Niadtong Pebrero 9, 1843, mihatag si Propeta Joseph Smith og mga instruksyon aron matabangan ang mga Santos nga masayud kon unsaon pag-ila sa kinaiya sa pagpangalagad sa mga anghel ug sa mga espiritu. Kining mga instruksyon narekord diha sa Doktrina ug mga Pakigsaad 129. Ang Doktrina ug mga Pakigsaad 130 naglangkob sa mga pagtulun-an ni Joseph Smith bahin sa nagkalain-laing mga doktrina samtang nakighimamat siya sa mga Santos didto sa Ramus, Illinois, niadtong Abril 2, 1843.
Naghatag si Propeta Joseph Smith og mga instruksyon kalabut sa kinaiya sa pagpangalagad sa mga anghel ug sa mga espiritu
Pangutan-a ang mga estudyante kon unsay ilang isulti sa usa ka tawo nga gustong masayud kon ang mga Santos sa Ulahing mga Adlaw mituo ba og mga anghel. Human makatubag ang mga estudyante, dapita ang usa ka estudyante sa pagbasa sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:
Imahe
Elder Jeffrey R. Holland
Gikan sa sinugdanan hangtud ngadto sa mga dispensasyon, ang Dios naggamit sa mga anghel sa paghatud sa gugma ug kahingawa alang sa Iyang mga anak. …
“Kasagaran kana nga mga binuhat dili makita. Usahay makita. Apan makita o dili kanunay sila nga anaa sa duol. Usahay ang ilang mga buluhaton importante kaayo ug adunay kahulugan sa tibuok kalibutan. Usahay ang mga mensahe labaw ka pribado. Sa panagsa ang pagpadala sa anghel mao ang pagpahimangno” (“Ang Pagpangalagad sa mga Anghel,”Liahona, Nob. 2008, 29).
Ipasabut nga sugod niadtong 1839 ug nagpadayon pagka-1843, mihatag si Propeta Joseph Smith og mga instruksyon sa pipila ka tawo aron matabangan sila nga masayud kon unsaon pag-ila sa kinaiya sa pagpangalagad sa mga anghel ug sa mga espiritu. Ang pipila niining mga instruksyon narekord diha sa Doktrina ug mga Pakigsaad 129.
Dapita ang usa ka estudyante sa pagbasa og kusog sa Doktrina ug mga Pakigsaad 129:1–3. Hangyoa ang klase sa pagsunod ug sa pagpangita sa importante nga kalainan tali sa mga anghel ug mga espiritu. (Mahimo nimong ipasabut nga ang pulong nga makiangayon nangahulugan og matarung.)
Sa unsang paagi nga ang mga anghel lahi kay sa mga espiritu? (Ang mga anghel dunay nabanhaw nga mga lawas nga unod ug bukog; ang mga espiritu wala.)
Dapita ang usa ka estudyante sa pagbasa og kusog sa Doktrina ug mga Pakigsaad 129:4–7. Hangyoa ang klase sa pagsunod, nga mangita og usa ka paagi sa pag-ila tali sa mga anghel ug sa matarung nga mga espiritu. Hangyoa ang mga estudyante sa pag-report kon unsay ilang makit-an.
Unsay atong makat-unan gikan sa bersikulo 7 mahitungod sa kinaiya sa tinuod nga mga mensahero nga gipadala gikan sa Langitnong Amahan? (Human makatubag ang mga estudyante, mahimo nimong isugyot nga isulat nila ang mosunod nga doktrina diha sa margin sa ilang mga kasulatan: Ang tinuod nga mga mensahero nga gipadala gikan sa Langitnong Amahan dili molingla kanato.)
Ipasabut nga ang yawa usahay mosulay sa pagpakita isip usa ka “anghel sa kahayag” aron makalingla sa mga tawo (tan-awa sa D&P 129:8). Agig dugang, “ang mga kasulatan usab naghisgot sa mga anghel sa yawa. Kini mao kadto nga mga espiritu kinsa misunod ni Lucifer ug gipapahawa gikan sa atubangan sa Dios didto sa kinabuhi nga wala pa dinhi sa yuta ug gihulog sa yuta (Pin. 12:1–9; 2 Ne. 9:9, 16; D&P 29:36–37)” (Giya ngadto sa mga Kasulatan, “Mga Angel,” scriptures.lds.org). Ayaw pagsulti og mga kasinatian kalabut ni Satanas o sa dautang mga espiritu o tugutan ang panaghisgot mahitungod sa makapaukyab nga mga istorya ug kwestiyonable nga materyal.
Dapita ang usa ka estudyante sa pagbasa og kusog sa Doktrina ug mga Pakigsaad 129:8–9. Hangyoa ang klase sa pagsunod ug sa pagpangita kon unsaon pag-ila sa dautang espiritu kinsa nagtinguha sa paglingla pinaagi sa pagpakita isip usa ka anghel sa kahayag. (Ipasabut nga ang pulong nga pagpangalagad diha sa bersikulo 9 nagpasabut sa pagpakita [manifestation] o pagbisita gikan sa usa ka anghel o espiritu.) Dapita ang mga estudyante sa pag-report kon unsay ilang nakat-unan.
Agig dugang sa instruksyon diha niining mga bersikulo, unsa may gihatag sa Langitnong Amahan nganha kaninyo aron sa pagtabang kaninyo nga makaila sa mga pagpanglingla ni Satanas?
Giklaro ni Propeta Joseph Smith ang nagkalain-laing mga doktrina
Ipasabut nga niadtong Abril 2, 1843, mipahigayon si Joseph Smith og usa ka komperensya sa stake uban sa mga Santos didto sa Ramus, Illinois, nga mga 20 ka milya (mga 32 kilometros) sa habagatang silangan nga bahin sa Nauvoo. Atol sa miting sa buntag si Elder Orson Hyde nagsangyaw og usa ka wali ug nagtudlo og interpretasyon sa kasulatan nga iyang nakat-unan sa kanhi niya nga pakig-uban sa laing simbahan.
Unsa ang responsibilidad sa Propeta niini nga sitwasyon? (Sa pagkorihir sa bisan unsang sayop nga doktrina nga gitudlo diha sa miting).
Ipasabut nga ang nagdumala nga mga lider sa Simbahan sama sa mga propeta, mga stake president, ug mga bishop dunay responsibilidad sa pagsiguro nga ang hustong doktrina gitudlo diha sa Simbahan. Human sa miting sa buntag, sila si Joseph Smith, Orson Hyde, ug laing pipila pa naniudto sa panimalay sa igsoong babaye ni Joseph nga si Sophronia. Atol sa paniudto, miingon ang Propeta nga “motanyag siya og pipila ka pagkorihir sa wali ni [Brother Hyde].” Mitubag si Brother Hyde, “Dawaton kini sa mapasalamatong paagi” (sa History of the Church, 5:323).
Unsay atong makat-unan gikan sa paagi sa pagdala ni Joseph Smith niini nga sitwasyon?
Unsay atong makat-unan gikan sa tubag ni Orson Hyde ngadto sa Propeta?
Ipasabut nga sa iyang pakigpulong sa buntag, nasayop sa pagsabut si Orson Hyde sa Juan 14:23. Dapita ang usa ka estudyante sa pagbasa og kusog niining bersikulo.
Pahibaloa ang klase nga human mi-refer si Orson Hyde niining bersikulo, gisultihan niya ang mga tawo nga kini “atong kahigayunan nga ang Amahan ug ang Anak mopuyo diha sa atong kasingkasing” (sa History of the Church, 5:323). Ang Doktrina ug mga Pakigsaad 130 naglangkob sa pagkorihir ni Propeta Joseph Smith niini nga ideya. Naglakip usab kini og pipila ka dugang nga mga pagtulun-an.
Dapita ang usa ka estudyante sa pagbasa og kusog sa Doktrina ug mga Pakigsaad 130:1–3. Hangyoa ang mga estudyante sa pagsunod, nga mangita nganong ang pamahayag ni Orson Hyde kalabut sa kahulugan sa Juan 14:23 dili husto. Hangyoa sila sa pag-report unsay ilang nakit-an.
Ipasabut nga daghang tawo karon ang walay ideya bahin sa Dios, o tingali sama kang Orson Hyde, kinsa usa ka kanhi Campbellite nga tigsangyaw, dunay dili husto nga panabut bahin sa kinaiya sa Dios tungod sa sayop nga mga tradisyon. Makatabang kita sa uban nga makasabut sa tinuod nga kinaiya sa Langitnong Amahan ug sa ilang relasyon ngadto Kaniya.
Unsaon nato pagtubag uban sa kamabination kon maghisgot sa ebanghelyo kauban kadtong dunay sayop nga mga ideya tungod sa sayop nga mga tradisyon?
Dapita ang usa ka estudyante sa pagbasa sa Doktrina ug mga Pakigsaad 130:22–23 nga kusog. Hangyoa ang klase sa pagsunod, nga mangita sa mga doktrina nga ilang mapasabut kon magtudlo sa uban mahitungod sa Dios nga Kapangulohan.
Unsa nga mga doktrina ang gitudlo niining mga bersikulo? (Ang mga estudyante kinahanglang mahibalo sa mosunod nga mga doktrina: Ang Langitnong Amahan ug si Jesukristo managlahi nga mga indibidwal nga adunay pisikal nga mga lawas nga unod ug mga bukog. Ang Espiritu Santo usa ka personahe sa espiritu.)
Ngano kaha nga importante nga masabtan nga ang Langitnong Amahan ug si Jesukristo managlahi nga mga indibidwal nga adunay pisikal nga mga lawas nga unod ug mga bukog?
Aron matabangan ang mga estudyante nga mas makasabut sa doktrina bahin sa Dios nga Kapangulohan, i-assign sila nga magtrabaho nga magpares. Hatagi ang matag pares og kopya sa mosunod nga pamahayag. Dapita ang mga estudyante sa pagtuon sa pamahayag kauban sa ilang mga partner ug badlisan ang mga kamatuoran mahitungod sa Amahan, sa Anak, ug sa Espiritu Santo nga nabantayan gayud nila.
“Dios nga Amahan: Sa kinatibuk-an ang Amahan, o si Elohim, kinsa mao ang gipasabut sa ngalan nga Dios. Siya gitawag og Amahan tungod kay Siya ang amahan sa atong mga espiritu. … Ang Dios nga Amahan mao ang labing gamhanan nga magmamando sa kalibutan. Siya ang makagagahum sa tanan … , nasayud sa tanan … , ug sa bisan asa anaa pinaagi sa iyang Espiritu. … Ang katawhan adunay talagsaon nga relasyon sa Dios nga nagpahiluna sa tawo nga lahi gikan sa uban nga linalang nga mga butang: mga lalaki ug mga babaye mga anak nga espiritu sa Dios.
“Dios nga Anak: Ang Dios nga nailhan nga Jehova mao ang Anak, nga si Jesukristo. … Si Jesus nagbuhat ubos sa kamandoan sa Amahan ug anaa sa hingpit nga pagkahiuyon uban kaniya. Ang tanan nga katawhan Iyang igsoon nga mga lalaki ug igsoon nga mga babaye, kay Siya ang kamagulangan sa mga anak nga espiritu ni Elohim. [Siya ang Manunubos kinsa nag-antus sa mga sala ug mga kasakit sa tanang katawhan ug mibuntog sa pisikal nga kamatayon alang sa tanan.] …
“Dios nga Espiritu Santo: Ang Espiritu Santo mao usab ang usa ka Dios ug mao ang gitawag nga Balaan nga Espiritu, ang Espiritu, ug ang Espiritu sa Dios, diha sa uban nga managsama nga mga ngalan ug mga ulohan [sama sa Maghuhupay]. Pinaagi sa panabang sa Espiritu Santo, ang tawo mahimo nga masayud sa kabubut-on sa Dios nga Amahan ug masayud nga si Jesus mao ang Kristo” (Giya ngadto sa mga Kasulatan, “Dios, Dios nga Kapangulohan,” scriptures.lds.org). Ang nag-unang tahas sa Espiritu Santo mao ang pagsaksi sa Dios nga Amahan ug ni Jesukristo. Ang Espiritu Santo nagtudlo ug nagpamatuod sa kamatuoran.
Human makompleto sa mga estudyante kini nga buluhaton, hangyoa ang pipila kanila sa pag-report kon unsay ilang gimarkahan ug ipasabut nganong importante kadto nga mga kamatuoran ngadto kanila. Mahimo nimong tapuson kini nga kalihokan pinaagi sa pagdapit sa usa o duha ka mga estudyante sa pagpakigbahin sa ilang mga pagpamatuod ngadto sa klase.
Aron matabangan ang mga estudyante nga madiskubrihan ang laing doktrina nga gitudlo ni Joseph Smith ngadto sa mga Santos didto sa Ramus, dapita sila sa pagribyu sa Doktrina ug mga Pakigsaad 130:2, nga mangita sa unsay iyang gisulti mahitungod sa atong mga relasyon.
Unsay buot ipasabut sa panag-uban? (Ang panag-uban dunay kalabutan sa kahimtang sa atong personal nga mga inter-aksyon ug mga relasyon.)
Unsa man ang gitudlo ni Joseph Smith kalabut sa kahimtang sa atong mga relasyon didto sa langit? (Ang mga estudyante mahimong mogamit og lain-laing mga pulong, apan kinahanglan nilang mahibaloan ang mosunod nga kamatuoran: Ang mga relasyon nga atong mabatunan didto sa langit sama ra niadtong atong matagamtaman dinhi sa yuta, apan maglakip kini sa walay katapusan nga himaya.)
Sa unsa kaha nga paagi nga kining kamatuoran makaimpluwensya sa inyong inter-aksyon ngadto sa uban?
Hangyoa ang usa ka estudyante sa pagbasa og kusog sa mosunod nga pagpamatuod ni Presidente Henry B. Eyring sa Unang Kapangulohan bahin sa mahangturong mga relasyon:
Imahe
Presidente Henry B. Eyring
“Tungod sa pagpahiuli sa kahibalo mahitungod sa mahanturong mga pamilya, mas malaumon kita ug mas mabination sa atong tanang mga relasyon sa pamilya. Ang dakong kalipay niini nga kinabuhi nakasentro sa mga pamilya ingon nga mao usab sa kalibutan nga moabut. Mapasalamaton kaayo ako sa kasiguroan nga akong naangkon nga kon kita magmatinud-anon, ang sama nga panag-uban nga atong nasinati niini nga kinabuhi maato sa kahangturan sa umaabut nga kalibutan, sa mahangturong himaya” [tan-awa sa D&P 130:2] (“Ang Tinuod ug Buhi nga Simbahan,”Liahona, Mayo 2008, 22).
Dapita ang mga estudyante sa pagpamalandong sa ilang mga relasyon ngadto sa uban, ilabi na sa mga sakop sa ilang pamilya. Dapita sila sa pagsulat og usa ka tumong sa pagpalig-on niadtong mga relasyon.
Aron matabangan ang mga estudyante nga madiskubrihan ang laing mga doktrina nga gitudlo sa Propeta atol niini nga miting didto sa Ramus, dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 130:4–11.
Unsay atong makat-unan mahitungod sa mga anghel gikan sa mga bersikulo 4–7?
Unsay atong makat-unan gikan sa bersikulo 9 mahitungod sa umaabut sa yuta?
Mahimo nimong ipasabut nga sumala sa mga bersikulo 10–11, ang tanan nga makapanunod sa celestial nga gingharian makadawat og Urim ug Thummim aron sa pagtabang kanila nga makakat-on ug makasabut mahitungod sa langitnong mga butang. Ang Propeta wala mohatag og bisan unsang detalye mahitungod niini nga pagtulun-an.
“Si Satanas mosulay sa paglingla pinaagi sa pagsundog sa kahayag nga nag-uban sa espiritu sa usa ka makiangayon nga tawo nga nahimo nga hingpit. Ang usa ka makiangayon nga tawo nga nahimo nga hingpit nga moabut isip usa ka mensahero mopakita diha sa iyang himaya, ‘kay mao lamang kana nga paagi nga siya makapakita’ (D&P 129:6). Si Propeta Joseph Smith kausa miingon, ‘Ang dautang mga espiritu dunay ilang mga kinutuban, mga limitasyon, ug mga balaod nga nagdumala kanila … ug klaro kaayo kini nga sila dunay gahum apan walay usa gawas lamang niadtong dunay priesthood ang makakontrolar’ (sa History of the Church, 4:576).
“Gitudlo sa Propeta nga kon lamanuhon ang dautan, ‘siya motunol sa iyang kamot’ (D&P 129:8). Ang mortal dili mobati og bisan unsa, tungod kay ang yawa usa ka espiritu nga walay lawas. Busa siya mailhan niini nga paagi gikan sa usa ka matarung nga espiritu o anghel nga gipadala gikan sa Dios. Ang makiangayon nga tawo dili mosulay sa pagpanglimbong (tan-awa sa D&P 129:7); ang anghel ni Satanas dili molikay sa pagsulay sa pagpanglimbong” (Doctrine and Covenants Student Manual, 2nd ed. [manwal sa Church Educational System, 2001], 321).
“Kon kini [ang yuta] mahimo nang celestial, mamahimo kining sama sa adlaw, ug i-andam aron kapuy-an sa mga Santos ug dad-on og balik ngadto sa presensya sa Amahan ug sa Anak. Dili na kini mamahimong butang nga dili kalapus ang kahayag sama kon unsa kini karon, apan mahisama sa mga bitoon sa kawanangan, puno sa kahayag ug himaya; mamahimo kining usa ka butang nga puno sa kahayag.—Si Juan mitandi niini, sa nahimong celestial nga kahimtang niini, ngadto sa usa ka dagat nga kristal” (“Sermon,” Deseret News, Hun. 15, 1859, 114).
Mga duha ka tuig ang milabay miingon siya:
Imahe
President Brigham Young
“Kini nga yuta, kon mahinlo ug mabalaan na kini, o mahimong celestial, mahisama sa usa ka dagat nga kristal, ug ang usa ka tawo pinaagi sa pagtan-aw niini makahibalo sa mga butang nga nangagi, sa karon, ug sa umaabut; bisan kon walay usa gawas sa na-celestial nga mga nilalang ang makatagamtam niini nga pribilehiyo; motan-aw sila sa yuta, ug ang mga butang nga ilang gitinguha nga mahibaloan ipakita ngadto kanila, sama nga ang hitsura makita pinaagi sa pagtan-aw sa salamin” (“Remarks,” Deseret News, Hul. 3, 1861, 137).
Si Elder Jeffrey R. Holland sa Korum sa Napulog Duha ka mga Apostoles kusganong namahayag sa katinuod sa Dios nga Kapangulohan:
Imahe
Elder Jeffrey R. Holland
“Ang atong una ug pinakaimportante nga artikulo sa hugot nga pagtuo sa Ang Simbahan ni Jesukristo sa mga Santos sa Ulahing mga Adlaw mao ‘Kita nagtuo sa Dios, ang Amahan sa Kahangturan, ug sa Iyang Anak, si Jesukristo, ug sa Espiritu Santo’ [Mga Artikulo sa Hugot nga Pagtuo 1:1]. Kita nagtuo nga kining tulo ka balaanong mga personahe nga naglangkob sa usa ka Dios nga Kapangulohan nagkahiusa sa katuyoan, sa pamaagi, sa pagpamatuod, sa misyon. Kita nagtuo nga Sila puno sa samang diosnong pagbati sa kalooy ug gugma, kaangayan ug grasya, pailub, pagpasaylo, ug katubsanan. Sa akong hunahuna tukma kini sa pag-ingon nga kita nagtuo nga Sila usa sa mahinungdanon ug mahangturong kinaiya nga mahunahuna gawas nga kita wala magtuo Kanila nga tulo ka mga tawo nga giusa ra diha sa usa ka lawas, usa ka Trinitarian nga ideya nga dili gayud pinasikad diha sa mga kasulatan tungod kay dili kini tinuod.
“Sa pagkatinuod usa ka hilabihan ka tinahud nga tinubdan nga gitawag og Harper’s Bible Dictionary nagrekord nga ‘ang pormal nga doktrina sa Trinity ingon nga kini gihubit sa dagkong mga konseho sa simbahan sa ikaupat ug ikalima nga mga siglo dili makita diha sa [Bag-ong Tugon]’ [Paul F. Achtemeier, ed. (1985), 1099; emphasis gidugang].
“Mao nga bisan unsang pagsaway nga Ang Simbahan ni Jesukristo sa mga Santos sa Ulahing mga Adlaw wala magtuo sa Kristiyanong kontemporaryo nga ideya kabahin sa Dios, si Jesus, ug ang Espiritu Santo dili usa ka komentaryo kalabut sa atong pasalig ngadto kang Kristo apan usa ka pag-ila (nga tukma nakong madugang) nga ang atong ideya kabahin sa Dios nga Kapangulohan lahi kay sa kasaysayan human sa Bag-ong tugon ug mibalik ngadto sa doktrina nga gitudlo ni Jesus Mismo. …
“Kita mamahayag nga kini klaro bisan walay lain pa nga pruweba [self-evident] gikan sa mga kasulatan nga ang Amahan, ang Anak, ug ang Espiritu Santo managlahi nga mga tawo, tulo ka balaanong mga binuhat” (“Sa Bugtong Tinuod nga Dios ug kang Jesukristo Nga Iyang Pinadala,”Liahona, Nob. 2007, 40, 41).