Sa usa ka pagpadayag ngadto ni Propeta Joseph Smith, ang Ginoo misugo nga ang Iyang gipahiuli nga Simbahan iorganisar sa Abril 6, 1830. Mitudlo usab Siya mahitungod sa kaimportante sa Basahon ni Mormon ug mihatag og mga instruksyon kabahin sa pagdumala sa Iyang Simbahan, lakip ang mga katungdanan sa priesthood, mga ordinansa, ug mga pamaagi sa bag-ong gipahiuli nga Simbahan. Kini nga pagpadayag, nga gitawag og ang “Mga Artikulo ug mga Pakigsaad” sa unang mga adlaw sa Simbahan, makita na karon sa Doktrina ug mga Pakigsaad 20. Kini nga pagpadayag narekord pipila ka adlaw human sa Abril 6, 1830, apan tingali gipadayag sa Ginoo ang ubang bahin niini ngadto sa Propeta niadto pang ting-init sa 1829. Tungod sa gitas-on niini, ang Doktrina ug mga Pakigsaad 20 gibahin ngadto sa tulo ka mga leksyon niini nga manwal.
Dapita ang mga estudyante sa paghunahuna sa katapusang miting nga ilang gitambungan diin gipaambit ang mga pagpamatuod. Hangyoa sila sa paghulagway kon sa unsang paagi ang pagpamatuod lahi kay sa pagsulti og istorya o pagpahayag og pasalamat.
Dapita ang usa ka estudyante sa pagbasa sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:
Imahe
Elder Dallin H. Oaks
“Ang pagpamatuod sa ebanghelyo usa ka personal nga pagsaksi nga gipahayag ngari sa atong mga kalag pinaagi sa Espiritu Santo nga ang pihong mga kamatuoran nga mahangturon ang kamahinungdanon tinuod ug nga kita nasayud nga kini tinuod” (“Pagpamatuod,”Liahona, Mayo 2008, 26).
Isulat ang mosunod sa pisara: Nasayud kita nga …
Dapita ang mga estudyante sa pagpakli ngadto sa Doktrina ug mga Pakigsaad 20. Ipasabut nga ang mga lider sa Simbahan mibasa og kusog niini nga seksyon sa mga komperensya sa Simbahan nga gipahigayon niadtong Hunyo 9, 1830, ug Septyembre 26, 1830, nga nakatabang sa pagpahinumdom sa mga miyembro sa bag-ong Simbahan sa daghang importante nga mga kamatuoran sa ebanghelyo. Awhaga ang mga estudyante sa pagpangita og mga doktrina ug mga baruganan niini nga seksyon nga mahimong giunhan sa mga pulong, “Kami nahibalo nga …”
Dapita ang mga estudyante nga hilum nga mobasa sa Doktrina ug mga Pakigsaad 20:1–2, nga mangita og mga ideya kabahin sa Pagpahiuli sa ebanghelyo.
Unsa nga mga kamatuoran mahitungod sa Pagpahiuli sa ebanghelyo ang gipamatud-an niini nga mga bersikulo? (Usa sa mga doktrina nga mahimong mahibaloan sa mga estudyante mao nga si Joseph Smith gitawag sa Dios ug gisugo sa pag-organisar sa Simbahan ni Jesukristo. Dapita ang usa ka estudyante sa pagsulat niini nga doktrina, lakip sa uban nga nahibaloan sa mga estudyante, diha sa pisara ubos sa mga pulong nga “Kami nahibalo nga …” Ang mga estudyante mahimong mohimo og susama nga lista diha sa ilang mga class notebook o scripture study journal.)
Aron matabangan ang mga estudyante nga makasabut sa kaimportante niining mga kamatuoran, awhaga sila sa pagpamalandong sa ilang kaugalingong mga pagpamatuod sa balaan nga tawag ni Joseph Smith ug ang katinuod sa Simbahan. Mahimo nimong hangyoon ang mga estudyante nga ipakigbahin sa klase kon giunsa nila pagkahibalo nga kining mga butanga tinuod.
Unsa kaha ang gipasabut sa pulong nga “pagsugod” sa Doktrina ug mga Pakigsaad 20:1 kalabut sa organisasyon sa Simbahan? (Mahimo nimong pahinumduman ang mga estudyante mahitungod sa Apostasiya ug sa panginahanglan alang sa Pagpahiuli.)
Unsaon nato pagtabang ang Simbahan sa Ginoo nga mopadayon sa “pagsulbong” sa atong panahon?
Ang Ginoo daklit nga misaysay sa pipila ka mga panghitabo sa Pagpahiuli
Dapita ang usa ka estudyante sa pagbasa og kusog sa Doktrina ug mga Pakigsaad 20:5–8. Hangyoa ang klase sa pagsunod, nga mangita sa mga butang nga nag-andam ni Joseph Smith sa pag-organisar pag-usab sa Simbahan dinhi sa yuta.
Unsa ang nasinati ni Joseph nga nakapahimo kaniya sa pag-organisar pag-usab sa tinuod nga Simbahan dinhi sa yuta? (Gitudloan siya sa Dios ug sa mga anghel ug gihatagan og gahum sa paghubad sa Basahon ni Mormon.)
Ipasabut nga sa dihang ang Simbahan giorganisar niadtong Abril 1830, ang Basahon ni Mormon mao pay pag-imprinta. Hangyoa ang mga estudyante nga hilum nga mobasa sa Doktrina ug mga Pakigsaad 20:9–12, nga mangita og mga kamatuoran nga gitudlo sa Basahon ni Mormon. Mahimo nimong isugyot nga markahan sa mga estudyante ang ilang madiskubrihan. Human sa igong panahon, isulat ang mosunod nga dili kompleto nga pamahayag sa pisara: Ang Basahon ni Mormon nagmatuod sa kalibutan nga …
Dapita ang pipila ka estudyante sa pag-adto sa pisara ug pagkompleto sa sentence gamit ang mga pulong nga ilang nakit-an sa Doktrina ug mga Pakigsaad 20:9–12. Mahimo nimong itudlo ang ilang lista sa mga tubag ug ipangutana ang mosunod:
Nganong importante man nga makaangkon og pagpamatuod nga ang Basahon ni Mormon tinuod?
Kon tinuod ang Basahon ni Mormon, nan unsa man ang gipasabut niana mahitungod ni Joseph Smith?
Ipamatuod nga ang Basahon ni Mormon maoy ebidensya nga ang Dios mipahiuli sa ebanghelyo sa atong panahon. Kini nga kamatuoran mahimong isulat sa pisara ubos sa ulohan nga “Kami nahibalo nga …”
Dapita ang usa ka estudyante sa pagbasa og kusog sa Doktrina ug mga Pakigsaad 20:14–15. Hangyoa ang klase sa pagpangita kon unsay gisaad sa Ginoo ngadto niadtong modawat sa Basahon ni Mormon ug mosunod sa mga pagtulun-an niini.
Unsa nga mga panalangin ang gisaad sa Ginoo niadtong modawat sa Basahon ni Mormon diha sa pagtuo?
Unsa ang mahitabo niadtong magpatig-a sa ilang mga kasingkasing diha sa kawalay pagtuo ug mosalikway sa Basahon ni Mormon?
Unsa ang pipila ka mga paagi nga atong madawat ang Basahon ni Mormon diha sa pagtuo?
Sa unsang paagi ang Basahon ni Mormon mogiya sa tawo aron “magbuhat og pagkamatarung”?
Hangyoa ang mga estudyante sa pagpamalandong (1) sa unsang paagi ang ilang pagpamatuod sa Basahon ni Mormon nakatabang kanila nga mas magmasulundon sa mga sugo sa Dios ug (2) unsay ilang mabuhat sa paglig-on sa ilang pagpamatuod niini.
Ang Basahon ni Mormon nagtudlo ug nagklaro sa importanting mga doktrina sa ebanghelyo
Mahimo nimong dapiton ang usa ka estudyante sa pagbasa sa mosunod nga pamahayag ni Presidente Ezra Taft Benson:
Imahe
Presidente Ezra Taft Benson
“Sa ika-baynte nga seksyon sa Doktrina ug mga Pakigsaad, ang Ginoo migahin og pipila ka mga bersikulo sa pag-summarize sa mahinungdanong mga kamatuoran nga gitudlo sa Basahon ni Mormon. (Tan-awa sa mga bersikulo 17–36.) Naghisgut kini kabahin sa Dios, sa paglalang sa tawo, sa Pagkapukan, Pag-ula, pagkayab ni Kristo ngadto sa langit, mga propeta, hugot nga pagtuo, paghinulsol, bunyag, Espiritu Santo, paglahutay, pag-ampo, kapaangayan ug pagbalaan pinaagi sa grasya, ug paghigugma ug pagserbisyo sa Dios” (“A New Witness for Christ,” Ensign, Nob. 1984, 7).
Dapita ang mga estudyante sa pagbasa sa Doktrina ug mga Pakigsaad 20:17, 29, 30, 31, 35 ug hibaloan ang mga pulong nga gibalik-balik duol sa sinugdanan sa matag bersikulo. (Ang mga estudyante kinahanglang mahibalo sa mga pulong nga “kami nahibalo nga” o susama niini.) Ipasabut nga sa Doktrina ug mga Pakigsaad 20:17–36, makakaplag kita og pipila ka importante nga mga doktrina nga gipahayag sa Simbahan sa Ginoo ngadto sa kalibutan isip resulta sa Unang Panan-awon ug sa pagtungha sa Basahon ni Mormon. Taliwala niini mao ang mga kamatuoran mahitungod sa Langitnong Amahan, si Jesukristo, ug sa Espiritu Santo ug unsay angay natong buhaton aron maluwas diha sa gingharian sa Dios.
Aron matabangan ang mga estudyante nga makatuman sa ilang tahas diha sa proseso sa pagkat-on ug moandam kanila sa pag-ila sa mga kamatuoran sa ebanghelyo, ipares-pares sila ug i-assign sa matag pares ang usa sa mga tudling diha sa pisara. Dapita sila sa pagtuon sa gi-assign kanila nga mga bersikulo, nga mangita sa mga kamatuoran mahitungod sa Amahan, sa Anak, ug sa Espiritu Santo ug unsay Ilang nahimo alang sa atong kaluwasan.
Human sa igong panahon, dapita ang pipila ka mga estudyante sa pagpaambit og usa ka kamatuoran nga ilang nahibaloan mahitungod sa Langitnong Amahan, si Jesukristo, o sa Espiritu Santo ug ipasabut nganong importante kini kanila. Mahimo nimong awhagon ang mga estudyante sa pagsulat og mga kamatuoran nga makahuluganon kaayo kanila diha sa ilang mga class notebook o mga scripture study journal.
Samtang ang mga estudyante mahibalo niini nga mga kamatuoran, mahimo nimo kining idugang sa lista diha sa pisara ubos sa ulohan nga “Kami nahibalo nga …” Ang pipila sa mga doktrina nga mahibaloan sa mga estudyante naglakip sa mosunod:
Ang Dios buhi, walay kinutuban, mahangturon, ug dili mabalhinon (bersikulo 17).
Kita gilalang sumala sa panagway ug hitsura sa Dios (bersikulo 18).
Ang Dios mihatag sa Iyang Bugtong Anak aron ilansang sa krus ug mabanhaw aron ang tanan nga motuo, magpabunyag, ug molahutay diha sa pagtuo mahimong maluwas (mga bersikulo 21–25).
Ang Espiritu Santo nagpamatuod sa Amahan ug sa Anak (bersikulo 27).
Ang Amahan, ang Anak, ug ang Espiritu Santo nagtambayayong sa pag-andam kanato alang sa kinabuhing dayon (mga bersikulo 17–28).
Dapita ang usa ka estudyante sa pagbasa og kusog sa Doktrina ug mga Pakigsaad 20:29–34. Hangyoa ang klase sa pagpangita sa atong mga responsibilidad kon gusto nato nga mapanunod ang kinabuhing dayon. Aron matabangan ang mga estudyante nga makasabut niini nga mga bersikulo, tingali kinahanglan nimong ipasabut nga ang kapaangayan (bersikulo 30) nagpasabut nga kita mapasaylo ug mapawalay sala. Ang pagbalaan (bersikulo 31) nagpasabut nga mahimong limpyo, putli, balaan, ug Kristohanon.
Unsay gitudlo niini nga mga bersikulo nga kinahanglan natong buhaton aron maluwas diha sa gingharian sa Dios?
Dapita ang usa ka estudyante sa pagbasa og kusog sa Doktrina ug mga Pakigsaad 20:35–36. Hangyoa ang klase sa pagpangita kon unsay ilang mabuhat aron mapakita nga nahibalo sila nga kining mga butanga tinuod.
Unsaon nato pagtahud ug paghimaya sa ngalan sa Ginoo?
Hangyoa ang mga estudyante sa pagribyu sa lista diha sa pisara ubos sa mga pulong nga “Kami nahibalo nga …” Hangyoa sila sa paghunahuna sa hilom hain niadto nga mga baruganan ang ilang nahibaloan nga tinuod. Kon gisulat na nila ang sama nga lista diha sa ilang mga class notebook o scripture study journal, mahimo nimo silang dapiton sa pagbutang og marka nga check tupad niadto nga mga kamatuoran.
Taposa ang leksyon pinaagi sa pagdapit sa mga estudyante sa pagpili og usa sa mga baruganan nga gi-highlight ug sa pagpaambit kon giunsa nila pagkahibalo sa katinuod niini.
“Human kini sa pagkatinuod ipaila ngadto niining una nga anciano [Joseph Smith] nga siya nakadawat og kapasayloan sa iyang mga sala”
Tingpamulak sa 1820: Nadawat ni Joseph Smith ang Unang Panan-awon (tan-awa sa JS—K 1:15–20; tan-awa usab sa Milton V. Backman Jr., Joseph’s Recitals of the First Vision,” Ensign, Ene. 1985, 13).
Si Joseph Smith “nalambigit pag-usab sa mga kahilayan sa kalibutan”
1820–1823: “Niana nga panahon nga milabay taliwala sa panahon nga ako nakakita og panan-awon ug sa tuig usa ka libo walo ka gatus ug kawhaan ug tulo … ako ubos ngadto sa tanan nga mga matang sa pagsulay; ug … ako nahulog ngadto sa daghan nga walay hinungdan nga mga kasaypanan, ug nagpakita sa kahuyang sa kabatan-on, ug kahilayan sa tawhanon nga kinaiya” (JS—K 1:28).
“Ug naghatag kaniya og gahum gikan sa kahitas-an; sa mga paagi nga giandam kaniadto, sa paghubad sa Basahon ni Mormon”
Septyember 22, 1827–Ting-init sa 1829: Nakuha ni Joseph ang bulawang mga palid ug ang Urim ug Thummim ug mihubad sa Basahon ni Mormon (tan-awa sa JS—H 1:59–75).
Ang mosunod nga pamahayag naggikan sa usa ka artikulo ni Elder D. Todd Christofferson sa Korum sa Napulog Duha ka mga Apostoles. Ang porsyon nga gikutlo sa ubos daklit lamang nga mipasabut sa mga doktrina sa kapaangayan ug pagkabalaan. Mahimo nimong basahon ang tibuok nga artikulo aron makaangkon og mas kompletong panabut niini nga mga doktrina.
Imahe
Elder D. Todd Christofferson
“Tungod ‘sa walay kinutuban nga mithi sa Iyang talagsaon nga maulaong sakripisyo,’ si Jesukristo makatagbaw o ‘makatubag sa katuyoan sa balaod’ alang kanato. Ang kapasayloan moabut pinaagi sa grasya Niya kinsa mitagbaw sa gipangayo sa kaangayan pinaagi sa Iyang kaugalingong pag-antus, ‘ang matarung alang sa mga dili matarung, aron kita iyang madala ngadto sa Dios’ (1 Ped 3:18). Iyang gitangtang ang pagpanghimaraut kanato nga wala tangtanga ang balaod. Kita napasaylo ug gibutang sa usa ka kondisyon sa pagkamatarung uban Kaniya. Mamahimo kitang, sama Kaniya, walay sala. Gipatunhay kita ug gipanalipdan pinaagi sa balaod, pinaagi sa hustisya. Busa, kita maingon nga, nahatagan og kaangayan.
“Sa ingon, kita mahimong tukma nga mamulong sa usa kinsa nahatagan og kaangayan nga napasaylo, walay sala, o walay pagbati nga sad-an. Sama pananglit, ‘Bisan kinsa ang maghinulsol ug magpabunyag pinaagi sa akong ngalan, siya mapuno; ug kon siya molahutay hangtud sa katapusan, tan-awa, Ako mohukom kaniya nga walay sala sa atubangan sa akong Amahan niana nga adlaw sa diha nga Ako mobarug aron paghukom sa kalibutan’ (3 Ne. 27:16; emphasis gidugang). Apan bisan mahimayaon ang kapasayloan sa mga sala, daghan pa og nahimo ang Pag-ula. Kana nga ‘daghan pa’ gipahayag ni Moroni:
“’Ug usab, kon kamo pinaagi sa grasya sa Dios mahingpit diha ni Kristo, ug dili maglimud sa iyang gahum, niana kamo pagasantoson diha ni Kristo tungod sa grasya sa Dios, pinaagi sa pagpaagas sa dugo ni Kristo, nga anaa sa pakigsaad sa Amahan ngadto sa kapasayloan sa inyong mga sala, nga kamo mahimo nga balaan, nga walay lama’ (Moro. 10:33; emphasis gidugang).
“Ang pagasantoson [pagabalaanon] pinaagi sa dugo ni Kristo mao ang pagkahimong limpyo, putli, ug balaan. Kon ang kapaangayan nagkuha sa silot alang sa nangaging sala, nan ang pagbalaan nagkuha sa lama o epekto sa sala. Si Propeta Joseph Smith mipamatuod:
“‘Ug kini mao ang ebanghelyo, ang maayo nga mga balita, diin ang tingog gawas sa kalangitan nagpamatuod ngari kanamo—
Nga siya mianhi sa kalibutan, gani si Jesus, aron ilansang sa krus alang sa kalibutan, ug mag-antus sa mga sala sa kalibutan, ug magbalaan sa kalibutan, ug sa paghugas niini gikan sa tanan nga dili matarung’ (D&P 76:40–41)” (“Justification and Sanctification,” Ensign, Hunyo 2001, 20–22).