Niadtong Septyembre 1832, human mopadayag og mga kamatuoran mahitungod sa priesthood ug sa kaimportante sa pagpatalinghug sa Iyang pulong, ang Ginoo mihatag og gibug-aton sa sugo alang sa mga Apostoles ug sa ubang mga naghupot sa priesthood sa pagsangyaw sa ebanghelyo sa tibuok kalibutan. Kini nga pagpadayag naghatag og dugang gibug-aton sa pagsangyaw sa ebanghelyo ug naghatag og mga instruksyon nga susama niadtong gihatag ni Jesukristo ngadto sa mga Apostoles human sa Iyang Pagkabanhaw. Ang Ginoo mipasabut usab kon sa unsang paagi kini nga buhat matuman, lakip kon sa unsang paagi masuportahan ug mapaluyohan ang mga paningkamot niadtong naapil sa Iyang buhat.
Ang Ginoo nanawagan sa mga Santos sa pagpamatuod sa mga baruganan ug mga ordinansa sa ebanghelyo
Dapita ang mga estudyante sa paghunahuna og ilang kaila nga bag-o lang nakadawat og mission call o bag-o lang mibiya aron magmisyon. Hangyoa ang mga estudyante sa pagsulti sa klase kon diin gitawag sa pagserbisyo kini nga mga misyonaryo. Ikonsiderar ang paggamit og globe o mapa aron sa pagtabang sa mga estudyante nga makita kon diin gitawag sa Ginoo kini nga mga misyonaryo.
Ipasabut nga ang matag tawo kinahanglan nga adunay oportunidad sa pagkat-on sa ebanghelyo. Hisguti ang kasamtangang populasyon sa kalibutan (mga 7 ka bilyon ka tawo) ug ipasabut nga imposible alang sa Unang Kapangulohan, sa Korum sa Napulog Duha ka mga Apostoles, ug sa Seventy, diin silang tanan dunay katungdanan sa pagsangyaw sa ebanghelyo ngadto sa tanang kanasuran, sa pagsangyaw bisan asa ug sa pagtudlo sa tanan.
Dapita ang usa ka estudyante sa pagbasa og kusog sa Doktrina ug mga Pakigsaad 84:62. Hangyoa ang klase sa pagpangita sa direksyon nga gihatag sa Ginoo niadtong adunay responsibilidad sa pagsangyaw sa ebanghelyo.
Sumala sa bersikulo 62, asa man angay mosangyaw sa ebanghelyo ang mga sulugoon sa Ginoo?
Agig dugang sa mga lider sa priesthood, kinsa pa ang adunay responsibilidad sa pagpaambit sa ebanghelyo sa tibuok kalibutan? (Tabangi ang mga estudyante nga makasabut nga bisan tuod kadaghanan sa full-time nga misyonaryo nga pagserbisyo gihimo sa batan-ong mga lalaki, batan-ong mga babaye, ug mga senior, ang tanang Santos sa Ulahing mga Adlaw adunay responsibilidad sa pagdala sa ebanghelyo ngadto sa tibuok kalibutan.)
Dapita ang usa ka estudyante sa pagbasa og kusog sa mosunod nga pamahayag ni Presidente Spencer W. Kimball:
Imahe
President Spencer W. Kimball
“Ang mga kasulatan klaro kaayong namahayag nga ang tanang miyembro sa Simbahan responsable sa paghimo sa misyonaryo nga buhat. …
“Ang mga propeta niini nga dispensasyon klaro usab nga nagtudlo sa konsepto nga ang misyonaryo nga pagserbisyo responsibilidad sa tanang mga miyembro. Si Presidente David O. McKay mitudlo sa baruganan gamit ang mahagitong mga pulong, ‘Ang matag miyembro usa ka misyonaryo!’ (Tan-awa sa Conference Report, Abril 1959, p. 122.)” (“It Becometh Every Man,” Ensign, Okt. 1977, 3).
Dapita ang usa ka estudyante sa pagbasa og kusog sa Doktrina ug mga Pakigsaad 84:64. Hangyoa ang klase sa pagsunod ug sa pagtino kon unsay madawat niadtong motuo ug magpabunyag. Hangyoa ang mga estudyante sa pag-report sa ilang mga tubag.
Nganong importante man nga ang mga tawo modawat sa ebanghelyo, mabunyagan, ug modawat sa Espiritu Santo? (Kinahanglan kitang mabunyagan ug makadawat sa Espiritu Santo aron makasulod sa gingharian sa Dios.)
Dapita ang mga estudyante nga mobasa sa hilum sa Doktrina ug mga Pakigsaad 84:65–73 ug motino kon unsay gisaad sa Ginoo niadtong motuo sa Iyang mga sulugoon ug magpabunyag. Dapita ang mga estudyante sa pag-report sa ilang nakaplagan ngadto sa klase.
Ngano kaha nga importante kini nga mga gasa alang niadtong mosangyaw ug alang niadtong motuo sa ebanghelyo?
Unsa ang pasidaan nga gihatag sa Ginoo diha sa bersikulo 73?
Dapita ang usa ka estudyante sa pagbasa og kusog sa Doktrina ug mga Pakigsaad 84:74–76. Hangyoa ang klase sa pagsunod ug sa pagtino kon unsay mahitabo sa mga indibidwal nga mopili nga dili motuo sa ebanghelyo ug magpabunyag.
Unsay mahitabo niadtong mopili nga dili motuo ug magpabunyag?
Base sa unsay inyong nakat-unan gikan sa Doktrina ug mga Pakigsaad 84, unsaon ninyo pag-summarize sa kaimportante sa pagtudlo sa uban sa ebanghelyo ni Jesukristo?
Ang Ginoo mihatag og mga instruksyon niadtong gitawag sa pagsangyaw sa Iyang ebanghelyo
Unsay posibling hinungdan nga ang usa ka tawo magduha-duha sa pagserbisyo sa Ginoo isip misyonaryo? (Ang mga tubag mahimong maglakip sa kahadlok sa pagbiya sa panimalay ug pamilya, sa sakripisyo sa panahon ug mga oportunidad, pinansyal nga mga babag, sa kalisud sa pakigsulti sa mga estranghero mahitungod sa ebanghelyo, ug sa kabalaka mahitungod sa pagkat-on og bag-ong pinulongan.)
Ipasabut nga ang Doktrina ug mga Pakigsaad 84:77–88 nagrekord sa pagsiguro sa Ginoo ngadto sa mga misyonaryo nga Siya moatiman sa ilang mga panginahanglan. Misaad usab siya kanila og ubang mga panalangin kon motuman sila sa ilang responsibilidad sa pagsangyaw sa ebanghelyo.
Kopyaha ang mosunod nga tsart diha sa pisara, ug ipakopya kini sa mga estudyante diha sa ilang mga class notebook o mga scripture study journal:
Misyonaryo nga Pagserbisyo
Mga Responsibilidad
Mga Panalangin
Dapita ang mga estudyante sa pagbasa sa Doktrina ug mga Pakigsaad 84:80, 85, 87–88 ug sa pagpangita sa mga responsibilidad ug mga panalangin sa misyonaryo nga pagserbisyo. (Mahimo nimong isulat kini nga pakisayran sa kasulatan diha sa pisara.) Mahimo nimong isugyot nga ang mga estudyante magpares, sa pagbasa, diin ang usa ka estudyante mangita sa mga responsibilidad ug ang laing estudyante moila sa mga panalangin. Hangyoa ang mga estudyante sa pagsulat sa ilang mga nakit-an diha sa angay nga mga kolum sa ilang tsart.
Human sa igong panahon, ipangutana ang mga mosunod:
Unsay inyong nakat-unan mahitungod sa mga responsibilidad sa misyonaryo nga pagserbisyo? (Tingali kinahanglan nimong ipasabut nga ang mga misyonaryo “[mo]badlong sa kalibutan” (D&P 84:87) pinaagi sa pagtudlo sa uban sa mga doktrina sa ebanghelyo ni Jesukristo ug pinaagi sa pagdapit kanila sa paghinulsol ug pagpuyo nga nahiuyon niadto nga mga doktrina.)
Sa unsang paagi ang Ginoo mopanalangin kanato samtang mopaambit kita sa ebanghelyo ngadto sa uban? (Ang mga estudyante mahimong mogamit sa uban nga mga pulong, apan kinahanglang ang ilang mga tubag magpakita sa mosunod nga baruganan: Ang Ginoo molig-on kanato ug mouban kanato samtang mopaambit kita sa ebanghelyo ngadto sa uban. Mahimo nimong isulat sa pisara kini nga baruganan.)
Sa unsang paagi ang mga saad nga gisulti sa Doktrina ug mga Pakigsaad 84:80, 85, ug 88 makaimpluwensya sa tinguha ug abilidad sa usa ka indibidwal sa pagpaambit sa ebanghelyo?
Dapita ang usa ka estudyante sa pagbasa og kusog sa mosunod nga pamahayag ni Presidente Henry B. Eyring sa Unang Kapangulohan:
Imahe
Presidente Henry B. Eyring
“Dili gayud kita mobati nga nag-inusara ug wala higugmaa diha sa pagserbisyo sa Ginoo. Kita makabati sa gugma sa Ginoo. Ang Manluluwas misaad nga ang mga anghel maglibut kanato aron sa pagtabang kanato. (Tan-awa sa D&P 84:88.) Ug kanunay Siyang nagtuman sa Iyang pulong” (“Mga Hagit nga Buntugon,”Liahona, Mayo 2012, 26).
Ipamatuod nga ang Ginoo molig-on kanato ug mouban kanato samtang mopaambit kita sa ebanghelyo ngadto sa uban. Mahimo ka usab nga mopaambit og kasinatian gikan sa imong kinabuhi nga naghulagway niini nga baruganan.
Isulat sa pisara ang mosunod nga dili kompleto nga pamahayag: Akong tumanon ang akong responsibilidad sa pagpaambit sa ebanghelyo pinaagi sa …
Dapita ang mga estudyante sa pagkompleto sa pamahayag diha sa ilang mga class notebook o mga scripture study journal. Human sa igong panahon, dapita ang pipila ka mga estudyante sa pagpakigbahin sa unsay ilang gisulat.
I-summarize ang Doktrina ug mga Pakigsaad 84:89–97 pinaagi sa pagpasabut nga ang Ginoo mimatuod nga kadtong modawat sa Iyang mga misyonaryo modawat usab Kaniya ug mapanalanginan. Sa laing bahin, kadtong mosalikway sa mga sulugoon sa Dios ug sa Iyang pulong mawad-an sa mga panalangin ug pagatungluhon.
Ipasabut nga ang Doktrina ug mga Pakigsaad 84:98–102 naglangkob sa mga pulong sa kanta sa hingpit nga kalipay ug pagdayeg nga may kalabutan sa katubsanan sa Zion. Ang mga pulong nga “katubsanan sa Zion” nagpasabut sa mga kahimtang nga matagamtam sa mga katawhan sa pakigsaad sa Dios sa umaabut tungod kay mipili sila sa pagduol ngadto Kaniya ug pagdawat sa tanan nga mga ordinansa ug mga panalangin sa ebanghelyo. Hangyoa ang usa ka estudyante sa pagbasa og kusog sa Doktrina ug mga Pakigsaad 84:98. Ipasabut nga ang awit sa katubsanan sa Zion pagakantahon human sa Ikaduhang Pag-anhi ni Jesukristo, sa dihang ang tanang katawhan nga magpabilin sa yuta makaila Kaniya.
Pag-display og litrato sa magkompanyon nga mga misyonaryo. (Kon nakaserbisyo ka isip misyonaryo, mahimo ka nga mopakita sa mga estudyante og litrato nimo nga kauban ang kompanyon kinsa usa ka tinubdan sa kalig-on alang kanimo.)
Ngano kaha nga ang Ginoo nagtawag og mga misyonaryo nga moserbisyo isip mga magkompanyon?
Unsa pa ang ubang mga calling sa Simbahan diin magserbisyo kita uban sa laing tawo? (Ang mga tubag mahimong maglakip sa mga kapangulohan, home teaching ug visiting teaching nga magkompanyon, ug mga komitiba.)
Dapita ang usa ka estudyante sa pagbasa og kusog sa Doktrina ug mga Pakigsaad 84:106. Hangyoa ang klase sa pagsunod ug sa pagtino kon unsay gisugo sa Ginoo nga buhaton sa mga miyembro sa Simbahan aron sa paglig-on sa usag usa.
Unsa ang gisulti sa Ginoo sa mga miyembro sa Simbahan nga ilang buhaton aron sa paglig-on sa usag usa? (Ang mga estudyante kinahanglang moila sa mosunod nga baruganan: Kadtong kinsa lig-on diha sa Espiritu kinahanglang mohatag og kaayuhan niadtong nagluya.)
Unsa kaha ang gipasabut sa “lig-on diha sa Espiritu”? Kanus-a kamo nabayaw pinaagi sa pakigtrabaho niadtong lig-on diha sa Espiritu? (Human makatubag ang mga estudyante, mahimo ka usab nga mopaambit og kasinatian. Kon mi-display ka og usa ka litrato nimo ug sa misyonaryo nga kompanyon, mahimo nimong ipasabut kon sa unsang paagi kini nga kompanyon nakapalig-on kanimo.)
Hangyoa ang mga estudyante sa pagpamalandong sa ilang kasamtangang espirituhanong kondisyon. Dapita kadtong naghunahuna sa ilang mga kaugalingon nga luya sa espirituhanong paagi sa paghunahuna og usa ka tawo nga nasayud sila nga lig-on sa espirituhanong paagi ug sa pagpangita og mga oportunidad nga makakat-on gikan niini nga tawo. Dapita kadtong kinsa naghunahuna sa ilang mga kaugalingon nga lig-on sa espirituhanong paagi sa pagpangita og mga paagi sa pag-awhag ug paglig-on sa uban.
Dapita ang mga estudyante sa pagbasa og hilum sa Doktrina ug mga Pakigsaad 84:109–110 ug sa pagpangita kon unsa pa ang mabuhat sa mga miyembro sa Simbahan aron sa paglig-on sa usag usa.
Niini nga mga bersikulo, unsay girepresentar sa lain-laing parte sa lawas? (Ang mga miyembro sa Simbahan.) Unsa ang ikatudlo kanato niini nga pasumbingay mahitungod sa paglig-on sa usag usa? (Kinahanglan natong hinumduman ang bili ug ang importansya sa matag miyembro sa Simbahan.)
Imatuod nga ang Ginoo nahigugma sa matag usa kanato ug mihatag sa matag usa kanato og lain-laing mga talento nga mahimo natong gamiton sa pagserbisyo sa uban.
Ipasabut nga human mohatag og pipila ka mga instruksyon ngadto ni Bishop Newel K. Whitney ug sa ubang mga lider sa priesthood (tan-awa sa D&P 84:111–117), ang Ginoo mihimo og saad ngadto sa Iyang mga sulugoon kinsa molakaw uban sa hugot nga pagtuo. Dapita ang usa ka estudyante sa pagbasa og kusog sa Doktrina ug mga Pakigsaad 84:118–119. Hangyoa ang klase sa pagsunod, nga mangita kon unsay gisaad sa Ginoo.
Sumala niini nga mga bersikulo, unsa ang gisaad sa Ginoo nga makita sa Iyang matinud-anong mga sulugoon? Sa unsang paagi ninyo nakita ang Ginoo nga migamit sa mga gahum sa langit sa atong panahon?
Ipamatuod nga bisan kon ang pipila sa kalibutan dili makakita sa gahum sa Ginoo, ang adlaw moabut nga ang tanan makakita Kaniya ug masayud nga Siya mao.
Sa Bag-ong Tugon, ang Manluluwas misugo sa Iyang mga sulugoon sa pagsangyaw sa ebanghelyo nga walay puntil o puyo (tan-awa sa Mateo 10:9–10; Lucas 10:1–4). Ang mga tawo niini nga panahon migamit og mga puntil sa pagdala og kwarta ug mga puyo sa pagdala og pagkaon. Ang Ginoo misugo sa mga misyonaryo nga dili mabalaka mahitungod sa pagkaon, sinina, kapuy-an, o uban pang temporal nga mga panginahanglan. Kinahanglang mosalig sila sa Ginoo ug sa uban alang sa ilang kinahanglanon.
Si Elder Bruce R. McConkie sa Korum sa Napulog Duha ka mga Apostoles mipasabut kon unsay kahulugan sa pagsangyaw sa ebanghelyo nga walay puntil o puyo karon:
Imahe
Elder Bruce R. McConkie
“Usa ka espesyal nga lagda ang magamit niadtong gitawag nga moadto sa tibuok kalibutan nga walay puntil o puyo ug mosangyaw sa ebanghelyo. Sa panahon ug higayon sa ilang misyonaryo nga pagserbisyo kinahanglang dili sila magpakabana kabahin sa negosyo o temporal nga mga paningkamot. Kinahanglang gawasnon sila sa makabalda nga mga obligasyon nga kanunayng mag-uban niadtong kinsa nagdumala og temporal nga mga kalihokan. Ang ilang tibuok nga atensyon ug tanan nilang kusog ug talento kinahanglang isentro sa buhat sa pangalagad, ug gisaaran sila sa Amahan nga moatiman siya sa ilang inadlaw nga mga panginahanglan” (Doctrinal New Testament Commentary, Volume 1: The Gospels, 3 vols. [1966–73], 1:243).
“Gisulayan sa liboan ka mga misyonaryo kini nga saad ug ang Ginoo mituman sa iyang saad ngadto sa tanan nga nagmatinud-anon sa ilang calling. Sa pagkatinuod kon ang Amahan makabantay sa pagkahulog sa gamay nga langgam, dili siya mosalikway ni bisan kinsa nga matinud-anong nagsunod sa iyang kabubut-on nga magtinguha sa iyang tabang. Walay duda nga dunaynanglakaw ug gikapoy sa lawas ug hunahuna, ug gigutom, tungod kay dunay mga misyonaryo nga wala mohatag sa tibuok nilang kasingkasing ngadto sa Ginoo ug giusikan nila ang bililhong panahon sa dihang kinahanglan unta nilang magsangyaw sa kamatuoran” (Church History and Modern Revelation, 2 vols. [1953], 1:344).