Materyal sa Pagpangandam alang sa Home-Study Teacher
Summary sa mga Leksyon sa Daily Home-Study
Ang mosunod nga mga summary sa mga panghitabo, mga doktrina, ug mga baruganan nga makat-unan sa mga estudyante samtang sila magtuon sa Doktrina ug mga Pakigsaad 8–9; 11–16; ug Joseph Smith—Kasaysayan 1:68–75 (unit 4) dili tuyo nga itudlo isip kabahin sa imong leksyon. Ang leksyon nga imong itudlo magtutok lamang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang magkonsiderar ka sa mga panginahanglan sa imong mga estudyante.
Samtang gitun-an nila ang mga paningkamot ni Oliver Cowdery nga makahubad sa mga palid, nakat-unan sa mga estudyante nga ang pagdawat ug pag-ila sa pagpadayag nagkinahanglan og paningkamot sa ilang bahin. Nakat-unan usab nila nga kon sila magtuon ug mangayo pinaagi sa hugot nga pagtuo, ang Ginoo mamulong ngadto sa ilang mga hunahuna ug kasingkasing pinaagi sa gahum sa Espiritu Santo.
Ang igsoon sa Propeta nga si Hyrum mipahayag og tinguha sa pag-abag sa buhat sa Ginoo. Gikan sa usa ka pagpadayag ngadto kang Hyrum, nakat-unan sa mga estudyante nga ilang madawat ang mga panalangin gika sa Dios sumala sa ilang mga tinguha ug kon sila nagtinguha sa paghimo sa buhat sa Dios, mamahimo silang himan sa pagbuhat og daghang kaayohan. Nakaangkon usab ang mga estudyante og oportunidad sa pagpamalandong kon unsaon nila sa pagtuon ug pagbaton sa pulong sa Ginoo aron makadawat sa Iyang Espiritu ug gahum.
Nakat-unan sa mga estudyante nga si Juan Bautista mihatag sa Aaronic Priesthood kang Joseph Smith ug ni Oliver Cowdery pinaagi sa pagpandong sa mga kamot. Ang mga yawe sa Aaronic Priesthood, nga naglakip sa pagpangalagad sa mga anghel, sa ebanghelyo sa paghinulsol, ug sa pagbunyag pinaagi sa pagpaunlod alang sa kapasayloan sa mga sala, sa makausa anaa na usab sa yuta.
Si David Whitmer mitabang ni Joseph Smith ug ni Oliver Cowdery sa pagbalhin didto sa New York aron makalingkawas sa pagpanggukod didto sa Pennsylvania. Gikan sa mga pulong sa Ginoo ngadto kang David Whitmer, nakat-unan sa mga estudyante nga kon sila mosunod sa mga sugo ug molahutay hangtud sa katapusan, sila makadawat og kinabuhing dayon. Nakat-unan usab nila nga samtang matinud-anon silang motabang diha sa buhat sa Ginoo, mapanalanginan sila sa espirituhanon ug sa temporal nga paagi. Pinaagi sa pagtuon sa mga pagpadayag nga nahatag ngadto ni John ug Peter Whitmer, nadiskubrihan sa mga estudyante nga ang atong mga paningkamot sa pagdala sa uban ngadto ni Jesukristo dako og bili ngari kanato ug nga ang Dios personal nga nakaila kanato.
Pasiuna
Sila si Oliver Cowdery, Hyrum Smith, Joseph Knight Sr., David Whitmer, John Whitmer, and Peter Whitmer ang tanan miila nga si Joseph Smith usa ka propeta sa Dios ug matinguhaon sa pagtabang sa Pagpahiuli. Ang Ginoo mitudlo kanila mahitungod sa espiritu sa pagpadayag ug kon unsa ang kinahanglang buhaton sa tawo sa dili pa magtinguha sa pagsangyaw sa ebanghelyo.
Ang Ginoo nagtudlo nilang Oliver Cowdery ug Hyrum Smith mahitungod sa espiritu sa pagpadayag
Hangyoa ang mga estudyante sa pagpataas sa ilang mga kamot kon naghunahuna ba sila kon unsaon pagkahibalo kon sila nakadawat og usa ka pagpadayag gikan sa Ginoo.
Dapita ang mga estudyante sa pagribyu sa Doktrina ug mga Pakigsaad 8 ug 9 ingon man usab sa unsay ilang gisulat diha sa ilang scripture study journal mahitungod niadtong mga kapitulo diha sa ilang leksyon sa day 1 alang niini nga unit. Hangyoa ang mga estudyante sa pagpangita kon unsa ang ilang nakat-unan mahitungod sa pagdawat ug pag-ila sa mga tubag sa mga pag-ampo. Dapita ang pipila ka mga estudyante sa pagpakigbahin sa ilang mga nakat-unan.
Unsa nga mga hagit ang inyong giatubang samtang naningkamot kamo sa pag-ila kon kamo nakadawat ba og mga pag-aghat o giya sa Espiritu Santo?
Pahinumdumi ang mga estudyante nga ang Doktrina ug mga Pakigsaad 8 ug 9 naglangkob sa mga instruksyon sa Ginoo alang kang Oliver Cowdery samtang si Oliver misulay sa paghubad sa bulawang mga palid. Gikan niining mga pagpadayag atong makat-unan kon unsaon sa pagdawat ug pag-ila ang pagpadayag. Dapita ang mga estudyante nga mopakli sa Doktrina ug mga Pakigsaad 8:2–3 (nga usa ka scripture mastery passage) ug magdungan sa pag-recite sa tudling. Isulat sa pisara ang mosunod nga baruganan: Ang Ginoo mamulong sa atong mga hunahuna ug mga kasingkasing pinaagi sa gahum sa Espiritu Santo.
Sa unsang paagi nga ang pagkahibalo niining kamatuoran makatabang kaninyo samtang maningkamot kamo sa pag-ila sa pagpadayag gikan sa Ginoo?
Ipasabut nga ang abilidad sa pagpangita ug pagdawat og personal nga pagpadayag usa ka gasa gikan sa Dios nga anaa alang sa tanan Niyang nga anak.
Hangyoa ang usa ka estudyante sa pagbasa og kusog sa Doktrina ug mga Pakigsaad 8:4, ug dapita ang klase sa pagsunod, nga mangita kon unsay gisaad sa Ginoo ngadto ni Oliver kon siya “[mo]gamit” sa gasa sa pagpadayag. Dayon ipangutana ang mosunod:
Unsa kaha ang gipasabut sa “gamita” ang espiritu sa pagpadayag? (Sa pagpangita og mga tubag sa mga pag-ampo ug magpakabuhi nga takus aron makadawat niini.)
Unsa nga baruganan ang atong makat-unan gikan sa Doktrina ug mga Pakigsaad 8:4? (Bisan og lahi ang pagkasulti sa mga estudyante niini, siguroa nga ilang mahibaloan nga kon atong gamiton ang espiritu sa pagpadayag, kita mahimong makalingkawas gikan sa dautan ug kadaut. Isulat kini nga baruganan diha sa pisara.)
Hangyoa ang mga estudyante sa pagpakigbahin sa dihang ang Ginoo mipanalipod kanila o sa tawo nga ilang kaila tungod kay sila nangita ug naminaw sa Espiritu Santo.
Dapita ang mga estudyante sa pagbasa og hilum sa Doktrina ug mga Pakigsaad 8:1 ug mangita sa mga paagi nga ilang mapalambo ang ilang mga pag-ampo aron “[ma]gamit” ang espiritu sa pagpadayag.
Kon mahimo, hatagi ang mga estudyante og kopya sa mosunod nga pamahayag ni Elder David A. Bednar sa Korum sa Napulog Duha ka mga Apostoles (o isulat ang pamahayag diha sa pisara sa dili pa magsugod ang klase):
Imahe
Elder David A. Bednar
“Tungod kay ang Espiritu mohagawhaw ngari kanato sa hinay ug sa kalumo, kini sayon rang sabton nganong kita kinahanglan nga maglikay sa dili maayo nga media, pornograpiya, ug makadaut, makaadik nga mga butang ug mga kinaiya. Kini nga mga himan sa kaaway makadaut ug sa kadugayan moguba sa atong kapasidad sa pag-ila ug sa pagtubag sa malumo nga mga mensahe gikan sa Dios nga gihatud pinaagi sa gahum sa Iyang Espiritu. Ang matag usa kanato kinahanglan tinuoray nga maghunahuna ug mainampuon nga mamalandong kon unsaon nato sa pagsalikway ang mga pagdani sa yawa ug sa minatarung “gamita kini,” gani ang espiritu sa pagpadayag, diha sa atong mga kinabuhi ug sa atong mga pamilya” (“Ang Espiritu sa Pagpadayag,”Liahona, Mayo 2011, 88).
Hangyoa ang mga estudyante sa pagbasa sa hilum sa pamahayag ni Elder Bednar ug sa pagtino sa mga pulong nga makatabang nila nga masabtan kon unsaon nga mas maayo sa “paggamit niini” o magtinguha sa espiritu sa pagpadayag. Mahimo nimong isugyot nga markahan nila kini nga mga pulong. Dayon ipangutana ang mosunod:
Unsa nga mga pulong ang inyong nahibaloan, ug nganong nagustohan ninyo kini?
Sumala ni Elder Bednar, nganong importante nga maglikay sa dautan kon kita nagtinguha sa pagdawat ug pag-ila sa pagpadayag?
Dapita ang mga estudyante sa pagkonsiderar og pipila ka mga paagi nga sila lagmit mas maayo nga “mogamit” sa gasa sa pagpadayag aron sa pagdawat og proteksyon gikan sa dautan. Mahimo nimo silang awhagon sa pagsulat og usa ka tumong kon unsaon nila sa “paggamit” niini nga gasa sa mas hingpit diha sa ilang mga kinabuhi.
Aron matabangan ang mga estudyante nga makasabut sa laing paagi sa pagpangita sa pagpadayag, pahinumdumi sila nga si Oliver Cowdery nahatagan og pagtugot sa paghubad, apan human nga siya nakasugod, siya “wala mipadayon sumala sa [iyang] nasugdan” (D&P 9:5). Hangyoa ang usa ka estudyante sa pagbasa og kusog sa Doktrina ug mga Pakigsaad 9:7–8, ug dapita ang klase sa pagsunod, nga mangita kon unsay gisulti sa Ginoo kang Oliver nga kinahanglan niyang buhaton aron makadawat og pagpadayag.
Base sa tambag sa Ginoo ngadto ni Oliver Cowdery, unsay atong makat-unan nga maoy kanunayng gikinahanglan sa atong bahin aron makadawat og pagpadayag? (Usa ka posibling baruganan nga mahibaloan sa mga estudyante mao nga ang pagdawat ug pag-ila sa pagpadayag nagkinahanglan og paningkamot sa atong bahin. Mahimo nimong isulat kining kamatuoran o ang susama niini nga gipahayag sa mga estudyante diha sa pisara.)
Gamit ang Doktrina ug mga Pakigsaad 9:8, unsa ang inyong ikatambag sa usa ka higala kinsa naningkamot sa paghimo og importante nga desisyon?
Mahimo usab nimong hangyoon ang mga estudyante sa pagpakigbahin og mga kasinatian sa dihang gikinahanglan sila nga maningkamot sa paghimo og lisud nga desisyon ug dayon nangutana sa Langitnong Amahan kon husto ba ang ilang gipili.
Ang Ginoo nagtudlo nilang Hyrum Smith, Joseph Knight Sr., ug sa mga managsuong lalaki nga Whitmer mahitungod sa ilang mga tahas diha sa buhat sa Dios
Ipahunahuna sa mga estudyante nga sila gihangyo sa pag-apil sa usa sa labing dako nga kawsa nga nahitabo sa yuta. Sultihi sila nga niadtong Mayo ug Hunyo 1829, lima ka mga kalalakin-an ang personal nga gitudloan kalabut sa kabubut-on sa Ginoo alang kanila diha sa Pagpahiuli sa ebanghelyo.
Isulat ang mosunod nga mga ulohan ug mga pakisayran sa pisara. Hangyoa ang mga estudyante sa pagpangita sa mga pakisayran aron makaplagan unsa ang gitambag sa Ginoo nga buhaton sa matag usa niining kalalakin-an aron makatabang sa pagtukod sa gingharian sa Dios dinhi sa yuta. Dapita ang mga estudyante sa pagpangita sa upat ka mga pakisayran. (Kon mubo na lang ang oras, bahina ang mga pakisayran tali sa klase ug hangyoa ang mga estudyante sa pag-report sa unsay ilang makit-an.)
Human natun-an sa mga estudyante ang mga pakisayran, ipangutana ang mosunod:
Unsa ang inyong namatikdan nga pagkasusama diha sa mga sugo sa Ginoo ngadto niining lima ka kalalakin-an? Unsa man ang kalainan nga inyong nakita?
Gikan sa unsay inyong nakat-unan gikan sa mga bersikulo diha sa Doktrina ug mga Pakigsaad 11, nganong ang Ginoo gusto nga si Hyrum Smith “[magpaabut] sa mubo nga panahon” (D&P 11:16) aron sa pagsangyaw sa ebanghelyo?
Unsa nga tambag ang gihatag sa Ginoo kang Hyrum diha sa Doktrina ug mga Pakigsaad 11:21 nga makatabang sa usa ka batan-ong lalaki o babaye nga nangandam sa pagserbisyo og misyon? (Gikan sa ilang mga tubag, tabangi ang mga estudyante nga mahibaloan ang mosunod nga baruganan: Kadtong mga nagtuon sa pulong sa Ginoo makadawat sa Iyang Espiritu ug sa gahum sa pagkumbinser sa uban sa kamatuoran sa ebanghelyo.) Mahimo nimong isulat kini diha sa pisara.
Dapita ang mga estudyante sa pagpamalandong kon unsa ang ilang mabuhat aron mas hugot ang ilang tumong sa pagpaningkamot sa pagtuon ug pagbaton sa pulong sa Ginoo ug sa paghimo og usa ka tumong sa pagbuhat sa mga pag-aghat nga ilang nadawat samtang namalandong sila.
Aron matabangan ang mga estudyante nga mas makapadayon sa pag-master sa scripture mastery verse sa Doktrina ug mga Pakigsaad 13:1, dapita sila nga magdungan sa pag-recite niini gikan sa ilang panumduman. Ipagamit ang ilang mga kasulatan kon gikinahanglan. Dayon ipares-pares ang mga estudyante ug hangyoa sila sa paggamit sa tudling sa pagpasabut ngadto sa ilang pares kon sa unsang paagi nga ang mga yawe sa Aaronic Priesthood makatabang sa pagdala sa mga tawo ngadto ni Jesukristo.
Sultihi ang mga estudyante nga samtang magtuon sila sa sunod nga unit sila makakat-on mahitungod sa mga tawo nga gipili isip mga saksi nga makakita sa bulawan nga mga palid, sa Liahona, ug uban pang sagrado nga mga butang. Ilang basahon ang istorya sa Manluluwas bahin sa Iyang pag-antus didto sa tanaman sa Getsemani ug diha sa krus. Ila usab nga basahon ang mga pagtulun-an sa Manluluwas bahin sa paagi kon unsaon nato nga makalikay sa ingon nga pag-antus.