruganan: Kon mosunod kita sa tingog sa Ginoo, gidapit nato ang Iyang pagpasaylo. Mahimo nimong isulat diha sa pisara kini nga baruganan.)
Ngano sa inyong hunahuna nga ang pagsunod sa mga aghat gikan sa Ginoo nagdapit og kapasayloan?
Aron matabangan ang mga estudyante nga makasabut niini nga baruganan, ipasabut nga ang tingog sa Ginoo mahimong madungog pinaagi sa mga kasulatan, sa mga pulong sa Iyang mga propeta sa ulahing mga adlaw, ug sa mga pag-aghat sa Espiritu Santo. Ang pagsunod sa Dios naglakip sa pagpuno sa atong mga kinabuhi sa matarung nga mga kalihokan nga makahatag og espirituhanong gahum. Dapita ang usa ka estudyante sa pagbasa og kusog sa mosunod nga pagpasabut gikan sa Matinud-anon sa Tinuhoan: “Ang hingpit nga pagkamasulundon magdala og hingpit nga gahum sa ebanghelyo sa imong kinabuhi, lakip ang pagdugang og kalig-on sa pagbuntog sa imong mga kahuyang. Kini nga pagkamasulundon naglakip sa mga kalihokan nga sa una wala tingali nimo mahunahuna nga kabahin sa paghinulsol, sama sa pagtambong sa mga miting, pagbayad sa ikapulo, paghatag og serbisyo, ug sa pagpasaylo sa uban. Ang Ginoo misaad, ‘Siya nga maghinulsol ug magbuhat sa mga sugo sa Ginoo mapasaylo’ (D&P 1:32)” (Matinud-anon sa Tinuhoan: Usa ka Pakisayran sa Ebanghelyo [2004], 133).
Dapita ang mga estudyante sa pagbasa sa hilum sa Doktrina ug mga Pakigsaad 108:2 ug mangita sa tambag sa Ginoo ngadto ni Lyman Sherman human siya sultihi nga gipasaylo na ang iyang mga sala. Dapita ang mga estudyante sa pag-report kon unsay ilang makit-an.
Unsa kaha ang buot ipasabut sa “himoa ang imong kalag magmalinawon kalabut sa imong espirituhanon nga kahimtang”?
Unsa sa inyong hunahuna ang tambag nga “ayaw na pagsupak sa tingog [sa Ginoo]” makatabang sa uban nga magmalinawon ang ilang kalag?
Hangyoa ang mga estudyante sa pag-ila og usa ka baruganan gikan sa Doktrina ug mga Pakigsaad 108:1–2 mahitungod kon unsay ikahatag sa kapasayloan sa Ginoo. (Ang mga estudyante mahimong moila og lain-laing mga baruganan, apan siguroha ang paghatag og gibug-aton sa mosunod: Ang kapasayloan sa Ginoo makahatag og kalinaw sa atong mga kalag.)
Itudlo nga ang mahinulsulon nga mga tawo usahay maghunahuna kon napasaylo ba sila sa ilang mga sala kon gibati gihapon nila ang kabug-at niini. Dapita ang usa ka estudyante sa pagbasa sa mosunod nga pamahayag. Hangyoa ang klase sa pagpaminaw alang sa tambag alang niadtong nakigbisog nga magmalinawon ang ilang mga kalag.
Si Presidente Boyd K. Packer sa Korum sa Napulog Duha ka mga Apostoles miingon:
Imahe
Presidente Boyd K. Packer
“[Ang] kabuntagon sa kapasayloan dili moabut diha-diha. Ayaw og hunong kon pakyas kamo sa sinugdanan. Sa kasagaran ang labing malisud nga bahin sa paghinulsol mao ang pagpasaylo sa inyong kaugalingon. Ang pagkawala sa kadasig kabahin sa pagsulay. Ayaw paghunong. Kanang masanag nga kabuntagon moabut ra.
“Dayon ‘ang kalinaw sa Dios, nga lapaw … sa pagpanabut’ moabut sa inyong kinabuhi pag-usab. [Mga Taga-Filipos. 4:7.] Dayon kamo, sama Kaniya, dili na mahinumdum sa inyong mga sala. Unsaon ninyo sa pagkasayud? Masayran ra ninyo! [Tan-awa sa Mosiah 4:1–3.]” “The Brilliant Morning of Forgiveness,” Ensign, Nob. 1995, 20).
Unsaon ninyo paghulagway kon unsay bation nga magmalinawon ang inyong kalag?
Dapita ang mga estudyante sa pagbasa sa hilum sa Doktrina ug mga Pakigsaad 108:3 ug mangita og dugang nga tambag nga gihatag sa Ginoo ngadto ni Lyman Sherman.
Unsa nga tambag ang gihatag sa Ginoo ni Brother Sherman? (Sa “pagbarug ug pagmabinantayon gikan karon sa pagsunod sa [iyang] mga panumpa.” Ang pulong pagsunod dinhi nagpasabut og pagtuman. Ang usa ka panumpa mao ang usa ka saad o pakigsaad.)
Unsa ang pipila ka mga panumpa nga atong himoon?
Dapita ang mga estudyante sa pagkonsiderar kon unsaon nga sila “magbinantayon gikan karon” sa pagsunod sa ilang mga panumpa. Kon aduna pay panahon, dapita sila sa pagsulat kon sa unsa nga paagi sila mas makasunod sa ilang mga panumpa.
Hangyoa ang pipila ka mga estudyante sa pagpasabut kon sa unsang paagi nga ang mga kamatuoran nga ilang nakit-an sa Doktrina ug mga Pakigsaad 108:1–3 makaawhag nila o sa usa ka higala o sakop sa pamilya sa pagsunod sa tingog sa Ginoo ug makaangkon og kapasayloan.
Dapita ang mga estudyante sa pagpamalandong kon sa unsa nga paagi nila magamit kini nga mga baruganan ug mobati nga malinawon mahitungod sa ilang espirituhanon nga pagkabutang sa atubangan sa Ginoo.
Ang Ginoo mihatag ni Lyman Sherman og dugang nga tambag ug mga saad
Pangutan-a ang mga estudyante kon nakadungog ba sila og ligdong nga katiguman. Kon aduna man gani, hangyoa sila sa pagpasabut unsay ilang nasabtan niini. Kon nagkinahanglan sila og tabang, ipasabut nga ang ligdong nga katiguman usa ka espesyal nga panagpundok alang “sa pagpahinungod sa mga templo, espesyal nga instruksyon ngadto sa mga lider sa priesthood, ug pagpaluyo og bag-ong Presidente sa Simbahan” (David B. Haight, “Solemn Assemblies,” Ensign, Nob. 1994, 14). Niadtong Disyembre 1832, ang Ginoo misaad sa mga Santos nga kon sila magtukod og templo ug magpahigayon og ligdong nga katiguman, Iyang ihatag ang daghang mga panalangin diha sa mga Santos (tan-awa sa D&P 88:70–75, 117–119). Niadtong Disyembre 1835, sa dihang ang pagpadayag nga narekord sa Doktrina ug mga Pakigsaad 108 gihatag ngadto ni Lyman Sherman, ang Templo sa Kirtland tulo na lang ka bulan sa dili pa ipahinungod. Taliwala sa Enero ug Mayo 1836, pipila ka mga miting ang gihimo didto sa Kirtland, ang uban giisip nga ligdong nga mga katiguman. Sa semana sa Marso 27, 1836, ang ligdong nga mga katiguman gihimo isip kabahin sa pagpahinungod sa Templo sa Kirtland, lakip sa ligdong nga katiguman aron sa paghatag og espesyal nga instruksyon ngadto sa mga lider sa priesthood nga gihimo niadtong Marso 30, 1836.
Dapita ang usa ka estudyante sa pagbasa og kusog sa Doktrina ug mga Pakigsaad 108:4–6. Hangyoa ang klase sa pagsunod, nga mangita kon unsay gisaad sa Ginoo ni Lyman nga iyang madawat didto sa ligdong nga katiguman.
Unsa ang gisulti sa Ginoo ni Lyman Sherman nga iyang madawat?
Dapita ang usa ka estudyante sa pagbasa og kusog sa Doktrina ug mga Pakigsaad 108:7–8. Hangyoa ang klase sa pagsunod, nga mangita sa mga instruksyon nga gihatag sa Ginoo ngadto ni Brother Sherman. Hangyoa ang mga estudyante sa pag-report kon unsay ilang makit-an. Mahimo nimong ipasabut nga ang mga pag-awhag mao ang mga pulong sa pagtambag.
Sa unsang paagi nga ang Ginoo buot nga lig-unon ni Lyman Sherman ang iyang kaigsoonan?
Hangyoa ang mga estudyante sa pagpangita sa mga kamatuoran nga anaa sa Doktrina ug mga Pakigsaad 108:7–8. Mahimo silang mangita sa lain-laing mga kamatuoran, lakip sa mosunod: Kinahanglan natong lig-unon ang uban sa atong tanang panagsultihanay ug mga buhat. Mahimo nimong isugyot nga markahan sa mga estudyante kini nga kamatuoran diha sa ilang mga kasulatan.
Sa unsang paagi inyong malig-on kadtong anaa sa inyong palibut pinaagi sa inyong panagsultihanay? Sa unsang paagi inyong malig-on kadtong anaa sa inyong palibut pinaagi sa inyong mga buhat?
Hangyoa ang mga estudyante sa paghulagway og usa ka kasinatian sa dihang dunay mipalig-on nila sa paagi nga gitambag sa Ginoo ni Lyman Sherman sa bersikulo 7.
Dapita ang mga estudyante sa paghunahuna og usa ka tawo nga ilang malig-on karon ug usa ka piho nga aksyon nga ilang mahimo sa pagbuhat niini.
Pahibaloa ang mga estudyante nga si Lyman Sherman nagpabilin nga matinud-anon hangtud siya namatay. Si Propeta Joseph Smith, kinsa didto sa Bilanggoan sa Liberty, mitawag ug mitudlo ni Lyman nga mahimong sakop sa Korum sa Napulog Duha ka mga Apostoles niadtong Enero 16, 1839, apan si Lyman namatay nga wala pa madawat ang sulat gikan sa Propeta mahitungod sa iyang bag-ong calling.
Tapusa pinaagi sa pagpakigbahin og usa ka kasinatian sa dihang dunay mipalig-on kanimo o sa dihang ikaw mipalig-on og usa ka tawo.
“Kon ang panahon moabut nga kamo nakabuhat na sa tanan nga inyong mahimo sa paghinulsol sa inyong mga sala, bisan kinsa kamo, bisan asa kamo, ug mihimo sa pagpahiuli kutob sa inyong mahimo … , dayon gusto ninyo ang kumpirmasyon nga tubag kon ang Ginoo midawat ba o wala kaninyo. Sa inyong pagsiksik sa kaugalingon, kon kamo nagtinguha ug inyong nakaplagan ang kalinaw sa tanlag, pinaagi niana nga timaan kamo masayud nga ang Ginoo midawat sa inyong paghinulsol” (Stand Ye in Holy Places [1974], 185).
Si Elder Richard G. Scott sa Korum sa Napulog Duha ka mga Apostoles mipamatuod bahin sa mga panalangin nga nag-uban sa pagtuman sa mga pakigsaad:
Imahe
Elder Richard G. Scott
“Sa inyong pagsalig [sa Ginoo], tinguhaa ug sunda ang Iyang kabubut-on, makadawat kamo sa mga panalangin nga dili masabtan sa inyong dunay kinutuban nga hunahuna dinhi sa yuta. Ang inyong Amahan sa Langit ug ang Iyang Balaan nga Anak mas nasayud kay kaninyo unsay makahatag og kalipay. Gihatag Nila kaninyo ang plano sa kalipay. Kon masabtan ninyo ug mosunod niini, ang kalipay mao ang inyong panalangin. Kon andam kamong mosunod, modawat, ug motahud sa mga ordinansa ug mga pakigsaad nianang balaan nga plano, makaangkon kamo sa labing dako nga sukod sa katagbawan niini nga kinabuhi. Oo, bisan sa mga panahon sa hilabihan nga kalipay. Inyong maandam ang inyong kaugalingon alang sa kahangturan sa mahimayaong kinabuhi uban sa inyong mga minahal kinsa mokwalipay niana nga gingharian” (“Trust in the Lord,” Ensign, Nob. 1995, 18).
Doktrina ug mga Pakigsaad 108:6. “Ikaw makabaton og katungod sa pagsangyaw sa akong ebanghelyo gani asa Ako mopadala kanimo”
Si Lyman Sherman usa sa pito ka mga Presidente sa Korum sa Seventy. Samtang naghatag og instruksyon sa mga sakop sa Seventy niadtong Marso 30, 1836, kabahin sa ilang tawag sa pagsangyaw sa ebanghelyo, si Propeta Joseph Smith miingon:
Imahe
Prophet Joseph Smith
“Ang mga Seventy adunay kagawasan sa pag-adto sa Zion kon gusto nila o bisan asa nila gusto ug mosangyaw sa ebanghelyo. Himoa nga ang katubsanan sa Zion mao ang atong tumong, ug maningkamot sa pagtuman niini pinaagi sa pagpadala sa tibuok kusog sa balay sa Ginoo bisan asa nato kini makit-an” (Journals, Volume 1: 1832–1839, vol. 1 of the Journals series of The Joseph Smith Papers [2008], 215; ang spelling, punctuation, ug capitalization gi-standardize; tan-awa usab sa History of the Church, 2:432).