Sa Septyembre 1830, ang Ginoo mitawag ni Thomas B. Marsh sa pagsangyaw sa ebanghelyo ug sa pagtabang sa pag-establisar sa Simbahan. Kini nga tawag, nga anaa sa Doktrina ug mga Pakigsaad 31, naglakip usab og mga saad ug tambag aron sa paggiya ni Thomas sa iyang personal nga kinabuhi ug isip usa ka misyonaryo. Sa Oktubre 1830, si Joseph Smith nakadawat og pagpadayag nga karon anaa sa Doktrina ug mga Pakigsaad 32, diin gitawag sa Ginoo si Parley P. Pratt ug Ziba Peterson sa pag-apil ni Oliver Cowdery ug Peter Whitmer Jr. sa usa ka misyon ngadto sa mga Lamanite sa kasadpang Missouri. Ang Ginoo misaad nga mouban niini nga mga tawo sa ilang misyonaryo nga paningkamot.
Ang Ginoo mitawag ni Thomas B. Marsh sa pagsangyaw sa ebanghelyo ug sa pagtabang sa pag-establisar sa Simbahan
Dapita ang mga estudyante sa paghunahuna sa mga sakop sa ilang pamilya ug sa ilang mga pagbati kanila. Mahimo ka nga mo-display og litrato sa imong pamilya ug daklit nga mohulagway sa imong gugma alang kanila. Hangyoa ang mga estudyante sa pagkonsiderar kon aduna bay sakop sa ilang pamilya nga dili miyembro sa Simbahan o kasamtangang wala magpuyo sumala sa iyang mga pakigsaad sa Ginoo. Mahimo usab nimong dapiton ang mga estudyante sa pagpamalandong sa ilang mga paglaum alang sa maong mga sakop sa pamilya.
Ipasabut nga diha sa Doktrina ug mga Pakigsaad 31, ang Ginoo namulong sa usa ka bag-ong kinabig nga ginganlan og Thomas B. Marsh ug misulti kaniya mahitungod sa iyang pamilya.
Aron matabangan ang klase nga makasabut sa background niini nga seksyon, dapita ang usa ka estudyante sa pagbasa sa mosunod nga paghulagway kon sa unsang paagi si Thomas B. Marsh nahimong miyembro sa Simbahan.
Samtang nagpuyo sa Boston, Massachusetts, niadtong 1829, si Thomas B. Marsh nakahukom nga walay usa sa mga simbahan nga iyang nailhan nga nahisubay sa mga pagtulun-an sa Biblia. Misulat siya, “Nagtuo ko nga gisugo ko sa Espiritu sa Dios sa pagbiyahe padulong sa kasadpan.” Mibiya siya sa iyang asawa, si Elizabeth, ug sa ilang batan-ong pamilya aron sa pagpangita sa kamatuoran. Human sa tulo ka bulan nga biyahe, si Thomas nagbiyahe padulong pauli sa dihang siya “nakadungog mahitungod sa [usa ka] Bulawang Basahon nga nakit-an sa usa ka batan-on nga ginganlan og Joseph Smith.” Miadto siya sa Palmyra, New York, diin iyang nahimamat si Martin Harris. Ang tig-imprinta mihatag ni Thomas og proof sheet [dakong papel para proofreading] nga naglakip sa unang disesais ka mga pahina sa Basahon ni Mormon. Si Thomas wala madugay misulat, “Sa pag-abut nako sa balay … akong gipakita sa akong asawa ang disesais ka mga pahina sa Basahon ni Mormon … nga nalipay siya pag-ayo, nga nagtuo nga buhat kini sa Dios.” Paglabay sa usa ka tuig, human masayud mahitungod sa pag-organisar sa Simbahan, si Thomas ug ang iyang pamilya mibalhin ngadto sa Palmyra. Samtang nagpuyo diha sa dapit gibunyagan siya duol sa Fayette ug gi-orden nga elder ni Oliver Cowdery sa Septyembre 1830 (tan-awa sa Thomas B. Marsh, “History of Thomas Baldwin Marsh,” Millennial Star, Hunyo 11, 1864, 375).
Unsa ang madayeg ninyo mahitungod sa pagpangita ni Thomas B. Marsh sa kamatuoran?
Hangyoa ang usa ka estudyante sa pagbasa og kusog sa Doktrina ug mga Pakigsaad 31:1–2, ug dapita ang klase sa pagpangita og mga pulong nga gigamit sa Ginoo sa pag-awhag ni Thomas human sa iyang bunyag.
Unsa nga pag-awhag ang gihatag sa Ginoo kang Thomas dinhi niini nga mga bersikulo?
Unsa nga saad ang gihatag sa Ginoo kang Thomas mahitungod sa iyang pamilya?
Unsa nga baruganan ang atong makat-unan gikan sa Doktrina ug mga Pakigsaad 31:1–2 nga makatabang kanato kon kita adunay mga sakop sa pamilya nga dili mga miyembro sa Simbahan o wala magpuyo nga matinud-anon sa ilang mga pakigsaad? (Bisan og ang mga estudyante mahimong mogamit og lain-laing mga pulong, kinahanglan silang mahibalo sa mosunod nga baruganan: Pinaagi sa atong pagkamatinud-anon, ang atong mga sakop sa pamilya mahimong mapanalanginan nga motuo ug masayud sa kamatuoran. Isulat sa pisara kini nga baruganan.)
Unsa ang pipila ka mga paagi nga ang mga indibidwal mapanalanginan pinaagi sa pagkamatinud-anon sa mga sakop sa pamilya? Unsa nga mga ehemplo niini ang inyong nakita?
Hangyoa ang mga estudyante sa pagbasa sa Doktrina ug mga Pakigsaad 31:3–4 ug hibaloan kon unsa ang gipabuhat sa Ginoo kang Thomas B. Marsh. Dapita sila sa pag-report unsay ilang nakit-an. Dayon hangyoa ang usa ka estudyante sa pagbasa sa mosunod nga pamahayag ni Presidente Gordon B. Hinckley kabahin sa mga panalangin nga moabut ngadto niadtong matinud-anong moserbisyo isip mga misyonaryo. (Mahimo nimong hatagan og kopya niini nga pamahayag ang mga estudyante aron tipigan diha sa ilang mga kasulatan.) Dapita ang klase sa pagpaminaw kon kinsa ang mapanalanginan pinaagi sa misyonaryo nga pagserbisyo.
Imahe
President Gordon B. Hinckley
“Inyong mapanalanginan ang mga kinabuhi niadtong inyong gitudloan, ug ang ilang kaliwatan nga nagsunod kanila. Inyong mapanalanginan ang inyong kaugalingong kinabuhi. Inyong mapanalanginan ang kinabuhi sa inyong pamilya, kinsa mosuporta kaninyo ug mag-ampo alang kaninyo” (“Of Missions, Temples, and Stewardship,” Ensign, Nob. 1995, 52).
Kinsa ang mapanalanginan pinaagi sa misyonaryo nga pagserbisyo?
Bahina ang klase ngadto sa tulo ka grupo. Dapita ang usa ka estudyante sa pagbasa og kusog sa Doktrina ug mga Pakigsaad 31:5–8. Hangyoa ang usa ka grupo sa pagpangita og mga panalangin nga moabut niadtong tudloan ni Thomas B. Marsh. Hangyoa ang ikaduhang grupo sa pagpangita og mga panalangin nga moabut kang Thomas samtang nagserbisyo siya isip misyonaryo. Hangyoa ang ikatulo nga grupo sa pagpangita og mga panalangin nga moabut sa pamilya ni Thomas samtang layo siya gikan kanila. Human makabasa ang estudyante, ipangutana ang mosunod:
Unsa nga mga panalangin ang moabut ngadto niadtong tudloan ni Thomas?
Sa unsang paagi si Thomas mapanalanginan sa iyang misyonaryo nga pagserbisyo?
Sa unsang paagi ang iyang pamilya mapanalanginan?
Sa unsang paagi nga ang misyonaryo nga pagserbisyo sa laing tawo mipanalangin sa inyong kinabuhi o sa kinabuhi sa tawo nga inyong nailhan?
Mahimo ka nga mopaambit og mga ehemplo kon sa unsang paagi imong nakita ang misyonaryo nga pagserbisyo nga mipanalangin sa kinabuhi sa mga tawo.
Si Jesukristo mihatag og personal nga tambag ngadto ni Thomas B. Marsh
Ipasabut nga ang Doktrina ug mga Pakigsaad 31:9–13 naglangkob og tambag nga gihatag sa Ginoo sa pagtabang ni Thomas B. Marsh sa iyang personal nga kinabuhi ug isip usa ka misyonaryo. Sa dili pa magsugod ang klase, isulat ang mosunod nga mga instruksyon sa pisara o andamon kini isip handout alang sa mga estudyante:
Tun-i ang Doktrina ug mga Pakigsaad 31:9–12, ug pag-ila og usa ka tambag nga inyong gibati nga importante nga atong sundon karon. Pangandam sa pagtubag niining mosunod nga mga pangutana:
Hain nga tambag ang inyong pilion? Ngano kaha nga importante man kini nga tambag ngari kanato karon?
Unsa ang usa ka paagi nga magamit nato kini nga tambag sa atong mga kinabuhi?
Sa unsang paagi nga makabenepisyo kita sa pagsunod niini nga tambag?
I-assign ang mga estudyante nga magpares sa pagtrabaho. Hangyoa sila nga magtagsa-tagsa sa pagtuon sa Doktrina ug mga Pakigsaad 31:9–12 ug dayon ipaambit ang ilang mga tubag sa mga pangutana ngadto sa ilang mga pares.
Human makapaambit ang mga estudyante, dapita sila nga hilum nga mobasa sa Doktrina ug mga Pakigsaad 31:13 ug pag-ila sa panalangin nga gisaad sa Ginoo ngadto ni Thomas B. Marsh kon siya magmatinud-anon. Dapita ang usa ka estudyante sa pagduol sa pisara ug isulat kini nga saad sa porma sa usa ka baruganan, gamit ang mga pulong nga kon ug niana. Awhaga ang tibuok klase sa pagtabang sa estudyante kon gikinahanglan. Bisan tuod ang estudyante mahimong mogamit og lain-laing mga pulong, ang mosunod nga baruganan kinahanglan nga klaro: Kon kita magmatinud-anon hangtud sa katapusan, niana ang Ginoo magauban kanato. Ipasabut nga kini nga kamatuoran atong magamit samtang naningkamot kita sa pagpaambit sa ebanghelyo ngadto sa uban ingon man usab sa ubang mga sitwasyon.
Kanus-a kamo mibati nga ang Ginoo uban kaninyo samtang nagtinguha kamo nga magmatinud-anon ngadto Kaniya? (Hatagi ang mga estudyante og panahon sa pagpamalandong niini nga pangutana sa dili pa sila motubag. Ikonsiderar ang pagpaambit sa imong kaugalingong kasinatian.)
Ang Ginoo mitawag kang Parley P. Pratt ug Ziba Peterson sa pag-apil sa misyon ngadto sa mga Lamanite
Hangyoa ang mga estudyante sa pagtan-aw sa mapa sa ilang mga kasulatan nga giulohan og “Ang Paingon sa Kasadpan nga Kalihokan sa Simbahan” (tan-awa sa Mga Mapa sa Kasaysayan sa Simbahan, Mapa 6). O mahimo ka nga mopakita og usa ka dakong mapa nga nagpakita sa gilay-on tali sa New York ug Missouri, USA.
Diin man si Oliver Cowdery ug Peter Whitmer Jr. gitawag sa pagsangyaw sa ebanghelyo? (Kon ang mga estudyante dili makahinumdom, dapita sila sa pag-refer ngadto sa Doktrina ug mga Pakigsaad 28:8–9; 30:5. Kini nga mga misyonaryo gitawag sa pagsangyaw “ngadto sa mga Lamanite,” sa kasadpang utlanan sa Missouri. Tabangi ang mga estudyante sa pagpangita niini nga dapit diha sa mapa.)
Dapita ang usa ka estudyante sa pagbasa og kusog sa pasiuna sa seksyon sa Doktrina ug mga Pakigsaad 32. Hangyoa ang klase sa pagsunod ug hibaloan ang pangutana sa pipila ka mga elder sa Simbahan kalabut sa misyon nga gipabuhat kang Oliver Cowdery ug Peter Whitmer Jr.
Unsa ang pangutana sa pipila ka mga elder sa Simbahan kalabut sa misyon ngadto sa mga Lamanite? (Gusto silang masayud kon duna bay dugang nga mga misyonaryo nga tawagon aron sa pagtudlo sa mga Lamanite.)
Dapita ang usa ka estudyante sa pagbasa og kusog sa Doktrina ug mga Pakigsaad 32:1–3. Hangyoa ang klase sa pagsunod, nga mangita kon unsa ang gipabuhat kang Parley P. Pratt ug Ziba Peterson ug unsa ang saad sa Ginoo kanila.
Unsa ang gipabuhat kang Parley ug Ziba?
Unsa ang gisaad sa Ginoo kanila?
Mahimo nimong hisgutan ang pagkasusama tali sa mga saad nga gihatag diha sa Doktrina ug mga Pakigsaad 32:3 ug sa baruganan nga gisulat sa pisara: Kon kita magmatinud-anon hangtud sa katapusan, niana ang Ginoo magauban kanato.
Mahimo nimong ipasabut nga panahon sa tinglarag sa 1830 ug sa tingtugnaw sa 1830–31, kining gamay nga grupo sa mga misyonaryo (wala madugay giapilan sa usa ka kinabig gikan sa Ohio nga ginganlan og Frederick G. Williams) mibiyahe og dul-an 1,500 ka milya (mga 2,400 ka kilometro) gikan sa Fayette, New York, padulong sa Independence, Missouri, nga kasagaran nanglakaw ra. Kining upat ka mga misyonaryo miabut sa Independence sa tunga-tunga sa Enero 1831. Sa usa ka bahin sa ilang pagpanaw, miantus sila og grabeng katugnaw, kusog nga mga hangin, ug kakapoy, nabuhi lang kasagaran sa mikaging nga corn bread ug hilaw nga karne nga baboy. Sa pipila ka mga dapit, ang snow nga ilang gilaktan miabut og tulo ka pye ang giladmon. Bisan pa niini nga kalisdanan, ang mga misyonaryo milampos sa pagpaila sa ebanghelyo ngadto sa mga American Indian nga nagpuyo sa Indian Territory duol sa kasadpang utlanan sa Missouri. Gisangyaw usab nila ang ebanghelyo sa Mentor ug Kirtland, Ohio, ngadto sa kongregasyon sa mga tawo nga nangita og usa ka pagpahiuli sa Kristiyanismo sa Bag-ong Tugon. (Ang mga estudyante dugang nga makat-on kabahin niining mga tawhana ug sa ilang pangulo, si Sidney Rigdon, sa ilang pagtuon sa Doktrina ug mga Pakigsaad 35.) Ang Ginoo mituman sa Iyang saad nga mouban Siya niini nga mga misyonaryo ug nga walay makabuntog kanila. (Tan-awa sa Church History in the Fulness of Times Student Manual 2nd ed. [manwal sa Church Educational System, 2003], 84–85.)
Mahimo nimong tapuson kini nga leksyon pinaagi sa pagpamatuod sa mga kamatuoran nga imong nahisgutan.
Ang pagpadayag nga narekord sa Doktrina ug mga Pakigsaad 31 mao ang usa sa pipila (tan-awa sa D&P 30–36) nga gihatag sa Ginoo kalabut sa misyonaryo nga buhat tali sa panahon nga una Siyang mipadayag sa baruganan sa pagpundok sa Iyang katawhan (tan-awa sa D&P 29:1–8) ug sa dihang una Siyang mitudlo og dapit nga pundokanan alang kanila (tan-awa sa D&P 37).
Doktrina ug mga Pakigsaad 31:2, 5–8. Pinaagi sa atong pagkamatinud-anon, ang mga sakop sa atong pamilya makadawat og pagpamatuod sa kamatuoran
Ang matag tawo nga nakat-on mahitungod sa ebanghelyo ni Jesukristo kinahanglang mopili sa iyang kaugalingon kon modawat ba niini. Hinoon, ang atong ehemplo sa pagkamatinud-anon makaimpluwensya sa uban alang sa kaayohan. Ang mga pamaagi ug panahon sa Ginoo sa pagtuman sa mga saad sama sa Iyang gihimo ngadto ni Thomas B. Marsh sa Doktrina ug mga Pakigsaad 31:2, 5–8 tingali dili kanunay motakdo sa atong mga paglaum o ekspektasyon. Hinoon, ang mosunod nga istorya ni Presidente Thomas S. Monson mahitungod sa usa niya ka kasinatian isip usa ka mission president sa Canada nagpakita nga ang Ginoo motuman gayud sa Iyang mga saad ngadto sa matinud-anon:
Imahe
President Thomas S. Monson
“Didto sa akong opisina usa ka adlaw may milingkod nga usa ka bag-ong miabut nga misyonaryo. Siya utokan, kusgan, [puno sa kadasig ug tinguha sa pagserbisyo], malipayon, ug mapasalamaton nga nahimong misyonaryo. Samtang ako nakigsulti kaniya ako miingon, ‘Elder, ako naghunahuna nga ang imong amahan ug inahan sa tibuok kasingkasing nagsuporta kanimo sa imong call sa misyon.’ Siya miduko ug mitubag, ‘Aw, dili kaayo. Abi nimo, President, ang akong amahan dili miyembro sa Simbahan. Siya wala magtuo sama sa atong gituohan, busa siya dili bug-os nga makadayeg sa kaimportante sa akong buluhaton.’ Sa walay pag-ukon-ukon ug giaghat pinaagi sa usa ka tinubdan nga dili akong kaugalingon, ako miingon ngadto kaniya, ‘Elder, kon ikaw matinuoron ug makugihon nga moalagad sa Dios sa pagsangyaw sa iyang mensahe, ang imong amahan mopasakop sa Simbahan sa dili pa mahuman ang imong misyon.’ Iyang gipig-it ang akong kamot og hugot kaayo, ang mga luha mitulo sa iyang mga mata ug misugod sa pagdagayday sa iyang mga aping, ug siya mipahayag, ‘Ang makita ang akong amahan nga modawat sa kamatuoran mao ang labing dako nga panalangin nga mahimong moabut sa akong kinabuhi.’
“Kining batan-ong lalaki wala magpaabut pinaagi sa paglaum ug pagpangandoy nga kining saad matuman, apan hinoon siya misunod sa maalamong tambag nga gihatag kaniadto pa sa karaan: ‘Pag-ampo ingon og ang tanan nag-agad sa Dios. Pagtrabaho ingon og ang tanan nag-agad diha kanimo.’ Ingon niana ang serbisyo sa misyon niining batan-ong lalaki.
“Sa matag komperensya sa misyonaryo ako siyang pangitaon sa wala pa ang mga miting ug mangutana, ‘Elder, kumusta ang paglambo sa imong papa?’
“Ang iyang tubag nga walay pagkausab mao, ‘Walay kalamboan, President, apan ako nasayud nga ang Ginoo motuman sa iyang saad ngari kanako pinaagi kanimo isip akong presidente sa misyon.’ Ang mga adlaw nahimong mga semana ug ang mga semana nahimong mga bulan, ug sa katapusan, duha na lamang ka semana sa wala pa kami mibiya sa natad sa misyon aron mopauli sa panimalay, ako nakadawat og sulat gikan sa amahan niini nga misyonaryo. Gusto nakong ipakigbahin kini kaninyo karon.
“‘Minahal nga Brother Monson:
“‘Ako buot magpasalamat kanimo pag-ayo sa pag-amuma sa akong anak nga lalaki kinsa bag-o lamang nakahuman og misyon sa Canada.
“‘Siya nahimong inspirasyon ngari kanamo.
“‘Ang akong anak nga lalaki gisaaran sa dihang mibiya alang sa iyang misyon nga ako mahimong usa ka miyembro sa Simbahan sa dili pa siya mopauli. Kini nga saad, sa akong pagtuo, gihimo ngadto kaniya pinaagi kanimo, nga wala ako masayud.
“‘Ako malipayong mopahibalo nga ako gibunyagan ngadto sa Simbahan usa ka semana sa wala pa niya mahuman ang iyang misyon. …
“‘… Ang iyang manghud nga lalaki bag-ohay lamang nabunyagan ug nakumpirmahan isip miyembro sa Simbahan.
“‘Tuguti ako sa pagpasalamat kanimo og usab alang sa tanang kalooy ug gugma nga gihatag ngadto sa akong anak nga lalaki pinaagi sa iyang mga kaigsoonan sa natad sa misyon sulod sa duha ka tuig.
“‘Kanimo kanunay nga matinuoron,
“‘Usa ka mapasalamaton nga amahan.’
“Ang mapainubsanong pag-ampo sa hugot nga pagtuo sa makausa natubag na usab” (sa Conference Report, Abr. 1964, 131–32).
Si Thomas B. Marsh nakakuha og pipila ka mga kahanas sa medikal nga paggamit sa mga tanom ug nakatabang sa mga tawo tungod sa iyang kahibalo. Hinoon, ang iyang mas mahinungdanon nga calling mao ang pag-ayo og mga kalag. Adunay daghang narekord nga mga higayon nga si Thomas B. Marsh mihatag sa iyang panahon sa pagtabang sa mga miyembro sa Simbahan nga masulbad ang ilang mga problema.
Bisan tuod ang unang misyon ngadto sa mga Lamanite wala kaayo magmalampuson sa pag-proselyte sa mga American Indian, kini adunay dakong epekto sa nag-unang kasaysayan sa Simbahan. Si Presidente Joseph Fielding Smith mipasabut:
Imahe
President Joseph Fielding Smith
“Ang panaw sa dul-an dos mil kwatro sientos ka kilometro, sa dakong bahin agi sa kamingawan, ug sa kanunay nga dautang panahon, mikabat og mga upat ka bulan. Hinoon, kini mapuslanon kaayo nga panaw, tungod kay daghan ang midawat sa Ebanghelyo sa ilang naagian ug dagko nga mga branch ang natukod sa Kirtland ug sa ubang mga bahin, ug daghang lig-on nga mga tawo ang mipasakop sa Simbahan. Kini ang unang misyonaryo nga biyahe sa kasadpan sa estado sa New York, ug ang resulta niini bililhon kaayo sa kaayohan sa Simbahan” (Church History and Modern Revelation, 2 vols. [1953], 1:150).
Ang pinadayag sa Doktrina ug mga Pakigsaad 32 gitumong ngadto ni Parley P. Pratt ug Ziba Peterson. Ikonsiderar ang pagbasa og kusog sa mosunod nga impormasyon sa kasaysayan aron matabangan ang klase nga makakat-on og dugang kabahin niining duha ka mga lalaki:
Sa ting-init sa 1830, si Parley P. Pratt ug ang iyang asawa, si Thankful, mibiyahe gikan sa ilang panimalay sa Amherst, Ohio, aron mobisita sa mga paryente diha sa estado sa New York. Ang Espiritu Santo midasig ni Parley sa paghunong sa barangay sa Newark, New York, duol sa Palmyra, diin nakakat-on siya mahitungod sa Basahon ni Mormon. Wala madugay misulat siya sa iyang reaksyon sa basahon:
Imahe
Parley P. Pratt
“Mibasa ko sa tibuok adlaw; hasulan ko nga mokaon, wala koy tinguha alang sa pagkaon; hasul pud gani ang pagkatulog pag-abut sa kagabhion, kay mas ganahan ko nga magbasa kay sa matulog.
“Sa akong pagbasa, ang espiritu sa Ginoo diha kanako, ug ako nasayud ug nakasabut nga ang basahon tinuod” (Autobiography of Parley P. Pratt, ed. Parley P. Pratt [1938], 20).
Si Parley mibiyahe ngadto sa Palmyra, diin iyang nahimamat ug gitudloan ni Hyrum Smith. Sa wala madugay, si Hyrum ug Parley mipanaw ngadto sa Fayette, New York, aron makighimamat sa mga miyembro sa nagkadako nga branch sa Simbahan. Si Parley nabunyagan ug gi-orden nga elder ni Oliver Cowdery niadtong Septyembre 1830.
Gamay ra ang nahibaloan mahitungod sa pagkakabig ni Ziba Peterson. Hinoon nasayud kita nga gibunyagan siya ni Oliver Cowdery niadtong Abril 1830 ug gi-orden nga elder pagka-Hunyo sa samang tuig.
Ang mosunod nga istorya maoy usa ka ehemplo kon sa unsang paagi ang Ginoo mipanalangin ni Parley P. Pratt sa iyang pagtuman sa iyang misyon:
Otsenta ka kilometro sa kasadpan sa Kirtland, si Parley gidakop tungod sa usa ka “walay hinungdan nga akusasyon,” gihusay, ug “gihukman nga mabilanggo” o mobayad og multa (Autobiography of Parley P. Pratt, ed. Parley P. Pratt [1938], 36). Tungod kay dili siya makabayad, gipriso si Parley og usa ka gabii sa pampubliko nga balay abutanan [inn]. Pagkasunod buntag, gibisitahan siya kadiyot sa iyang mga kauban ug miawhag kanila sa pagpadayon sa ilang panaw, misaad nga moapas ra siya kanila sa dili madugay. Si Parley mi-report: “Human milingkod duol sa kalayo nga gibantayan sa usa ka opisyal, mihangyo ko nga mogawas. Migawas ko ngadto sa plaza nga giubanan niya. Miingon ko, ‘Mr. Peabody, maayo ba ka sa lumba dagan?’ ‘Dili,’ miingon siya, ‘ apan ang akong dakong bull dog maayo, ug kini siya gibansay sa pagtabang kanako sa akong trabaho niining pipila na ka mga tuig; iyang tumbahon ang si bisan kinsang tawo sumala sa akong mando.’ ‘Nan, Mr. Peabody, gipugos ko nimo nga mouban og lakaw og usa ka milya, miuban ko nimo og duha ka milya. Gihatagan ko nimo og oportunidad sa pagsangyaw, pag-awit, ug gihatagan usab ko nimo og kapuy-an ug pamahaw. Mopadayon na ako karon sa akong biyahe; kon maayo ka sa lumba mahimo ka nga mokuyog nako. Salamat sa tanan nimong kaayo—maayong adlaw, sir.’
“Gisugdan dayon nako ang akong paglakaw, samtang nagbarug siya nga nahingangha ug wala gayud makahimo sa paglakang. … Wala siya maulii sa iyang pagkahingangha nga igo nga makagukod hangtud nga nakadagan na ko og, tingali, mga dul-an duha ka gatus ka metros. … Karon migukod na siya nga nagpanawag kanako, ug nagsinggit sa iyang iro sa pagsakmit kanako. Ang iro, nga usa sa pinakadako nga sukad akong nakita, duol na kaayo sa akong luyo uban sa tanan niyang kabangis; ang opisyal nabiyaan apan naggukod gihapon, nagpakpak sa iyang kamot ug nagsinggit, ‘stu-boy, stu-boy—dakpa siya—bantay—guniti siya —tumbaha siya,’ ug nagtudlo sa direksyon nga akong gidaganan. Ang iro paspas nga nakaapas kanako, ug molukso na unta kanako,sa diha nga, kalit sama sa kilat, nakahunahuna ko, nga tabangan ang opisyal, sa pagpadagan sa iro uban sa tanang kabangis ngadto sa kakahoyan nga unahan og gamay kanako. Mitudlo ko paingon didto nga direksyon, mipakpak sa akong mga kamot, ug misinggit nga gisundog ang opisyal. Ang iro milabay kanako sa gidobleng kapaspason padulong sa kakahoyan; nga giawhag sa opisyal ug nako, ug kaming duha nagdagan sa sama nga direksyon.”
Kay nakalingkawas gikan sa iro ug sa opisyal, si Elder Pratt nakaapas sa iyang mga kauban agi sa laing agianan. Nahibaloan wala madugay ni Parley nga si Simeon Carter, kinsa iyang gibilinan og usa ka Basahon ni Mormon, lakip sa mga saisyenta ka tawo, mipasakop sa Simbahan (tan-awa sa Autobiography of Parley P. Pratt, 38–39).