Niadtong Marso 1831, dul-an sa usa ka tuig human sa pagka-organisar sa Simbahan, gipahinumduman sa Ginoo ang mga Santos nga ang mga miting sa Simbahan kinahanglang ipahigayon pinaagi sa Balaang Espiritu. Sa samang pagpadayag, gihatagan niya og gibug-aton nga ang mga tawo nga dili mga miyembro sa Simbahan dili isalikway sa pampubliko nga mga miting. Agig dugang sa pagkorihir sa naandan nga gibuhat sa dili pagpaapil sa mga dili tumutuo gikan sa mga miting, gitudlo sa Ginoo ang bahin sa mga gasa sa Espiritu.
Gitudloan sa Ginoo ang mga Santos kalabut sa ilang mga miting sa Simbahan
Hangyoa ang mga estudyante sa paghunahuna nga sila ang nagdumala sa pagplano og sakrament miting.
Unsaon ninyo sa pagkahibalo kon unsay i-apil sa miting? Unsaon man ninyo pagpili ang musika ug pagdesisyon kon kinsa ang mohatag sa mga pakigpulong?
Dapita ang usa ka estudyante sa pagbasa sa Doktrina ug mga Pakigsaad 46:1–2. Hangyoa ang klase sa pagsunod ug mangita alang sa instruksyon nga gihatag sa Ginoo kon unsaon pagpahigayon sa mga miting sa Simbahan. Mahimo nimong ipasabut nga ang responsibilidad sa pagpahigayon sa mga miting naglakip sa responsibilidad sa pag-andam alang niini. Hangyoa ang mga estudyante sa pagreport sa unsay ilang nakit-an. Ang ilang mga tubag mahimong magkalain-lain, apan kinahanglan nilang ipahayag ang mosunod nga baruganan: Ang mga lider sa Simbahan kinahanglang magiyahan sa Balaang Espiritu samtang magpahigayon sila sa mga miting.
Kanus-a kamo mibati nga ang mga lider gigiyahan sa Espiritu Santo sa usa ka miting?
Unsaon kaha sa tanang miyembro sa Simbahan sa pagdapit sa impluwensya sa Espiritu Santo diha sa mga miting sa Simbahan?
Dapita ang mga estudyante nga isulat sa ilang mga class notebook o mga scripture study journal bahin sa usa ka paagi nga ilang mapalambo ang ilang pag-apil sa mga miting sa Simbahan.
Isulat sa pisara ang mosunod: Welcome ang mga Bisita. Hangyoa ang mga estudyante sa pag-ila sa mga dapit kon asa nila nakita nga giplastar kini nga mga pulong. Ipangutana kon ila ba kining nakita sa gawas sa mga meetinghouse sa Simbahan. Dapita ang usa ka estudyante sa pagbasa og kusog sa seksyon sa pasiuna sa Doktrina ug mga Pakigsaad 46. Dapita ang klase sa pagsunod diha sa ilang mga kasulatan ug sa pagpangita kon kinsa ang gipaapil sa nag-unang mga Santos ngadto sa ilang mga miting. Dapita sila sa pag-report unsay ilang nakit-an. Dapita dayon sila sa pagbasa og hilum sa Doktrina ug mga Pakigsaad 46:3–6, nga mangita sa mga pulong nga mikorihir niining naandang buhat sa una.
Unsa ang atong makat-unan gikan niini nga mga bersikulo kon unsay gusto sa Ginoo sa pagtratar nato sa uban? (Ang mga estudyante kinahanglang mahibalo sa mosunod nga baruganan: Gimanduan kita sa Ginoo sa pag-abi-abi sa tanang tawo sa atong pampublikong mga miting.)
Unsaon nato sa pagtabang ang uban nga masayud nga welcome sila sa mga miting sa Simbahan?
Aron matabangan ang mga estudyante nga mapalambo ang ilang panabut bahin niini nga kamatuoran, ipakigbahin ang mosunod nga mga ehemplo:
Usa ka batan-ong miyembro sa Simbahan mibisita sa usa ka bag-ong ward kauban ang iyang pamilya sa unang higayon. Human sa sakrament miting, usa ka miyembro sa ward ang mitimbaya sa pamilya ug mipakita kanila kon asa moadto alang sa Sunday School. Iyang gidala ang batan-ong babaye ngadto sa klase ug mipaila-ila kaniya ngadto sa magtutudlo. Ang mga batan-ong lalaki ug babaye diha sa klase miila kaniya sa daklit ug dayon nagpadayon sa pag-istoryahanay nga sila ra, nga mibaliwala kaniya.
Unsay nakalahi niini nga sitwasyon kon ang mga sakop sa klase sa Sunday School mosunod sa mga baruganan diha sa Doktrina ug mga Pakigsaad 46:3–6?
Awhaga ang mga estudyante sa pag-abi-abi niadtong motambong sa mga miting, mga klase, ug mga kalihokan sa Simbahan.
Gipasabut sa Ginoo ang mga katuyoan sa mga gasa sa Espiritu
Pahinumdumi ang mga estudyante nga niadtong Pebrero 1831, miapil si Joseph Smith sa mga Santos didto sa Kirtland (tan-awa sa leksyon 50 niini nga manwal). Sa iyang pag-abut, iyang nakita nga kining mga miyembro sa Simbahan mihimo og pipila ka sayop nga mga buhat. Usa ka sayop nga buhat mao ang dili pagpaapil sa mga tawo sa mga miting sa Simbahan, sama sa gipasabut sa sayong bahin niini nga leksyon. Laing sayop nga buhat mao nga ang ubang mga miyembro nalambigit sa katingad-an nga kinaiya sa dihang mitambong sila sa mga miting sa Simbahan. Nangangkon sila nga ang ilang mga aksyon dinasig sa Espiritu Santo. Ang ubang mga miyembro mituo nila, ug ang uban mibati nga ang mga kinaiya dili iya sa Dios. Sa pagpadayag nga narekord diha sa Doktrina ug mga Pakigsaad 46, gitudlo sa Ginoo ang mga baruganan nga makatabang sa mga Santos nga makalikay nga malingla ug nga makatabang nila nga makasabut sa tinuod nga mga gasa sa Espiritu.
Unsa man ang gipasabut sa malingla? (Mapahisalaag o madani sa pagtuo sa butang nga dili tinuod.) Makahunahuna ba kamo og panahon sa dihang nalingla kamo?
Hangyoa ang mga estudyante sa pagbasa og hilum sa Doktrina ug mga Pakigsaad 46:7–8 ug mangita kon unsay gitambag sa Ginoo nga buhaton sa Iyang katawhan aron malikayan nila nga malingla. Mahimo nimong isugyot nga markahan sa mga estudyante ang ilang nadiskubrihan.
Unsa ang gitudlo niini nga mga bersikulo kon unsaon sa paglikay nga malingla? (Tabangi ang mga estudyante nga mahibalo sa mosunod nga baruganan: Usa ka paagi aron malikayan ang pagkalingla mao ang pagsunod sa Espiritu Santo sa tanang pagkabalaan.)
Sumala sa bersikulo 8, unsa ang kinahanglan natong pangitaon sa matinguhaong paagi? (Ang labing maayo nga mga gasa.)
Isulat ang mosunod sa pisara: Kon kita mangita sa matinguhaong paagi sa labing maayo nga mga gasa, …
Sa pag-apil sa mga estudyante sa mosunod nga kalihokan, dapita sila sa pagpangita sa mga panalangin nga moabut samtang magtinguha sila sa mga gasa sa Espiritu. Mahimo nimong ipasabut nga ang mga gasa sa Espiritu mao ang “mga panalangin o mga kahanas nga gihatag pinaagi sa gahum sa Espiritu Santo. Ang Dios mihatag sa dili mokubos usa niini nga mga gasa ngadto sa kada matinud-anon nga miyembro sa Simbahan” (Matinud-anon sa Tinuhoan: Usa ka Pakisayran sa Ebanghelyo [2004], 34).
Sa dili pa magklase, isulat ang mga numero 13 hangtud sa 25 ug 27 sa lain-laing mga dapit diha sa usa ka piraso nga papel. Dayon guntinga ang papel ngadto sa katorse ka mga piraso sa puzzle, nga dunay numero sa matag piraso sa puzzle.
I-apud-apod ang puzzle ngadto sa mga estudyante. Depende sa gidak-on sa klase, tingali kinahanglan nimong mohatag og tagsa ra ka piraso sa puzzle sa gagmayng mga grupo o mohatag og sobra sa usa ka piraso nga puzzle sa indibidwal nga mga estudyante. Dapita ang klase nga magtinabangay sa pag-assemble sa puzzle.
Sa usa ka puzzle, nganong importante man ang matag piraso?
Dapita ang usa ka estudyante sa pagbasa og kusog sa Doktrina ug mga Pakigsaad 46:8–12, 26. Hangyoa ang klase sa pagsunod ug mangita sa katuyoan sa mga gasa nga gihatag sa Dios ngari kanato.
Unsa ang gamitan sa mga gasa sa Espiritu? (“Alang sa kaayohan sa mga anak sa Dios.”)
Sumala sa bersikulo 9, kang kinsa man ihatag ang mga gasa sa Espiritu? (Niadtong nahigugma sa Dios ug nagsunod sa Iyang mga sugo ug niadtong “nangita sa mao aron sa pagbuhat.”)
Sumala sa bersikulo 11, pila man kanato ang nahatagan og gasa sa Espiritu?
Gikan sa unsay inyong nakat-unan niining mga bersikulo, unsaon man ninyo sa pagkompleto sa sentence diha sa pisara? (Bisan kon ang mga estudyante mahimong mogamit og lain-laing mga pulong, ang ilang mga tubag kinahanglang mopahayag sa mosunod nga baruganan: Kon matinguhaon kitang mangita sa labing maayo nga mga gasa, ihatag kini sa Dios kanato alang sa kaayohan sa uban. Mahimo nimong isugyot nga markahan sa mga estudyante ang mga pulong diha sa ilang mga kasulatan nga nagtudlo niini nga kamatuoran.)
Giyahi ang atensyon sa mga estudyante ngadto sa puzzle nga ilang na-assemble. Pahinumdumi sila sa kaimportante sa matag piraso sa puzzle.
Nganong ang matag miyembro importante man sa Simbahan sa Ginoo? (Ang matag usa adunay gasa nga makabenepisyo sa uban.)
Kuhaa og balik ang puzzle ug ihatag og balik ang mga piraso ngadto sa mga estudyante. Ipasabut nga ang mga numero diha sa mga piraso nagpasabut sa mga bersikulo sa Doktrina ug mga Pakigsaad 46 ug nga ang matag usa niining mga bersikulo naghingalan og usa ka gasa sa Espiritu. Dapita ang mga estudyante sa pagbasa og kusog sa mga bersikulo nga mohaum sa mga numero nga gihatag ngadto kanila.
Human mabasa ang matag bersikulo, hangyoa ang mga estudyante sa pagsugyot og sitwasyon diin kana nga gasa makabenepisyo sa mga anak sa Dios. Mahimong manlimbasug ang ubang mga estudyante sa pagsabut sa ubang mga gasa. Ang mosunod nga mga pagpasabut sa pipila ka gasa mahimong makatabang nimo sa paggiya sa panaghisgutan:
Ang gasa nga masayud sa mga kalainan sa pagdumala kasagaran makita diha sa mga lider nga nahibalo kon sa unsang paagi nga ang mga gasa sa uban makatabang sa nagkadaiyang mga katungdanan sa pagserbisyo.
Ang gasa nga masayud sa mga nagkalain-lain nga mga paagi makita diha sa abilidad sa usa ka tawo nga makakita sa kalainan tali sa tinuod nga mga gasa o mga buhat sa Espiritu Santo ug dili tinuod nga mga espiritu, mga doktrina, o mga sugo.
Ang gasa sa pulong sa kaalam wala magpasabut sa sugo nga nailhan isip Pulong sa Kaalam. Hinoon, nagpasabut kini sa panalangin sa kaalam nga moabut niadtong kinsa “[mangayo] sa Dios nga nagapanghatag ngadto sa tanang mga tawo sa madagayaon gayud” (Santiago 1:5).
Ang gasa sa pag-ila sa mga espiritu nagtugot sa usa ka tawo sa pag-ila o pagsabut sa tinuod ug tinago nga mga tinguha sa uban. Kini nga gasa nagtabang sa usa ka tawo nga mabantayan ang tinago nga mga dautan ug makita ang maayo diha sa uban.
Ang gasa sa mga pinulongan ug ang gasa sa paghubad sa mga pinulongan kasagaran makita diha sa mga misyonaryo kinsa nakahimo sa pagkat-on ug pagsabut og dali sa mga pinulongan. Kini nga mga gasa mahimo usab nga matagamtaman sa mga tawo nga kinahanglang mobuntog sa mga babag sa pinulongan aron sa pagkat-on ug pagtudlo sa ebanghelyo.
Nganong kinahanglan kitang magtinguha og espirituhanong mga gasa? Unsa kaha ang atong mahimo aron sa pagtinguha niini? (Mahimong makatabang ang pagpasabut nga ang Ginoo makapadayag sa espirituhanong mga gasa pinaagi sa patriyarkal nga mga panalangin o uban pang mga panalangin sa priesthood.)
Kanus-a mo nakakita og tawo nga nakadawat og espirituhanong gasa aron makabenepisyo sa uban?
Hangyoa ang mga estudyante sa pagsiksik sa Doktrina ug mga Pakigsaad 46:30–33 nga sila ra ug hibaloi ang upat ka butang nga kinahanglan natong buhaton samtang maggamit kita sa atong espirituhanong mga gasa. (Ang mga tubag mahimong maglakip sa kinahanglan kitang mangayo nga ang kabubut-on sa Dios matuman, molihok diha sa pangalan ni Jesukristo, magpasalamat sa mga panalangin nga atong madawat, ug mopakita og hiyas ug pagkabalaan.)
Ipahayag ang pasalamat alang sa mga gasa sa Espiritu ug alang sa impluwensya niini sa imong kinabuhi. Hatagi ang mga estudyante og oportunidad sa paghimo sa ingon. Pagpamatuod bahin sa tinguha sa Ginoo alang sa tanang katawhan nga masayud nga sila welcome ug gikinahanglan sa Iyang Simbahan.
Si Elder L. Tom Perry sa Korum sa Napulog Duha ka mga Apostoles nagtudlo:
Imahe
Elder L. Tom Perry
“Ang atong komunidad sa mga Santos dili pagsalikway apan paglakip, nga tinukod ibabaw sa pundasyon nga mao ang mga apostoles ug mga propeta, nga niini si Jesukristo mismo mao ang ulohang bato sa pamag-ang. Bukas kini kanatong tanan kinsa naghigugma, nagdayeg, ug adunay kapuangod alang sa mga anak sa atong Amahan sa Langit” (“Building a Community of Saints,” Ensign, Mayo 2001, 37).
Si Elder Orson Pratt sa Korum sa Napulog Duha ka mga Apostoles nagtudlo:
Imahe
Elder Orson Pratt
“Bisan kanus-a ang Espiritu Santo maanaa sa usa ka tawo, dili lang kay kini molimpyo, mobalaan, ug mohimo kaniyang putli, tugbang sa iyang pagtugyan sa iyang kaugalingon sa impluwensya niini, apan usab mohatag diha kaniya og pipila ka gasa, nga gituyo para sa kaayohan sa iyang kaugalingon ug sa uban. Walay usa kinsa natawo sa Espiritu, ug kinsa nagpabilin gayud nga matinud-anon, nga walay espirituhanong gasa. …
“Ang matag miyembro dili makadawat sa tanan niining gasa; apan giapud-apod kini ngadto sa tibuok pundok [sa Simbahan], sumala sa kabubut-on ug kaalam sa Espiritu. … Ang uban mahimong makaangkon sa tanan niining gasa nga mahatag ngadto kanila, aron masabtan kining tanan, ug maandam sa pag-ila sa bisan unsang dili tinuod nga mga gasa, ug sa pagdumala sa tibuok pundok sa Simbahan, nga ang tanan mahimong makabenepisyo. … Kini nga espirituhanong mga gasa iapud-apud ngadto sa mga miyembro sa Simbahan, sumala sa ilang kamatinud-anon, mga kahimtang, natural nga mga abilidad, mga katungdanan, ug mga calling; nga ang tanan matudloan sa tukmang paagi, mapamatud-an, mahingpit, ug maluwas” (Masterful Discourses and Writings of Orson Pratt, comp. N. B. Lundwall [1946], 539–41). (Tan-awa usab sa Doctrine and Covenants Student Manual, 2nd ed. [manwal sa Church Educational System, 2001], 100.)
Ang espirituhanong mga gasa gilista diha sa Doktrina ug mga Pakigsaad 46 ug diha usab sa 1 Mga Taga-Corinto 12:1–13 ug Moroni 10:8–18. Apan dili lamang kini ang espirituhanong mga gasa nga atong madawat. Si Elder Bruce R. McConkie sa Korum sa Napulog Duha ka mga Apostoles nagtudlo:
Imahe
Elder Bruce R. McConkie
“Ang espirituhanong mga gasa walay kinutuban ang gidaghanon ug dili maihap ang matang niini. Kadtong nalista diha sa gipadayag nga pulong yano lamang nga mga paghulagway sa walay utlanan nga pagbu-bu sa balaanong grasya nga gihatag sa mabinationg Dios ngadto niadtong nahigugma ug nagserbisyo kaniya” (A New Witness for the Articles of Faith [1985], 371).
Si Elder Marvin J. Ashton sa Korum sa Napulog Duha ka mga Apostoles miingon:
Imahe
Elder Marvin J. Ashton
“Sa walay paghan-ay, tuguti ko nga maghisgut og pipila sa mga gasa nga dili kanunay nga makita o mabantayan apan importante kaayo.
“… Ang gasa sa pagpangutana; ang gasa sa pagpaminaw; ang gasa sa pagkadungog ug paggamit sa hinay, hinagawhaw nga tingog; ang gasa nga makahimo sa pagbakho; ang gasa sa paglikay sa panagbingkil; ang gasa nga dali rang mouyon; ang gasa sa paglikay sa kawang nga pagbalik-balik; ang gasa sa pagpangita nianang unsay matarung; ang gasa nga dili dayon mohukom; ang gasa sa pagpangayo sa Dios og giya; ang gasa sa pagkadisipulo; ang gasa sa pag-amuma sa uban; ang gasa nga makahimo sa pagpamalandong; ang gasa sa paghalad og pag-ampo; ang gasa sa paghatag og makapatandog nga pagpamatuod; ug ang gasa sa pagkadawat sa Espiritu Santo” (“There Are Many Gifts,” Ensign, Nob. 1987, 20).